Lix rahom li Dios

Junxil xinwulak wochb’een lin junkab’al toj najt chirix li tenamit, ut xoowar rub’el li choxa chi maak’a’ xtz’apb’al qab’een. Xqil li Vía Láctea, b’ar wi’ li chahim jwal neke’tam, ut wankeb’ ajwi’ li chahim li junpaat neke’nume’ ut neke’xmuqb’esi rib’. Naq nasaho’ qach’ool chirix lix yiib’ahom li Dios, xqeek’a naq xoowan sa’ junajil rik’in li Dios. Eb’ li qakok’al xe’k’i chaq Hong Kong, b’ar wi’ maajun sut xe’ril chaq li na’leb’ a’in. Xe’xpatz’ we ma a’an ajwi’ li choxa aran sa’ qatenamit. Xinyal xch’olob’ankil chiruheb’ naq yal jun ajwi’ li choxa wan, a’b’an ch’a’aj rilb’al li chahim sa’ qatenamit yal xmaak li luz ut li sib’.

Li Santil Hu naxye naq “li paab’aal a’an xtoonal li k’a’ru na’oyb’enimank; a’an xkawub’ li ink’a’ na’ilmank ru.” Us ta li aleek ut k’a’aq chik re ru naxmoy ru li k’a’ru naqil sa’ musiq’ej, wi naqak’anjela qapaab’aal chirix li Dios ut li Jesukristo, li Ralal, naru naqanaw naq wankeb’, ut naq nokohe’xk’oxla.

Sa’ lix Hu laj Mormon, li profeet aj Lehi kiril “jun toon li che’, atawal wi’ li ru choq’ re xsahob’resinkil xch’ool junaq” ut “q’axal ki’, chiru chixjunil.” Naq kixyal li ru che’, kinujob’resiik li raam rik’in sahil ch’oolejil q’axal nim, ut kiraj naq lix junkab’al tixyal ajwi’. Naqanaw naq li ru che’ nareetali “lix rahom li Dios,” ut chanchan laj Lehi, laa’o nokoru ajwi’ chi saho’k chixnawb’al chirix li Dios wi naqab’oq a’an sa’ qayu’am.

Li Jesukristo naxk’utb’esi lix rahom li qaChoxahil Yuwa’ choq’ qe. Naq kixtoj rix li maak, kixk’ul li qamaak sa’ xb’een ut kitene’ sa’ xk’ab’a’ li qamaa’usilal. Xriiqa lix rahil qach’ool, xk’am xrahil li qaam, ut xk’ul sa’ xb’een li qarahilal ut li qayajel. Naxtaqla chaq li Santil Musiq’ej chixk’ojob’ankil qach’ool, ut li Musiq’ej a’an naruuchini li sahil ch’oolej, li tuqtuukilal, ut li paab’aal, li naxk’e qayo’onihom ut li qarahom.

Us ta wan xrahom li Dios choq’ qe chiqajunil, wankeb’ li neke’xsik’ chi anchal xch’ool, ut wankeb’ li neke’raj a’b’an moko k’ulub’ejeb’ ta naq neke’xk’oxla. Wankeb’ ajwi’ li neke’xxuwa naq oso’k re li rahok a’an rik’ineb’. Li loq’laj hu ut lix profeet li Qaawa’ neke’xye naq naru taqeek’a xrahom li Dios rajlal wi naqoksi li rusilal li Kristo chixjalb’al qak’a’uxl, chi kuyuk maak, chixpaab’ankileb’ li taqlahom, ut chixtenq’ankileb’ li qas qiitz’in. Naqeek’a xrahom li Dios naq naqab’aanu li k’a’ru nokoxjilosi rik’in, maare a’an raatinankil wulaj wulaj rik’in li tijok ut li loq’laj hu, ut naq naqakanab’ xb’aanunkil li k’a’ru nokoxnajtob’resi rik’in, maare a’an li q’etq’etil, li wech’ok, ut li q’etok aatin.

Li Awa’b’ej Russell M. Nelson kixk’e qab’oqb’al re naq “taqisi, chi tenq’anb’ilo xb’aan li Kolonel, li k’a’ru q’eel sa’ li qayu’am” ut re naq “taqakanab’ li k’ahil ch’oolej.” Kixwaklesi qach’ool re naq “taqakawresi li qamusiq’ejil k’ojleb’aal” rik’in “xjayalinkil qayu’am rik’in [li Kolonel] ut rik’ineb’ li k’ojob’anb’il k’anjel ut sumwank re lix santil ochoch.” Kixye naq wi “naqapaab’eb’ li sumwank noko’ok wi’ sa’ li santil ochoch, k’a’jo’ wi’chik naq naqak’ul lix wankil li Qaawa’ re xk’eeeb’al qametz’ew. … Naqeek’a lix saq ruhil rahom li Jesukristo ut li qaChoxahil Yuwa’ chi q’axal naab’al!”

