Li k’uub’anb’il na’leb’ re uxtaan

Sa’ li abril xnume’, chirix naq kiyeeman resil naq li Iglees toje’ kixloq’ li santil ochoch re Kirtland, li Awa’b’ej Nelson kooxb’oq chixtz’ilb’al rix li tij yeeb’il sa’ lix q’axtesinkil li santil ochoch re Kirtland, li tz’iib’anb’il sa’ li tasal 109 re li Tzol’leb’ ut Sumwank. Li tij a’an, chan li Awa’b’ej Nelson, “a’an jun ch’olob’anel na’leb’ li naxye chan ru naq li santil ochoch naxk’e qamusiq’ejil wankilal re xnumsinkileb’ li ch’a’ajkilal sa’ roso’jikeb’ li kutan a’in.”

Nawoyb’eni naq xetaw eena’leb’ sa’ li tasal 109 li xchaab’ilob’resi lee yu’am. Sa’ li ewu a’in, tinwotz wiib’ oxib’ li na’leb’ kink’ul laa’in naq kinb’aanu li kixye li qaprofeet. Li tuqtuukilal li kiweek’a naq yookin chaq chi tzolok kixk’e chinjultika naq li Qaawa’ a’an aj uxtaan, ut naq li na’leb’ li kixk’uub’ li qaChoxahil Yuwa’ chirix li qakolb’al, a’an jun na’leb’ re uxtaan.

Jo’ maare ak nekenaw, “tz’aamanb’il naq eb’ li toje’ b’oqb’ileb’ jo’ misioneer te’xk’ul li loq’laj tiqib’aak sa’ junpaat ut naq te’wulaq sa’ li santil ochoch chi kok’ aj xsa’, jo’ naru chiruheb’.” Chirix naq te’xk’ul li loq’laj tiqib’aak, te’ruuq “chi k’anjelak jo’ aj k’anjenel sa’ li santil ochoch naq maji’ neke’xtikib’ lix k’anjel sa’ li mision.”

Li k’anjelak sa’ li santil ochoch rub’elaj naq na’ux li xik sa’ li mision, k’a’jo’ naq taarosob’tesiheb’ li misioneer naq neke’xtaw xna’leb’ chirixeb’ li sumwank re li santil ochoch rub’elaj naq te’xye resil li rosob’tesihomeb’ li sumwank a’an chiru li ruchich’och’.

A’ut naq kintz’il rix li tasal 109, kintzol naq, sa’ li santil ochoch, li Dios naxk’e xkomon chik li wankilal reheb’ li ak’ misioneer—ut qe ajwi’ laa’o chiqajunilo. Sa’ li tij re q’axtesink, li kik’utb’esiman chiru, li profeet aj Jose Smith kixye: “Naq ebʼ laa moos teʼelq chaq saʼ laa wochoch … re xchʼolobʼankil xyaalal laa kʼabʼaʼ,” “teʼqʼunobʼresiiq li raam” chixjunilebʼ li tenamit—“li ani xninqalebʼ ru re li ruchichʼochʼ” jo’eb’ ajwi’ “chixjunilebʼ li nebʼaʼ, li maakʼaʼebʼ wan re, ut li tawasinbʼilebʼ.” A’an kixtz’aama naq “lix kawilebʼ xjolom taaʼeeleliq chaq chiru li yaal, ut ebʼ laa tenamit teʼxtaw usilal saʼ rilobʼaalebʼ chixjunil; re naq chixjunil lix maril li ruchichʼochʼ teʼxnaw naq laaʼo, laa moos xqabʼi lix yaabʼ aakux, ut naq laaʼat xoohaataqla.”

A’an a’in li nayeechi’iman reheb’ li ak’ misioneer—naq xkawilal li jolom “taaʼeeleliq chaq chiru li yaal,” ut naq “teʼxtaw usilal saʼ rilobʼaalebʼ chixjunil,” re naq li ruchich’och’ tixnaw naq li Qaawa’ xtaqlan reheb’. Laa’o ajwi’ naqaj ru osob’tesiik chi jo’kan. K’a’jo’aq raj naq too’osob’tesiiq wi te’q’unob’resiiq li raameb’ li qas qiitz’in naq wanko rik’ineb’. Li tij re q’axtesink ink’a’ naxye chi ch’olch’o chan ru naq li wank sa’ li santil ochoch tixq’unob’resi li raameb’, a’b’an nink’oxla naq taak’ulmanq a’an a’ yaal jo’ chanru naq’unob’resiik li qaam laa’o sa’ li rochoch li Qaawa’ naq nokojayaliik rik’in li Kristo ut li ruxtaan a’an.

