Chawil aawib’ chiru li xkab’il aaleek
Maamuq aawib’ chiruheb’ li te’rahoq aawe ut li te’tenq’anq aawe; ayu b’an sa’ aanil rik’ineb’ a’an.
K’iila chihab’ chaq, naq kinket kab’laju chihab’, kine’xb’oq chi xik xb’een sut sa’ jun campamento re li Tijonelil re Aaron. Chalen chalen nawoyb’eni naq tine’xb’oq aran, xb’aan naq lin yuwa’ kok’ aj xsa’ naxik sa’ k’iche’ rochb’eeneb’ li saaj sa’ xk’anjel re li Iglees, a’b’an laa’in yal ninkana sa’ kab’l.
K’a’jo’ xsahil inch’ool naq kiwulak li kutan a’an. Ut relik chi yaal naq jwal kiwaj k’ulub’aak sa’ xyanqeb’ li saaj al a’an. K’eek’o inch’ool chixk’utb’al chiruheb’ naq chaab’ilin. Sa’ li yalok q’e a’an, moko ke’xb’ay ta rib’ chixyalb’al wix re rilb’al ma tine’xk’ul sa’ lix ch’uut.
Kine’xtaqla chixchapb’al xlaawil lix b’eleb’aal ch’iich’ lin yuwa’ re xb’aanunkil junaq xulil chiruheb’ laj jolominel. Ink’a’ jultik we k’a’ru kinye re xpatz’b’al li laaw re lin yuwa’, a’b’an sa’ junpaat kinsutq’i rik’in lix laaw sa’ wuq’, chi sa inch’ool.
Chirix a’an ke’xk’e jun chik intaqlankil. Tento tinte li b’eleb’aal ch’iich’ ut tinten jun li che’ chiru li chunleb’aal re naq tixnat’ li bociin. Ut tintz’ap li b’eleb’aal ch’iich’ rik’in laaw re naq taa’eek’anq li bociin sa’ q’ojyin, chi maa’ani truuq chi isink re li che’ re xchupb’al li bociin.
Arin, li seraq’ a’in jwal na’ok chixk’utb’al inxutaan. Naq kink’e li che’ sa’ xna’aj, kintz’ap li rokeb’aal li b’eleb’aal ch’iich’ ut kin’aalinak chi kaw re xmuqb’al wib’ sa’ jun siir li pim. Naq kinkut wib’ chi ch’och’, kiweek’a jun kawil tiq’leb’. Xmaak li q’ojyin ut li aanil, koxinkut wib’ sa’ xb’een jun siir li k’ix.
Lix japb’al we ink’a’ kik’utun xb’aan naq jwal kaw xyaab’ li bociin; ut maak’a’ xkolb’al wib’, jo’kan naq yal kinyeeqaan chi sutq’iik wan wi’ li b’eleb’aal ch’iich’, ut rik’in xutaan kinxootonk maak ut kinsik’ b’ayaq inb’anb’al.
Chiru li q’ojyin a’an, kinhupub’ wib’ sa’ jun li warib’aal naq lin yuwa’, rik’in jun alikaat, yoo chirisinkileb’ li k’ix ke’t’il sa’ lin tib’el … ut ninye eere naq moko sa ta kinchunla chiru naab’al kutan.
Naab’al sut nintz’il rix li k’a’ru kinnumsi aran. Anajwan naru ninse’ek chirix lix maak’a’il inna’leb’ sa’ insaajilal, naq nawil chik junjunq li na’leb’ chi saqen ru.
Naab’al li k’a’ru naqab’aanu laa’o, anchal ak re ajwi’ li ruchich’och’il winq—naqaj naq li qas qiitz’in toohe’xk’ul, naq chaab’il toohe’ril, naq junelik tootz’aqonq, ut naqaj xmuqb’al qib’ naq xqab’aanu li ink’a’ us. Tin’aatinaq chirix li na’leb’ a’in—naq naqamuq qib’ chirix naq naqab’aanu li ink’a’ us.
