Lix jalb’al laa k’a’uxl ink’a’ naxk’e riiq li Jesukristo; naxnimob’resi b’an lix sahil xch’ool

Wiib’ oxib’ chihab’ chaq naq wankin aran Florida, yookin chirilb’al jun li hu chirix kab’l. Lix k’ab’a’ li hu naxye naq tooruuq chi wulak sa’ choxa, us ta maji’ tz’aqal qe qu. Jun ixq li yoo chi nume’k kixpatz’ we, “Ma naruhan a’an?”

Kintaqsi injolom chi sachso inna’leb’, toj reetal naq kink’e reetal naq yoo chi aatinak chirix li hu nawil. Yal kinyeeb’e chi jo’ka’in, “Toj yookin chixtikib’ankil, a’b’an naq tinchoy rilb’al, tinye aawe.”

Ay, wi ta yal tinruuq raj chi sutq’iik chaq sa’ li hoonal a’an! Tinye raj re, “Hehe’, naruhan! Xb’aan naq li choxa moko re ta li ani tz’aqal re ru; re b’an li ani kuyb’il xmaak, li ani naxsik’ rajlal li Kristo.”

Nawaj aatinak rik’ineb’ li wan naq neke’xye: “Li jalb’a-k’a’uxlej ut li kuyuk maak nak’anjelak rik’in chixjunileb’ chik, ka’ajwi’ wik’in laa’in ink’a’.” Rik’ineb’ li neke’xye sa’ xch’ool, “Xb’aan naq li sachk nink’ul ink’a’ najala, maare ak we chi jo’kan.” Rik’ineb’ li neke’reek’a, jo’ laa’in, naq jwal taqsink ru lix b’ehil li sumwank!

Jun chaab’il misioneer aran Australia, li Elder QaQa, a’an aj Fiji, kixwotz li nareek’a chirix a’an: “Laa’in ninnaw naq li Dios nikinxra, a’b’an wan naq ninpatz’, “Ma naxnaw li Dios naq laa’in ninra a’an?” Xb’aan naq moko tz’aqal ta we wu, ut toj nink’ul li sachk.”

Rik’in lix patz’om, li Elder QaQa kixk’os ru tz’aqal li k’a’ru rajlal naxik wi’ ink’a’uxl. Maare yoo ajwi’ aak’a’uxl, nakapatz’, “Yookin chixyalb’al inq’e, a’b’an ma naxnaw li Dios naq ninyal inq’e? Naq nink’ul li t’ane’k, ma toj naxnaw li Dios naq ninra?”

Chi ra inch’ool tento tinye naq junxil kinb’is lin sumwanjik rik’in li Kolonel a’ yaal lix tz’aqalil we wu sa’ inyu’am. Kink’oxla naq wi tiikin chi paab’ank, maajun wa tento tinjal ink’a’uxl. Ut naq kinb’aanu li ink’a’ us wulaj wulaj, kinnajtob’resi wib’ rik’in li Dios naq kinye, “X’oso’ rajom a’an chiwix.”

Moko yaal ta a’an.

Kintzol naq wi yookat chiroyb’eninkil junaq kutan naq tz’aqalaq raj aasaqal malaj aachaab’ilal re xik rik’in li Kolonel, ink’a’ nakataw ru li naraj a’an.

Maare us raj xjalb’al li qana’leb’ chirixeb’ li taqlahom ut li ab’ink.

Ninnaw naq li Dios naxk’e reetal li sachk naqak’ul, a’b’an li tz’aqal naril, a’an li naqab’aanu chirix naq naqak’ul li sachk. Ma taqasutq’isi qib’ rik’in a’an wi’chik? Ma tookanaaq sa’ sumwanjik rik’in?

Maare nakawab’i li raatin li Qaawa’, “Wi nikinaara, taapaab’ lin chaq’rab’,” ut nakattawasiik xb’aan naq ink’a’ xapaab’ chixjunileb’ li taqlahom. Chijultiko’q aawe naq li jalb’a-k’a’uxlej a’an ajwi’ jun taqlahom! Maare a’an li taqlahom jwal k’iilasutinb’il sa’eb’ li loq’laj hu.

Naq laj Alma kixye, “Aay, laaʼinaq raj taxaq anjel, ut chiwanq raj taxaq rajom inchʼool … ut tinyaabʼasi raj li jalbʼa-kʼaʼuxlej,” ink’a’ kixyal qajitb’al xb’aan li qamajelal. Kiraj b’an xyaab’asinkil li jalb’a-k’a’uxlej re naq laa’ut ut laa’in ink’a’ taqak’ul rahilal sa’ li ruchich’och’. Laj Alma xik’ kiril li maak xb’aan naq li maak naxk’e chiqeek’a li rahilal.

