මොර්මන්ගේ පොත—අපගේ ගමනේ අපරිමිත වස්තුවක්

ඇල්මා සහ මොසායාගේ පුත්‍රයන් වගේ, අපිත් “එනම් [අපට] දෙවියන්වහන්සේගේ වචනය දැන ගැනීමට හැකි වන පිණිස” සහ සත්‍යයෙන් ශක්තිමත් වෙන්නට, ශුද්ධලියවිලි උද්‍යෝගයෙන් [සෙවිය] යුතු වෙනවා (ඇල්මා 17:2).

ජෝර්ජියා ඇට්ලන්ටා ධර්මදූත සේවයේ ධර්මදූත නායකයන් ලෙස සේවය කරන අතරතුර, මගේ බිරිඳ සහ මම සෑම ධර්මදූතවරයෙකුටම දිනපතා අවම වශයෙන් මිනිත්තු 30 ක්වත් මොර්මන්ගේ පොත අධ්‍යයනය කිරීමට දිරිමත් කළා. ඒ කැපවීම අපේ ඇදහිල්ල වැඩි කළ අතර ප්‍රාතිහාර්යයන් සෙවීමට සහ අපේක්ෂා කිරීමට අපට උපකාර කළා.

ධර්මදූත සේවයෙන් පසු අපට දිනපතා ශුද්ධලියවිලි අධ්‍යයනය සඳහා එතරම්ම කාලයක් නොතිබෙන්න පුළුවන්, නමුත් ඔබ සෑම දිනකම යාච්ඤා පූර්වකව මොර්මන්ගේ පොත අධ්‍යයනය කිරීමට අවංකවම ප්‍රමුඛත්වය දෙන්නේ නම්, ඔබට ස්වාමින්වහන්සේ සහ උන්වහන්සේගේ පොරොන්දු කෙරෙහි වැඩි අධ්‍යාත්මික ශක්තියක් සහ විශ්වාසයක් ලැබෙනු ඇතැයි මම පොරොන්දු වෙනවා.

නීෆායි අපට මෙසේ ඉගැන්වූවා, “ක්‍රිස්තුස්වහන්සේගේ වචනය භුක්ති විඳපන්න; මක්නිසාද බලන්න, ක්‍රිස්තුස්වහන්සේගේ වචනය නුඹලා කළයුතු සියල්ල නුඹලාට කියනු ලබන්නේය”(2 නීෆායි 32:3).

භුක්ති විඳීම යන්නෙන් කියවීමට වඩා වැඩි යමක් අදහස් කරනවා—එහි තේරුම රසවිඳීම, මෙනෙහි කිරීම සහ අදාළ කර ගැනීමයි. ඔබ මොර්මන්ගේ පොත අධ්‍යයනය කරන විට, ඔබේ ශුද්ධලියවිලි අධ්‍යයනය වඩාත් අර්ථවත් කිරීමට ක්‍රම සලකා බලන්න. උදාහරණයක් ලෙස:

• ශුභාරංචි පුස්තකාල යෙදුමේ ඇති අධ්‍යයන ආධාරක භාවිත කරන්න.

• දෙවියන්වහන්සේගේ සැලැස්ම තේරුම් ගැනීමට සහ අපගේ ස්වර්ගික පියාණන්වහන්සේ සමඟ ගිවිසුම් ඇති කර ගැනීමට සහ ඒවා පවත්වා ගැනීමට අපව මෙහෙයවන සදාකාලික සත්‍යයන් හඳුනා ගන්න.

• ඔබේ අධ්‍යයනයේ දී ඔබ ඉගෙන ගත් දේ ආරක්ෂා කිරීම සඳහා වැදගත් වාක්‍ය ඛණ්ඩ ඉස්මතු කර ඔබේ හැඟීම් සටහන් කරගන්න.

අපගේ ආත්මයේ ප්‍රශ්නවලට පිළිතුරු දීමට මොර්මන්ගේ පොතට බලය තිබෙනවා. නීෆායි පැවසූ පරිදි, “ඒවා අපගේ ලාභය හා ඉගෙනීම සඳහා වන පිණිස, අපි සියලු ශුද්ධලියවිලි අපට අදාළ කර ගත යුතු වෙනවා” (1 නීෆායි 19:23).

ක්‍රිස්තුස්වහන්සේගේ වචන භුක්ති විඳින විට, ඒවා එළිදරව්වට දොර විවර කර අපගේ ජීවිතයේ විවිධ තත්වයන් තුළ උන්වහන්සේ වෙත සමීප වීමට අප කළ යුතු දේ අපට පෙන්වනවා.

ජීවන වෘක්ෂයේ ඵලය තම පවුලේ අය සමඟ බෙදා ගැනීමට ලීහායි කැමති වූවාක් මෙන් (බලන්න 1 නීෆායි 8:12), අපි මොර්මන්ගේ පොත පිළිබඳ සාක්ෂියක් ලබා ගන්නා විට, යේසුස් ක්‍රිස්තුස්වහන්සේගේ ශුභාරංචිය දැන ගැනීමෙන් ලැබෙන ප්‍රීතිය බෙදා ගැනීමට අපි ආශාවක් වර්ධනය කරගමු.

