සංයම ගුණයෙන් සරසන ලද
ක්රිස්තුස්වහන්සේගේ වැනි සංයම ගුණාංගයෙන් අපගේ මනස හා හදවත් අලංකාර කර ගැනීමට මම අප සැමට අවංක ආරාධනාවක් කරනවා.
2021 මැයි මාසයේදී, සෝල්ට් ලේක් දේවමාළිගාවේ ප්රතිසංස්කරණ කටයුතු නැරඹීමට ගිය අවස්ථාවේ දී, සභාපති රසල් එම්. නෙල්සන්, සීමිත සම්පත් සහ නොසැලෙන ඇදහිල්ලෙන්, එම පූජනීය ගොඩනැගිල්ල, කාලයේ පරීක්ෂණයට ලක් වූ භෞතික හා අධ්යාත්මික කලාකෘතියක් ලෙස ගොඩනඟන ලද පුරෝගාමීන්ගේ උත්සාහය ගැන මවිත වුණා. කෙසේ වෙතත්, කාලයත් සමඟ දේවමාළිගාවේ මුල් අත්තිවාරම් ගල්වල හිඩැස් ඇති කිරීමට සහ පෙදරේරු වැඩවල අස්ථාවරත්වයට හේතු වූ ඛාදනයේ බලපෑම් ද ඔහු නිරීක්ෂණය කළා, ඒවගේම ඒවා ව්යුහාත්මක ශක්තිමත් කිරීමේ අවශ්යතාවය පිළිබඳ පැහැදිලි සලකුණු වුණා.
ස්වභාවධර්මයේ බලවේගයන්ට ඔරොත්තු දීම සඳහා දේවමාළිගාවේ අත්තිවාරම ශක්තිමත් කිරීම සඳහා ප්රධාන පියවර ක්රියාත්මක කිරීම අවශ්ය වූවා සේම, යේසුස් ක්රිස්තුස්වහන්සේ තුළ අපගේම අධ්යාත්මික පදනම ශක්තිමත් කිරීම සඳහා අසාමාන්ය පියවර—සමහරවිට අප කිසිදා නොගත් පියවර—ගත යුතු බව අපගේ ආදරණීය අනාගතවක්තෘවරයා අපට ඉගැන්නුවා. ඔහු අපට පෞද්ගලිකව මෙනෙහි කිරීම සඳහා ගැඹුරු ප්රශ්න දෙකක් ඉතිරි කළා: “ඔබේ අත්තිවාරම කෙතරම් ස්ථිර ද? ඒවගේම ශුභාරංචිය පිළිබඳ ඔබේ තේරුම්ගැනීමට සහ සාක්ෂිය සඳහා අවශ්ය කුමන ආකාරයේ ශක්තිමත් කිරීමක් ද?”
අපගේ ආත්මයන් හි අධ්යාත්මික ඛාදනය වැළැක්වීම සඳහා දිව්යමය වශයෙන් ආනුභාව ලත් සහ ඵලදායී මාධ්යයන් යේසුස් ක්රිස්තුස්වහන්සේගේ ශුභාරංචිය විසින් අපට සපයනවා, ඒවා මගින් අපගේ අත්තිවාරම බලවත් ලෙස ශක්තිමත් කරන අතර අපගේ සාක්ෂියේ සහ ශුභාරංචියේ පූජනීය සත්යයන් පිළිබඳ අපගේ අවබෝධයේ අපගේ ඇදහිල්ලේ සහ අස්ථාවරත්වයේ හිඩැස් වළක්වා ගැනීමට උපකාරී වෙනවා. මෙම අරමුණ සාක්ෂාත් කර ගැනීම සඳහා විශේෂයෙන් අදාළ වන එක් මූලධර්මයක්, දහම සහ ගිවිසුම් 12 වන කොටසේ දක්නට ලැබෙනවා, එය අනාගතවක්තෘ ජෝසෆ් ස්මිත් හරහා ස්වාමින්වහන්සේගේ කැමැත්ත තේරුම් ගැනීමට උනන්දුවෙන් උත්සාහ කළ ධර්මිෂ්ඨ මිනිසෙකු වූ ජෝසෆ් නයිට් වෙත ලබා දුන් හෙළිදරව්වක්, එය ලබා දී තිබුණේ හුදෙක් බාහිර වෙනසක් සඳහා නොවේ, නමුත් ස්වර්ගයේ කුළුණු ලෙස ස්ථිරව—ඔහුගේ අනුගාමිකත්වයේ නොසැලී සිටීමටයි. ගැලවුම්කරුවාණන් මෙසේ පැවසුවා:
“බලන්න, තවද එසේම මම නුඹට මෙන්ම, මෙම කාර්යය පෙරට ගෙන ඒමට සහ පිහිටුවීමට ආශා වන්නාවූ සියල්ලන්ටම කතා කරන්නෙමි;
“යටහත් වී සහ ප්රේමයෙන් පූර්ණ වී, ඇදහිල්ල, බලාපොරොත්තුව සහ පිවිතුරු ප්රේමයෙන් යුතුව, ඔහුගේ රැකවරණයට පවරනු ලබන ඕනෑම දෙයක් සඳහා, සියලු දේවලදී ඔහු සිහි ඇතිව මිස, මෙම කාර්යයට උපකාරී වීමට කිසිවකුටවත් නොහැකි වන්නේය.”