Naq kintz’il rix li tij re xq’axtesinkil li santil ochoch re Kirtland, kink’e ajwi’ reetal naq laj Jose kixtz’aama li uxtaan—choq’ reheb’ li komon sa’ li Iglees, li ani xik’ neke’ril li Iglees, laj jolominel sa’ xb’een li tenamit, eb’ lix tenamitul li ruchich’och’. Ut kixtz’aama ajwi’ naq taajultiko’q a’an re li Qaawa’ ut naq taaruxtaana ru li xEmma ut eb’ lix kok’al.

K’a’jo’ tana naq kisaho’ xch’ool laj Jose, naq jun xamaan chik chirix a’an, sa’ li Paswa re li 3 re abril re 1836, sa’ li santil ochoch re Kirtland, li Kolonel kixk’ut rib’ chiru a’an ut laj Oliver Cowdery, ut, jo’ tz’iib’anb’il sa’ li tasal 110 re li Tzol’leb’ ut Sumwank, kixye: “Laaʼin xinkʼulubʼa li ochoch aʼin, ut lin kʼabʼaʼ taawanq arin; ut laaʼin tinkʼutbʼesi wibʼ chiru lin tenamit rikʼin uxtaan saʼ li ochoch aʼin.” Ak re naq lix yeechi’inkil li uxtaan a’an jwal kixtoch’ xch’ool laj Jose. Ut jo’ kixye li Awa’b’ej Nelson sa’ li abril xnume’, li yeechi’ink a’an “nak’anjelak sa’ chixjunileb’ li santil ochoch wankeb’ anajwan.”

Chiqajunilo naru taqataw li uxtaan sa’ li rochoch li Qaawa’. Yaal ut a’an chalen chaq naq li Qaawa’ kixtaqlaheb’ laj Israel chixyiib’ankil jun muheb’aal ut chixk’eeb’al lix tz’apb’al li kaax re sumwank tz’aqal sa’ xyi. Sa’ li santil ochoch, uxtaan naqataw sa’eb’ li sumwank noko’ok wi’. Eb’ li sumwank a’an, rochb’een li sumwank re li kub’iha’, nokohe’xb’ak’ rik’in li Yuwa’b’ej ut li K’ajolb’ej, ut nokohe’xtenq’a, jo’ kixye li Awa’b’ej Nelson, chixk’ulb’al “li rahok ut li uxtaan k’a’jo’ xninqaleb’ ru … a’an li hesed nayeeman re” sa’ Hebreo.

Uxtaan naqataw naq nokotz’ape’ sa’ junajil rik’ineb’ li qajunkab’al chi junelik. Jo’kan ajwi’, sa’ li santil ochoch naqataw ru chi saqen wi’chik ru naq li yo’ob’tesink, li t’ane’k, lix mayej li Kolonel re xtojb’al qix, ut li sutq’iik wi’chik rik’in li qaChoxahil Yuwa’—relik chi yaal, li junjunq xcha’alil li k’uub’anb’il na’leb’ re li kolb’a-ib’—a’an li uxtaan k’utb’esinb’il. Naru naqaye naq li k’uub’anb’il na’leb’ re li kolb’a-ib’ a’an jun na’leb’ re sahil ch’oolejil xb’aan naq a’an jun “kʼuubʼanbʼil naʼlebʼ re uxtaan.”

Ninb’antioxi naq sa’ li tasal 110 li Qaawa’ kixye naq a’an tixk’ut rib’ rik’in uxtaan sa’eb’ lix santil ochoch. Ninb’antioxi ajwi’ naq k’utb’esinb’il aran chan ru naq li Qaawa’ tixk’ut rib’ rik’in uxtaan naq laa’o, jo’ laj Jose Smith, naqatz’aama li ruxtaan.

