“Jilonqex wik’in”

Ex was wiitz’in, ninsaho’ chi us sa’ wank eerik’in sa’ li jolomil ch’utub’aj-ib’ a’in re Lix Iglees li Jesukristo reheb’ laj Santil Paab’aanel sa’ Roso’jikeb’ li Kutan. A’an a’in lix Iglees. Ch’utch’uuko sa’eb’ li ch’utleb’aal ut li ochoch chiru chixjunil li ruchich’och’ sa’ xk’ab’a’ li Kristo.

Naq noko’ok sa’ li rawa’b’ejihom, naqak’ul lix k’ab’a’ sa’ qab’een rik’in jun sumwank. A’an li Ralal li Dios li waklijenaq chi yo’yo ut li nimanb’il xloq’al. Wan li kamk ut li maak sa’ qab’een. A’b’anan, xb’aan lix rahom choq’ qe, li Kolonel nokoxb’oq chi jilok rik’in a’an.

Aʼan aʼin li naxye qe: “Jilonqex wikʼin ut laaʼin tinjiloq eerikʼin; sikʼomaqin chi yalbʼil eeqʼe ut tineetaw; chextzʼaamanq, ut texkʼuluq; chextochʼoq, ut taateemanq cheru.”

Wan hoonal taqeek’a naq nach’ wanko rik’in li Kolonel Jesukristo A’b’anan, sa’eb’ lix yalb’al qix, wan naq naqeek’a naq najt wanko rik’in a’an, ut naqaj naq tixye qe naq naxnaw k’a’ru wan sa’ qach’ool ut naq nokoxra chi junjunqal.

Lix b’oqom li Kolonel naxye chan ru taqeek’a xtuqlajik qach’ool chirix a’an. Xjilosinkil qib’ rik’in a’an rik’in junelik xjultikankil a’an. Xsik’b’al a’an chi anchal qach’ool sa’eb’ li loq’laj hu. Li tz’aamank rik’in tijok chiru li qaChoxahil Yuwaʼ re naq toojiloq rikʼin lix Raarookil Alal.

Naru naqataw ru li k’a’aq re ru a’in. A’an li taab’aanu raj wi najt laa yanq rik’inebʼ laa raarookil amiiw. Taataw raj chan ru aatinak rik’inebʼ, taasaho’q raj aach’ool rik’in li mensaaj taak’ul rik’inebʼ, ut taab’aanu raj chixjunil li tatruuq re xtenq’ankilebʼ.

Naq nak’ulman a’in chi kok’ aj xsa’, rik’in xnumik li hoonal, taawanq xchamal li rahok-ib’, ut teereek’a naq yookex chi nach’ok. A’b’an wi’ chiru naab’al hoonal ink’a’ na’ux li aatinak-ib’ ut li tenq’ank-ib’, taaq’unaaq lix k’amb’al eerib’.

Li Jesukristo nokoxra chi junjunqal. A’an nokoxtenq’a chixjilosinkil qib’ rik’in a’an. Li taab’aanu raj rik’in laa wamiiw, chanchan ajwi’ li taab’aanu rik’in li qaChoxahil Yuwa’. Tat-aatinaq rik’in a’an sa’ tijok ut sa’ xk’ab’a’ li Jesukristo, taawoyb’ini lix b’eresihom li Santil Musiqʼej, tojaʼ ut naq tatk’anjelaq chiruheb’ laa was wiitz’in sa’ xk’ab’a’ li Kolonel ut chi sa aach’ool. Sa’ junpaat taaweek’a naq yookat chi nach’ok rik’in.

