Xwankilal li Dios rik’ineb’ li saaj winq loq’eb’

B’antiox aawe, Elder Andersen, laa waatin chirix lix wankilal li tijonelil ut lix wankil lix tojb’al rix li maak xb’aan li Kolonel.

Sa’ jun li domingo chiru li enero xnume’, naq chunchuukin sa’ li ch’utam re li loq’laj wa’ak, ke’k’ulub’aaq numenaq kab’laju chi saaj winq re naq te’k’ojob’aaq sa’ xk’anjel li Tijonelil re Aaron. Xweek’a naq anchal x’eek’an li ruchich’och’ rub’el qoq.

Xink’e reetal naq sa’ chixjunil li ruchich’och’, a’ yaal reheb’ li zona horaria, sa’ xkomoneb’ chik li ch’utam a’in, k’iila mileb’ laj tenq’anel, laj tzolonel, ut laj tij—jo’ li ramiiw li Elder Holland, laj Easton—yookeb’ chi k’ulub’aak re naq te’k’ojob’aaq sa’ xk’anjel li tijonelil chiru chixjunileb’ xyu’am, re xch’utub’ankil Israel yalaq b’ar.

Rajlal enero, nak’eeman li uq’ej sa’ xb’een xjolomeb’ maare 100.000 chi saaj winq, ut li loq’laj k’anjel a’an naxjunajiheb’ sa’ jun li wankilal komoninb’il chaq chalen lix k’ojlajik wi’chik li evangelio rik’in laj Jose ut laj Oliver, ut rik’in ajwi’ laj Jwan aj Kub’sihom Ha’, ut li Jesukristo.

Anajwan ut, sa’ li iglees a’in, ink’a’ k’aynaqo chixnimankil qib’. K’aynaqo b’an chixtuulanob’resinkil qib’.

A’ut naq xwil li nimla teep aj saaj winq sa’ li tijonelil chanchan nimla kaaq sa’ chixjunil li ruchich’och’, xinpatz’ wib’—rik’in naq wanko sa’ li “iglees re sahil ch’oolej” ma ink’a’ raj taqayaab’asi resil sa’ xb’eeneb’ chaq li kab’l. “Anajwan” chankin, “taawanq raj li trompeet ut li choqink rik’in tzojtzoj ut nimla cohete. Maare ajwi’ li desfiil!”

Rik’in naq naqanaw chan ru xwankil li Dios chi yaal, xqil naq xjalb’ehiik li ruchich’och’ naq li wankilal a’an xnujob’resi li ruchich’och’.

Naq neke’k’ojob’aak li saaj winq a’in, neke’ok chi junajwa sa’ jun li k’anjel re naq te’taqlaaq sa’eb’ li na’ajej b’ar wi’ lix wanjikeb’, lix tijeb’, ut lix wankilal lix tijonelil li Dios li wan rik’ineb’ jwal tixjal li wank aran.

Lix numsinkil chaq li wankilal a’in kitikla sa’ ruq’ jun anjel li kitaqlaak xb’aan li Dios. Laj Jwan aj Kub’sihom Ha’ najter, li waklijenaq wi’chik chi yo’yo, kixk’ut rib’ chiru laj Jose ut laj Oliver, kixk’e li ruq’ sa’ xb’eeneb’ xjolom, ut kixye, “Sa’ eeb’een laa’ex, ex wech moosil, sa’ lix k’ab’a’ li Mesias nink’ojob’ li Tijonelil re laj Aaron, li nak’amok re li laaw re lix k’anjeleb’ li anjel, ut re li evangelio re jalb’a-k’a’uxlej, ut re li kub’iha’ chi sub’b’il rub’el ha’ re risinkileb’ li maak” (Tzol’leb’ ut Sumwank 13:1).

Laj Jwan kixye re li wankilal a’in li “Tijonelil re Aaron,” chanchan xk’ab’a’ li ras laj Moises, ut li rech aj tij. Najter chaq, lix k’anjel li Tijonelil re Aaron, a’an li k’utuk ut xtenq’ankileb’ li k’ojob’anb’il k’anjel—li k’ojob’anb’il k’anjel naxjayali li paab’aal rik’in li Mesias chal re, a’an li Jesukristo (chi’ilmanq Deuteronomio 33:10).

