යේසුස් ක්‍රිස්තුස්වහන්සේගේ පවුල්-කේන්ද්‍රීය ශුභාරංචිය

යේසුස් ක්‍රිස්තුස්වහන්සේගේ පසුදවස්වල ශුද්ධවන්තයන්ගෙන් යුත් සභාවේ දහම පවුල කේන්ද්‍ර කරගෙන තිබෙනවා. පවුල පිළිබඳ අපගේ මූලධර්මයට අත්‍යවශ්‍ය වන්නේ දේවමාළිගාවයි. එහිදී ලැබුණු නියෝග අපට සදාකාලික පවුල් ලෙස අපගේ ස්වර්ගික පියාණන්වහන්සේගේ අභිමුඛයට නැවත පැමිණීමට හැකියාව ලබා දෙනවා.

2025 අප්‍රියෙල් ප්‍රධාන සම්මන්ත්‍රණය වන විට, සභාපති රසල් එම්. නෙල්සන් නව දේවමාළිගා 200 ක් ඉදිකිරීම නිවේදනය කර තිබුණා. සෑම ප්‍රධාන සම්මන්ත්‍රණයකම අවසානයේ නව දේවමාළිගා නිවේදනය කිරීමට ඔහු ප්‍රිය කළ අතර, අපි සියල්ලෝම ඔහු සමඟ ප්‍රීති වුණා. කෙසේ වෙතත්, සැලසුම් කිරීමේ සහ ඉදිකිරීම්වල මුල් අවධියේ තිබෙන විශාල දේවමාළිගා සංඛ්‍යාවක් දැන් පවතින බැවින්, නව දේවමාළිගා නිවේදනය කිරීම මන්දගාමී කිරීම සුදුසුයි. එමනිසා, ප්‍රේරිතවරුන් දොළොස්දෙනාගේ ගණපූරණයේ අනුමැතිය ඇතිව, මෙම සම්මන්ත්‍රණයේ දී අපි කිසිඳු නව දේවමාළිගාවක් නිවේදනය කරන්නේ නැහැ. නව දේවමාළිගා ඉදිකිරීම නිවේදනය කළ යුත්තේ කවදා ද සහ කොතැන ද යන්න ඇතුළුව, ලොව පුරා සිටින සභා සාමාජිකයින්ට දේවමාළිගාවේ නියෝග ලබා දීමේ දී අපි දැන් ඉදිරියට යමු.

මම දැන් ඉදිරිපත් කළ මගේ කතාවේ කොටස ලියා ඇත්තේ අපගේ ආදරණීය සභාපති රසල් එම්. නෙල්සන්ගේ අභාවයෙන් පසුවයි. දැන් පහත දැක්වෙන්නේ සති කිහිපයකට පෙර ලියා අනුමත කරන ලද දේවල් නමුත්, එය තවමත් ස්වාමින්වහන්සේ විසින් දේවානුභාවයෙන් ලියන ලද මගේ ඉගැන්වීම් නියෝජනය කරනවා.

හරියටම වසර 30 කට පෙර ප්‍රකාශයට පත් කරන ලද පවුල් ප්‍රකාශනය, “පවුල දෙවියන්වහන්සේ විසින් නියම කරන ලද්දක්” බවත් “උන්වහන්සේගේ දරුවන්ගේ සදාකාලික ඉරණම සඳහා මැවුම්කරුගේ සැලැස්මට කේන්ද්‍රීය” බවත් ප්‍රකාශ කරනවා. එය මෙසේ ද ප්‍රකාශ කරනවා, “දෙවියන්වහන්සේ තම දරුවන්ට, බෝ වී වැඩෙමින් පොළොව පූර්ණ කරන්නට දුන් ආඥාව තවමත් ක්‍රියාත්මකයි.” ඒ වගේම, “දෙවියන්වහන්සේ ආඥා කර ඇති ලෙස ප්‍රජනන බලයන් ක්‍රියාත්මක කළ යුත්තේ ස්වාමිපුරුෂයා සහ භාර්යාව ලෙස නීත්‍යානුකූලව විවාහ වූ පුරුෂයා සහ ස්ත්‍රිය අතර පමණක් බව අපි තවදුරටත් ප්‍රකාශ කරනවා” ඒ කාලේ වගේ–වැඩිහිටි රසල් එම්. නෙල්සන් බ්‍රිගම් යන්ග් විශ්ව විද්‍යාල ප්‍රේක්ෂකයින්ට මෙසේ ඉගැන්නුවා, පවුල “දෙවියන්වහන්සේගේ සැලැස්මට වැදගත්. … ඇත්ත වශයෙන්ම, සැලැස්මේ අරමුණක් තමයි පවුල උත්කර්ෂවත් කිරීම.”