Wan naq tento ninjultika, jo’ ta naq tz’iib’anb’il chiru inpeekem, naq eb’ li taqlahom a’aneb’ li b’e re elk chiru li rahilal. Jo’kan ajwi’ li jalb’a-k’a’uxlej. Li qaprofeet kixye, “Li Kolonel junelik nokoxra, a’b’an jwal wi’chik naq naqajal qak’a’uxl.”

Chi jo’kan ut, naq li Qaawa’ naxye, “Chejal eekʼaʼuxl, chejal eekʼaʼuxl,” us raj taak’oxla naq naxye, “Nekexinra. Nekexinra.” K’oxla naq a’an naxtz’aama chawu naq taakanab’ li k’a’ru narahob’tesink aawe, ut nakatxb’oq chi elk chaq sa’ li q’ojyin ut ok sa’ lix saqen a’an.

Sa’ xteep lin ko’ xCarly, jun ak’ aj tij kiwiq’la re rosob’tesinkil li loq’laj wa’ak, ut sa’ xna’aj xyeeb’al, “Re naq teʼxbʼaanu re xjultikankil lix kikʼel laa Walal,” a’an kisach ut kixye, “Re naq teʼxbʼaanu re xjultikankil lix rahom laa Walal.” Ki’el xya’al ru xCarly naq kinaq xyaalal li aatin a’an sa’ xch’ool.

Laj Kolol qe kiwan xch’ool chixk’ulb’al rahilal rik’in xtojb’al rix li maak xb’aan naq nakatxra. Relik chi yaal, laa’at “li sahil ch’oolej wan chiru” naq kixk’ul li rahilal.

Li qab’oqb’al chixjalb’al qak’a’uxl a’an reetalil lix rahom li Dios.

Xk’ulub’ankil li b’oqok a’an reetalil li qarahom laa’o.

K’oxla junaq xjalam-uuch li Kristo jwal nawulak chawu. K’oxla naq se’se ru a’an naq nakawoksi lix maatan a’an, xb’aan naq li Kristo a’an “tzʼaqal xlemtzʼunkil li yoʼonink.”

Lix jalb’al laa k’a’uxl ink’a’ naxk’e riiq li Jesukristo; naxnimob’resi b’an lix sahil xch’ool.

Qak’utaq li na’leb’ a’an!

Xb’aan naq li jalb’a-k’a’uxlej a’an li esil jwal chaab’il!

Ink’a’ nokokana sa’ xb’ehil li sumwank xb’aan naq maajun wa nokosach. Nokokana b’an sa’ li b’e xb’aan naq naqajal qak’a’uxl wulaj wulaj.

Ut naq naqajal qak’a’uxl, li Dios naxkuy qamaak. Ink’a’ naxk’e qaxutaan, ink’a’ nokoxjuntaq’eeta rik’in yalaq ani chik, ut ink’a’ nokoxch’iila xb’aan naq a’an ajwi’ li maak xqajal wi’ qak’a’uxl jun xamaan chaq.

Junelik nasaho’ xch’ool naq nokoril chixwiq’ib’ankil qib’. Sa xch’ool chixkuyb’al qamaak xb’aan naq sa’ rilob’aal a’an, chaab’ilo!

Ma ink’a’ yaal a’an?

Wi yaal, k’a’ut b’i’ naq ch’a’aj xpaab’ankil li na’leb’ a’an?

Laj Satanas, laj jitol qe ut laj b’alaq’, naroksi li xutaan re qanajtob’resinkil rik’in li Dios. Li xutaan a’an jun q’ojyin jwal aal, chanchan naq twanq raj tz’aqal raalil wi ta taawisi raj sa’ laa tib’el.

Li xutaan a’an li xyaab’ kuxej li nakatxrahob’tesi, naxye, “K’a’ru b’i’ yookat?” “Ma ruujenaqat jun sutaq chixb’aanunkil li us?”

Li xutaan ink’a’ naxye naq xqab’aanu li ink’a’ us; naxye b’an naq ink’a’ uso laa’o. Maare tixye ajwi’, “Muq aawib’.” Laj tza naxb’aanu chixjunil li naru chiru re xk’eeb’al riiq li qaam, naxye naq jwal terto xtz’aq li jalaak, naq us raj tookanaaq sa’ li q’ojyin, ut chi jo’kan naxsach li yo’onink.

Laj Satanas narelq’a li yo’onink.

Aajel ru naq taawab’i a’in, jo’kan naq tinye chi kaw xyaab’ inxkux: Maawa’at li xyaab’ kuxej sa’ laa wulul, ut maawa’at li ink’a’ us aab’aanuhom. Maare us raj naq taayaab’asi ajwi’ a’an. Ye re laj Satanas, “Anajwan, ink’a’,” Kanab’ a’an chawix.

