Sahil ch’oolejil rik’in xtaaqenkil li Jesus sa’ li sumwank

Jun kutan re li 2023, li xUyanga Altansukh yoo chi k’anjelak sa’ li tenamit Darkhan sa’ xnim li saq’e Mongolia, naq li awa’b’ej re mision aran Mongolia ki’ok sa’ li na’ajej nak’anjelak wi’. Chan li xUyanga:

“Xwil ut xink’oxla naq wan jun xlemtz’unkil sa’ li rilob’aal. Jwal chaab’il ut jwal se’se’ rik’ineb’ li wankeb’ sa’ lix sutam, ut xweek’a’ lix q’unal xch’ool. Naq ak xik re, xink’e wiib’ oxib’ li patz’om. Ink’a’ naab’al kutan chirix a’an, xk’ulun wi’chik sa’ lin k’anjel, ut xpatz’ we ma tinruuq chi wulak sa’ lix iglees. Xink’oxla naq maare us raj a’an. Yoo ink’a’uxl chirix li k’a’ru te’xk’ul lin kok’al sa’ xyu’ameb’, xb’aan naq anchal nujenaq li ruchich’och’ rik’in ch’a’ajkilal ut q’ojyin. Nawaj raj naq eb’ lin kok’al te’wanq chanchanaq li winq a’in, rik’in li saqen sa’ rilob’aal, ut xwotzb’al li sahil ch’oolej rik’ineb’ li qas qiitz’iin.

“Sa’ jun kutan, eb’ li misioneer ke’xk’ut chiqu li chaq’rab’ re li lajetqil. Eb’ lin kok’al chi sa sa’ xch’ool xe’xye, “Tento taqatoj li qalajetqil mama’.” Sa’ li hoonal a’an xwil lix paab’aaleb’ lin kok’al. Naq toj maji’ laa’in komon sa’ li paab’aal, nawil li jolomil ch’utub’aj-ib’ ut nawab’i chi aatinak li Awa’b’ej Russell M. Nelson. Kixye’ resileb’ li ak’ santil ochoch sa’ chixjunil li ruchich’och jo’ ajwi’ naq taayiib’amanq jun chik li ak’ santil ochoch aran Ulan Bator, Mongolia. Jwal xinsaho’ ut xinyaab’ak, a’ut ink’a’ xinnaw k’a’ut. Rik’in li sahil ch’oolej a’an xink’e reetal naq lin paab’aal ut lin nawom yoo chi k’iik.”

Jo’ li xUyanga, wankeb’ naab’al millon, li yookeb’ ajwi’ chi tenq’ank sa’ xch’utub’ankil Israel re xkawresinkil li xkab’ k’ulunik li Jesukristo. Li xUyanga xtikib’ xtaaqenkil xb’ehil li sumwank ut a’an chik jun xtzolom li Kristo. K’a’ru naraj naxye wank jo’ xtzolom li Kristo? Nawulak chiwu chan ru nayeeman tzolom sa’ Japones—deshi—de, li naraj xyeeb’al iitz’inb’ej , ut shi, li naraj xyeeb’al kok’al.

Li Jesukristo kixye: “Laa’in kinwan sa’ xtiklajik rik’in li Yuwa’b’ej, ut laa’in li Xb’een Yo’lajenaq.” Xb’aan naq naqanaw ani a’an ut k’a’ru kixb’aanu, naqaloq’oni, naqoxloq’i, naqanima ru, ut naqataaqe. Li Kristo xtoj qix, ut junelik toob’antioxinq xb’aan lix mayej aj tojol-ix maak’a’ roso’jik.

Wan jun li qaChoxahil Yuwa’ li nokoxra jo’ ralal xk’ajol. Lix rahom choq’ qe tzaqal re ru. Li Jesukristo ut lix k’anjel neke’reetali lix rahom li Dios choq’ qe. Jo’ kixtz’iib’a laj Jwan: “Xbʼaan naq li Dios kʼaʼjoʼ naq kixra li ruchichʼochʼ: kixkʼe chaq li Ralal jun chiribʼil re naq chixjunil li taapaabʼanq re, inkʼaʼ taasachq, wanq bʼan xyuʼam chi junelik.”