Sa’ lin saajilal, kiweek’a xsahil inch’ool xb’aan naq kinnach’ok rik’in li Kolonel—ut a’an kinach’ok wik’in—sa’ xk’ab’a’ xpaab’ankileb’ li taqlahom. Naq saajin chaq, li loq’laj wa’ak nak’eeman sa’ jun ch’utam ewu. Nanaq sa’ inch’ool jun q’ojyin, 75 chihab’ chaq anajwan, q’ojyin ut ke rix li ochoch. Kiweek’a jun saqen ut jun tiqwalil sa’ xk’ab’a’ xpaab’ankil li taqlahom re xch’utub’ankil wib’ rik’ineb’ laj santil paab’anel re tz’aqonk sa’ li loq’laj wa’ak, ut ok sa’ sumwank rik’in li qaChoxahil Yuwa’ naq junelik taanaq sa’ qach’ool li Ralal ut taqapaab’ lix chaq’rab’.

Sa’ xraqik li ch’utam sa’ li ewu a’an, kiqab’icha “Chatwanq wikʼin, ak yoo chi ewuuk,” rik’ineb’ li aatin, “Chatwanq wikʼin, at Kolol we.”

Eb’ li aatin a’in ke’xk’e chiweek’a’ li Musiq’ej chi numtajenaq, us ta toj saajin chaq. Sa’ li q’ojyin a’an kiweek’a’ xrahom li Kolonel ut naq nach’ wankin rik’in sa’ xk’ab’a’ lix k’ojob’ahom li Santil Musiq’ej.

Naab’al chihab’ chirix a’an, kiwaj reek’ankil wi’chik xrahom li Kolonel ut naq nach’ wankin rik’in li Qaawa’ jo’ li kiweek’a chaq sa’ li ch’utam naq saajin chaq. Jo’kan naq kinpaab’ jun chik li chaqrab’: Xintzoleb’ li loq’laj hu.

Sa’ lix hu laj Lukas, kiwil resil li rox kutan chirix xk’eeb’al chiru krus ut xmuqb’al, naq eb’ lix tiikil moos ke’chal xb’aan xrahomeb’ chirix li Kolonel, re xyulb’al lix junxaqalil. Naq ke’wulak ke’xtaw li pek chi tolk’osinb’il chire li muqleb’aal, ut ink’a’ ke’xtaw lix tib’el.

Wiib’eb’ li anjel xaqxookeb’ aran, ke’xpatz’ k’a’ut naq yookeb’ xxiw:

“K’a’ut naq nekesik’ li yo’yo sa’ xyanqeb’ li kamenaq?

“Maa’ani chik arin: xwakliik chi yo’yo. Jultikaq eere chan ru naq xexraatina naq toj wan chaq Galilea.

“Naq kixye li K’ajolb’ej tento taaq’axtesiiq sa’ ruq’eb’ laj maak, taak’ehe’q chiru krus, ut sa’ rox li kutan taawakliiq chi yo’yo.”

Sa’ ajwi’ li kutan a’an wiib’eb’ lix tzolom li Jesus yookeb’ chi xik sa’ jun k’aleb’aal, Emaus xk’ab’a’, ut a’an ajwi’ li Qaawa’ kinach’ok rik’ineb’ ut ki’ok chi b’eek rochb’eeneb’.

Lix hu laj Lukas nokoxb’eresi chirochb’eeninkileb’ sa’ li q’ojyin a’an:

“Naq yookeb’ chixtz’ilinkil rix ut chixseraq’inkil a’an, a’ ajwi’ li Jesus kinach’ok rik’ineb’ ut ki’ok chi b’eek rochb’eeneb’.

“A’b’anan kimoyon xsa’ li ruheb’ ut ink’a’ ke’ru chixnawb’al ru.

“Li Jesus kixpatz’ reheb’: K’a’ru chi aj ix yookex chi seraq’ik sa’ lee b’eenik chi ra eech’ool?

“Ut jun reheb’ a’an, aj Kleofas xk’ab’a’, kixye re: Ma ka’jat wi’ laa’at yal aj numelat Jerusalen li ink’a’ nakanaw li xk’ulmank aran sa’eb’ li kutan a’in?”

