Xkawresinkil qib’ re xk’ulb’al li Kolonel

Ex was wiitz’in, sa’ li octubre xnume’, li Awa’b’ej Russell M. Nelson kixye, “A’an a’in xq’ehil choq’ eere laa’ex ut choq’ we laa’in naq taqakawresi qib’ choq’ re li xkab’ xk’ulunik li Qaawa’, a’ laj Kolol qe, li Jesukristo. Naq li Awa’b’ej Nelson na’aatinak chirix li xkab’ xk’ulunik li Qaawa’, junelik na’aatinak rik’in sahil oyb’enink. A’ut, jun ch’ina ixqa’al toje’ xye we naq nach’i’aak naq narab’i resil li xkab’ xk’ulunik. “Ninxuwak xb’aan naq te’chalq rahilal rub’elaj naq taak’ulunq wi’chik li Jesus,” chan.

Ut moko k’a’ajeb’ ta wi’ li kok’al li neke’xuwak chi jo’kan. Li na’leb’ jwal chaab’il choq’ re li ixqa’al, choq’ eere, ut choq’ we laa’in a’an naq taqataaqe li raatin li Kolonel. Li naxye a’an moko muqmu ta, moko ch’a’aj ta. Wi yooko chixtaaqenkil li raatin, ink’a’ raj tooxuwaq chi moko tooch’i’aaq.

Sa’ xraqik lix k’anjel sa’ li ruchich’och’, kipatz’man re li Jesukristo jo’q’e taasutq’iiq chaq. Re xsumenkil a’an, a’an kixk’ut oxib’eb’ li jaljookil ru aatin sa’ Mateo 25 chirix li kawresink-ib’ re xk’ulb’al a’an—maare naq taak’ulunq a’an wi’chik malaj naq tookamq laa’o. Aajel ru li raatin xb’aan naq li kawresink-ib’ re xk’ulb’al li Jesukristo a’an li rajom li yu’am.

Xb’een, li Kolonel kixyaab’asi li jaljookil ru aatin chirixeb’ li lajeeb’ chi tuq’ixq. Sa’ li aatin a’in, li lajeeb’ chi tuq’ixq yookeb’ chi xik sa’ li sumlaak. Oob’ reheb’ ke’xk’am li aseeyt re xnujob’resinkileb’ lix saqen, a’ut li oob’ chik ink’a’ ke’xk’am li re. Naq kiyaab’asiman naq chal re li b’eelomej, li oob’ chi tuq’ixq maak’a’eb’ xna’leb’ ke’el chixloq’b’al li aseeyt. Naq ke’q’aj, ak numenaq chik li hoonal; tz’aptz’o chik rokeb’aal xna’aj li sumlaak.

Li Jesus kireetali oxib’ li na’leb’ sa’ li jaljookil ru aatin re qatenq’ankil. A’an kixye:

“Ut saʼ li kutan aʼan, naq tinkʼulunq saʼ lin loqʼal, taatzʼaqloq ru li jaljookil ru aatin li kinye chirixebʼ li lajeebʼ chi tuqʼixq.

“Xbʼaan naq ebʼ li wankebʼ xnaʼlebʼ ut keʼkʼuluk re li yaal, ut keʼxkʼul li Loqʼlaj Musiqʼej choqʼ aj kʼamol bʼe chiruhebʼ, ut inkʼaʼ keʼbʼalaqʼiik—ninye chi yaal eere, … teʼxkuy … xnumsinkil li kutan.”

Sa’ jalan chik aatin, ink’a’ raj te’xuwaq chi moko te’ch’i’aaq xb’aan naq te’kole’q ut te’usaaq. Te’numtaaq.

Wi chaab’il qana’leb’, naqak’ul li yaal naq naqak’ulub’a lix evangelio li Jesukristo rik’ineb’ li k’ojob’anb’il k’anjel ut sumwank re li tijonelil. Chirix a’an, naqayal qaq’e re naq k’ulub’ejaqo chi ochb’eeniik rajlal xb’aan li Santil Musiq’ej. Li seeb’al a’in tento taqak’ul sa’ junesal, chi timil timil. Li loq’onink rajlal, sa’ junesal, ut chi muqmu naxb’oq li Santil Musiq’ej chixk’amb’al qab’e.

Li rox na’leb’ kireetali li Jesus a’an xtz’eqtaanankil li b’alaq’il na’leb’. Li Kolonel kixye:

“Chekʼehaq reetal re naq maaʼani chibʼalaqʼinq eere.