K’ehomaq reetal, ink’a’ ninye naq nimla maak lin xulil a’an, a’b’an naru taqajuntaq’eeta li xink’ul aran rik’in li na’leb’ choq’ re li qawanjik arin sa’ ruchich’och’.
Sa’ li Awimq Eden, laj Adan ut li xEva ke’wan sa’ sahilal—ke’wan xtzakemq, k’a’jo’ xchaq’alil ru li awimq, ut ink’a’ yal ch’ina-us, a’an b’an ajwi’ jun awimq b’ar wi’ maak’a’ li mul chi moko li k’ix.
A’b’anan, naqanaw ajwi’ naq laj Adan ut li xEva ink’a’ naru te’k’iiq sa’ li awimq. Li awimq a’an maawa’ xraqik lix b’eheb’, a’an b’an jun yale’k-ix, li xb’een ajwi’, li tixk’e xk’ulub’eb’ ut tixkawresiheb’ re naq te’xik chi uub’ej toj sa’ xraqik li b’e, a’an li sutq’iik chiru li rilob’aal li Yuwa’b’ej ut li K’ajolb’ej.
Jultikaq eere naq kiwan ka’pak’alink sa’ li awimq. Kikanab’aak laj Lucifer chiraalenkil laj Adan ut li xEva. Xb’een wa kiraale laj Adan re naq tixkʼux li ru li cheʼ re xnawbʼal li us ut li inkʼaʼ us. Rik’in xjultikankil li taqlahom naq tento naq ink’a’ tixk’ux a’an, laj Adan ink’a’ kixb’aanu. Toja’ naq kichal li xEva, li kixk’ux li ru li che’, ut kixq’unb’esi xch’ool laj Adan re naq tixk’ux ajwi’.
Moqon, ke’xye naq aajel ru li ke’xb’aanu xb’aan naq kixk’e chi uxmank lix k’uub’anb’il na’leb’ li qaChoxahil Yuwa’. A’b’an naq ke’xk’ux li ru li che’, ke’xq’et li chaq’rab’—jun chaq’rab’ kixk’e li Yuwa’b’ej reheb’. Xmaak naq neke’xnaw chik li us ut li ink’a’ us, maare jwal ke’raho’ xch’ool naq ke’rab’i xyaab’ xkux li Yuwa’b’ej li yoo chi wulak wi’chik sa’ li awimq. Ke’xk’e reetal naq t’ust’uukeb’, ut relik chi yaal naq maak’a’eb’ xt’ikr, xb’aan naq ke’wan chaq chi maak’a’ xnawomeb’. A’b’an li k’a’ru jwal ra chiru naq ke’wan chi t’ust’u sa’ li hoonal a’an, a’an naq kik’utun chi saqen lix q’etomeb’. Maa’ani naru nakolok rixeb’ ut yal wankeb’ chi jo’kan. Ke’kana chi t’ust’u sa’ tib’ejel jo’ ajwi’ sa’ musiq’ej.
Laj Lucifer, li seeb’ chi k’oxlak, naq kixk’e reetal chan ru ke’kana, kiraaleheb’ wi’chik—kixye chik reheb’ naq te’xmuq rib’ chiru li Dios.
Li aaleek a’in—a’an li “xkab’ aaleek” tinye re—a’an li aaleek li naru naxk’am chaq li k’a’ru nim wi’chik chiqatenb’al. Yaal ajwi’ naq us wi’chik wi ink’a’ too’ok sa’ li xb’een aaleek re xq’etb’al lix chaq’rab’ li Dios, a’b’an ak naqanaw naq chiqajunilo toot’ane’q sa’ li aaleek a’an. Naq naniman li qana’leb’ ut qanawom, naqoyb’eni naq maare li qametz’ew re xkolb’al qib’ chiru li xb’een aaleek taakawuuq naq naqayal qaq’e chi wulak jo’ li qaKolonel Jesukristo.
Junjunq maare te’xyal xmuqb’al rib’ chiru li Dios xb’aan naq ink’a’ neke’raj naq te’nawe’q malaj te’k’utunq lix sachik, ut neke’reek’a xxutaan malaj xmaak. A’b’anan, naab’aleb’ li raqal sa’ li loq’laj hu neke’xk’ut chiqu naq moko naru ta naqamuq qib’ chiru li Dios. Tinwotz yal junjunq reheb’ a’an.
