ඔබ ඇත්තෙන්ම කවුදැයි කියා දැනගන්න
අපි අපේ ගෝලත්වයේ මාවතේ කොතැනක සිටියත්, අපි ඇත්තටම කවුදැයි කියා හොඳින් තේරුම් ගත්තොත් අපේ ජීවිත මූලික වශයෙන් වෙනස් වේවි.
වසර කිහිපයකට පෙර අපේ දියණියට ඇගේ ධර්මදූත මෙහෙවරේ සිටිය දී ගැඹුරු අත්දැකීමක් ලැබුණා. ඇයගේ අනුමැතිය ඇතිව, ඇය ඒ සතියේ අපට ලියූ දෙයින් උපුටා ගත් කොටසක් මම බෙදා ගන්නම්:
“ඊයේ සභාවට නැවත පැමිණෙමින් සිටින සාමාජිකයෙක් අපට හැකි ඉක්මනින් පැමිණෙන ලෙස පැවසුවා. අපි එතනට ගියාම, ඇය බිම වැටිලා, පාලනය කරගන්න බැරිව අඬනවා අපි දැක්කා. ඇයට රැකියාව අහිමි වූ බවත්, ඇයව මහල් නිවාසයෙන් පන්නා දැමීමට නියමිත බවත්, නැවතත් ඇය නිවසක් අහිමි කෙනෙකු බවට පත් වෙන්නට නියමිත බවත් ඒ කඳුළු අතරින් අපි දැනගත්තා.”
අපේ දියණිය තවදුරටත් මෙසේ පැවසුවා: “මම මගේ ශුද්ධලියවිලි පද ඉතා ඕනෑකමින් සොයන්න පටන් ගත්තා, ඇයට උපකාර කිරීමට යමක්—ඕනෑම දෙයක්—සොයා ගැනීමට උත්සාහ කළා. මම ගැලපෙන පදය සොයමින් ඉද්දී, මම මෙහෙම සිතුවා, මම මොකද කරන්නේ? මේක ක්රිස්තුස්වහන්සේ කරන දෙයක් නෙමේ. මේක මට විසඳන්න පුළුවන් ප්රශ්නයක් නෙවෙයි, නමුත් මේ මගේ උදව් අවශ්ය දෙවියන්වහන්සේගේ දියණියක්. ඉතින් මම මගේ ශුද්ධලියවිලි වසා දමා, ඇය අසල දණ ගසාගෙන, ඇය නැඟිට මෙම අභියෝගයට මුහුණ දීමට සූදානම් වන තුරු, අපි එකට අඬමින් ඇයව වැළඳගෙන සිටියා.”
මෙම කාන්තාව සැනසීමෙන් පසු, අපගේ දියණිය ශුද්ධලියවිලි පද භාවිත කරමින් ඇයගේ දිව්යමය වටිනාකමේ යථාර්ථය තේරුම් ගැනීමට සහ අපගේ පැවැත්මේ මූලිකම සත්යයන්ගෙන් එකක් වන—අපි දෙවියන්වහන්සේගේ ආදරණීය පුතුන් සහ දියණියන් බවත්, උන්වහන්සේට අපි දුක් විඳින විට අපි කෙරෙහි පරිපූර්ණ අනුකම්පාවක් දැනෙන බවත්, අප නැවත නැගී සිටින විට අපට සහාය වීමට සූදානම් දෙවියන්වහන්සේ කෙනෙකු බවත් ඇයට ඉගැන්වීමට උත්සාහ කළා.
අපගේ ධර්මදූතයින් උගන්වන මූලධර්මයේ පළමු කරුණ තමයි දෙවියන්වහන්සේ අපගේ ප්රේමණීය ස්වර්ගික පියාණන්වහන්සේ බව වීම බොහොම අර්ථවත් දෙයක්. සෑම පසුකාලීන සත්යයක්ම ගොඩනැගෙන්නේ අප සැබවින්ම කවුරුන්ද යන්න පිළිබඳ මූලික අවබෝධය මතයි.
ප්රාථමික අංශයේ ප්රධාන සභාපතිනි සූසන් එච්. පෝටර් මෙසේ ඉගැන්වූවා: දෙවියන්වහන්සේගේ දරුවෙකු ලෙස, ඔබ කෙතරම් පූර්ණව ආදරය ලබා තිබෙනවාදැයි ඔබ දැනගෙන අවබෝධ කරගත් විට, එය සියල්ල වෙනස් කරනවා. එය ඔබ වැරදි කරන විට ඔබ ගැන ඔබට හැඟෙන ආකාරය වෙනස් කරනවා. එය දුෂ්කර දේවල් සිදු වූ විට එය ඔබට දැනෙන ආකාරය වෙනස් කරනවා. එය දෙවියන්වහන්සේගේ ආඥා පිළිබඳ ඔබේ දැක්ම වෙනස් කරනවා. එය අනෙක් අය පිළිබඳ ඔබේ දැක්ම සහ වෙනසක් කිරීමට ඔබට ඇති හැකියාව වෙනස් කරනවා.”