“Xbʼaan naq naabʼalebʼ teʼchalq ut teʼroksi lin kʼabʼaʼ, “Laaʼin li Kristo” chaʼqebʼ, ut naabʼalebʼ teʼbʼalaqʼiiq.”

Li Kolonel kixnaw naq eb’ laj b’alaq’ te’xyal xb’alaq’inkil tzʼaqal li sikʼbʼilebʼ ru, ut naq te’b’alaq’iiq naab’aleb’ li tzolom. Ink’a’ raj taqapaab’ li raatin laj b’alaq’ li naxye naq k’eeb’il lix choxahil taqlankil, chi moko tooxik raj re tootzole’q sa’ muqmu xb’aaneb’ laj b’alaq’.

Lix Hu laj Mormon naxk’ut chiqu chan ru taqatz’il rix ani aj b’alaq’ ut ani li tzolom. Jun li tzolom junelik nak’utuk chirix xpaab’ankil li Dios, k’anjelak chiru a’an, ut xb’aanunkil li us. Ink’a’ toob’alaq’iiq wi taqasik’ ut taqak’ul xna’leb’eb’ li qakomon li tiikeb’ chi paab’ank jo’ xtzolom li Kolonel.

Jo’kan ajwi’, ink’a’ toob’alaq’iiq wi tooloq’oninq chi kok’ aj xsa’ sa’ li santil ochoch. Li loq’onink aran nokoxtenq’a chirilb’al li junelik q’e kutan ut naxkol qix chiru yalaq k’a’ chi wankilal li tooxjalb’ehi raj chiru lix b’ehil li sumwank.

Li na’leb’ aajel ru sa’ li jaljookil ru aatin chirixeb’ li lajeeb’ chi tuq’ixq, a’an naq chaab’il qana’leb’ wi naqak’ulub’a li evangelio, naqasik’ ochb’eeniik xb’aan li Santil Musiq’ej, ut naqatz’eqtaana li b’alaq’. Eb’ li oob’ chi tuq’ixq li wankeb’ xna’leb’ ink’a’ ke’ru chixtenq’ankileb’ li maak’a’eb’ x’aseeyt; maa’ani naru chixk’ulub’ankil li evangelio, chixtaaqenkil li Santil Musiq’ej, ut chixtz’eqtaanankil li b’alaq’ sa’ qak’ab’a’ laa’o. Tento taqab’aanu a’in qajunes qib’.

Li Kolonel kixyaab’asi ajwi’ li jaljookil ru aatin chirixeb’ li talento. Sa’ li jaljookil ru aatin a’in, jun li winq kixk’e jalan jalanq xk’ihal li tumin, a’eb’ li talento, reheb’ oxib’eb’ li moos. Re jun li moos kixk’e oob’ chi talento, re jun chik kixk’e wiib’, ut re li rox kixk’e jun. Rik’in hoonal, li xb’een ut li xkab’ moos ke’xk’ihob’resi li tumin kik’eeman reheb’. A’b’an li rox li moos yal kixmuq lix talento sa’ li ch’och’. Reheb’ li wiib’ chi moos li ke’xk’ihob’resi xtumineb’, li winq kixye: “Us, chaab’il aj k’anjelat, tiik aach’ool rik’in li b’ab’ay, tink’e aawankil sa’ xb’een naab’al chik, tattz’aqonq sa’ xsahilal xch’ool laj eechal aawe.”

Toja’ naq li winq kixch’iila li moos li kixmuq lix talento sa’ li ch’och’, naq kixye re, “At maa’us aj k’anjel, aj q’emat.” Kirisi lix talento li moos a’in, ut kixmin ru chi xik. A’b’anan, wi ta li moos kixk’ihob’resi raj lix talento, kib’antioxiik raj ut kiq’ajkamuuk raj jo’eb’ li rech moosil.

Jun na’leb’ sa’ li jaljookil ru aatin a’in, a’an naq li Dios naraj naq taqak’ihob’resiheb’ li seeb’al li k’eeb’ileb’ qe, a’ut ink’a’ naraj naq taqajuntaq’eeta li qaseeb’al rik’in xseeb’aleb’ li qas qiitz’in. Qak’ehaq reetal li na’leb’ a’in kixk’e jun aj tzolonel aj Hasidico sa’ li siglo 18, laj Zusya aj Anipol. Laj Zusya a’an jun aj k’utunel jwal nawb’il ru, li ki’ok chi xuwak naq kinach’ok xraqik xyu’am. Lix tzolom kixpatz’ re, “Qawa’, k’a’ut naq nakatxuwak? Chaab’ilat chiru laa yu’am; relik chi yaal naq li Dios tatxq’ajkamu chi chaab’il.”

