Li b’eresiik xb’aan li Jesukristo

Sa’ li jek’inb’il aatin chirix li junkab’al naqil naq “li junjunq a’aneb’ raab’ileb’ musiq’ejil alalb’ej malaj rab’inb’ej chiru choxahil na’b’ej yuwa’b’ej ut xb’aan a’an, li junjunq wan xchoxahilal li ak xk’am chaq, ut li toj taareechani. … Sa’ li wanjik naq maji’ neke’yo’la, li musiq’ejil alalb’ej ut rab’inb’ej ke’xnaw ru ut ke’xloq’oni li Dios jo’ xJunelik Yuwa’, ut ke’xk’ulub’a lix k’uub’anb’il na’leb’, li te’ruuq wi’ li ralal xk’ajol A’an chixk’ulb’al xjunxaqalileb’ re tz’ejwalej, ut rik’in li te’xk’ul sa’ li ruchich’och’, chixk’amb’al li b’e li naxik sa’ li tz’aqalil re ru, ut chixtawb’al sa’ roso’jik li choxahilal li te’ruuq chixk’ulb’al jo’ aj eechanihom re li junelik yu’am.”

Rub’elaj lix yo’lajik sa’ li ruchich’och’, li Jesukristo kixk’ut rib’ chiru laj Moises ut kiraatina sa’ xk’ab’a’ li Yuwa’b’ej. Kixye re laj Moises naq wan jun li nimla k’anjel choq’ re. Chiru li ch’utam a’an, li Qaawa’ kixye re k’iila sut, “li walal.”

Chirix naq ak xk’ulman a’an, laj Satanas kichal chiraalenkil, ut kixye, “At Moises, ralalat li winq, loq’onihin.”

Laj Moises kixsume li aaleek rik’in xjultikankil lix choxahilal ut kixye, “Anihat laa’at? Xb’aan naq k’e reetal, laa’in jun ralal li Dios.” Li yaal kikolok re laj Moises chiru lix pleetihom laj tza.

Ex was wiitz’in, eb’ li qasachb’esinkil sa’ li ruchich’och’ a’an tz’aqal yaal. K’iila sut neke’aalenk, a’b’an wan jun li rajb’al, ut a’an qisinkil sa’ xb’ehil li yo’yookil ha’ li nak’amok qe rik’in li Yuwa’b’ej ut li junelik yu’am.

Ninnaw naq yaal tz’aqal naq wan li qasachb’esinkil sa’ li ruchich’och’. Sa’ jun li domingo, naq toj ak’in sa’ li paab’aal, yookin chixwotzb’al jun li tzolok, naq kiwakli jun li aatinak li ch’i’ch’i’ kinxkanab’. Xch’a’ajko’ chiwu xraqb’al li tzolok a’in. Kinjosq’o’ ut xweek’a naq laa’in li xrahob’tesiik. Chi maajun li aatin xinye, xin’el chaq ut xink’oxla naq maji’ wan chik tinsutq’iiq sa’ li Iglees.

Sa’ li hoonal a’an, jun li winq li wan li tijonelil rik’in, xaqxo chiwu. Rik’in rahok, kinxb’oq chixk’eeb’al inch’ool chirix li Kristo ut ink’a’ sa’ li kik’ulman sa’ li tzolok a’an. Naq kijultiko’ we li k’a’ru kink’ul rik’in, a’an kixye we naq kirab’i jun xyaab’ kuxej li kixye re, “Ayu chirix; aajel ru a’an choq’ we.”

Ex raarokil wamiiw, chiqajunilo aajel qu choq’ re a’an. Li Awa’b’ej Nelson kixye naq “sa’ xk’ab’a’ li qasumwank rik’in li Dios, maajun wa tixkanab’ qatenq’ankil, ut maajun wa taa’oso’q lix chaab’il kuyum choq’ qe.” Li qachoxahilal ut li qawanjik sa’ sumwank rik’in li Dios neke’xk’e qak’ulub’ chixk’ulb’al li choxahil tenq’.

Jo’ naq li kar tento naxch’oolani rib’ sa’ li palaw re k’iik, aajel ajwi’ ru naq taqach’oolani qib’ sa’ musiq’ejil re naq ink’a’ tookamq chi ink’a’ kawresinb’il li qamusiq’. Li tijok, li loq’laj hu, li santil ochoch, ut li tz’aqonk sa’ li ch’utam re domingo aajel ru re xkawresinkil li qamusiq’.

Chiru li noviembre re 1956, laj Ricardo García kikub’e xha’ aran Chile, ut a’an li xb’een komon sa’ li Iglees sa’ lin tenamit. Tz’aqal jun kutan chi maji’ nakam, kixch’olob’ chiruheb’ lix junkab’al ut li ramiiw, “Naab’al chihab’ chaq anajwan, eb’ li misioneer xine’xb’oq chi saho’k inch’ool wochb’eeneb’ lin junkab’al. Laa’in jun winq sa xch’ool. Yehomaq reheb’ chixjunil arin Chile naq li evangelio a’an ajwi’ li sahil ch’oolejil.”

Chirix naq ak xch’oolaniik rik’in lix evangelio li Jesukristo, laj Ricardo kixq’axtesi lix yu’am chi k’anjelak rik’in rahok chiru li Dios ut rik’in xtenq’ankil li ras riitz’in. Lix b’aanuhom jo’ xtzolom li Dios a’an jun eetalil li narosob’tesi tasal tenamit ut jo’ ajwi’ laa’in. Li profeet aj Jose Smith kixk’ut naq “junaq li winq nujenaq rik’in lix rahom li Dios ink’a’ ka’ajwi’ nasaho’ xch’ool rik’in rosob’tesinkil lix junkab’al, naxik b’an sa’ chixjunil li ruchich’och’, chi anchal xch’ool re rosob’tesinkileb’ chixjunil li jar teepal chi winq.”