යේසුස් ක්‍රිස්තුස්වහන්සේගේ සභාව පවුල් කේන්ද්‍ර කරගත් සභාවක් කියලා සමහර වෙලාවට හඳුන්වනවා. ඒක එහෙමයි! දෙවියන්වහන්සේ සමඟ අපගේ සම්බන්ධතාවය සහ අපගේ ලෞකික ජීවිතයේ අරමුණ පවුල යන වචන වලින් පැහැදිලි කර තිබෙනවා. යේසුස් ක්‍රිස්තුස්වහන්සේගේ ශුභාරංචිය අපගේ ස්වර්ගික පියාණන්වහන්සේගේ ආත්මික දරුවන්ගේ ප්‍රයෝජනය සඳහා වූ සැලැස්මයි. ශුභාරංචි සැලැස්ම මුලින් අපට ඉගැන්වූයේ සදාකාලික පවුලක මන්ත්‍රණ සභාවක දී බවත්, එය අපගේ ලෞකික පවුල් හරහා ක්‍රියාත්මක කරන බවත්, එහි අපේක්ෂිත ඉරණම සදාකාලික පවුල්වල දෙවියන්වහන්සේගේ දරුවන් උත්කර්ෂවත් කිරීම බවත් අපට නිසැක වශයෙන්ම පවසන්න පුළුවන්.

එම මූලධර්ම සන්දර්භය තිබියදීත්, විරුද්ධත්වයක් තිබෙනවා. එක්සත් ජනපදයේ අපි විවාහ සහ දරු ප්‍රසූතියේ පිරිහීමකින් පීඩා විඳිමින් සිටිනවා. ආසන්න වශයෙන් වසර සියයක් තිස්සේ විවාහක ජෝඩු විසින් නායකත්වය දරන පවුල් අනුපාතය අඩු වී ඇති අතර උපත් අනුපාතයද අඩු වී තිබෙනවා. අපගේ සභාවේ සාමාජිකයන්ගේ විවාහ සහ උපත් අනුපාත බොහෝ සෙයින් ධනාත්මක වන නමුත් ඒවා ද සැලකිය යුතු ලෙස පහත වැටී තිබෙනවා. පසුදවස්වල ශුද්ධවන්තයින් විවාහයේ අරමුණ සහ දරුවන්ගේ වටිනාකම පිළිබඳ අවබෝධය නැති කර නොගෙන සිටීම අත්‍යවශ්‍ය වෙනවා. අපි උත්සාහ කරන අනාගතය තමයි ඒක. “උත්කර්ෂවත් වීම පවුලේ කටයුත්තක්,” ලෙස සභාපති නෙල්සන් අපට උගන්වා තිබෙනවා. “පවුල් උත්කර්ෂවත් කරන්න පුළුවන් යේසුස් ක්‍රිස්තුස්වහන්සේගේ ශුභාරංචියේ ගැලවීමේ නියෝග තුළින් විතරයි.”

ඓතිහාසික හේතූන් මත රට පුරා විවාහ සහ දරු ප්‍රසූතියේ පහත වැටීම තේරුම් ගත හැකි නමුත්, පසුදවස්වල ශුද්ධවන්තයන්—එම ප්‍රවණතා—අනුගමනය නොකර වටිනාකම් සහ භාවිතයන් වැඩි දියුණු කළ යුතු වෙනවා.