Ut ke’xwotz lix rahileb’ xch’ool xb’aan naq li Jesus kikam naq sa’ xch’ooleb’ a’an a’anaq raj taakoloq re li tenamit Israel.

Tento naq kiwan li rahok sa’ xyaab’ xkux li Qaawa’ naq ki’aatinak rik’ineb’ li wiib’ chi tzolom a’in li raheb’ xch’ool ut yookeb’ chi yaab’ak.

Naq toj yookin chirilb’al ru, ke’chal li aatin a’in li ke’xtoch’ li waam, jo’ chanru xweek’a naq toj ka’ch’inin chaq:

“Naq ke’nach’ok rik’in li tenamit li yookeb’ wi’ chi xik, yal paynum taanume’q naq kixb’aanu rib’.

“A’b’an eb’ a’an ke’xmin ru chi kanaak ut ke’xye re: Kanaaqat qik’in, xb’aan naq yoo chi ewuuk ut ak xxulq’i li saq’e. Ut ki’ok re kanaak rik’ineb’.”

Sa’ li q’ojyin a’an li Kolonel kixk’ulub’a ok sa’ rochocheb’ lix tzolom. Kiwa’ak rochb’eeneb’. Kixchap li wa, kib’antioxink sa’ xb’een, kixjachi ut kixtikib’ xk’eeb’al reheb’. Tojo’ naq kitehonk xsa’ li ruheb’ ut ke’xnaw ru. A’b’an a’an sachaamil chiruheb’.

Laj Lukas kixtz’iib’a choq’ qe li reek’ahomeb’ li osob’tesinb’il tzolom a’an: “Ut ke’xye chirib’ileb’ rib’: Ma ink’a’ tab’i’ naxamnak li qach’ool naq yoo chaq chiqaatinankil sa’ b’e ut yoo xch’olob’ankil chiqu li Santil Hu?”

Eb’ li wiib’ chi tzolom ke’sutq’i sa’ aanil aran Jerusalen re xyeeb’al reheb’ li junlaju chi apostol li k’a’ru kik’ulman. Naq yookeb’ chixwotzb’al li k’a’ru xe’xk’ul, li Kolonel kixk’ut wi’chik rib’.

Xaqaamil li Jesus sa’ xyiheb’, “chiwanq taxaq eerik’in li tuqtuukil usilal, chan reheb’.” Chirix a’an kixtz’il rix li profeetil aatin chirix lix taqlanb’il k’anjel re xtojb’al rix lix maakeb’ chixjunil li ralal xk’ajol lix Yuwa’ ut re xtoqb’al lix b’ak’leb’ li kamk.

“Ut kixye reheb’: Jo’ka’in tz’iib’anb’il, tento naq li Kristo taarahob’tesiiq ut taawakliiq chi yo’yo sa’ xyanqeb’ li kamenaq sa’ rox li kutan:

“Ut taapuktesimanq resil a’an re naq chixjunileb’ li tenamit te’sutq’iiq rik’in li Dios ut te’kuymanq te’sachmanq lix maakeb’, taatiklaaq a’an arin Jerusalen.

“Laa’ex ak xeril lix tz’aqlojik ru chixjunil a’in.”

Jo’eb’ lix raarookil tzolom, li junjunq ralal xk’ajol li Choxahil Yuwa’b’ej li kixsik’ ru ok sa’ rokeb’aal li kub’iha’ wan rub’el sumwank re wank jo’ aj yehol nawom chirix li Kolonel ut re rilb’aleb’ li wankeb’ sa’ rajb’al ru chiru chixjunil li qayu’am sa’ ruchich’och’. Li profeet aj Alma sa’ lix Hu laj Mormon kixye chi saqen ru li yeechi’ihom a’in k’iila cient chihab’ chaq anajwan sa’ li ha’ Mormon:

“Wan eerajom ok sa’ lix korral li Dios, ut xtenamit a’an texk’ab’a’iiq, ut wan eech’ool chixk’amb’al eeriiq cherib’il eerib’ re naq taaseeb’o’q.”