K’e reetal li kelook, a’ li xrahil aach’ool jo’ naraj li Dios li nasutq’isin aawe rik’in laj Kolol aawe, ut k’e reetal naq li rusilal na’ok sa’ laa yu’am ut xyu’ameb’ laa komon. Ninch’olob’ xyaalal naq wi taq’axtesi jun yotʼbʼil chʼoolej re, sa’ junpaat taajiloq a’an qik’in.

Wi ta taawil ani sub’e’k re rub’el ha’, ma ink’a’ taaye’ raj laa wuq’ re xkolb’aleb’? Ma nakak’oxla naq li Kolonel tixtz’eqtaana raj laa wuq’? Laa’in nink’oxla naq a’an taapisk’oq raj sa’ li ha’, tixsub’ rib’ rub’el chixjunil re qawaklesinkil re naq tooruuq chi musiq’ak wi’chik! Maa’ani truuq tixsub’ raj rib’ toj reetal naq ink’a’ tawb’ilaq raj xb’aan lix saqen li Kristo.

Lix saqen li Kolonel junelik naxq’ax ru xq’ojyinal li xutaan. Maajun wa tixsach xloq’al aawaam. K’e reetal chi us.

• Qayehaq naq li uq’ej a’in nareetali li loq’alil.

• Ut li uq’ej a’in nareetali li ab’ink. Maare xat-aj chaq eq’la, xattijok, ut xatz’il rix li loq’laj hu re rab’inkil xyaab’ xkux li Dios. Xab’aanu li us, ut nakawileb’ laa was aawiitz’in jo’ tixb’aanu raj li Kristo. Yookat chirab’inkil li aatin sa’ li jolomil ch’utub’aj-ib’! Yookat chi ab’ink!

• Malaj, maare yookat chi ch’a’ajko’k. Ch’a’aj chawu xb’aanunkil li k’a’ru najilosin aawe rik’in li choxa. Nakatxutaanak xb’aan naq xab’aanu li ink’a’ us.

• B’ar wan aaloq’al? Ma x’eek’asiik li uq’ej a’in?

Laa loq’al moko b’ak’b’il ta rib’ rik’in li ab’ink. Ink’a’ najala laa loq’al; junelik wan. Li Dios kixk’e laa loq’al, ut maak’a’ ut maa’ani truuq raj taajaloq re. Yaal naq li ab’ink naxyeechi’i qosob’tesinkil. A’b’an ink’a’ naxyeechi’i qaloq’al. Laa loq’al junelik “nim … saʼ rilobʼaal li Dios,” maak’a’ naxye b’ar wankat xb’aan li xasik’ ru xb’aanunkil.

Us ta ninsach, nawaj kanaak sa’ sumwanjik rik’in li Kristo, ut tinye aawe k’a’ut.

Kintzol xsub’b’al wib’ rub’el ha’ naq saajin chaq, ut kintzol naq eb’ laj tz’ilonel-ix neke’ril ma chaab’il nab’aanuman a’an. Ma kin’ok sa’ li ha’ chi tiik, ma tiikeb’ ru’uj li woq, ma kin’ok sa’ li ha’ chi ink’a’ naweek’asi chi kaw? Chirix a’an k’a’jo’ xchaab’ilal li neke’xb’aanu. Neke’xtz’il rix ma chaab’il tz’aqal a’an.

Li junjunq jalan jalanq xch’a’ajkil li naxb’aanu. Ut ka’ajwi’ laj Kolol aawe naxnaw jo’ nimal xch’a’ajkil laa we laa’at. Laa’in nawaj sumwanjik rik’in li ani naxtaw wu, li naxnaw k’a’ru wan sa’ li waam ut lix yalb’al inq’e!

A’an naxnaw naq li qʼojyinal choql yoo chi kub’eek sa’ qab’een laa’o li wanko sa’ li b’e, ut naq tento toob’eeq chire li nima’ jwal tz’aj—jo’kan naq us ta chapchooko chiru li b’arb’ookil ch’iich’, toj tootz’uqleeq xb’aan xha’il.

Li chalk rik’in li Kristo a’an chanchan xyeeb’al, “Ma tatintenq’a?” rik’in aawoyb’enihom naq li ruq’ junelik ye’yo chawu. Nink’oxla naq rilb’al li jalb’a-k’a’uxlej chi jo’ka’in naraj naxye naq us ta maji’ noko’ab’in chi tz’aqal re ru, naqayal ab’ink rik’in rahok anajwan, ut naqasik’ ru kanaak rajlal rik’in li Kristo, xb’aan naq naqara.