Li hu Numeros naxye naq a’aneb’ laj tij re Aaron li te’xch’e’ ut te’xtuqub’ li k’a’ru na’oksiman re xb’aanunkil li k’ojob’anb’il k’anjel. “Laj Aaron ut eb’ li ralal xk’ajol taaxaqab’eb’ chi k’anjelak [sa’] … li meex, … [ut] li k’a’aq re ru li nak’anjelak re loq’onink” (Numeros 3:10, 31).

Sa’ xq’ehil li Najter Chaq’rab’, li k’anjel re xmayejankil li xul kitz’aqob’resiik ru ut kiraqe’ rik’in li Jesukristo ut lix tojb’al rix li maak. Li najter k’anjel a’an wan chik reeqaj rik’in li k’anjel li nareetali li loq’laj wa’ak rik’in li Qaawa’.

Anajwan, li Qaawa’ naxb’oqeb’ li wankeb’ sa’ li tijonelil chixb’aanunkil li k’a’ru kib’aanuman ajwi’ najter, a’an li k’utuk ut xb’aanunkil li k’ojob’anb’il k’anjel—re naq tixjultika qe lix tojb’al rix li maak.

Naq eb’ laj tenq’anel, laj tzolonel, ut laj tij neke’tenq’an rik’in li loq’laj wa’ak, neke’osob’tesiik jo’ chanru na’osob’tesiik yalaq ani: rik’in xpaab’ankil li sumwank li neke’ok wi’ rik’in xk’ulb’al li wa ut li ha’. A’ut rik’in xb’aanunkil li loq’laj k’anjel a’in, neke’xtzol ajwi’ xna’leb’ chirixeb’ lix teneb’ankil ut lix k’anjel sa’ li tijonelil.

Li Tijonelil re Aaron, naqaye naq a’an li tijonelil re kawresink xb’aan naq naxtenq’aheb’ li saaj winq chireek’ankil li iiq’ ut li sahil ch’oolej rik’in li k’anjelak sa’ xk’ab’a’ li Dios, li naxkawresiheb’ choq’ re xkomon chik li k’anjel, naq maare te’b’oqe’q chixk’eeb’al li tenq’ li ink’a’ xe’xk’oxla chaq—maare a’an rosob’tesinkileb’ li komon naq lix yo’onihomeb’ ut li rajomeb’, malaj tz’aqal lix yu’ameb’ anchal xiwxiw wankeb’.

Li nimla tenq’ank a’an naraj li nimla kawresink-ib’.

Li hu Tzol’leb’ ut Sumwank naxye naq eb’ laj tenq’anel ut laj tzolonel “te’xk’e xtijb’aleb’, te’ch’olob’anq, te’waklesinq ch’oolej, ut te’k’utuq, ut te’xb’oqeb’ chixjunil chi chalk rik’in li Kristo” (Tzol’leb’ ut Sumwank 20:59). Rochb’eeneb’ li k’anjel a’an, laj tij “taajultikanq aatin, … ut taakub’sinq ha’” (Tzol’leb’ ut Sumwank 20:50).

Anchal xiikileb’ li k’anjel a’an, a’b’an relik chi yaal, ak neke’ux li na’leb’ a’in yalaq b’ar sa’ li ruchich’och’.

Jun li obiisp kixk’uteb’ li k’anjel a’in chiru li ak’ awa’b’ejil reheb’ laj tenq’anel. Li awa’b’ejil ke’ok chixtz’ilb’al rix chan raj ru li k’anjel a’an sa’ xyanqeb’ lix komon. Ke’xye naq te’ok raj chirula’aninkileb’ li cheek’el komon re naq te’xnaw k’a’ru aajel ru choq’ reheb’.

Jun reheb’ li ke’rula’ani, a’an laj Alan xk’ab’a’; a’an jun li winq kaw li raam ut wan naq najosq’o’. Li rixaqil laj Alan, li xWanda, ak ki’ok junxil sa’ li Iglees, a’b’an laj Alan, qayehaq naq toj tenq’aak naraj.

A’b’an eb’ laj tenq’anel toj ke’k’anjelak, ut yal neke’se’ek naq laj Alan naxye li kawil aatin naq yookeb’ chixtenq’ankil. Ch’a’aj naq xik’ te’ile’q aj tenq’anel, ut timil timil ke’wulak chiru laj Alan. Timil timil, ke’xb’oq ajwi’ sa’ li iglees.

