Laa’at li Kristo
(Mateo 16:16)
Naqaj naq eb’ li qalal qak’ajol te’xpaab’ li Jesukristo, te’xb’ak’ rib’ rik’in li Jesukristo ut lix Iglees rik’ineb’ li sumwank, ut te’xyal xq’e chi wank jo’ chanru li Jesukristo.
Naq lin yum, laj Eli, wan sa’ li cuarto grado sa’ li eskweel, sa’ lix clase xe’xb’aanu jun ch’ina k’anjel re jolomink tenamit, ut a’an xsik’e’ ru chi wank jo’ aj raqol aatin sa’ lix clase. Sa’ jun kutan, kiwulak aran jun tz’aqal aj raqol aatin sa’ li tenamit arin Utah, li kixk’e lix b’aatal chirix laj Eli, ut kixxaqab’ a’an jo’ aj raqol aatin sa’ li clase. Chirix a’an, laj Eli k’a’jo’ naq xk’e xch’ool chi tzolok chirix li chaq’rab’, ut chi tzolok chirix li tz’aqal aj k’ehol chaq’rab’, a’an li Jesukristo.
Chirix tzolok chi kaw chiru k’iila chaq’rab’, laj Eli xb’oqe’ xb’aan jun nimla facultad de derechos, re xtz’ilb’al rix ma taakanab’aaq chi tzolok aran. Moqon, a’an xye we, “Mama, xe’xpatz’ lajeeb’ li na’leb’ we. Lix raqik li patz’om a’an, “B’ar nakataw aana’leb’ chirix li k’a’ru tiik?” Laa’in xinye naq chalen chaq sa’ xtiklajik, eb’ li winq neke’xtzol xna’leb’eb’ chirix li tiikilal rik’ineb’ xnimal ru winq. Li winq li nintaw wi’ inna’leb’ chirix li tiikilal choq’ re lin yu’am, a’an li Jesukristo. Laa’in xinye naq wi chixjunileb’ li winq te’xyu’ami raj li na’leb’ kixk’ut li Jesukristo sa’ li raatin chiru li tzuul, chaab’ilaq raj wi’chik li ruchich’och’, ut jwal raj wi’chik li tuqtuukilal taawanq.” Chirix a’an xraqe’ li entrevista, ut a’an xk’oxla sa’ xch’ool, “Bueno, maamin tinruuq chi tzolok sa’ li facultad de derechos. Maa’ani naraj rab’inkil resil li Jesukristo sa’ jun nimla tzoleb’aal.”
Wiib’ xamaan chik chirix a’an, xyehe’ re laj Eli naq xk’ule’ chi tzolok, ut te’xtoj ajwi’ xtz’aq a’an. Rub’elaj xyeeb’al naq taatzoloq a’an, xoowulak re rilb’al li tzoleb’aal taatzoloq wi’. Li tzoleb’aal chanchan rochoch jun rey, ut wan sa’ xb’een jun tzuul li na’ilok chiru jun xchaq’al ru palaw. Naq xoob’eek chiru li nimla biblioteca ut eb’ li numleb’aal aran, xqil naq tz’iib’anb’il chiru t’ikr ut chiru pek li na’leb’ neke’tawman sa’ li aatin kixye li Jesus chiru tzuul.
Li aatin kixye a’an chiru li tzuul a’an li jun chi aatin q’axal nim xwankil li xyeeman, li naxk’ut li k’a’ru maajun wa k’utb’il. Maajun chik aatin naxk’ut jo’ a’an lix na’leb’ li Jesukristo, lix diosilal a’an, ut li qajom sa’ roso’jik a’an li wulak jo’ chanchan a’an.
Li wank choq’ xtzolom li Jesukristo natikla sa’ li qochoch, ut sa’ li Tzoleb’aal reheb’ li Kok’al naq yal waqxaqlaju po xyu’ameb’ li kok’al. Naqaj naq eb’ li qalal qak’ajol te’xpaab’ li Jesukristo, te’xb’ak’ rib’ rik’in li Jesukristo ut lix Iglees rik’ineb’ li sumwank, ut te’xyal xq’e chi wank jo’ chanru li Jesukristo.
Xpaabʼankil li Jesukristo
Xb’een wa, xpaab’ankil li Jesukristo.
Chirix naq li Jesukristo ki’aatinak chirix lix wahil li yu’am, “naab’aleb’ lix tzolom ke’xb’alq’usi rib’, ut ink’a’ chik neke’b’eek rik’in a’an.” Li Jesus kirileb’ li Kab’laju chi Apostol, ut rik’in rahil ch’oolejil kixpatz’ reheb’: “Ma teeraj ajwi’ xik laa’ex?”
Laj Pedro kichaq’ok:
“Qaawa’, ani aj-ik’in tooxik? Aawik’in wank li aatin nak’ehok li junelik yu’am.