දෙවියන්වහන්සේ සමඟ මුහුණට මුහුණ කතා කරන විට මෝසෙස් ලැබූ අත්දැකීම ගැන කියවද්දි මෙම වෙනස පැහැදිලි වෙනවා. එම සංවාදය අතරතුර, දෙවියන්වහන්සේ මෝසෙස්ට ඔහුගේ දිව්ය උරුමය ගැන නැවත නැවතත් ඉගැන්වූ අතර, “මෝසෙස්, … ඔබ මාගේ පුත්රයාය” කියා පැවසුවා. මෝසෙස් තම ඒකජාතක පුත්රයා මෙන් බව දෙවියන්වහන්සේ පැහැදිලි කළා. තමා කවුද යන්නත්, තමාට කිරීමට කාර්යයක් ඇති බවත්, තමාට ප්රේමණීය ස්වර්ගික පියාණන්වහන්සේ කෙනෙක් සිටින බවත් මෝසෙස් පැහැදිලිව තේරුම් ගත්තා.
මෙම අත්දැකීමෙන් පසු, විරුද්ධවාදියා ඔහුව පරීක්ෂාවට ලක් කර වහාම “මෝසෙස්, මනුෂ්ය පුත්රය” යැයි කියා ඔහුට කතා කළා. මෙය සතුරාගේ අවි ගබඩාවේ ඇති පොදු හා භයානක මෙවලමක්. අපගේ ස්වර්ගික පියාණන්වහන්සේ නිරන්තරයෙන් හා ආදරයෙන් අපට මතක් කර දෙන්නේ අපි උන්වහන්සේගේ දරුවන් බවයි, නමුත් විරුද්ධවාදියා සැමවිටම අපගේ දුර්වලතා මගින් අපව ලේබල් කිරීමට උත්සාහ කරනවා. නමුත් තමා “මනුෂ්ය පුත්රයෙකුට” වඩා වැඩි යමක් බව මෝසෙස් ඒ වන විටත් දැනගෙන සිටියා. ඔහු සාතන්ට මෙසේ ප්රකාශ කළා: “නුඹ කවරෙක්ද? මක්නිසාද බලන්න, මම දෙවියන්වහන්සේගේ පුත්රයෙක් වෙමි.” ඒ හා සමානව, අපි ලෞකික අභියෝග වලට මුහුණ දෙන විට හෝ අපගේ දුර්වලතා මගින් අපව ලේබල් කිරීමට උත්සාහ කරන බව අපට හැඟෙන විට, අප සැබවින්ම කවුරුන්ද යන්න පිළිබඳ දැනුමෙන් ශක්තිමත්ව සිටිය යුතු වෙනවා. අපි වලංගුභාවය සෙවිය යුත්තේ තිරස් අතට නොව සිරස් අතටයි. අපි එසේ කරන විට, අපටත් නිර්භීතව මෙසේ ප්රකාශ කරන්න පුළුවන්, “මම දෙවියන්වහන්සේගේ දරුවෙක්.”
තරුණ වැඩිහිටියන් සඳහා වූ ලොව පුරා පැවති දේශනයක දී, අපගේ ආදරණීය සභාපති රසල් එම්. නෙල්සන් මෙසේ ඉගැන්වුවා: “ඉතින් ඔබ කවුද? පළමුවෙන්ම සහ ප්රධාන වශයෙන්, ඔබ දෙවියන්වහන්සේගේ දරුවෙක්, ගිවිසුමේ දරුවෙක් සහ යේසුස් ක්රිස්තුස්වහන්සේගේ ගෝලයෙක්. ඔබ මෙම සත්යයන් වැලඳ ගන්නා විට, අපගේ ස්වර්ගික පියාණන්වහන්සේගේ ශුද්ධ වූ අභිමුඛයේ සදාකාලිකව ජීවත්වීමේ ඔබගේ අවසාන ඉලක්කය කරා ළඟා වීමට උන්වහන්සේ ඔබට උපකාර කරනවා.”