“Relik chi yaal, ut wan eechʼool chi yaabʼak rikʼinebʼ li nekeʼyaabʼak; relik chi yaal, ut xkʼojobʼankilebʼ xchʼool li nekeʼajok kʼojobʼaak xchʼool, ut xaqliik joʼ aj yehol nawom chirix li Dios saʼ chixjunil hoonal, ut saʼ chixjunil li kʼaʼaq re ru, ut saʼ chixjunil li naʼajej … , toj reetal eekamik, re naq taaruuq taatojeʼq eerix xbʼaan li Dios, … re taaruuq taawanq eeyuʼam chi junelik.”

Wi tiikex chiruheb’ li yeechi’ihom a’an, teenaw naq li Qaawa’ naxtz’aqob’resi ru lix yeechi’ihom naq junaq eerik’in sa’ lix k’anjel, rik’in xseeb’ob’resinkil lee riiq. Texwulaq xnawb’al ru li Kolonel, ut sa’ junaq kutan texwulaq chi wank jo a’an ut “tatz’aqloq eere eeru rik’in.” Naq nakatenq’a laa was aawiitz’in sa’ xk’ab’a’ li Kolonel, taak’e reetal naq yookat chi nach’ok rik’in a’an.

Wankeb’ li raarookeb’ aab’aan yookeb’ chi najto’k sa’ li b’e re li junelik yu’am. Maare nakak’oxla kʼa’ chik ru naru taabʼaanu re xsutq’isinkileb’ chaq. Chanawaq naq li Qaawa’ tixjilosiheb’ chaq rik’in wi tiik aach’ool chi k’anjelak chiru.

Maare jultik aawe li yeechi’ihom kixk’e li Qaawa’ re laj Jose Smith ut laj Sidney Rigdon naq najt wankeb’ rik’ineb’ lix junkab’al sa’eb’ lix taqlahom: “Sidney ut Jose, li raabʼilex inbʼaan, lee junkabʼal wankebʼ saʼ xyaalal; wankebʼ saʼ wuqʼ, ut tinbʼaanu rehebʼ joʼ ninkʼoxla naq us; xbʼaan naq wikʼin laaʼin wan chixjunil li wankilal.”

Naq nakak’irtesi lix toch’olaleb’ li wankeb’ sa’ rajb’al ru, lix wankil li Qaawa’ tatxtenq’a. Tixye’ li ruq’ rochb’een laa wuq’ re xtenq’ankileb’ ut rosob’tesinkileb’ li ralal xk’ajol li qaChoxahil Yuwa’.

Junjunq lix moos li Jesukristo re li sumwank tixk’ul xb’eresinkil xb’aan li Musiq’ej naq taak’anjelaq ut taarosob’tesiheb’ li ras riitz’in sa’ lix k’ab’a’. Jo’kan b’i taaweek’a lix rahom li Kolonel ut taataw xsahil aach’ool naq taajilosi aawib’ rik’in a’an.

Laa’in jun aj yehol nawom chirix lix waklijik chi yo’yo li Qaawa’ chanchan ta wi’ naq kinwan aran wochb’eeneb’ li wiib’ chi tzolom sa’ li ochoch sa’ xb’ehil Emaus. Ninnaw naq yo’yo.

A’an a’in lix tz’aqal Iglees—lix Iglees li Jesukristo. Naq taawulaq xkutankil li raqok aatin, tooxaqliiq chiru li Kolonel. A’anaq jun hoonal re sahil ch’oolejil choq’ reheb’ li ke’xsik’ k’anjelak chiru sa’ li yu’am a’in ut te’ruhanq chirab’inkil li raatin: “Us, chaab’il aj k’anjelat ut tiik aach’ool.”

Ninch’olob’ a’in jo’ aj yehol nawom chirix li Kolonel waklijenaq chi yo’yo ut laj Tojol qix, sa’ xk’ab’a’ li Jesukristo, amen.