“… Laa’o naqapaab’ ut naqanaw naq laa’at li Kristo, li Ralal li Yo’yookil Dios.”
Jo’ chanru kixk’ut laj Pedro rik’in lix b’aanuhom, li paab’aal a’an xpaab’ankil ut xk’ulub’ankil li ani ut li k’a’ru yaal. Ut re naq li qapaab’aal taak’amoq sa’ li kolb’a-ib’, tento naq jayalinb’ilaq rik’in li Qaawa’ Jesukristo. “Naqak’anjela li qapaab’aal chirix li Jesukristo naq naqak’ulub’a li na’leb’ naq a’an yo’yo, naq naqataw ru chan ru naq wan a’an, ut naq naqanaw naq yooko chixyalb’al qaq’e chi wank jo’ chanru naraj a’an.”
Li qaraarookil profeet, li Awa’b’ej Russell M. Nelson, xye: “Li paab’aal chirix li Jesukristo a’an xk’ub’elal chixjunil li paab’aal, ut a’an li nachal wi’ choxahil wankilal.”
Chan ru naru taqatenq’aheb’ li kok’al re naq kawaq xpaab’aaleb’ chirix li Jesukristo ut te’xk’ul lix choxahil wankilal a’an? A’ li Kolonel ajwi’ li tento too’iloq wi’.
Li Qaawa’ kiraatina li tenamit, ut kixye:
“Kʼehomaq reetal, laaʼin li Jesukristo. …
“Waklinqex ut chalqex wik’in. …
“… Li chʼutchʼuukil tenamit xkohebʼ chi uubʼej, ut keʼxchʼik li ruqʼ saʼ xkʼatq xsaʼ, ut keʼxchʼeʼ xkʼobʼolal li klawx saʼ ruqʼ ut saʼ roq, ut aʼin keʼxbʼaanu, ut xkoʼo li junjunq … ut keʼilok rikʼin xnaqʼebʼ ru ut keʼchʼeʼok rikʼin ruqʼebʼ, ut keʼxnaw chi chʼolchʼo ut keʼxchʼolobʼ xyaalal, naq aʼan ajwiʼ aʼan, li tzʼiibʼanbʼil resil chirix xbʼaanebʼ li profeet, li taachalq.”
Nink’e eeb’oqb’al naq teek’oxla chan ru nak’ulman a’in sa’ xyu’ameb’ li kok’al. Ma neke’rab’i li k’a’ru nach’olob’aman chirix li Jesukristo ut lix evangelio? Ma neke’ril li k’a’ru k’utk’u rik’in oxloq’ chirix lix k’anjel ut lix diosilal a’an? Ma neke’reek’a ut neke’xk’e reetal naq li Santil Musiq’ej naxk’ut xyaalal naq a’an yo’yo ut naq a’an ralal li Dios? Ma neke’xnaw li raatin ut lix k’anjel a’an?
Li wank sa’ komonil rik’in li Jesukristo, ut rik’in lix Iglees
Xkab’, li wank sa’ komonil rik’in li Jesukristo, ut sa’ lix Iglees.
Eb’ lix tenamit li rey Benjamin ke’xyal jun nimla jalaak sa’ xch’ooleb’, ut rik’in sumwank ke’xteneb’ rib’ chixb’aanunkil li k’a’ru naraj li Dios. Sa’ xk’ab’a’ li sumwank ke’ok wi’ rik’in li Dios ut li Jesukristo, “ralal xk’ajol li Kristo kiyehe’ reheb’, li ralal ut lix rab’in a’an.” Jo’ komon sa’ Lix Iglees li Jesukristo reheb’ laj Santil Paab’anel sa’ Roso’jikeb’ li Kutan, sa’ xk’ab’a’eb’ li sumwank, tento sa’ qab’een xk’eeb’al chi nimank li rawa’b’ejihom a’an, ut xkawresinkil qib’ choq’ re lix k’ulunik a’an.
Chan ru naru naqatenq’aheb’ li kok’al chixk’ulb’aleb’ ut chixpaab’ankileb’ li loq’laj sumwank? Sa’ li hu Kim, Taaqehin, sa’ xtiqb’al li aatin A ut B, neke’tawman li na’leb’ ut li tzol’leb’ re xtenq’ankileb’ li junkab’al ut eb’ laj tzolonel ut laj jolominel re xkawresinkileb’ li kok’al re te’kanaaq sa’ xb’ehil li sumwank re li Dios chiru chixjunil lix yu’ameb’.
Li wank jo’ li Jesukristo
Rox, li wank jo’ li Jesukristo.