Wan jun li wamiiw li jwal ch’ina-us lix junkab’al ut jwal chaab’il lix trab’aaj. A’b’an chixjunil a’in kisach naq ink’a’ chik kiru chi trab’ajik xmaak jun yajel, ut naq lix sum kixjach rib’ rik’in. Ch’a’aj wan chalen chalen, a’b’an toj naxk’ul xkawilal rik’in lix rahom choq’ reheb’ lix kok’al ut rik’in lix sumwank rik’in li Dios. Moqon, kixnaw ajwi’ naq lix sum kisumlaak chi ak’il ut kixpatz’ naq taasachmanq resil lix junajinkileb’ sa’ li santil ochoch. Jwal ch’a’aj xreek’a a’an. Kiwulak sa’ rochoch li Qaawa’ re xtuqub’ankil xna’leb’ aran. Wulajaq chik, xtaqla we li mensaaj a’in:

“Jwal ch’ina-us li xink’ul sa’ li santil ochoch ewer. Tz’aqal yaal naq toj yoo chaq b’ayaq li xik’ ilok sa’ waam. … Ak xinnaw naq tento tinjal ink’a’uxl, ut ak xintijok wulaj wulaj re naq truuq tinb’aanu. … Ewer sa’ li santil ochoch, xweek’a chi yaal naq li Musiq’ej xrisi li xik’ ilok sa’ waam. … Jwal sa xweek’a naq x’el wik’in. … Jun li nimla iiq sa’ inb’een ak xseeb’o’ chik.”

Us ta toj wankeb’ lix ch’a’ajkilal, toj nakana sa’ xch’ool li wamiiw li usilal kixk’ul sa’ rochoch li Qaawa’, naq lix rahom li Dios kixtenq’a chi nach’ok rik’in li Dios, chirilb’al naq toj tixk’ul li us sa’ xyu’am, ut chixtz’eqb’al b’ayaq lix xiw.

Naq naqak’ul lix rahom li Dios, naru taqakuy li qiiq ut li k’a’ru naraj li Dios chi sa li qach’ool ut chi moko ch’a’aj ta. Kaw qach’ool rik’in li Dios naq ink’a’ tixkanab’ lix sumwank qik’in, naq toorochb’eeni sa’ qach’a’ajkilal ut tooxkol chiru li moosil. Naqaj ajwi’ xwotzb’al li rahok naqeek’a rik’in li qajunkab’al ut rik’ineb’ li neke’qara. Chanchan lix junkab’al laj Lehi, li junjunq komon naru tixye ma taaraj tixyal li ru che’, ut laa’o tooruuq chixraab’aleb’, chi wotzok rik’ineb’, ut chixb’oqb’aleb’ re naq te’reek’a xrahom li Dios.

Re xtenq’ankileb’ chireek’ankil xrahom li Dios, tento taawanq xna’leb’ li Kristo qik’in, maare a’an li tuulanil, li rahok, li toq’ob’ank-u, ut li kuyuk, ut tento taqak’ameb’ rik’in li Kristo rik’in xpaab’ankileb’ li xnimal ru chaq’rab’, a’an xraab’al li Dios ut li qas qiitz’in.

Jun li qalal xch’a’ajko’ rik’in xraab’al rib’ ut xtawb’aleb’ li ramiiw naq toj saaj chaq. Li wixaqil ut laa’in xootijok re xnawb’al chan ru xtenq’ankil, ut xqaj xb’aanunkil k’a’ru tooxtaqla li Qaawa’ chixb’aanunkil. Moqon, xweek’a naq naru tinpatz’ re li awa’b’ej reheb’ li xb’eenil ma wan ani sa’ aajel ru li truuq tinwula’ani wochb’een li walal. Naq xtz’il rix, li awa’b’ej xooxtaqla chirula’aninkil jun li qana’chin li moko kaw ta rib’, ut kixk’e qaliceens rik’in li awa’b’ej re uq’ej re naq rajlal xamaan taqak’e li loq’laj wa’ak sa’ rochoch li qana’chin. Xwulak chiwu li na’leb’ a’an, a’b’an ink’a’ xinnaw ma taawulaq chiru li walal li ula’anink rajlal xamaan.

Naq xqula’ani xb’een sut, xraho’ qach’ool chirix li qana’chin xb’aan naq jwal ra wan. Jwal xb’antioxi qe li loq’laj wa’ak, ut xwulak chiqu rula’aninkil rochb’een lix b’eelom. Sa’ jun li domingo, maa’anihin laa’in ut ink’a’ xinru chirochb’eeninkil li walal sa’ li ula’anink, a’b’an xinye re naq toj taaxik. Naq xinq’aj, jwal xwaj xnawb’al k’a’ru xk’ul li walal rik’ineb’. Chan li walal naq kixk’e reetal naq ink’a’ nak’eeman reheb’ li rech saajil xkomon li chaab’il k’anjel a’in. Chan ajwi’ naq chi jo’kan naq kixk’am li riitz’in rik’in re naq tixxtenq’a sa’ li k’anjel, ut chaab’il x’el li loq’laj wa’ak, a’b’an ra chaq xch’ool li qana’chin xb’aan naq chiru li xamaan xb’oqeb’ chaq li ramiiw chirilb’al li pelicula sa’ rochoch, a’b’an ink’a’ nak’anjelak lix k’utleb’ jalam-u. Li walal xtz’il rix sa’ internet, xtaw b’ar wan xjotb’al li ch’iich’, ut xyiib’ chi junpaat choq’ re li qana’. Xsaho’ xch’ool li walal chixk’ulb’al jun lix k’anjel li naxtenq’a li qana’chin. Xreek’a xrahom li Dios choq’ re.