Lix tz’aam laj Jose Smith chirix li uxtaan sa’ li tasal 109 maawa’ xb’een wa naq lix tz’aam kixk’e a’an chixk’ulb’al li k’utb’esinb’il na’leb’. Sa’ li loq’laj k’iche’, li ch’ajom aj Jose kitijok re xnawb’al b’ar wan li Iglees li tz’aqal yaal, a’ut kixye ajwi’ naq “kirelaji chiru li Qaawa’ naq taaruxtaana ru, xb’aan naq maa’ani chik taaruuq taak’ehoq uxtaan re.” Kiteeli li rokeb’aal choxa xb’aan naq laj Jose kixk’e reetal naq naraj ru li uxtaan ka’ajwi’ naru nak’ehok li Qaawa’. Oxib’ chihab’ chik chirix a’an, li anjel aj Moroni kixk’ut rib’ chirix naq laj Jose “kitijok ut kitzʼaaman chiru li Nimajwal Dios re tixkuy chixjunil lix maak ut lix majelal xnaʼlebʼ.”

Naqak’e reetal sa’eb’ li loq’laj hu naq li k’utb’esinb’il na’leb’ nachal chi kok’ aj xsa’ chirix naq natz’aaman li uxtaan. Laj Enos kirab’i lix yaab’ xkux li Qaawa’ ka’ajwi’ chirix naq kixtz’aama naq taakuye’q lix maak. Ki’ok chi jalaak xch’ool lix yuwa’ li rey aj Lamoni naq a’an kixye, “Laaʼin tinqʼaxtesi chixjunil lin maak re xnawbʼal aawu.” Maare ink’a’ taqak’ul xninqal ru sachb’a-ch’oolej jo’eb’ a’an, a’b’an choq’ reheb’ li ch’a’aj chiruheb’ xk’eeb’al reetal lix sumenkileb’ lix tij, naru naq a’an li xsik’b’al li ruxtaan li Qaawa’ li taatenq’anq reheb’ chireek’ankil lix toch’om li Santil Musiq’ej.

Jun na’leb’ jo’ a’an nak’utman chi chaab’il sa’ Moroni 10:3–5. Wan naq naqak’os ru li raqal a’in re xk’utb’al naq rik’in li tijok chi anchal ch’oolej, naru naqanaw ma tz’aqal yaal lix Hu laj Mormon. A’b’an sa’ xk’osb’al ru li na’leb’ a’in, maare naqatz’eq xwankil li uxtaan. K’ehomaq reetal li naxye laj Mormon: “Nawaj relajinkil cheru, naq joʼqʼe teeril li kʼaʼaq re ru aʼin, … naq chijultikoʼq eere chanru ruxtaanal chaq li Qaawaʼ choqʼ rehebʼ li ralal xkʼajolebʼ li winq, chalen chaq xyoʼobʼtesinkil laj Adan toj reetal ajwiʼ xqʼehil naq teekʼul li kʼaʼaq re ru aʼin, ut chetzʼil rix saʼ eechʼool.”

Laj Moroni moko ka’ajwi’ ta nokorelaji naq taqil li k’a’aq re ru a’in—li tz’iib’anb’il esil li ok chaq re chixtz’apb’al—nokorelaji aj b’an wi’ naq taqatz’il rix sa’ li qach’ool li k’a’ru naxk’ut lix Hu laj Mormon chirix “chanru ruxtaanal chaq li Qaawaʼ choqʼ rehebʼ li ralal xkʼajolebʼ li winq.” Xtz’ilb’al rix li ruxtaan li Qaawa’ nokoxkawresi re naq “toopatzʼoq re li Dios, li Junelik Yuwaʼbʼej, saʼ lix kʼabʼaʼ li Kristo, ma inkʼaʼ yaal li kʼaʼaq re ru aʼin.”

Naq naqatz’il rix lix Hu laj Mormon, maare taqapatz’: Ma tz’aqal yaal, jo’ kixye laj Alma, naq lix k’uub’anb’il na’leb’ li Dios re uxtaan naxk’e chi wakliik chi yo’yo chixjunileb’ li yo’lajenaqeb’ chaq sa’ li ruchich’och a’in, ut re naq “te’kʼojobʼamanq wiʼchik saʼ xxaqalil chi tzʼaqal re ru”? Ma yaal li kixye laj Amulek—ma yaal naq li ruxtaan li Kolonel naru chixk’eeb’al chixjunilli k’a’ru elajinb’il xb’aan li tiik ruhil na’leb’, li tento raj taqatoj, ut naru “chixsutinkil qix rikʼin ruqʼ li koleʼk”?