Sa’ xyalb’al qaq’e chixtawb’al ru li k’a’ru ink’a’ naqanaw, wan naq naqak’ojob’ qach’ool rik’in li k’a’ru xqak’ul junxil malaj rik’in li k’a’aq re ru ak naqanaw. Maare naru naqatzol k’a’ruhaq chirix Ii Dios Yuwa’b’ej sa’ li qak’anjel jo’ na’b’ej yuwa’b’ej malaj sa’ li komonil wank rik’in li qajunkab’al. A’b’anan ink’a’ raj taqayal xtawb’al ru li qaChoxahil Yuwa’ ka’ajwi’ rik’ineb’ li na’leb’ a’an. Li xna’leb’ li Dios Yuwa’b’ej naxq’ax ru yalaq k’a’ru chi na’leb’ re li winq t’anenaq li maji’ tz’aqal re ru. Li Dios Yuwa’b’ej a’an li Yuwa’b’ej tz’aqal chaab’il. A’an tz’aqal aj rahonel, q’un xch’ool, wan xkuyum, ut naxtaw ru li naqeek’a ut wan xloq’al tz’aqal. Naru naqapaab’ chi tz’aqal. Lix rahom li Kristo a’an xk’utleb’ lix rahom li Dios Yuwa’b’ej, ut a’an nareetali li rahok a’an.

Li Jesukristo a’an li eetalil jo’ ajwi’ li b’e. Rik’in li Kristo naru naqataw ru chi us lix tz’aqal chaab’ilal li Yuwa’b’ej ut lix k’uub’anb’il na’leb’. Xb’aan li Kristo, k’eeb’il qawankil re xq’axb’al ru li na’leb’ ak reheb’ li winq ut ixq re naq tooruuq chi wulak jo’ chanru li Yuwa’b’ej.

Jo’ li qaChoxahil Yuwa’, li Jesukristo a’an aj uxtaan ut tiik xch’ool chi tz’aqal. Lix tiikilal ut li ruxtaan ink’a neke’xq’et rib’. Neke’xtz’aqob’resi b’an rib’. Li tiikilal ut li uxtaan neke’reetali lix tz’aqal rahom li Dios choq’ reheb’ li ralal xk’ajol. Naru naqak’ojob’ qach’ool rik’in li Dios Yuwa’b’ej ut li Jesukristo xb’aan naq tiikeb’ xch’ool qik’in.

Li Dios Yuwa’b’ej ut li Jesukristo, li Ralal, juntaq’eeteb’ tz’aqal sa’ li rajom ut li rahok. Xb’aan naq li Dios ut li Jesukristo nokohe’xra, nokohe’xkanab’ chi ok sa’ sumwank rik’ineb’ naq naqataaqeheb’ chi anchal qach’ool. Naq naqab’aanu a’an, jwal noko’ok wi’chik sa’ komonil rik’in li Kristo: “Ut anajwan, saʼ xkʼabʼaʼ li sumwank li kekʼuubʼ, laaʼex ralal xkʼajol li Kristo taayeheʼq eere, li ralal, ut lix rabʼin; xbʼaan naq kʼehomaq reetal, saʼ li kutan aʼin xexrala saʼ musiqʼejil, xbʼaan naq nekeye naq jalbʼil lee chʼool xbʼaan xpaabʼankil lix kʼabʼaʼ; joʼkan naq yoʼlajenaqex rikʼin aʼan, ut okenaqex choqʼ ralal ut xrabʼin.”

Jo’ xtzolom, naq noko’ok sa’eb’ li sumwank ut neke’qapaab’, noko’osob’tesiik rik’in li musiq’ejil wankilal. Wanko sa’ junajil rik’in li Kristo ut li Dios Yuwa’b’ej, sa’ jun li wanjik re sahilal ut naru naqeek’a lix rahom ut li sahil ch’oolej li ka’ajwi’ nak’eeman reheb’ li neke’xpaab’ li sumwank. Naru naqeek’a xrahom li Dios chi tz’aqal, ut naru tookanaaq sa’ xrahom a’ yaal chanru xtiikilal li qajom ut li qab’aanuhom.