මෙම සැසියට අප සමඟ සහභාගී වන අපගේ ධර්මදූතවරියන්ගෙන් කෙනෙකු වන බෙන්සන් සහෝදරිය, ඇගේ තරුණ සහෝදරයාට උපකාර කිරීමට ඇති ඇගේ ආශාව මා සමඟ බෙදාගත්තා. ඒ කාලයේ දී, ඔහු විද්‍යාලයට යාමට සූදානම් වෙමින් සිටි අතර, ධර්මදූත සේවයක නිරත වීම ගැන ඔහුට විශ්වාසයක් තිබුණේ නැහැ. බෙන්සන් සහෝදරියට ඇගේ ධර්මදූත සේවයේ මුල් මාස හතර තුළ මොර්මන්ගේ පොත කියවා, ඇගේ ප්‍රියතම පද සලකුණු කර, පසුව එම පිටපත ඇගේ සහෝදරයාට යැවීමට ආරාධනා කරන්නට මට අවශ්‍ය වුණා.

බෙන්සන් සහෝදරිය මොර්මන්ගේ පොතේ සලකුණු කළ පිටපත යවා සෑම රාත්‍රියකම එය කියවීමට ඇගේ සහෝදරයාට ආරාධනා කළා. පසුව ඇය මා සමඟ මෙසේ බෙදාගත්තා: “මගේ ධර්මදූත සේවයට පෙර, මගේ සහෝදරයාට පූර්ණ කාලීන ධර්මදූත සේවයක් කිරීමට අවශ්‍ය දැයි විශ්වාසයක් තිබුණේ නැහැ. කාලයත් සමඟ, ඔහු මොර්මන්ගේ පොත කියවන විට, ඔහු තම ජීවිතයේ ප්‍රීතිය වැඩි වන බව සොයා ගත් අතර ධර්මදූත සේවයක නිරත වීම ගැන සලකා බැලීමට පටන් ගත්තා.

බෙන්සන් සහෝදරිය ඇගේ ධර්මදූත සේවය සම්පූර්ණ කිරීමට සති දෙකකට පෙර, ඇගේ සහෝදරයා ඔහුගේ ධර්මදූත සේවයේ කැඳවීම ලැබුණා. ඔහු දැන් මෙක්සිකෝවේ ටක්ස්ට්ලා ගුටියරෙස්හි ධර්මදූත සේවයේ යෙදෙනවා. මොර්මන්ගේ පොත තුළින්, වැඩිහිටි බෙන්සන් ඔහුගේ ජීවිතය අධ්‍යාත්මික පැහැදිලිකමකින් දැකීමට සමත් වූ අතර, එය ඔහුව ස්වාමින්වහන්සේට සේවය කිරීමටත්, දේවල් සාර්ථක වනු ඇතැයි විශ්වාස කිරීමටත් හේතු වුණා. ක්‍රිස්තුස්වහන්සේගේ වචනවල බලයෙන් බලපෑමට ලක් වූ—එම තීරණය ආශ්චර්යයක්.

මගේ ආදරණීය සහෝදර සහෝදරියනි, මොර්මන්ගේ පොත පිළිබඳ ඔබේ අධ්‍යයනය ගැඹුරු කරන ලෙස මම ඔබ සැමව දිරිගන්වනවා. මොර්මන්ගේ පොතේ ඇති ක්‍රිස්තුස්වහන්සේගේ වචන අප භුක්ති විඳින විට, ආත්මයාණන්වහන්සේ සදාකාලික සත්‍යයන් තේරුම් ගැනීමටත්, ස්වාමින්වහන්සේ උන්වහන්සේගේ පණිවිඩය අසන්නට සූදානම් කර ඇති අයට අපගේ සාක්ෂි ස්ථිර විශ්වාසයෙන් බෙදා ගැනීමටත් අපට උපකාර කරන බව මම දන්නවා. ස්වාමින්වහන්සේ මෙසේ ඉගැන්වූවා: “මාගේ තෝරාගත්තා වූ අය මාගේ හඬ අසා, තවද ඔවුන්ගේ හදවත් දැඩිකර නොගන්නෝය” (දහම සහ ගිවිසුම් 29:7). දෙවියන්වහන්සේගෙන් ඇදහිල්ලෙන් ඉල්ලන අයට ශුද්ධාත්මයාණන්ගේ බලයෙන් මොර්මන්ගේ පොතේ සත්‍යය හා දිව්‍යමයභාවය පිළිබඳ සාක්ෂියක් ලැබෙනු ඇති බවට මම සාක්ෂි දරනවා. මේ ගැන මම සාක්ෂි දරන්නේ යේසුස් ක්‍රිස්තුස්වහන්සේගේ නාමයෙන්, ආමෙන්.