අවුරුදු 80කට කලින් මගේ ළමා කාලයේ දී, මම මගේ සීයාගෙයි ආච්චිගෙයි ගොවිපළේ ජීවත් වෙනකොට, දිවා කාලයේ සිදු වූ හැම දෙයක්ම වගේ පවුලේ මඟ පෙන්වීම යටතේ සිදු වුණු පරිසරයක පැවතුණා. පවුලේ කටයුතුවලින් අවධානය වෙනතකට යොමු කිරීමට රූපවාහිනියක් හෝ වෙනත් ඉලෙක්ට්‍රොනික උපකරණ තිබුණේ නැහැ. ඊට හාත්පසින්ම වෙනස්ව, අද නාගරික සමාජයේ පවුල් කේන්ද්‍රීය ක්‍රියාකාරකම්වල නියැලෙන සාමාජිකයින් සංඛ්‍යාව ඉතා අඩුයි. නාගරික ජීවිතය සහ නවීන ප්‍රවාහනය, සංවිධානාත්මක විනෝදාස්වාදය සහ අධිවේගී සන්නිවේදනය නිසා යෞවනයින්ට ඔවුන්ගේ නිවෙස්, නිදා ගැනීමට සහ ඉඳහිට ආහාර ගැනීමට මෙන්ම ඔවුන්ගේ ක්‍රියාකාරකම් පිළිබඳව දෙමාපියන්ගේ මඟ පෙන්වීම ගොඩක් අඩු නවාතැන් ලෙස සැලකීම පහසු වී තිබෙනවා.

සභාවේ වත්මන් සාමාජිකයින් බොහෝ දෙනෙකුගේ ජීවනෝපාය මාර්ග නිසා දෙමාපියන් ලෙස ඔවුන්ගේ බලපෑම් ද අඩු වී තිබෙනවා. අතීතයේ දී, පවුල් එක්සත් කළ ශ්‍රේෂ්ඨ බලපෑම්වලින් එකක් වූයේ වනාන්තරය එළි පෙහෙලි කිරීම හෝ ජීවිකාව උපයා ගැනීම වැනි—පොදු ඉලක්කයක් හඹා යාම සඳහා එකට අරගල කිරීමේ අත්දැකීමයි. පවුල ආර්ථික නිෂ්පාදන ඒකකයක් ලෙස සංවිධානාත්මකව පවත්වාගෙන යනු ලැබුවා. අද වන විට බොහෝ පවුල් ආර්ථික පරිභෝජන ඒකක වන අතර, ඒ සඳහා ඉහළ මට්ටමේ පවුල් සංවිධානයක් සහ සහයෝගීතාවයක් අවශ්‍ය වෙන්නෙ නැහැ.

දෙමාපියන්ගේ බලපෑම් අඩු වන විට, සදාකාලිකවම අපගේ පවුලේ ඉරණම සඳහා සූදානම් වීමට තම දරුවන්ට ඉගැන්වීමට දෙවියන්වහන්සේ දුන් වගකීමක් පසුදවස්වල ශුද්ධවන්තයන්ට තවමත් තිබෙනවා (දහම සහ ගිවිසුම් 68:25). අපේ පවුල් සියල්ලම සාම්ප්‍රදායික නොවන විට, අපගෙන් බොහෝ දෙනෙකුට මෙය කිරීමට සිදු වෙනවා. දික්කසාදය, මරණය සහ වෙන්වීම යථාර්ථයන්. මම හැදී වැඩුණු පවුල තුළ මම එය අත්වින්ඳා.

මට අවුරුදු හතේ දී මගේ පියා මැරුණා, ඒ නිසා මගේ මල්ලිවයි නංගිවයි මාවයි වැන්දඹු මවක් විසින් ඇති දැඩි කළා. ඉතාමත් දුෂ්කර අවස්ථාවන්හි දී, ඇය ඉදිරියටම ගියා. ඇය තනිව හා බිඳී සිටියා, නමුත් ස්වාමින්වහන්සේගේ උපකාරයෙන්, නැවත පිහිටුවන ලද සභාවේ මූලධර්මය පිළිබඳ ඇගේ බලවත් ඉගැන්වීම අපට මගපෙන්නුවා. ඇගේ දරුවන් ඇති දැඩි කිරීමේ දී ඇය ස්වර්ගීය උපකාරය ඉල්ලා කොතරම් යාච්ඤා කළාද, ඇයට ආශීර්වාද ලැබුණා! අපි හැදී වැඩුණේ අපේ මියගිය පියා සැමවිටම සිටිනවා වගේ දැනුණු ප්‍රීතිමත් නිවසකයි. අපිට පියෙක් හිටියා, ඇයට සැමියෙක් හිටියා, එයාලගේ දේවමාළිගා විවාහය නිසා අපි හැමදාම පවුලක් විදිහට ඉන්නවා. අපේ පියා ස්වාමින්වහන්සේ ඔහුට වෙනත් කාර්යයකට කතා කළ නිසා තාවකාලිකව විදේශගතව සිටියා කියලා ඇය අපිට ඉගැන්නුවා.