Sa’ li ch’ol 15 re lix hu laj Jwan, sa’ li raqal 9, naxye: “Jo’ naq xinxra li Yuwa’b’ej, jo’kan ajwi’ naq xexinra laa’in.” A’b’anan naxk’e ajwi’ jun li qak’anjel: “Texkanaaq sa’ lin rahom.”

Sa’ li raqal jun chik, k’eebil qe li b’e re tookanaaq sa’ lix rahom: “Wi nekepaab’ lin chaq’rab’, texkanaaq sa’ lin rahom jo’ naq laa’in xinpaab’ xchaq’rab’ lin Yuwa’ ut ninkanaak sa’ lix rahom.”

Naxye ajwi’ li rajb’al xpaab’ankil lix taqlahom sa’ li raqal 11: “Xinye a’in eere re naq li xsahilal inch’ool chiwanq eerik’in ut li xsahilal eech’ool tz’aqalaq re ru”.

Rik’in li tz’aqal paab’ank sa’ sumwank, naru too’ok chixtawb’al ru li Dios ut li sahil ch’oolej taaraj naq te’xk’ul chixjunileb’ li ralal xk’ajol. Jo’kan ajwi’ tooruuq chixtawb’al ru junqaq li na’leb’ li ink’a’ jwal ch’olch’ookeb’ ru. Maare a’an ajwi’ li na’leb’ a’in: Chan ru naq li Dios wan sa’ sahil ch’oolej naq eb’ li ralal xk’ajol neke’xnumsi nimla ch’a’ajkilal? Li na’leb’ a’an natawman sa’ lix nawom li Dios ut sa’ lix k’uub’anb’il na’leb’ tz’aqal re ru. A’an nokoril chalen sa’ xtiklajik toj sa’ li loq’laj kutan chalel chiqu. A’an kixk’e lix b’ehil, rik’in li Jesukristo, li Ralal, re naq chiqajunilo laa’o, li ralal xk’ajol, tooruhanq chixq’axb’al ru li rahilal, li ch’a’ajkilal, li maak, ut li wank sa’ junesal sa’ ruchich’och. Li Dios xk’e qe li b’e ut xtaql li qach’ool.

Naru taqataw ru li na’leb’ a’in wi naqatz’il rix li esilal chirixeb’ li ani xe’xk’ul sahil ch’oolej jo’ xtzolom li Kristo. Wankeb’ li neke’xye naq nasaho’ qach’ool a’ yaal jo’ chanru li qalal li jwal ra wan. Nawil naq moko aajel ta ru naq jo’kanaq. Lin na’ wan 94 chihab’ re, ut numenaq 200 li riyajil yo’yookeb’. Yalaq jo’q’e, naru rahaq xch’ool junaq reheb’ li 200. Wi yaal ta raj li aatin a’in, lin na’ ink’a’ raj sahaq li xch’ool junelik, a’b’an ink’a’ jok’an. Li ani neke’nawok ru neke’xnaw naq jwal sa xch’ool.

Anajwan nawaj raj xwotzb’al jun chik li k’a’ru xinnumsi. Sa’ enero re 2019, li wixaqil, xDebbie, ut laa’in xoob’oqe’ sa’ lix oficiin li Awa’b’ej Nelson. Kixk’e jun li chunleb’aal nach’ chiqak’atq ut kichunla. Chirix naq ak xk’e li qab’oqb’al li wan anajwan, li Awa’b’ej Nelson kixsutq’isi li rilob’aal rik’in li xDebbie. Chaab’il xch’ool, aj rahonel, q’un xch’ool, ut nujenaq rik’in sahil ch’oolejil, jo’ li yuwa’b’ej malaj li wa’chinb’ej tz’aqal chaab’il. Kixchap li ruq’ li xDebbie ut kixt’ost’osi, ut kixk’ojob’ xch’ool naq chaab’il taa’elq chixjunil ut naq li qajunkab’al osob’tesinb’ilaq. Sa’ li hoonal a’an xqeek’a naq b’eenb’een nokoxk’oxla laa’o, ut naq maajo’q’e taa’oso’q xhoonal choq’ qe. Sa’ li viernes a’an koo’el sa’ lix oficiin, chi sa ut k’ojk’o li qach’ool rik’in li rahok.