යේසුස් ක්රිස්තුස්වහන්සේ තුළ ස්ථිර පදනමක් සඳහා සංයමය යනු අත්යවශ්ය ශක්තිමත් කිරීමක් බව, මෙම පූජනීය එළිදරව්වේ සටහන් කර ඇති ගැලවුම්කරුවාණන්ගේ මගපෙන්වීම අපට මතක් කර දෙනවා. එය සේවය කිරීමට කැඳවනු ලැබූ අයට පමණක් නොවේ, නමුත් ස්වාමින්වහන්සේ සමඟ පූජනීය ගිවිසුම් ඇති කරගෙන ඇදහිලිවන්තව උන්වහන්සේව අනුගමනය කිරීමට පිළිගන්නා සියල්ලන්ටම අත්යවශ්ය ගුණාංගවලින් එකක්. මෙම එළිදරව්වේ සඳහන් කර ඇති අනෙකුත් ක්රිස්තුමය ගුණාංග, සංයමය සමඟ සමපාත වන අතර ඒවා ශක්තිමත් කරනවා: ඒ තමයි නිහතමානිකම, ඇදහිල්ල, බලාපොරොත්තුව, දයාව සහ උන්වහන්සේගෙන් ගලා එන නිර්මල ප්රේමය. තවදුරටත්, යේසුස් ක්රිස්තුස්වහන්සේ තුළ අපගේ අත්තිවාරම දුර්වල කළ හැකි ලෞකික බලපෑම් නිසා ඇතිවන සියුම් නමුත් නිරන්තර අධ්යාත්මික ඛාදනයට එරෙහිව අපගේ ආත්මයන් ආරක්ෂා කර ගැනීම සඳහා සංයමය වර්ධනය කිරීම අර්ථවත් ක්රමයක්.
ක්රිස්තුස්වහන්සේගේ සැබෑ ගෝලයන්ව සරසන ගුණාංග අතර, සංයමය ගැලවුම්කරුවාණන්ගේම පිළිබිඹුවක් ලෙස කැපී පේනවා, එය ආත්මයාණන්වහන්සේගේ වටිනා ඵලයක් වන අතර, දිව්ය බලපෑමට විවෘත වන සියල්ලන්ටම එය ලබා ගන්න පුළුවන්. එය හදවතට සමගිය ගෙන දෙන, ප්රඥාව සහ සන්සුන් භාවයෙන් ආශාවන් සහ හැඟීම් හැඩගස්වන ගුණයක්. ශුද්ධලියවිලිවල, අපගේ අධ්යාත්මික ගමනේ ප්රගතියේ අත්යවශ්ය අංගයක් ලෙස මෙම සංයමය ඉදිරිපත් කර තිබෙනවා, එය අපගේ හැඟීම්, අපගේ වචන සහ අපගේ ක්රියාවන් පිරිපහදු කරනවා ඒවගේම, ඉවසීම, දේවභක්තිය සහ අනුකම්පාව කරා අපව ගෙන යනවා.