“Ink’a’ nawulak chiwu li iglees,” chan.

“Laa’o b’an nokowulak chawu,” chankeb’. “Chalqex qikʼin. Naru tatwulaq ka’ajwi’ sa’ qach’utam laa’o, wi taawaj.”

Li obiisp xye naq us a’an, ut aj Alan kiwulak—ut ink’a’ kixkanab’ wulak.

Eb’ aj tenq’anel ke’ok jo’ aj tzolonel, ut naq neke’xtenq’a laj Alan, naxk’ut chiruheb’ li yiib’ank carro ut xkomon chik li k’anjel. Naq eb’ aj tzolonel ke’ok jo’ aj tij, laj Alan ak naxye reheb’ “li wamiiw.”

Aran, ak yookeb’ chixkawresinkileb’ rib’ choq’ re li mision, ut ke’xpatz’ re laj Alan ma truuq te’xyal li k’utuk na’leb’ rik’in. Kixye naq maajo’q’e taaraab’i chi moko tixpaab’, a’b’an naru te’tzoloq yal sa’ rochoch.

Toja’ naq kiyajer laj Alan. Ut kiq’uno’ lix ch’ool.

Ut sa’ jun lix ch’utameb’, kixpatz’ reheb’ naq te’tijoq re naq truuq tixkanab’ li mayib’k, ut ke’xb’aanu ajwi’. Toja’ naq ke’xtaaqe laj Alan toj sa’ rochoch ut ke’xtz’eq chixjunil lix may.

Naq timil timil nalaj xkawilal laj Alan ut nakana sa’ b’anleb’aal, “eb’ li ramiiw” neke’xtenq’a, ut neke’xk’ut xwankilal li tijonelil ut li rahok chi tz’aqal yaal (chi’ilmanq Tzol’leb’ ut Sumwank 121:41).

Ki’ux ajwi’ li sachb’a-ch’oolej naq laj Alan xpatz’ naq te’xkub’si xha’—a’b’an kikam ut ink’a’ kiru xb’aanunkil. Chi patz’b’il xb’aan laj Alan, eb’ li saaj winq a’an ke’k’anjelak sa’ xmuqb’al laj Alan jo’ aj yehol aatin ut aj k’amol xkaaxonil, b’ar wi’ xe’xk’e xtijb’aleb’, xe’ch’olob’ank, xe’waklesin ch’oolej, xe’k’utuk, ut xe’xb’oqeb’ chixjunil chi chalk rik’in li Kristo.

Ut moqon, sa’ li santil ochoch, jun reheb’ “li ramiiw laj Alan” kixkub’si xha’ li awa’b’ej reheb’ laj tenq’anel sa’ xk’ab’a’ laj Alan.

Chixjunil li kixye laj Jwan aj Kub’sihom Ha’, ke’xb’aanu. Ke’xb’aanu li neke’xb’aanu laj tenq’anel, laj tzolonel, ut laj tij sa’ chixjunil li Iglees ut chiru chixjunil li ruchich’och’.

Li k’anjel re li loq’laj wa’ak wan ajwi’ sa’ xb’eeneb’ li wankeb’ sa’ li Tijonelil re Aaron.

Sa’ li chihab’ xnume’ xinnaw ru jun li obiisp ut li rixaqil. Naq toje’ xikeb’ re chirilb’al xkub’sinkil xha’ li ralal, ke’xnumsi chaq jun li rahilal jwal nim naq sa’ junpaat kikam lix ch’ina ixaqa’al, xTess xk’ab’a’.

Wulajaq chik, eb’ li komon ke’xchutub’ rib’ choq’ re li loq’laj wa’ak chi numtajenaq li toq’ob’ank-u, ut ke’raho’ ajwi’ xch’ool a’an sa’ xk’ab’a’ xsachik li chaab’il ixqa’al. Maajun xk’oxla naq taawulaq li obiisp ut lix junkab’al sa’ li iglees chiru li kutan a’an, a’b’an wiib’ oxib’ minuut ma natikla li ch’utam, ke’ok chi ch’anch’ookeb’ ut ke’chunla.

Li obiisp kinume’ chiru li pulpito ut ink’a’ kichunla sa’ lix siiy rik’ineb’ li rech aj k’anjel; kichunla b’an sa’ xyanqeb’ aj tij chiru li meex re li loq’laj wa’ak.