Wi laa’at nakayal aaq’e a’b’an toj ch’a’aj wankat, wi li Dios anchal ink’a’ narab’i laa tij, malaj wi ink’a’ nakaweek’a xrahom li Dios, chanawaq naq toj wan xloq’al xyalb’al aaq’e, ut naq li qaChoxahil Yuwa’ ut li Jesukristo neke’xnaw aawu, nakate’rab’i, ut nakate’xra.

Naq lix jukub’eb’ lix tzolom li Jesus “kaw na’eek’asiik xb’aan li xkaw oq li ha’,” li Kolonel kib’eek chaq rik’ineb’ sa’ xb’een li ha’, ut kixye “Kawaq eech’ool: laa’inin; mexxuwak.” Naq laj Pedro kiraj b’eek sa’ xb’een li ha’, li Jesus kixye re, “Kim.” Ut naq laj Pedro kixuwak ut ki’ok raj chi ha’, li Kolonel junpaat kixye’ li ruq’ re xkolb’al, ut naq yoo chirisinkil sa’ li ha’ kixye, “Ka’ch’in laa paab’aal, at winq. K’a’ut naq xwiib’ank laa ch’ool?”

Naq kaw nokoxten li iq’ sa’ qayu’am, ma toj taqasik’ ru li sahil ch’oolej ut li kawil ch’oolej? Chan ru taajultiko’q qe naq li Kolonel ink’a’ nokoxkanab’ ut naq nach’ wan qik’in, us ta ink’a’ naqak’e reetal? Ma wan li qach’ool chixsik’b’al li Jesus naq jwal ch’a’aj li b’e chiqu? Ut k’a’ru naxb’aanu li Kolonel re qakolb’al naq yooko chi ok sa’ ha’? Chan ru too’iloq wan wi’ li Jesus, chi maak’a’ li wiib’ank ch’oolej chi moko li xuwak?

Wi taawaj reek’ankil xrahom li Dios, tatinb’oq chixb’aanunkileb’ li na’leb’ we’keb’:

• Xb’een, mat-eek’an jun k’amokaq re naq taajultiko’q aawe naq laa’at jun ralal li Dios, ut re naq taab’antioxi li usilal nakak’ul.

• Xkab’, tijon wulaj wulaj ut patz’ re li Dios ani sa’ laa sutam naru tatxtenq’a chireek’ankil xrahom.

• Rox, patz’ chi anchal aach’ool k’a’ru taab’aanu re xtenq’ankil li komon a’an chireek’ankil xrahom li Dios.

• Ut li xkaa, matb’ay chixb’aanunkil li k’a’ru naxye aawe li Musiq’ej.

Wi junelik nokotijok chirixeb’ li qas qiitz’in, li Dios tixk’ut chiqu ani tooruuq chixtenq’ankil. Ut wi ink’a’ nokob’ay chixb’aanunkil li naxye, li Dios naru tooxtaqla chaq jo’ xsumenkil lix tij li qas qiitz’in. Timil timil, naq ak xook’ay xb’aanunkil chi jo’kan, te’sumeeq li qatij laa’o, ut taqeek’a xrahom li Dios.

Wiib’ oxib’ po chaq, naq xoowulak Vietnam, li wixaqil ut laa’in wanko sa’ jun li avion naq yoo jun li kaq-sut-iq’. Jwal kaw na’eek’an li avion, ut sa’ li ventaan naqil li choql, li hab’, ut raq’ li kaaq. Chirix naq li avion xyal xq’e chixtaqsinkil rib’, kiwulak sa’ xb’eeneb’ li choql ut xk’utun jun li ilok jwal ch’ina-us. Xnaq wi’chik sa’ qach’ool li qaChoxahil Yuwa’ ut li Jesukristo ut lix nimal ru xrahom choq’ qe.

Ex wamiiw, rik’in naq week’ahom xrahom li Dios, sa’ lin ch’ool chixyeeb’al eere naq li Jesukristo, a’an lix rahom li Dios. Nokoxra chi tz’aqal, chiqajunjunqal, ut chi junelik. Naq yooko chixtaaqenkil li Jesus, choonujaaq taxaq rik’in xrahom, ut laa’aqo taxaq jun saqen li naxk’am xb’eheb’ li qas qiitz’in sa’ xrahom. Sa’ xk’ab’a’ li Jesukristo, amen.