Chan laj Zusya: “Wi ta li Dios tixye raj we, “At Zusya, k’a’ut naq ink’a’ xatwan jo’ jun chik laj Moises?” laa’in tinye, “Xb’aan naq ink’a’ xak’e xnimal li waam jo’ xak’e xnimal li raam laj Moises.” Ut wi ta tinxaqliiq raj chiru li Dios ut a’an tixye,”At Zusya, k’a’ut naq ink’a’ xatwan jo’ jun chik laj Salomon?” laa’in tinye, “Xb’aan naq ink’a’ xak’e xchaab’ilal inna’leb’ jo’ xak’e xchaab’ilal xna’leb’ laj Salomon.” A’b’anan, k’a’ raj ru tinye wi ta tinxaqliiq raj chiru laj yo’ob’tesihom we ut a’an tixye, “At Zusya, k’a’ut naq ink’a’ xatwan jo’ laj Zusya? K’a’ut naq ink’a’ xak’am aawib’ jo’ li winq xatinyo’ob’tesi wi’?” Ay, xb’aan a’an naq ninxuwak.”

Yaal naq li Dios taaraho’q xch’ool wi ink’a’ naqaq’axtesi qib’ chiru lix k’ulub’ejil, li ruxtaan, ut li rusilal li Kolonel re xk’ihob’resinkileb’ li seeb’al kiqak’ul rik’in li Dios. Chi tenq’anb’il xb’aan, a’an naraj naq toowulaq tz’aqal jo’ naraj a’an naq toowulaq. Maak’a’ na’ok wi’ re li Dios naq jalan jalanq qaseeb’al chiqajunjunqal. Us raj ajwi’ naq maak’a’ na’ok wi’ qe.

Sa’ xraqik, li Kolonel kixyaab’asi li jaljookil ru aatin chirixeb’ li karneer ut li chib’aat. Naq a’an taak’ulunq wi’chik sa’ xloq’al, “chixjunileb’ li tenamit talaje’ch’utub’aaq chiru, ut taarisi li jun ch’ol sa’ xyanqeb’ li jun ch’ol chik, jo’ laj k’aak’alenel ketomq narisiheb’ li karneer sa’ xyanqeb’ li chib’aat. Ut tixk’eheb’ li karneer sa’ xnim uq’, ut eb’ li kok’ chib’aat sa’ xtz’e.”

Eb’ li wankeb’ sa’ xnim uq’ ke’reechani li rawa’b’ejihom, ut eb’ li wankeb’ sa’ xtz’e maak’a’ ke’reechani. Eb’ li te’wanq sa’ xnim uq’, a’aneb’ li ke’k’ehok re chi wa’ak naq kitz’okaak, li ke’k’ehok ruk’a naq kichaqik re, li ke’k’uluk re sa’ rochocheb’ naq kixsik’ rochochnal, li ke’tiqib’an re naq kit’usq’i, ut li ke’ulanin re naq kiyajer ut naq kiwan sa’ tz’alam.

Ke’sach xna’leb’ chixjunileb’, eb’ li ke’wan sa’ xnim uq’ jo’eb’ ajwi’ li ke’wan sa’ xtz’e. Ke’xpatz’ re jo’q’e xe’xk’e malaj ink’a’ xe’xk’e xtzakemq, ruk’a, ut xt’ikr, malaj jo’q’e xe’xtenq’a malaj ink’a’ naq tenq’aak naraj. Re xsumenkileb’, li Kolonel kixye, “Relik chi yaal ninye eere: jo’ch’inal jo’nimal xeb’aanu chaq reheb’ li kok’ iitz’in a’in q’axal kok’eb’, we laa’in xeb’aanu chaq.”