බොහෝ පවුල් එතරම් සතුටින් නොසිටින බව මම දන්නා නමුත් සෑම තනි මවකටම ස්වර්ගික පියාණන්වහන්සේගේ ප්‍රේමය සහ දේවමාළිගාවේ විවාහයක අවසාන ආශිර්වාද ගැන උගන්වන්න පුළුවන්. ඔබටත් මෙය කරන්න පුළුවන්! ස්වර්ගික පියාණන්වහන්සේගේ සැලැස්ම සෑම කෙනෙකුටම මෙම හැකියාව සහතික කරනවා. දේවමාළිගාවේ විවාහයට සහ සදාකාලික පවුලක් ලෙස මුද්‍රා තැබීමෙන් ලැබෙන අනාගත ආශිර්වාදවලට අපි සෑම කෙනෙක්ම කෘතඥ වෙනවා. මගේ මව මෙන්, දෙවියන්වහන්සේ “නුඹගේ පීඩාවන් නුඹගේ යහපත සඳහා කැප කරන” (2 නීෆායි 2:2) බවට ලීහායි ඔහුගේ පුත් ජේකබ්ට දුන් පොරොන්දුව උපුටා දැක්වීමට අපි කැමතියි. එය සම්පූර්ණ හෝ දැනට අසම්පූර්ණ සෑම පසුදවස්වල ශුද්ධවන්තයින්ගේ පවුලකටම අදාළ වෙනවා. අපි පවුලේ සභාවක්.

අපගේ දහම සහ සදාකාලික පවුල් පිළිබඳ අපගේ විශ්වාසය අපව ශක්තිමත් කර බැඳ තබනවා. අපි දරුවන් ලෙස යූටා හි පේසන් අසල ඔහුගේ ගොවිපළේ ජීවත් වූ විට, මගේ මවගේ පැත්තේ සීයා හැරිස් දුන් පොරොන්දුව මට කිසිදා අමතක වන්නේ නෑ. මගේ පියා දුර ඈත කොලරාඩෝවේ ඩෙන්වර්හි දී මිය ගිය බවට ඛේදජනක පුවත ඔහු මට පැවසුවා. මම නිදන කාමරයට දුවගෙන ගිහින් ඇඳ ළඟ දණ ගහගෙන හදවතින්ම අඬ අඬා හිටියා. සීයා මා පිටුපසින් ඇවිත් මා ළඟින් දණ ගහගෙන, “මම ඔබේ පියා වෙන්නම්” කියා පැවසුවා. පවුලකට සාමාජිකයෙකු අහිමි වූ විට හෝ අතුරුදහන් වූ විට ඇති වන හිඩැස් පිරවීමට ආච්චිලා සීයලාට කළ හැකි දේ පිළිබඳ එම මෘදු පොරොන්දුව ප්‍රබල උදාහරණයක්.

දෙමව්පියන්, තනිකඩ හෝ විවාහක සහ දරුවන් සඳහා එම භූමිකාව ඉටු කරන ආච්චිලා සීයලා වැනි අය තමයි—ප්‍රධාන ගුරුවරුන්. ඔවුන්ගේ වඩාත්ම ඵලදායී ඉගැන්වීම කරන්නේ ආදර්ශයෙන්. විවාහයේ සහ දරුවන්ගේ වැදගත්කම, ජීවිතයේ අරමුණ සහ ප්‍රීතියේ සැබෑ මූලාශ්‍රය වැනි සදාකාලික වටිනාකම් ප්‍රදර්ශනය කිරීමට සහ ඉගෙන ගැනීමට පවුල් කවය ඉතා හොඳ තැනක්. කරුණාව, සමාව දීම, ස්වයං-පාලනය සහ අධ්‍යාපනයේ වටිනාකම සහ අවංකව වැඩ කිරීම වැනි ජීවිතයේ අනෙකුත් අත්‍යවශ්‍ය පාඩම් ඉගෙන ගැනීමටද එය හොඳම ස්ථානයයි.