බොහෝ විට නැවත නැවතත් සඳහන් වන ශුද්ධලියවිල්ලෙ හි දෙවියන්වහන්සේ අපට උන්වහන්සේ සමඟ ඇති සම්බන්ධතාවය මතක් කර දීම අහම්බයක් වෙන්න බැහැ. සක්රමේන්තු යාච්ඤාවේ දී උන්වහන්සේව හැඳින්විය හැකි සියලු නම් අතරින්, උන්වහන්සේ “දෙවි වූ, සදාතනික පියාණන්වහන්සේ” ලෙස හඳුන්වන ලෙස ඉල්ලා තිබෙනවා.
අපි කවුද කියලා අපි ඇත්තටම දැනගන්නා විට, අපගේ ආදරණීය ස්වර්ගික පියාණන්වහන්සේ නැවත උන්වහන්සේ සමඟ ජීවත් වීමට අපට සැලැස්මක් සපයා ඇති බව අපි වඩාත් තදින් විශ්වාස කරනවා. වැඩිහිටි පැට්රික් කීරන් මෙසේ ඉගැන්වූවා, “අපගේ පියාණන්ගේ සුන්දර සැලැස්ම, උන්වහන්සේගේ “විශිෂ්ට” සැලැස්ම පවා සැලසුම් කර ඇත්තේ ඔබව නිවසට ගෙන ඒමට මිස ඔබව බැහැර කිරීමට නොවේ. … දෙවියන්වහන්සේ නොනවතින ලෙස ඔබ පසුපස හඹා යමින් සිටිනවා.” ඒ ගැන මොහොතකට සිතන්න—අපගේ සර්වබලධාරී, ප්රේමණීය පියාණන්වහන්සේ “ඔබව නොනවත්වා ලුහුබඳිනවා.”
අපි අපේ ගෝලත්වයේ මාවතේ කොතැනක සිටියත්, අපි ඇත්තටම කවුද කියලා හොඳින් තේරුම් ගත්තොත් අපේ ජීවිත මූලික වශයෙන් වෙනස් වේවි. මෙම අවබෝධය ගැඹුරු කළ හැකි ක්රම දෙකක් මම යෝජනා කරන්නද.
පළමුව, යාච්ඤාව
ගැලවුම්කරුවාණන් තම ලෞකික දේවසේවය ආරම්භ කරන විට, උන්වහන්සේව “දෙවියන්වහන්සේ සමඟ සිටීමට” වනාන්තරයට ගෙන යනු ලැබුවා. සමහරවිට අපි අපගේ මානසිකත්වය සරලව යාච්ඤා කිරීමෙන් ඉවත් කර, සෑම දිනකම දෙවියන්වහන්සේ සමඟ සැබවින්ම අදහස් හුවමාරු කර ගැනීමට සහ “දෙවියන්වහන්සේ සමඟ සිටීමට” ප්රමාණවත් කාලයක් ගත කිරීමට යොමු කළ යුතු වෙනවා.
මගේ පියාණන්වහන්සේ සමඟ කතා කිරීමට සූදානම් වීමට මිනිත්තු කිහිපයක් ගත කරන විට, මගේ යාච්ඤාවල ගුණාත්මකභාවය වැඩි දියුණු වන බව මට පෙනී ගොස් තිබෙනවා. මෙය ක්රියාත්මක වන රටාවක් බව ශුද්ධලියවිලි අපට පෙන්වා දෙනවා. ජෝසෆ් ස්මිත් වේවා; හීලමන්ගේ පුත්රයා වන නීෆායි වේවා; නැතහොත් ඊනොස් වේවා, සියල්ලන්ම දෙවියන්වහන්සේ සමඟ වාර්තාගත සන්නිවේදනයකට පෙර යම් ආකාරයක මෙනෙහි කිරීමක් සහ ආවර්ජනාවක් කර තිබෙනවා. තම පියාගේ වචන ඔහුගේ හදවතේ ගැඹුරට කිඳා බසින විට ඔහුගේ ආත්මය කුසගින්නේ තිබූ බව ඊනොස් පැවසුවා. මේ සෑම උදාහරණයක්ම “දෙවියන්වහන්සේ සමඟ සිටීමට” සෑම දිනකම අපගේ කාලය සඳහා අධ්යාත්මිකව සූදානම් වීමේ අවශ්යතාවය අපට උගන්වනවා.
නීෆායිවරුන්ට, ගැලවුම්කරුවාණන් මෙසේ උපදෙස් දුන්නා, “නුඹලා යාච්ඤා කරන විට, නුඹලාගේ කුටියට ඇතුළු වී, තවද නුඹලා දොර වසා ගත් විට, රහසින් සිටින නුඹලාගේ පියාණන්වහන්සේට යාච්ඤා කරන්න.”