Ch’olch’o ru li na’leb’ sa’ li jaljookil ru aatin: naq nokok’anjelak chiruheb’ li qas qiitz’in, nokok’anjelak chiru li Dios; naq ink’a’, nokosach. A’an naroyb’eni naq te’qak’anjela li qamaatan, li qachaab’ilal, ut li qaseeb’al re rosob’tesinkil lix yu’ameb’ li ralal xk’ajol li qaChoxahil Yuwa’. Li choxahil ajom re k’anjelak chiru as iitz’inb’ej nak’utman sa’ jun utz’u’ujinb’il aatin re li siglo 19 xb’aan jun aj Finlandia, laj Johan Ludvig Runeberg xk’ab’a’. Laa’in ut eb’ li was wiitz’in kiqab’i k’iila sut li utz’u’ujinb’il aatin “Aj K’alom Paavo” naq toj kok’o chaq. Sa’ a’an, laj Paavo a’an jun aj k’alom neb’a’ li wan xna’aj sa’ xch’och’ileb’ li kaq’nab’ aran Finlandia rik’in li rixaqil ut lix kok’aleb’. Chiru wiib’ oxib’ chihab’, neke’sachman naab’al reheb’ li rawimq, wan naq xb’aan xha’il li saqb’ach sa’ xtiklajik li chihab’, li nimla saqb’ach sa’ saq’ehil, malaj li ratz’am ke sa’ hab’alq’e. Naq neke’xch’utub’ li rela’ lix q’olom, naraho’ xch’ool li rixaqil laj k’alom ut naxye, “Paavo, Paavo, at cheek maak’a’ aachahimal, li Dios kooxkanab’ qajunes.” Laj Paavo naxchaq’b’e, naxye, “Yuhi li rix che’ rik’in li hariin centeno re xk’uub’ankil li kaxlan wa re naq ink’a’ te’tz’okaaq li kok’al. Laa’in tinyal inq’e chixchaqob’resinkileb’ li awimq sa’ li k’anjha’. Li Dios yoo chixyalb’al qix, a’b’an a’an tixk’e li k’a’ru taak’anjelaq qe.”

Naq neke’sachman li awimq, laj Paavo naxye re li rixaqil naq tixk’ihob’resi xk’ihal li rix che’ naxyuhi rik’in li hariin re naq ink’a’ te’tz’okaaq. A’an naxyal wi’chik xq’e, naxb’ekeb’ li jul re xchaqob’resinkil li ch’och’ re naq kolb’ilaqeb’ rix li awimq chiru xha’il li saqb’ach ut li ratz’am ke.

Chirix xnumik naab’al li kawil chihab’, laj Paavo naxq’ol naab’al li awimq. Li rixaqil naxjap re chixyeeb’al, “Paavo, Paavo, sahil kutan wanko wi’! Qatz’eqaq li rix che’, ut qak’uub’aq ka’ajwi’ li kaxlan wa rik’in centeno.” A’b’an laj Paavo naxchap li ruq’ li rixaqil ut naxye, “Yuhi xyijach li hariin rik’in li rix che’, xb’aan naq xkeho’ li rawimqeb’ li qech kab’al.” Laj Paavo naxmayeja lix q’olom lix junkab’al re xtenq’ankileb’ li rech kab’al rahob’tesinb’ileb’ ut neb’a’eb’.

Li na’leb’ sa’ lix jaljookil ru aatin li Kolonel chirixeb’ li karneer ut li chib’aat, a’an naq tento te’qoksi li qamaatan—li qahoonal, li qachaab’ilal, ut li qosob’tesinkil—re xtenq’ankileb’ li ralal xk’ajol li qaChoxahil Yuwa’, jo’eb’ li rahob’tesinb’ileb’ ut li neb’a’eb’.

Re li ch’ina ixaq’al xin’aatinak wi’, ut eere chejunilex, ninye, chataaqe li Jesukristo ut chapaab’ li Santil Musiq’ej, jo’ chanru taapaab’ raj junaq raarookil amiiw. Chakanab’ aawib’ sa’ ruq’eb’ li neke’rahok aawe ut li neke’rahok re li Kolonel. Sik’ lix b’eresihom li Dios re xchaab’ilob’resinkileb’ laa seeb’al, ut tenq’aheb’ laa was aawiitz’in, us ta ch’a’aj a’an. Kawresinb’ilaqat re xk’ulb’al li Kolonel, ut taawanq laa sahil oyb’enihom, jo’ li Awa’b’ej Nelson. Chi jo’kan, yooqat chi tenq’ank sa’ xkawresinkil li ruchich’och’ choq’ re li xkab’ xk’ulunik li Jesukristo, ut osob’tesinb’ilaqat rik’in laa woyb’enihom re ok sa’ xhilob’aal li Qaawa’, anajwan ut chalel.

Jo’ naqab’icha sa’ jun reheb’ li ak’ b’ich:

Sa’ xk’ab’a’ li Jesukristo, amen.