Sa’ li lunes xqil jun li esil. Sa’ li kutan ajwi’ a’an naq li Awa’b’ej Nelson xwan qik’in, jun reheb’ lix rab’in kikam xb’aan li cancer. Sachso qach’ool kookana. Li qaam kinujak rik’in rahil ch’oolej chirix li Awa’b’ej Nelson ut lix junkab’al. Li qaam kinujak ajwi’ rik’in b’antioxink xb’aan naq kooxk’oxla laa’o naq yoo ajwi’ chi yaab’ak chirix lix rab’in li yoo chaq chi raho’k.

Naq naqak’oxla li na’leb’ xqak’ul, naqapatz’ qib’: “Chan ru naq jwal chaab’il xch’ool, aj rahonel, ut kaw xch’ool sa’ jun Ii hoonal jwal ch’a’aj choq’ re? Lix sumenkil, a’an naq a’an naxnaw. A’an naxnaw naq li Kristo x’el chi uub’ej. Naxnaw naq taawanq wi’chik rik’in lix rab’in ut naq tixnumsi li junelik q’e kutan rik’in. Li sahil ch’oolejil ut li junelikil nawom neke’chal xb’aan xjunajinkil qib’ rik’in li Kolonel sa’ xpaab’ankil li sumwank ut rik’in li wank choq’ xtzolom.

Li Awa’b’ej Nelson kixye: “Jo’ chanru naq li Kolonel naxyeechi’i qe li tuqtuukilal li “naxq’ax ru chixjunil li na’leb’” [Filipenses 4:7], jo’kan ajwi’ naxyeechi’i qe jun xkawil ru, jun xchamal ru ut jun xk’ihal ru li sahil ch’oolejil li naxq’ax ru lix k’a’uxleb’aal ut lix tawom ru li winqilal. Qayehaq, chanchan naq ink’a’ naru naqeek’a li sahil ch’oolejil naq jun li alalb’ej wan lix yajel maak’a’ xb’an malaj naq naqatz’eq li qatrab’aaj malaj li qasum aatin nokoxb’alaq’i. A’b’anan, a’an tz’aqal li sahil ch’oolejil naxyeechi’i li Kolonel.”

Naq naqapaab’ li sumwank, taqak’e qach’ool chirixeb’ li komon, ut wanq li qajom chixtenq’ankileb’ li jun siir chireek’ankil li sahil ch’oolej ut li rahok naqeek’a sa’ li sumwank. Naru too’okenq sa’ li k’anjel jwal nim sa’ li ruchich’och’ anajwan—a’an lix ch’utub’ankil Israel. Tooruuq chi tenq’ank chixk’amb’aleb’ li ralal xk’ajol li Dios rik’in li Kristo. Jo’ kixye li profeet aj Jakob, “Ut osob’tesinb’ilat laa’at; xb’aan naq rik’in naq yalb’il eeq’e chi k’anjelak wochb’een sa’ li wawimq, ut kepaab’ lin taqlahom, ut kek’am wi’chik wik’in li tz’aqal ru che’, … taawanq xsahil eech’ool wik’in sa’ xk’ab’a’ li ru li wawimq.”

Naq naqateneb’ qib’ chi k’anjelak jo’ tzolom sa’ li sumwank, a’ yaal jo’ naru chiqu, jwal noko’ok wi’chik sa’ komonil rik’in li Yuwa’b’ej ut li K’ajolb’ej, naniman xsahil li qach’ool, ut li qanawom re junelik q’e kutan naxnimo’b’resi rib’. Toja’ naq naqak’ul wankilal ut naqeek’a sahil ch’oolej li ka’ajwi’ nak’eeman reheb’ lix tzolom li Dios li neke’xpaab’ li sumwank. Sa’ lix loq’laj k’ab’a’ li Jesukristo, amen.