එය කුටියක් වුනත් නිදන කාමරයක් වුනත්, ඔබට යාච්ඤා කිරීමට තනිව සිටිය හැකි ස්ථානයක් සොයා ගෙන, ඔබේ ආත්මයට නිශ්චලව සිටීමට ඉඩ ලැබෙන සහ “සියුම් කුඩා හඬකින්” පෙළඹවීම් දැනීම තමයි ඒ මූලධර්මය. අපි කෘතඥ වන දේවල් සහ අපගේ පියාණන්වහන්සේ වෙත ගෙන ඒමට කැමති ප්රශ්න හෝ කනස්සල්ල ගැන මෙනෙහි කිරීමෙන් අපට සූදානම් වෙන්න පුළුවන්. කටපාඩම් කළ යාච්ඤාවක් නොකර හැකි නම් ශබ්ද නඟා අපගේ පියාණන්වහන්සේ සමඟ කතා කිරීමට අපි උත්සාහ කළ යුතු වෙනවා.
අපේ ජීවිතයේ අවුල් සහගත තත්වයන් තුළ, අපි කුඩා දරුවන් සමඟ පොරබදන විට හෝ රැස්වීම් අතර එහෙට මෙහෙට දුවන විට, අපට ඇඳුම් ආයිත්තම් කට්ටලවල සුඛෝපභෝගීත්වය සහ කල්පනාකාරී පෙර සූදානමක් නොතිබෙන්න පුළුවන් බව මම තේරුම් ගත්තා—නමුත් අපි දවස මුල දී “දෙවියන්වහන්සේ සමඟ සිටීමට” උත්සාහයක් ගත් විට එම නිහඬ, ඉක්මන් සහ හදිසි යාච්ඤාවන් වඩාත් අර්ථවත් වෙන්න පුළුවන්.
දිගු කලක් යාච්ඤා නොකළ අය හෝ තම යාච්ඤාවලට සවන් දෙන බව දැනී නැති අය ඉන්න පුළුවන්. ඔබේ ස්වර්ගික පියාණන්වහන්සේ ඔබව හඳුනන බවත්, ඔබට ප්රේම කරන බවත්, ඔබෙන් අසන්නට කැමති බවත් මම ඔබට පොරොන්දු වෙනවා. උන්වහන්සේට අවශ්යයි ඔබ සමඟ සන්නිවේදනය කරන්න. උන්වහන්සේට අවශ්යයි ඔබ කවුදැයි ඔබම මතක තබා ගන්න.
වැඩිහිටි ජෙෆ්රි ආර්. හොලන්ඩ් මෑතක දී මෙසේ ඉගැන්වූවා, “ඔබ කොතරම් යාච්ඤා කළත්, තවත් යාච්ඤා කරන්න. ඔබ කොතරම් තදින් යාච්ඤා කළත්, තව තවත් තදින් යාච්ඤා කරන්න.”
අපගේ යාච්ඤාවල වාර ගණන සහ උද්යෝගය වැඩි කිරීමට අමතරව, දිනපතා මොර්මන්ගේ පොත අධ්යයනය කිරීම සහ දේවමාළිගාවේ නමස්කාර කිරීම අපගේ මනස එළිදරව්ව සඳහා සූදානම් කිරීමට උපකාරී වෙනවා. අපගේ ස්වර්ගික පියාණන්වහන්සේ සමඟ අපගේ සන්නිවේදනය වැඩි දියුණු කිරීමට අපි උත්සාහ කරන විට, අපි උන්වහන්සේගේ දරුවන් බව වඩාත් ගැඹුරින් දැනීමට උන්වහන්සේ අපට ආශිර්වාද කරනවා.
දෙවනුව, යේසුස්වහන්සේ ක්රිස්තුස්වහන්සේ බව දැනගන්න.
ස්වර්ගික පියාණන්වහන්සේ තම දරුවන් ලෙස අප කෙරෙහි දක්වන ප්රේමයේ ශ්රේෂ්ඨතම ප්රකාශනය නම්, අපට නැවත නිවසට පැමිණීමට උපකාර කිරීම සඳහා උන්වහන්සේ තම පුත්රයාණන්, අපගේම පුද්ගලික ගැලවුම්කරුවාණන් එවූ බවට ඇති යථාර්ථයයි. එමනිසා, අපි උන්වහන්සේව දැන හඳුනා ගත යුතු වෙනවා.