ඇත්ත වශයෙන්ම, සභාවේ බොහෝ සාමාජිකයින්ට ශුභාරංචි වටිනාකම් සහ අපේක්ෂාවන් වැළඳ නොගන්නා ආදරණීය පවුලේ සාමාජිකයන් සිටිනවා. එවැනි සාමාජිකයින්ට අපගේ ආදරය සහ ඉවසීම අවශ්‍ය වෙනවා. එකිනෙකා සමඟ සම්බන්ධ වීමේ දී, අප සොයන පරිපූර්ණත්වය ලෞකිකත්වයේ ආතති සහගත තත්වයන්ට පමණක් සීමා නොවන බව අප මතක තබා ගත යුතු වෙනවා. දහම සහ ගිවිසුම් 138:57–59 හි ඇති ශ්‍රේෂ්ඨ ඉගැන්වීම, ලෞකිකත්වයෙන් පසුව එන ආත්මික ලෝකය තුළ පසුතැවීම සහ අධ්‍යාත්මික වර්ධනය දිගටම පැවතිය හැකි බව අපට සහතික කරනවා. වඩාත් වැදගත් දෙය නම්, පවුල් එකිනෙකා ශක්තිමත් කිරීම සඳහා එක්සත් වන විට, යේසුස් ක්‍රිස්තුස්වහන්සේගේ මහිමාන්විත හා ගැලවීමේ වන්දිගෙවීම නිසා, ලෞකික ජීවිතයේ අප සියලු දෙනා අත්විඳින පාප සහ නොවැළැක්විය හැකි අඩුපාඩු පසුතැවීම තුළින් සමාව ලබා ගත හැකි බව අප සැම දෙනාම මතක තබා ගත යුතු වෙනවා.

අපගේ ගැලවුම්කරුවාණන් වන යේසුස් ක්‍රිස්තුස්වහන්සේ අපගේ පරම ආදර්ශයයි. උන්වහන්සේගේ ඉගැන්වීම් සහ ආත්ම පරිත්‍යාගය අනුව අපගේ ජීවිත හැඩගස්වා ගන්නේ නම් අපට ආශීර්වාද ලැබෙනවා. ක්‍රිස්තුස්වහන්සේ අනුගමනය කිරීම සහ එකිනෙකාට සේවය කිරීම, දැන් බහුලව දක්නට ලැබෙන ආත්මාර්ථකාමිත්වය සහ පුද්ගලවාදය සඳහා හොඳම පිළියමයි.

ශුභාරංචි මූලධර්මවලට අමතරව තම දරුවන්ට ප්‍රායෝගික දැනුම ඉගැන්වීමේ යුතුකමක් දෙමාපියන්ටත් තිබෙනවා. පවුල් එකට එක්ව අර්ථවත් දේවල් කරන විට ඔවුන් එක්සත් වෙනවා. පවුල් උද්‍යාන පවුල් සබඳතා ගොඩනඟනවා. ප්‍රීතිමත් පවුල් අත්දැකීම් පවුල් සබඳතා ශක්තිමත් කරනවා. කඳවුරු බැඳීම, ක්‍රීඩා ක්‍රියාකාරකම් සහ අනෙකුත් විනෝදාස්වාදයන් පවුල් බැඳීමට විශේෂයෙන් වටිනවා. මුතුන් මිත්තන් සිහිපත් කිරීම සඳහා පවුල් විසින් පවුල් රැස්වීම් සංවිධානය කළ යුතු අතර, එය දේවමාළිගාවට මඟ පාදනවා.