Sa’ xchamal qach’ool wan li qajom chiqajunqal chi sutq’iik sa’ li qachoxahil ochoch, ut li Jesukristo a’an laj k’amol qab’e. A’an li b’e. Lix mayej aj tojol-ix naxsik’ xb’ehil naq tooruuq chi ok sa’eb’ li loq’laj sumwank rik’in li Dios. Naq ak xoo’ok sa’ sumwank, wan naq taqak’e reetal naq yooko chi numxik b’ar wi’ kaw roq li ha’. Li xiwxiw, li rahil ch’oolej, li aaleek, ut li ch’a’ajkilal te’xyal rix li qapaab’aal ut li qamusiq’ejil metz’ew. Patz’ aatenq’ankil. Li Jesukristo naxtaw ru ut junelik wan xch’ool chiqatenq’ankil rik’in xwotzb’al li qiiq.

Chijultiko’q eere naq a’an nawb’il ru jo’ “jun winq re rahil ch’oolejil, ut k’aynaq rik’in li rahil aamej.” Li Kolonel kixye, “Sa’ li ruchich’och’ teek’ul li rahilal: a’b’anan kawaq eech’ool; Laa’in xinq’ax ru xwankil li ruchich’och’.” Lix mayej aj tojol-ix naxkanab’ naq kuyb’ilaq li qamaak toj reetal naq ink’a’ chik najultiko’ re.

Maare ink’a’ taasachq sa qach’ool li qamaak, xb’aan naq a’an xkomon li qatzolb’al sa’ ruchich’och’, aajel ru naq taajultiko’q qe re naq ink’a’ taqaka’sutiheb’. Naraj b’an naq taajultiko’q li Kolonel qe sa’ xk’ulb’al li loq’laj wa’ak sa’ li Iglees rajlal domingo. Li k’ojob’anb’il k’anjel a’an jun raqal aajel ru re li loq’onink ut re lix k’iijik li qamusiq’. Naqeek’a li sahil ch’oolejil naq naqataw ru naq li hilob’aal kutan moko yalaq k’a’ru ta chi kutankil. “Li hilob’aal xaqab’anb’il choq’ re li winq,”re xk’eeb’al qahilaal chiru li ruchich’och’ ut re x’ak’ob’resinkil li qajunxaqalil ut li qamusiq’.

Naqajultika ajwi’ li Qaawa’ naq nokoxik sa’ li santil ochoch—li rochoch li Qaawa’. Eb’ li santil ochoch neke’xk’e xnimal qanawom chirix li Jesukristo naq a’an xb’eenil li qasumwank li nokoxk’am sa’ li junelik yu’am, li xnimal ru xmaatan li Dios.”

Li xik sa’ li santil ochoch naxk’e xk’ojob’ankil lin ch’ool ut xnimal woyb’enihom chirix li qeechanihom. Ak innumsihom li choxahil junajil rik’ineb’ li qas qiitz’in li yoyookeb’ ut li kamenaqeb’ ajwi’. Wilom li sachb’a-ch’oolej re k’irtesink sa’ xyu’ameb’ lin kok’al, wiib’ reheb’ a’an wankeb’ lix yajel ink’a’ na’ilman ru, a’b’an naraj li rilb’aleb’ wulaj wulaj chiru chixjunil lix yu’ameb’.

Sa’ li qajunkab’al, nasaho’ qach’ool naq noko’aatinak chirix li k’uub’anb’il na’leb’ re sahil ch’oolejil. Nasaqeno’ ru lix naq’eb’ ru lin kok’al naq neke’rab’i naq b’antiox re li Jesukristo, “lix tawasinkileb’ yal chiru jun ch’ina k’amok taawanq.” Naqaraheb’ li qakok’al chi anchal qach’ool, ut naqanaw naq sa’ jun kutan jo’ kixk’ut li Awa’b’ej Jeffrey R. Holland, “te’xaqliiq chiqu chi loq’oninb’ileb’ ut ninqeb’ xwankil chi tz’aqalaqeb’ re ru sa’ tz’ejwalej ut k’auxlej.” Eb’ li qasumwank nokohe’xnach’ob’resi rik’in li Qaawa’ toja’ re naq neke’xk’e chi uxmank li ink’a’ naru, ut neke’xnujob’resi chi saqen ut tuqtuukilal li na’ajej b’ar wi’ wan li q’ojyin ut kab’ rix ch’oolej.

B’antiox re li Jesukristo, wan li yo’onink ut li k’a’ru k’ojob’anb’il chi us, re naq toj yooqo chixraab’aleb’, chi tijok chirixeb’, ut chixtenq’ankileb’ li qas qiitz’in li aajeleb’ ru choq’ qe.

Ninnaw naq li Kristo yo’yo. Naxnaw qu ut nokoxra. A’an li b’e, li yaal, ut lix yu’am li ruchich’och’.

Sa’ li kutan a’in nekexinb’oq chejunilex chixjayalinkil eeyu’am rik’in li Jesukristo ut lix k’utum. Xbʼaanunkil aʼin tooxtenqʼa re naq inkʼaʼ toot’ane’q sa’ li aaleek, li josqʼil, ut li xtoqʼobʼankil qu. Tookanaaq jo’ eb’ li santil ochoch—oxloq’, kaw rib’, ut junelik wan. Te’qakuy li kaq-sut-iq’, ut toowulaq sa’ li qochoch, rik’in xyalb’al qaq’e ut chi saho’k qach’ool toj sa’ roso’jik. Sa’ xk’ab’a’ li Jesukristo, amen.