මෙම ක්රිස්තුමය ගුණාංගය වර්ධනය කර ගැනීමට උත්සාහ කරන ක්රිස්තුස්වහන්සේගේ ගෝලයන් තව තවත් නිහතමානී බවින් හා ප්රේමයෙන් පිරෙනවා. ඔවුන් තුළ සන්සුන් ශක්තියක් මතුවෙනවා ඒවගේම ඔවුන්ට කෝපය පාලනය කරගන්න, ඉවසීම පෝෂණය කරගන්න සහ විපත්ති සුළං දරුණු ලෙස හමන විට පවා අන් අයට ඉවසීමෙන්, ගෞරවයෙන් සහ අභිමානයෙන් සැලකන්න වඩා හොඳින් හැකියාව ලැබෙනවා. ඔවුන් ආවේගශීලීව ක්රියා කිරීමට උත්සාහ නොකර, යටහත් පහත්කමෙන් සහ ශුද්ධාත්මයාණන්ගේ මෘදු බලපෑමෙන් මගපෙන්වනු ලබන අධ්යාත්මික ප්රඥාවෙන් ක්රියා කිරීමට තෝරා ගන්නවා. මේ ආකාරයෙන්, ඔවුන් අධ්යාත්මික ඛාදනයට ගොදුරු වීමේ අවදානම අඩු වෙලා යනවා, මොකද, ප්රේරිත පාවුල් ඉගැන්නුවා වගේ, ක්රිස්තුස්වහන්සේ පිළිබඳ ඔවුන්ගේ සාක්ෂිය සෙලවිය හැකි පරීක්ෂාවන් හමුවේ පවා ඔවුන්ව ශක්තිමත් කරන උන්වහන්සේ තුළින් ඔවුන්ට සියල්ල කළ හැකි බව ඔවුන් දන්නවා.
ගැලවුම්කරුවාණන්ව නියෝජනය කිරීමට සහ ඇදහිල්ලෙන් හා කැපවීමෙන් උන්වහන්සේගේ කැමැත්ත ඉටු කිරීමට කැමති අයගේ සුදුසුකම් පිළිබඳව තීතස්ට ලියූ ලිපියේ දී පාවුල් පූජනීය උපදෙස් ලබා දුන්නා. ඔවුන්, සංයමයේ බලපෑම පැහැදිලිව පිළිබිඹු කරන ගුණාංග වන—ආගන්තුක සත්කාරයට ලැදි, සන්සුන්, යුක්තිසහගත සහ ශුද්ධ විය යුතු බව ඔහු පැවසුවා.
කෙසේ වෙතත්, ඔවුන් “හිතුවක්කාර නොවූ, නොකිපෙන්නාවූ, [සහ] ගහගන්නෙක් නොවූ” අය විය යුතු බව පාවුල් අනතුරු ඇඟෙව්වා. එවැනි ලක්ෂණ ගැලවුම්කරුවාණන්ගේ මනසට පටහැනි වන අතර සැබෑ අධ්යාත්මික වර්ධනයට බාධා කරනවා. ශුද්ධලියවිලි සන්දර්භය තුළ, “හිතුවක්කාර නොවූ” යන්නෙන් අදහස් කරන්නේ අහංකාරයෙන් හා උඩඟුකමින් ක්රියා කිරීම ප්රතික්ෂේප කරන්නෙක් ගැනයි; “නොකිපෙන්නාවූ” යනු නොඉවසිලිමත් වීමට සහ කෝපයට පත්වීමට ඇති ස්වභාවික ආශාවෙන් වැළකී සිටින්නෙක් ගැනයි; සහ “ගහගන්නෙක් නොවූ” යන්නෙන් අදහස් කරන්නේ වාචිකව, ශාරීරිකව සහ චිත්තවේගීයව විවාදාත්මක, ආක්රමණශීලී සහ රළු හැසිරීම් ප්රතික්ෂේප කරන අයෙක් ගැනයි. ඇදහිල්ලෙන් හා නිහතමානීව අපගේ හැසිරීම වෙනස් කිරීමට අපි උත්සාහ කරද්දි, අපට උන්වහන්සේගේ කරුණාවේ ශක්තිමත් පර්වතයට ස්ථිරව නැංගුරම් ලා උන්වහන්සේගේ ශුද්ධ වූ දෑත්වල පවිත්ර හා ඔප දැමූ උපකරණ බවට පත්වෙන්න පුළුවන්.