Ma jultik aawe lix tenamit li rey aj Benjamin, li maakʼaʼ chik li rajom re xbʼaanunkil li maaʼusilal; re bʼan xbʼaanunkil rajlal li chaabʼilal? Ma nakak’oxla naq ke’xxok lix muheb’aal t’ikr, ke’sutq’i sa’ rochocheb’, ut maajun wa chik ke’maakob’k? Ch’olch’o naq ink’a’! A’b’anan, maak’a’ chik rajomeb’ re maakob’k. Ke’ab’in rik’in rahok! Ke’xsutq’isi rib’ li raameb’ rajlal rik’in li Dios naq toj ke’xnumsi li ch’a’ajkilal!

Jun sut, naq wankin chaq chire li palaw, kiwil jun xul li yoo chi p’urik chiru li iq’, yoo chireek’asinkileb’ lix xik’ chi kaw, a’b’an ink’a’ naru chi xik chi uub’ej. Toja’ naq kink’e reetal jun chik li xul li wan toj taqe’q. A’an kixtaw jun iq’ na’apun taqe’q ut yoo chi xik’ank aran chi maak’a’ xch’a’ajkilal. Kama’an lix jalanil li b’eek qajunes qib’ rik’in li b’eek qochb’een li Kolonel ut xkanab’ankil naq a’an tooxtaqsi, rik’in li k’irtesink sa’ xxik’.”

Sa’ xraqik li qak’anjel jo’ aj jolominel sa’ jun mision aran Australia, naq koo’aatinak rik’ineb’ li misioneer chixjunjunqaleb’, koo’aatinak chirix 3 Nefi 17, li naxye resileb’ li tenamit li ke’ril li Kolonel ut ke’rab’i a’an chi tijok chirixeb’. Kiqapatz’ reheb’, “Wi ta tatruuq chirab’inkil li Kolonel chi tijok chawix laa’at, k’a’ raj ru tixye a’an naq nakak’oxla?”

K’a’jo’ wi’chik naq kiweek’a li Musiq’ej naq kiwab’i lix sumenkileb’ li patz’om a’in. Chixjunileb’ li misioneer ke’ok chi k’oxlak, ut ke’el xya’al ruheb’ naq xqajultika reheb’, “Laj Kolol aawe naxnaw jo’ nimal li ch’a’ajkilal yookat chixnumsinkil. A’an ak kireek’a a’an!”

A’in a’in li na’leb’ ke’xwotz li misioneer chi q’un xch’ooleb’: Jun reheb’ kixye, “Li Jesus tixye re lix Yuwa’: a’an yoo chixb’aanunkil chixjunil li naru chiru. Ninnaw naq yoo chixyalb’al xq’e.” Jun elder kixye, “Rik’in chixjunil li ak naxnumsi sa’ lix yu’am, jwal sa inch’ool rik’in,” chan jun chik.

Qayalaq a’in. Sa’ li ewu a’in, naq maji’ tattijoq, k’oxla naq li Kolonel wan chak’atq. Aʼan laj aatinanel chawix chiru li Yuwaʼbʼej. Patz’ aawib’, “K’a’ raj ru tixye li Kolonel re li Yuwa’b’ej chiwix laa’in?”

Toja’ naq taach’anab’ aawib’.

Yal rab’inkil li xyaab’ kuxej li naxye li k’a’ru us chawix—lix yaab’ xkux li Kolonel, laa tz’aqal aamiiw, ut laa Yuwa’ sa’ Choxa, li wan aran chi yaal. Chijultiko’q aawe, junelik nim lix rahomeb’ a’an ut laa loq’al.

Xaqxookin arin re xch’olob’ankil xyaalal naq li Jesukristo naxsaqenob’resi ru chixjunileb’ li ch’unch’uukeb’ sa’ q’ojyin. Jo’kan ut, sa’eb’ li kutan nakawab’i li xyaab’ kuxej li naxye aawe naq taamuq aawib’, naq tatkanaaq aajunes sa’ li q’ojyin, nakatinb’oq chixpaab’ankil li Kristo! Jilosi aawib’ rik’in a’an ut loch li saqen—tzʼaqal xlemtzʼunkil li qayoʼonihom.

Chi sutsu xb’aan lix saqen, taak’e reetaleb’ laa was aawiitz’in li ke’reek’a ajwi’ li junaatal, a’b’an anajwan chik naq lochlo li saqen, laa’at ut eb’ a’an teek’oxla, “K’a’ut naq jwal kooxuwak sa’ li q’ojyin?” Ut k’a’ut naq najt kookana aran?”

“Lix Qaawa’ li Saqen chiq’alunq aawe sa’ xtel ut chik’ojob’anq aach’ool ut chirahoq aawe rajlal.” Chiqara a’an ut chiqasik’ ru rajlal. Sa’ xk’ab’a’ li Jesukristo, amen.