Sa’ lix Hu laj Mormon, li Kolonel kixye reheb’ lix tzolom naq te’xtaaqe a’an sa’ chixjunil: “K’a’ chi winqul tento naq texwanq laa’ex? Chi yaal ninye eere, joʼ chanru ajwiʼ laaʼin.”
Chirix naq xe’kub’e xha’ ut xe’k’ojob’aak sa’ li Iglees, chan ru naru taqatenq’aheb’ li kok’al re te’xpaab’ eb’ li sumwank re ch’utub’aak rik’in li Jesukristo, rochb’eeneb’ li ras riitz’ineb’? Re toowanq choq tzolom chiru li qayu’am, tento naq toowanq “choq’ aj b’aanuhom re li aatin, ut ink’a’ ka’ajwi’ choq’ aj ab’ihom re.”
Naq yookex chixk’eeb’al xb’oqb’aleb’ lix tzolom li Qaawa’ li toj kok’eb’, chek’e eech’ool naq teetenq’aheb’, teetzoleb’, ut texb’eeq rochb’eeneb’, re naq te’xtaw li b’e. Chetenq’aheb’ li kok’al naq yookeb’ chixkawresinkil rib’ chi k’utuk, chi ch’olob’ank, chi tijok, ut chi k’anjelak re naq kawaqeb’ xch’ool ut te’saho’q xch’ool naq neke’xb’aanu lix k’anjeleb’. Rik’in li Musiq’ej, chesik’ xtenq’ankileb’ a’an chixnawb’al naq reheb’ a’an li Iglees a’in, ut naq wan xteneb’ankileb’ re xkawresinkil li ruchich’och’ choq’ re lix k’ulunik li Kolonel.
Naq naqajayali li qayu’am rik’in li Jesukristo, najalman chi junajwa li k’a’ru naqaj, ut chan ru naqasik’ a’an. Lix jalajik li qach’ool naxjal chixjunil! A’an naxjal li qach’ool, “jo’kan naq maak’a’ chik li qajom re xb’aanunkil li maa’usilal, re b’an xb’aanunkil rajlal li chaab’ilal.” Naxjal chan ru naqoksi li qahoonal ut li qatumin, k’a’ru li naqil, li naqab’i, ut li naqawotz. Naxjal ajwi’ chan ru naq nokosumen sa’ jun li patz’ink re ok sa’ jun nimla tzoleb’aal li naru najalok re li qayu’am.
Aajel ru naq naqakanab’ chi lemtz’unk lix saqen li Jesukristo sa’ chixjunil li k’a’ru wan sa’ li qayu’am. Wi ink’a’ yooko chixch’olob’ankil xyaalal lix diosilal li Kristo rub’elaj naq kiyo’la, lix loq’laj k’anjel a’an, ut lix waklijik a’an chi yo’yo sa’ li qochoch ut sa’ chixjunileb’ li ch’utam sa’ li Iglees, li k’a’ru naqaye chirix li rahok, li k’anjelak, li tiikilal, li tuulanil, li b’antioxink, ut li uxtaan, yal nakana jo’ ch’ina-usil aatin chirix li sahil wank. Wi maak’a’ li Jesukristo, maak’a’ li wankilal chi jalaak, maak’a’ k’a’ru naqajayali wi’ qib’, maak’a’ xyaalalileb’ li ch’a’ajkilal sa’ li qayu’am. Wi laa’o moko yalb’il ta qaq’e chi wank choq’ xtzolom li Jesukristo, naru naq a’anaq nimla sachk choq’ reheb’ li qalal qak’ajol.
Naq naqaye reheb’ li qakok’al naq neke’qara, ma yooko ajwi’ chixyeeb’al reheb’ naq raab’ileb’ xb’aan lix Choxahil Yuwa’ ut li Kolonel Jesukristo? Li qarahom laa’o naru naxk’ojob’eb’ xch’ool ut naxwaklesiheb’ xmusiq’, a’ut lix rahom a’an naru nasantob’resin, nakolok, ut nak’irtesin.
Li Jesus li naqak’ut laa’o tento naq maawa’aq jun Jesus li yal yoob’anb’il, malaj li utz’u’ujinb’il, malaj li maak’a’ xwinqilal, malaj li maak’a’ naxpatz’, malaj li moko nawb’il ta ru, a’an b’an jun Jesus li k’eeb’il xloq’al, li q’axal nim xwankil, li waklijenaq chi yo’yo, li taqenaq xloq’al, li nimajel ru, li wan xwankil, li wan choq’ Ralal li Dios, ut li kaw xmetz’ew chi kolok. Jo’ jun ch’ina al xye we sa’ li Islas Filipinas, “Wan qak’ulub’il re tookole’q!” Sa’ lix santil ut loq’laj k’ab’a’ li ani “kik’ehe’ xb’aan li Dios choq’ xtojb’al rix li maak,” a’ li Jesukristo, amen.