Li Qaawa’ naxk’e xna’leb’ laj Jeremias rik’ineb’ li patz’om a’in: “Ma naru tixmuq rib’ junaq kristiaan chiwu b’ar wi’ ink’a’ twil ru laa’in? chan li Qaawa’. Laa’in wankin yalaq b’ar jo’ sa’ choxa jo’ sa’ ruchich’och’.”
Ut re laj Job naxye:
“Li Dios naril ut naxnaw jo’ch’inal jo’nimal naqab’aanu.
“Maak’a’ junaq q’oqyinkil ru na’ajej te’xmuq wi’ rib’ li neke’b’aanunk maa’usilal.”
Laj David aj salmiist rik’in utz’u’ujinb’il aatin naxye:
“At Qaawa’, laa’at nakatz’il wix ut nakanaw wu.
“Nakanaw jo’q’e nink’ojlaak ut jo’q’e ninwakliik, us ta najt wankin, a’b’an nakanaw li nink’oxla. …
“Toj maji’ na’elk li aatin chi ru’uj waq’, ak xanaw laa’at, at Qaawa’. …
“Ma truuq tab’i’ tinxik chi najt chiru laa loq’laj musiq’? Ma truuq tab’i’ tin’eeleliq chawu laa’at?
“Wi ta tintaqe’q sa’ choxa, aran wankat laa’at; wi ta tinsotob’ wib’ sa’ xna’ajeb’ li kamenaq, aran ajwi’ wankat chaq.”
Eb’ li ak’ komon
Choq’ reheb’ li ani toje’ xe’ok sa’ Lix Iglees li Jesukristo reheb’ laj Santil Paab’anel sa’ Roso’jikeb’ li Kutan, li xkab’ aaleek maare ch’a’ajaq. Rik’in lee k’ub’iha’ xex’ok sa’ sumwank re xk’ulb’al sa’ eeb’een lix k’ab’a’ li Jesukristo, li naraj naxye naq aajel ru xjalb’al lee yu’am. Ch’a’aj xjalb’al li qayu’am. Maare aajel ru teejal li k’a’ru k’aynaqex wi’, li nekeb’aanu ut maare ajwi’ lee rochb’een re naq texwulaq toj wan wi’ li qaChoxahil Yuwa’.
Laj tza naxnaw naq naru taapaab’ li ch’ina aaleek li ink’a’ jwal kaw. A’an tatxk’e chixk’oxlankil naq laa yu’am re junxil, li kixk’e chaq xrahil aach’ool, ak taawulaq wi’chik chawu. Laj jitonel, jo’ nayeeman re sa’ li hu Apokalipsis, tatraale chixk’oxlankil li na’leb’ a’in: “Moko kaw ta laa ch’ool re naq taajal raj laa yu’am; moko tatruuq ta; moko k’ulub’ejat ta sa’ xyanqeb’ li kristiaan a’in; moko tate’xk’ulub’a ta; k’a’jo’ xq’unal laa metz’ew.”
Wi anchal yaaleb’ li na’leb’ a’in naq nekek’oxla, laa’ex li toje’ xex’ok sa’ xb’ehil li sumwank, naqatz’aama cheru naq meerab’i li xyaab’ xkux laj jitonel. Nekexqara; kaw lee metz’ew; nekexqak’ulub’a; ut, rik’in li Kolonel, truuq teeb’aanu chixjunil. Sa’ li hoonal naq tz’aqal teeraj ru li qarahom ut qatenq’, meek’oxla naq texqatz’eqtaana wi ak xexsutq’i b’ayaq sa’ lee yu’am re junxil. Rik’in lix nimla wankilal lix tojb’al rix li maak xb’aan li Jesukristo, naru nekexk’irtesiik wi’chik. A’b’an wi nekemuq eerib’ chiru a’an ut nekenajtob’resi eerib’ chiru li paab’aal toje’ xetaw, nekenajtob’resi ajwi’ eerib’ chiru li yo’leb’aal li tixk’e lee kawilal anajwan ut moqon.