සංයමය වර්ධනය කර ගැනීමේ අවශ්යතාවය ගැන මෙනෙහි කිරීමේදී, අනාගතවක්තෘ සාමුවෙල්ගේ මව වූ හන්නාගේ වචන මට මතක් වෙනවා—ඇය විශිෂ්ට ඇදහිල්ලක් ඇති කාන්තාව, ඒවගේම ඇය මහත් පරීක්ෂාවන්ගෙන් පසුව පවා ස්වාමින්වහන්සේට කෘතඥතාව පළ කරමින් ගීතයක් ගායනා කළා. ඇය මෙසේ පැවසුවා: “ඔපමණ උඩඟු ලෙස තවත් කථා නොකරල්ලා; අහංකාරය නුඹලාගේ මුඛවලින් නොනික්මේවා. මක්නිසාද ස්වාමීන්වහන්සේ සියල්ල දන්න දෙවි කෙනෙක්ය, උන්වහන්සේ ක්රියාවල් කිරා බලන සේක.” ඇගේ ගීතය යාච්ඤාවකට වඩා වැඩි යමක්—එය නිහතමානීව, ආත්ම දමනයෙන් සහ මධ්යස්ථව ක්රියා කිරීමට ස්වයං-ආමන්ත්රණය කරන ආරාධනයක්. සැබෑ අධ්යාත්මික ශක්තිය ප්රකාශ වන්නේ ආවේගශීලී ප්රතික්රියා හෝ උඩඟු වචන වලින් නොව, ස්වාමින්වහන්සේගේ ප්රඥාව සමඟ පෙලගැසී ඇති මධ්යස්ථ, කල්පනාකාරී ආකල්ප වලින් බව හන්නා අපට මතක් කර දෙනවා.
බොහෝ වෙලාවට ලෝකය ආක්රමණශීලී බවින්, අහංකාරයෙන්, නොඉවසිලිමත්කමෙන් සහ අධික බවෙන් පැන නගින හැසිරීම් උසස් කරනවා, බොහෝ විට එදිනෙදා ජීවිතයේ පීඩන සහ වලංගුභාවය සහ ජනප්රියත්වය කෙරෙහි ඇති නැඹුරුව මගින් එවැනි ආකල්ප සාධාරණීකරණය කරනවා. අපි සංයම ගුණයෙන් අපගේ බැල්ම ඉවතට හරවා, අපගේ ක්රියා කිරීමේ සහ කතා කිරීමේ ආකාරයෙන් ශුද්ධාත්මයාණන්ගේ මෘදු හා මධ්යස්ථ බලපෑම නොසලකා හරිද්දි, අපි පහසුවෙන් සතුරාගේ උගුලට හසු වෙනවා, එය අනිවාර්යයෙන්ම වචන ප්රකාශ කිරීමට සහ අපගේ සමාජීය, පවුල් හෝ සභා සබඳතාවලදී පවා අප ගැඹුරින් පසුතැවිලි වන ආකල්ප අනුගමනය කිරීමට අපව යොමු කරනවා. පුද්ගලයෙකුගේ සැබෑ චරිතය හෙළිදරව් වන්නේ හරියටම විශේෂයෙන්ම අභියෝගාත්මක කාලවලදී නිසා, මෙම අවස්ථාවන්වලදී මෙම ගුණධර්ම ක්රියාත්මක කිරීමට යේසුස් ක්රිස්තුස්වහන්සේගේ ශුභාරංචිය අපට ආරාධනා කරනවා. මාටින් ලූතර් කිං කණිෂ්ඨ වරක් මෙසේ පැවසුවා, “මිනිසෙකුගේ සැබෑම මිනුම වන්නේ ඔහු සැනසිල්ලෙන් සහ පහසුවෙන් සිටින අවස්ථාවන්හිදී ඔහු සිටින ආකාරය නොව, නමුත් අභියෝග සහ මතභේදාත්මක අවස්ථාවන්හිදී ඔහු සිටින ආකාරයයි.”
ගිවිසුම්ගත ජනතාවක් වශයෙන්, අපව කැඳවා ඇත්තේ අප ස්වාමින්වහන්සේට දුන් පරිශුද්ධ පොරොන්දු තුළ අපගේ හදවත් ස්ථිරව මුල් බැසගෙන, උන්වහන්සේගේ පරිපූර්ණ ආදර්ශය තුළින් උන්වහන්සේ ස්ථාපිත කළ රටාව ප්රවේශමෙන් අනුගමනය කිරීමටයි. ඒ වෙනුවට, උන්වහන්සේ මෙසේ පොරොන්දු වී තිබෙනවා, “සැබවක්, සැබවක්, මම නුඹලා හට පවසන්නෙමි, එනම් මෙය මාගේ දහම වන්නේය, තවද කවරෙකු වුවත් මෙය මත ගොඩනැගෙන්නේද, තවද නිරයේ දොරටු ඔවුන්ට විරුද්ධව ජයගන්නේ නැත.”