වසර ගණනාවකට පෙර, ස්ටේක සභාපතිවරයෙකු ලෙස සේවය කරන අතරතුර, දේවමාළිගාවේ නියෝග ක්රියා කරවන්නෙකු ලෙස සේවය කිරීම සඳහා සහෝදරයෙකුට නිර්දේශයක් මම ඉදිරිපත් කළා. ඔහු කෙතරම් අපූරු නියෝග ක්රියා කරවන්නෙකු වනු ඇත්දැයි පැහැදිලි කිරීමෙන් පසු, මම අහම්බෙන් “අනුමත නොකරයි,” යනුවෙන් එබුවා, එලෙස නිර්දේශය ඉදිරිපත් වුණා. පණිවිඩය ආපසු කැඳවීමට කළ අසාර්ථක උත්සාහයකින් පසු, මම දේවමාළිගාවේ සභාපතිවරයාට කතා කර මෙසේ පැවසුවා, “මම දරුණු වැරැද්දක් කළා.” පැකිලීමකින් තොරව, මේ යහපත් දේවමාළිගාවේ සභාපතිවරයා මෙසේ පැවසුවා, “සභාපති ඒයර්, ඔබ කළ කිසිවක් සමාව දිය නොහැකි සහ අවසානයේ නිවැරදි කළ නොහැකි දෙයක් නොවේ.” මොනතරම් ශ්රේෂ්ඨ සත්යයක්ද. ඇත්ත වශයෙන්ම, යේසුස් ක්රිස්තුස්වහන්සේ “ගැලවීමට බලවත්.”
2019 දී දේවමාළිගා නිර්දේශය දීමට පෙර අසන ප්රශ්නවල ප්රබල වෙනසක් ඇති වුණා. මීට පෙර, ගැලවුම්කරුවාණන් සහ මිදුම්කරුවාණන් ලෙස යේසුස් ක්රිස්තුස්වහන්සේගේ භූමිකාව පිළිබඳ සාක්ෂියක් ඔබට තිබෙනවාද කියලා එක් ප්රශ්නයක් ඇසුවා. දැන් එය අසන්නේ ඔබේ ගැලවුම්කරුවාණන් සහ මිදුම්කරුවාණන් ලෙස උන්වහන්සේගේ භූමිකාව පිළිබඳ සාක්ෂියක් ඔබට තිබෙනවාද කියලයි. යේසුස් ක්රිස්තුස්වහන්සේගේ වන්දිගෙවීම අන් අයට විතරක් නෙමේ; එය ඔබටත් මටත් ක්රියාත්මක වෙනවා. උන්වහන්සේ මගේ ගැලවුම්කරුවාණන්. උන්වහන්සේ ඔබේ ගැලවුම්කරුවාණන්. තනි තනි වශයෙන්. ඔබටත් මටත් අපගේ පියාණන්වහන්සේ සමඟ නැවත එක් විය හැක්කේ උන්වහන්සේ තුළින්ම විතරයි.
ඉතින් සහෝදර සහෝදරියනි, අපි උන්වහන්සේව සොයමු. පියාණන්වහන්සේ සමඟ සහ අප සෑම කෙනෙකු සමඟම උන්වහන්සේගේ දිව්ය සම්බන්ධතාවය අධ්යයනය කරමු. අපි පසුතැවිලි වන විට අපගේ මිදුම්කරුවාණන් තුළින් අප සෑම කෙනෙකුටම පෞද්ගලිකව පැමිණෙන මිදීමේ ප්රේමයේ ගීතය අත්විඳිමු. “ගැලවීමට බලවත් තැනැත්තා” අපි දැන හඳුනා ගන්නා විට, දෙවියන්වහන්සේගේ දරුවන් ලෙස, අපි උන්වහන්සේගේ ප්රීතිය—උන්වහන්සේගේ වැදගත්ම අවධානය බවත්—සැබවින්ම අපි සෑම කෙනෙකුම ගැලවීම ලැබීමට වටින බවත් අපට වැටහෙයි.
අපට ප්රේමණීය ස්වර්ගික පියාණන්වහන්සේ කෙනෙකු සිටින බවට මම සාක්ෂි දරනවා. බලවත් යාච්ඤාව, පෞද්ගලික එළිදරව්ව සහ යේසුස් ක්රිස්තුස්වහන්සේ වෙතට පැමිණීම තුළින් අපි මෙම සදාකාලික සත්යය දැන ගන්නා විට, අපට දැන් සහ සැමවිටම නිර්භීතව “මම දෙවියන්වහන්සේගේ දරුවෙක්” යැයි ප්රකාශ කරන්න පුළුවන්. යේසුස් ක්රිස්තුස්වහන්සේගේ නාමයෙන්, ආමෙන්.