දෙමව්පියන් තම දරුවන්ට ගෙවත්තේ සහ නිවසේ වැඩ කිරීම ඇතුළුව ජීවත්වීමේ මූලික කුසලතා පිළිබඳව අධ්‍යාපනය ලබා දිය යුතු වෙනවා භාෂා ඉගෙනීම ධර්මදූත සේවයට සහ නූතන ජීවිතයට ප්‍රයෝජනවත් සූදානමක්. මෙම විෂයයන් හි ගුරුවරුන් වන්නේ දෙමාපියන්, ආච්චිලා සීයලා හෝ විස්තෘත පවුලේ සාමාජිකයන් වෙන්න පුළුවන්. පවුලට සහ එහි සාමාජිකයින්ට බලපාන සියලු කාරණා සම්බන්ධයෙන් කණ්ඩායමක් ලෙස ඉගෙන ගෙන එකට උපදෙස් දෙන විට පවුල් සමෘද්ධිමත් වෙනවා.

“නමුත් අපට ඒ කිසිවකට වෙලාවක් නැහැ” කියා සමහරු කියන්න පුළුවන්. සැබවින්ම වටින දේ කිරීමට කාලය සොයා ගැනීමට, බොහෝ දෙමව්පියන්ට ඔවුන්ගේ තාක්ෂණයන් අක්‍රිය කළහොත් තම පවුලට සක්‍රිය කළ හැකි බව පෙනී යයි. දෙමව්පියෙනි, මතක තියාගන්න, ඒ දරුවන්ට ඇත්තටම රාත්‍රී ආහාරය සඳහා අවශ්‍ය වන්නේ ඔබ සමඟ කාලය ගත කරන එකයි.

පවුල් එක්ව යාච්ඤා කරනවා නම්, රාත්‍රියේ සහ උදෑසන දණ ගසා ආශීර්වාද සඳහා ස්තුති කිරීමට සහ පොදු ගැටළු සම්බන්ධයෙන් යාච්ඤා කරනවා නම්, ඔවුන්ට මහත් ආශීර්වාද ලැබෙනවා. සභාවේ සේවාවන්හි දී සහ අනෙකුත් භක්තිමත් අවස්ථාවන්හි දී පවුල් එක්ව නමස්කාර කරන විටත් ඔවුන් ආශීර්වාද ලබනවා. පවුල් සබඳතා ශක්තිමත් වන්නේ පවුල් කතාන්දර, පවුල් සම්ප්‍රදායන් නිර්මාණය කිරීම සහ පූජනීය අත්දැකීම් බෙදා ගැනීමෙනුයි. සභාපති ස්පෙන්සර් ඩබ්ලිව්. කිම්බල් අපට මෙසේ මතක් කළා “අපගේම ජීවිතවලින් සහ අපගේ මුතුන් මිත්තන්ගේ ජීවිතවලින් ආනුභාවයක් ලැබූ කතන්දර … බලවත් ඉගැන්වීමේ මෙවලම් වේ.” ඒවා බොහෝ විට අපට සහ අපගේ අනාගත පරම්පරාවට ආනුභාවයේ හොඳම මූලාශ්‍ර වෙනවා.

අපගේ සදාකාලික පියාණන් වන දෙවියන්වහන්සේගේ එකම පුත්‍රයාණන් වන ස්වාමින් වන යේසුස් ක්‍රිස්තුස්වහන්සේ ගැන මම සාක්ෂි දරනවා. ස්වර්ගික පවුල් නැවත එක්වීමකට මඟ පෙන්වන ගිවිසුම් මාර්ගය අනුගමනය කිරීමට උන්වහන්සේ අපට ආරාධනා කරනවා. කර්ට්ලන්ඩ් දේවමාළිගාවේ නැවත පිහිටුවන ලද යතුරු මගින් මෙහෙයවනු ලබන පූජකත්වයේ මුද්‍රා තැබීමේ බලයන්, පවුල් සදාකාලිකවම එකට ගෙන එනවා (බලන්න දහම සහ ගිවිසුම් 110:13–16). ලොව පුරා වැඩි වෙමින් පවතින ස්වාමින්වහන්සේගේ දේවමාළිගා ගණනාවක ඒවා දැනට ක්‍රියාත්මක වෙමින් පවතිනවා. මේක ඇත්ත. අපි එහි කොටස්කරුවන් වෙමු, මම යාච්ඤා කරනවා, යේසුස් ක්‍රිස්තුස්වහන්සේගේ නාමයෙන්, ආමෙන්.