හොවර්ඩ් ලයෝන් විසින්, Let Not Your Heart Be Troubled [ඔබේ හදවත කැළඹීමට ඉඩ නොදෙන්න], හැවන්ලයිට් අනුග්රහයෙනි
මිහිපිට ගැළවුම්කරුවාණන්ගේ දේවසේවය උන්වහන්සේගේ චරිතයේ සෑම අංශයක්ම සංයම ගුණයෙන් සලකුණු වුණා. “දුක් කරදරවලදී ඉවසිලිවන්ත වන්න, නින්දා කරන්නන්ට නින්දා නොකරන්න” කියමින් උන්වහන්සේ උන්වහන්සේගේ පරිපූර්ණ ආදර්ශය තුළින් අපට ඉගැන්වූවා. උන්වහන්සේ විවාද සහ මතභේද නිසා අපි කෝපයට යටත් නොවිය යුතු බව උගන්වමින්, මෙසේ ප්රකාශ කළා; “නුඹලා පසුතැවිලි වී, තවද කුඩා දරුවෙකු මෙන් විය යුතුය.” මුළු හදවතින්ම උන්වහන්සේ වෙතට පැමිණීමට කැමති සියල්ලන්ම තමන් කෝපයෙන් සිටින අය සමඟ හෝ තමන්ට විරුද්ධව යමක් ඇති අය සමඟ සමාදාන විය යුතු බව උන්වහන්සේ ඉගැන්නුවා. මධ්යස්ථ ආකල්පයකින් සහ දයානුකම්පිත හදවතකින්, අපට රළු ලෙස, අකාරුණික ලෙස, අගෞරවයෙන් හෝ නොසලකා හැරීමෙන් සලකන විට, උන්වහන්සේගේ කරුණාව අපෙන් ඉවත් නොවන බවත්, උන්වහන්සේගේ සාමයේ ගිවිසුම අපගේ ජීවිතවලින් ඉවත් නොවන බවත් උන්වහන්සේ අපට සහතික වුණා.
මීට වසර කිහිපයකට පෙර, මගේ බිරිඳට සහ මට මෙක්සිකෝ නගරයේ සභාවේ ඇදහිලිවන්ත සාමාජිකයන් කිහිප දෙනෙකු හමුවීමේ පූජනීය වරප්රසාදය ලැබුණා. ඔවුන්ගෙන් බොහෝ දෙනෙක්, පෞද්ගලිකව හෝ ඔවුන්ගේ ආදරණීයයන් හරහා, පැහැරගැනීම්, මිනීමැරුම් සහ අනෙකුත් හද කම්පා කරවන ඛේදවාචක ඇතුළු විස්තර කළ නොහැකි පරීක්ෂාවන්ට මුහුණ දී තිබුණා.
අපි ඒ ශුද්ධවන්තයන්ගේ මුහුණු දෙස බැලූ විට, කෝපයක්, අමනාපයක් හෝ පළිගැනීමේ ආශාවක් අපට පෙනුනේ නෑ. ඒ වෙනුවට අපි දුටුවේ නිහඬ නිහතමානීකමක්. ඔවුන්ගේ මුහුණුවල ශෝකය තිබුණත්, සුවය සහ සැනසීම සඳහා අවංක ආශාවක් පැතිර තිබුණා. දුක් විඳීමෙන් ඔවුන්ගේ හදවත් බිඳී ගොස් තිබුණත්, මෙම ශුද්ධවන්තයන් යේසුස් ක්රිස්තුස්වහන්සේ කෙරෙහි ඇදහිල්ලෙන් ඉදිරියට ගියා, ඒවගේම ඔවුන්ගේ දුක් වේදනා ඔවුන්ගේ ඇදහිල්ලේ හිඩැස් බවට පත්කර නොගැනීමට හෝ ශුභාරංචිය පිළිබඳ ඔවුන්ගේ සාක්ෂියේ අස්ථාවරත්වයක් ඇතිකර නොගැනීමට තෝරා ගත්තා.
ඒ පූජනීය රැස්වීම අවසානයේ, අපි ඔවුන් එක් එක්කෙනාට ආචාර කළා. සෑම අතට අත දීමක්ම, සෑම වැළඳගැනීමක්ම, ස්වාමින්වහන්සේගේ උපකාරයෙන්, ජීවිතයේ කලකිරීම් සහ අභියෝගවලට සංයමයෙන් යුතුව ප්රතිචාර දැක්වීමට අපට තෝරා ගත හැකි බවට නිහඬ සාක්ෂියක් බවට පත් වුණා. ඔවුන්ගේ නිහඬ හා නිහතමානී ආදර්ශය, සෑම දෙයකදීම සංයමයෙන් යුතුව ගැලවුම්කරුවාණන්ගේ මාර්ගයේ ගමන් කිරීමට මෘදු ආරාධනයක් ලෙස සේවය කර තිබුණා. අපිට දැනුනේ අපි දේවදූතයන් ඉදිරියේ ඉන්නවා වගේ.