Jun chaab’il wamiiw, a’an jun ak’ komon, kixye we naq jwal ch’a’aj xk’anjelankil li paab’aal naq xjunes wan. Natawman xnimal kawilal rik’in li komonil wank sa’ junaq li ch’uut—b’ar wi’ chiqajunilo nokotichk’ok a’b’an nokoxik chi uub’ej rik’in lix rahom li Jesukristo.
Li Awa’b’ej Russell M. Nelson kixye naq li “numtaak sa’ xb’een li ruchich’och’ ink’a’ nak’ulman sa’ jun kutan malaj wiib’. Nak’ulman chiru xnajtil li yu’am naq naqak’ulub’a rajlal lix tzol’leb’ li Kristo. Naqach’olani li qapaab’aal chirix li Jesukristo naq naqajal qak’a’uxl wulaj wulaj ut neke’qapaab’ li sumwank li nokohe’xtiqib’ rik’in wankilal. Nokokana sa’ xb’ehileb’ li sumwank ut noko’osob’tesiik rik’in musiq’ejil metz’ew, k’utb’esinb’il na’leb’, ut lix k’anjeleb’ li anjel.”
Wi nakak’ul junaq toch’e’k sa’ laa tib’el, tatxch’a’ajkila a’an ut naru naxk’e sa’ xiwxiw laa yu’am wi ink’a’ nakasik’ aab’anb’al. Jo’kan ajwi’ nak’ulman rik’in li rahilal sa’ musiq’ej. Ka’ajwi’ li rahilal sa’ musiq’ej li ink’a’ nab’ane’ naru naxk’e sa’ xiwxiw laa kolb’al. Maamuq aawib’ chiruheb’ li te’rahoq aawe ut li te’tenq’anq aawe; ayu b’an sa’ aanil rik’ineb’ a’an. Li obiisp, li awa’b’ej re uq’ej, ut eb’ laj jolominel naru nakate’xtenq’a chi k’irtesiik xb’aan lix wankilal lix tojb’al rix li maak.
Ani eere li yookex chixmuqb’al eerib’, naqatz’aama cheru naq chexsutq’iiq chaq. Laa’ex nekeraj ru li k’a’ru naxyeechi’i li evangelio ut lix tojb’al rix li maak, ut laa’o naqaj ru li k’a’ru nekeyeechi’i laa’ex. Li Dios naxnaw lee maak; ink’a’ naru teemuq eerib’ chiru. K’amomaq wi’chik eerib’ rik’in a’an.
Jo’ aj santil paab’anel, tento taqak’ulub’a li qas qiitz’in sa’ li Iglees b’ar wi’ wan li rahok, li kuyuk, ut li waklesink choq’ reheb’ li neke’raj xik chi uub’ej sa’ lix b’e li Dios.
Ilomaq eerib’ chiru li xkab’ aaleek! Taaqehomaq lix na’leb’eb’ li profeet, li ke’wan najter ut li wankeb’ anajwan ut chenaw naq ink’a’ naru nekemuq eerib’ chiru li Yuwa’b’ej aj rahonel.
Oksihomaq b’an lix wankilal lix tojb’al rix li maak xb’aan li Jesukristo li nak’irtesin. Wan qayu’am re naq taqak’ul qajunxaqalil li q’un xmetz’ew, li wan ajwi’ li kamk ut “jar paay chi majelal” sa’ xb’een, ut li tixk’uleb’ naab’al reheb’ li xb’een aaleek; re ajwi’ naq tooxik chi uub’ej us ta toot’ane’q sa’eb’ li aaleek a’in; ut re naq taqasik’ qachoxahil tenq’ chirix naq ak xoot’ane’, re naq tooruuq chi wulak jo’ li qaKolonel ut li qaChoxahil Yuwa’. A’an lix b’e li Dios. Maajun chik b’e wan. Ninch’olob’ xyaalaleb’ li na’leb’ a’in sa’ xk’ab’a’ li Jesukristo, amen.