Naq ink’a’ naru chi wark sa’ li q’ojyin xnume’ xmaak xyot’ik lix ch’ool, kixk’ul jun na’leb’ sa’ xk’a’uxl chirix li k’a’ru jwal aajel ru choq’ re lix junkab’al—ut choq’ re ajwi’ li komon sa’ li iglees. A’an rab’inkil xyaab’ xkux lix obiisp, li awa’b’ej re li Tijonelil re Aaron, lix yuwa’ li ra xch’ool, chixyaab’asinkil li na’leb’ yeechi’inb’il sa’ li k’anjel re li loq’laj wa’ak.

Jo’kan naq chirix a’an kiwiq’la rik’ineb’ laj tij a’an ut ki’aatinak rik’in lix Choxahil Yuwa’. Sa’ xyi li nimla ch’a’ajkilal re li hoonal a’an, kixyaab’asi jun li aatin jwal nim xwankil chiru li kanab’anb’ilo chixyeeb’al sa’ li yu’am a’in.

A’an li aatin li wan xwankil sa’ li junelik q’e kutan.

A’an li aatin re loq’laj k’anjel.

Aatin re sumwank.

Naxk’e qataqlankil re naq taqajayali tz’aqal rajom li yu’am a’in—jo’ ajwi’ li maatan q’axal nim li naru taqak’ul sa’ li k’a’ru kixk’uub’ chaq li Dios choq’ qe.

Ma taak’e reetal k’a’ru xe’rab’i li komon sa’ li kapiiy a’an sa’ li kutan a’an—rik’in li aatin k’aynaqo chirab’inkil rajlal domingo sa’eb’ li qach’utleb’aal kab’l?

“At Dios, li Junelik Yuwaʼbʼej, naqatzʼaama chawu saʼ lix kʼabʼaʼ laa Walal, li Jesukristo, naq chawosobʼtesi ut chasantobʼresi li kaxlan wa aʼin choqʼ re li raamebʼ chixjunil li teʼkʼuluq re, re naq teʼwaʼaq re xjultikankil lix tibʼel laa Walal, ut teʼxkʼut xyaalal chawu, at Dios, li Junelik Yuwaʼbʼej, naq wankebʼ xchʼool chixkʼulbʼal saʼ xbʼeenebʼ lix kʼabʼaʼ laa Walal, ut junelik chixjultikankil aʼan, ut chixpaabʼankil lix taqlahom li kixkʼe chaq rehebʼ; re taaruuq taawanq junelik lix Musiqʼ rikʼinebʼ. Amen” (Tzol’leb’ ut Sumwank 20:77).

Ut chirix a’an: “At Dios, li Junelik Yuwaʼbʼej, naqatzʼaama chawu, saʼ lix kʼabʼaʼ laa Walal, li Jesukristo, naq chawosobʼtesi ut chasantobʼresi li haʼ aʼin, choqʼ re li raamebʼ chixjunil li teʼukʼaq re, re naq teʼxbʼaanu re xjultikankil lix kikʼel laa Walal, li kihoyeʼ choqʼ rehebʼ; re naq teʼxkʼut xyaalal chawu, at Dios, li Junelik Yuwaʼbʼej, naq junelik taajultikoʼq aʼan rehebʼ, re naq taaruuq taawanq lix Musiqʼ rikʼinebʼ. Amen” (Tzol’leb’ ut Sumwank 20:79).

Li chaab’il na’b’ej yuwa’b’ej a’an neke’xnaw naq ak xtz’aqlok ru li aatin a’an. Relik chi yaal, chi k’ojob’anb’ileb’ xch’ool chi junajwa, nawan “lix Musiq’ rik’ineb’.”

Junelik ninb’antioxin chirix naq li wankeb’ sa’ li Tijonelil re Aaron, rik’in lix wankilal ut lix loq’laj k’anjel, nokohe’rosob’tesi chiqajunilo rik’ineb’ li laaw re “lix k’anjeleb’ li anjel, ut re li evangelio re jalb’a-k’a’uxlej, ut re li kub’iha’ chi sub’b’il rub’el ha’ re risinkileb’ li maak” (Tzol’leb’ ut Sumwank 13:1). Sa’ xk’ab’a’ li Jesukristo, amen.