සියල්ලන්ටම වඩා ශ්රේෂ්ඨතම තැනැන්වහන්සේ වන යේසුස් ක්රිස්තුස්වහන්සේ සෑම රෝම කූපයකින්ම ලේ ගලන තුරු අප වෙනුවෙන් දුක් වින්දා, නමුත් උන්වහන්සේ කිසි විටෙකත් තම හදවත ගිනි තැබීමට කෝපයට ඉඩ දුන්නේ නෑ, එසේම එවැනි පීඩා මධ්යයේ වුවද, ආක්රමණශීලී, අපහාසාත්මක හෝ අසභ්ය වචන උන්වහන්සේගේ තොල්වලින් පිට වුණේ නෑ. පරිපූර්ණ සංයමයෙන් හා අසමසම මෘදුකමෙන් යුතුව, උන්වහන්සේ තමන් ගැන නොව—නමුත් අතීතයේ, වර්තමානයේ සහ අනාගතයේ සිටින දෙවියන්වහන්සේගේ සෑම දරුවෙකු ගැනම සිතුවා. “උන්වහන්සේ නින්දාකරනු ලැබූ කල නින්දා නොකළ සේක; වධවින්ද කල තර්ජන නොකර, ධර්මිෂ්ඨලෙස විනිශ්චය කරන තැනන්වහන්සේට කාරණය භාරදුන් සේක” යනුවෙන් ප්රකාශ කළ විට, ප්රේරිත පේත්රැස් ක්රිස්තුස්වහන්සේගේ උතුම් ආකල්පය ගැන සාක්ෂි දැරුවා. උන්වහන්සේගේ ශ්රේෂ්ඨතම වේදනාව මධ්යයේ පවා, ගැලවුම්කරුවාණන් පරිපූර්ණ හා දිව්යමය සංයමයක් පෙන්නුම් කළා. උන්වහන්සේ මෙසේ ප්රකාශ කළා “එසේවුවද, මහිමය පියාණන්වහන්සේට වේවා, එමෙන්ම මම සහභාගි වී මනුෂ්ය දරුවන් වෙනුවෙන් මාගේ සූදානම අවසන් කළෙමි.”
මගේ ආදරණීය සහෝදර සහෝදරියනි, අපගේ ආදරණීය සභාපති රසල් එම්. නෙල්සන්ගේ අනාවැකිමය කැඳවීමට පූජනීය ප්රතිචාරයක් ලෙස, යේසුස් ක්රිස්තුස්වහන්සේ තුළ අපගේ අධ්යාත්මික පදනම ශක්තිමත් කිරීම සඳහා අසාමාන්ය පියවර ගන්නා ලෙස මම අපෙන් ඉල්ලා සිටිනවා. අපගේ ක්රියාවන් හා වචන වලට සංයමය එකතු කරගැනීමට ඇදහිල්ලෙන් හා ඉතා උවමනාවෙන් උත්සාහ කරන විට, අපගේ මිදුම්කරුවාණන්ගේ නිසැක අත්තිවාරම මත අපගේ ජීවිත වඩාත් ශක්තිමත් කර නැංගුරම් ලා ගන්නා බවට මම සාක්ෂි දරනවා.
නිරන්තරයෙන් සංයමයෙන් සිටීම අපගේ ආත්මය පවිත්ර කර අපගේ හදවත ගැලවුම්කරුවාණන් ඉදිරියෙහි පාරිශුද්ධ කරන බවත්, අපව මෘදු ලෙස උන්වහන්සේ වෙතට ළං කරන බවත්, උන්වහන්සේගේ දෙවන පැමිණීමේ දී අප උන්වහන්සේව මුණගැසෙන ඒ තේජාන්විත දිනය සඳහා බලාපොරොත්තුවෙන් හා සාමයෙන් අපව සූදානම් කරන බවත් මම අවංකවම සාක්ෂි දරනවා. මෙම පූජනීය වචන මම බෙදාගන්නේ යේසුස් ක්රිස්තුස්වහන්සේගේ ශුද්ධ වූ නාමයෙන්, ආමෙන්.