Ma yaal, jo’ kixye laj Alma, naq li Kristo kixk’ul rahilal sa’ xk’ab’a’ li qamaak, jo’ ajwi’ li “qarahilal ut qachʼaʼajkilal,” re naq “taaruuq tixnaw … chanru xkʼeebʼal xtenqʼankilebʼ lix tenamit joʼ chanru xmajelal lix kawilalebʼ”? Ma yaal naq q’axal aj uxtaan li Qaawa’, jo’ kixye li rey aj Benjamin, jo’kan naq, chi maajo’ nimal xtz’aq, kixtoj rix “lix maakebʼ … li xeʼkam chi inkʼaʼ nekeʼxnaw li naraj li Dios chirixebʼ, malaj li keʼmaakobʼk chi maakʼaʼebʼ xnawom”?

Ma yaal, jo’ kixye laj Lehi, naq “laj Adan kitʼaneʼ re naq teʼwanq li winq; ut nekeʼwan li winq re naq teʼwanq xsahilebʼ xchʼool”? Ut ma tz’aqal yaal, jo’ kixye laj Abinadi rik’in raatin laj Isaias, naq li Jesukristo “kitochʼeʼ saʼ xkʼabʼaʼ li qʼetok aatin kiqabʼaanu laaʼo, kiteneʼ saʼ xkʼabʼaʼ li qamaaʼusilal; li chʼiilank koowan wiʼ saʼ tuqtuukilal kiwan saʼ xbʼeen aʼan; ut rikʼin li rapleek kixkʼul aʼan, nokokʼirtesiik”?

Ma tz’aqal yaal naq k’a’jo’ xnimal li ruxtaan lix k’uub’anb’il na’leb’ li Yuwa’b’ej, jo’ k’utb’il sa’ lix Hu laj Mormon? Ninch’olob’ naq tz’aqal yaal a’an, ut naq tz’aqal yaal li k’a’ru k’utb’il chirix li uxtaan sa’ lix Hu laj Mormon.

A’ut, ninnaw naq wankeb’ eere, us ta yookex chi ilok ut tijok rik’in paab’aal, li ch’a’aj cheru xk’eeb’al chi uxmank lix yeechi’ihom laj Moroni naq li qaChoxahil Yuwa’ “tixkʼutbʼesi cheru li yaal chirix, rikʼin lix wankil li Santil Musiqʼej.” Ninnaw naq ch’a’aj a’an xb’aan naq kinnumsi, naab’al chihab’ chaq, naq sa’ xtiklajik ink’a’ kink’ul sa’ junpaat ut chi ch’olch’o ru xsumenkileb’ lin tij chirix li nawil sa’ lix Hu laj Mormon.

Wi a’an ajwi’ laa ch’a’ajkilal laa’at, nakatinb’oq chixtaaqenkil li raatin laj Moroni naq taatz’il rix chan ru naq lix Hu laj Mormon naxk’ut “chanru ruxtaanal chaq li Qaawaʼ choqʼ rehebʼ li ralal xkʼajolebʼ li winq.””? Jo’ kinnumsi laa’in, nawoyb’eni naq sa’ xb’aanunkil a’an, lix tuqtuukilal li Santil Musiq’ej taa’ok sa’ laa waam, ut tatruuq chixnawb’al, chixpaab’ankil, ut chireek’ankil naq lix Hu laj Mormon ut li k’uub’anb’il na’leb’ re uxtaan li naxk’ut, a’an tz’aqal yaal.

Ninb’antioxi naq li Yuwa’b’ej kixk’uub’ jun na’leb’ re uxtaan, ut naq li Kolonel kiwan xch’ool chixk’anjelankil. Ninnaw naq a’an tixk’utb’esi rib’ rik’in uxtaan sa’ lix santil ochoch ut sa’ li qayu’am, wi taqasik’ ru a’an. Sa’ xk’ab’a’ li Jesukristo, amen.