Jo’ jun ch’ina al

Sa’ xraqik xyu’am li Jesus sa’ li ruchich’och’, kixkawob’resi xtzolb’aleb’ lix apostol. Wi ta li esil kixk’ut ut li Iglees kixxaqab’ chaq te’kanaaq, tento raj te’kawresimanq chi us xch’ooleb’ li kab’laju chi winq li ke’xnaw ru yal chiru kaahib’ xka’k’aal po.

Sa’ jun kutan li Qaawa’ kiril jun li wech’ink sa’ xyanqeb’ li Kab’laju ut moqon kixpatz’, “K’a’ru nekewech’i wi’ chaq eerib’ sa’ b’e?” Ke’xutaanak, ut “ch’anch’o ke’kanaak,” chan li tz’iib’anb’il esil. A’b’an li Jesus ak naxnaw k’a’ru yookeb’ chixk’oxlankil sa’ xch’ooleb’ ut kixk’e reetal naq xtikla b’ayaq li q’etq’etil aran. Jo’kan naq, “kixb’oq jun li ch’ina al, kixk’e sa’ xyiheb’, …

“Ut kixye: “Relik chi yaal ninye eere: wi ink’a’ teejal eena’leb’ ut wi ink’a’ jo’kaqex li kok’al, ink’a’ tex’ok sa’ lix nimajwal wankilal li choxa.

“Jo’kan utan, ani tixkub’si rib’ jo’ li ch’ina’al a’in, a’an li q’axal nim xwankil sa’ lix nimajwal wankilal li choxa.”

Tento ajwi’ xk’eeb’al reetal naq rub’elaj xyo’lajik li Kristo, li rey aj Benjamin sa’ xchaq’rab’inkil rib’ ki’aatinak ajwi’ chirix lix tuulanil jun li ch’ina al. A’an naxye: “Li ruchich’och’il winq wan choq’ aj xik’ ilonel re li Dios, … ut toj taawanq chi junelik qʼe kutan, wi inkʼaʼ … naʼok choqʼ aj santil paabʼanel saʼ xkʼabʼaʼ lix tojbʼal rix li maak xbʼaan li Kristo li Qaawaʼ, ut naʼok chanchan jun li chʼina al, kubʼenaq ratawom, … tuulan, … nujenaq rikʼin rahok, … jo’ chanru naq jun li ch’ina al naxk’e rib’ rub’el xwankil lix yuwa’.”

Ch’olch’o naq wan junjunq li na’leb’ li ink’a’ naqawaklesi wi’ xch’ooleb’. 25 chihab’ chaq anajwan, li wi aj oxib’ chihab’ kixja’ch’ lix tel li ranab’ aj oob’ chihab’. Lin ji’, li yoo chirilb’aleb’ sa’ li ewu a’an, sa’ junpaat kixk’ut chiru xrab’in chixjunil li na’leb’ chirix li jalb’a-k’a’uxlej li naxnaw a’an, ut kixye naq li iitz’inb’ej maare ink’a’ naxnaw li rahilal na’eek’aman sa’ xja’ch’b’al lix tel. Lix kixye li yuwa’b’ej kik’anjelak chiru yal jun k’asal, maare jun k’asal rik’in meer, toj reetal naq ki’ab’iman jun li yaab’ak chi jwal kaw b’ar wi’ li wi kixjap re chixyeeb’al, “Anajwan naxnaw.”

Jo’kan ut, k’a’ru li tento taqatzol rik’ineb’ li toj ka’ch’ineb’ sa’ li yu’am a’in? K’a’ru kitoch’ok xch’ool li Kristo toj reetal naq kiyaab’ak jo’ naxye sa’ lix Hu laj Mormon? K’a’ru yoo chixk’utb’al li Jesus naq kixk’e chi chalk li xam ut eb’ li anjel re naq te’xsuteb’ li kok’al a’an, ut kixtaqlaheb’ li ninq, “K’ehomaq reetal lee kok’al”?

Inka’ naqanaw k’a’ut naq kixb’aanu, a’b’an nink’oxla naq maare xb’aan naq saqeb’ ru ut maak’a’eb’ xmaak, tuulaneb’ xch’ool, ut xb’aan naq wan li na’leb’ naru naqatzol laa’o.

K’a’ut naq eb’ li qakutan re yaab’ak kik’ab’a’iik xb’aan jun jo’ “xjo’maajo’il li jo’maajo’”? K’a’ut naq “lix jo’maajo’il k’oxlahomeb’ ut lix q’etq’etileb’ li ralal xk’ajoleb’ li winq” natam sa’ li kab’l nim ut paapo xsa’ li kiril laj Lehi? Ut eb’ laj Tzoramita, li ch’uut li neke’tijok yal re xnimob’resinkil rib’? Chirixeb’ a’an laj Alma kixye, “at Dios neke’elajin chawu rik’in xtz’uumaleb’ re, a’b’an xnimob’resihomeb’ rib’… rik’in li jo’maajo’il k’a’aq re ru re li ruchich’och’.”

Sa’ junpak’al chik, ma wan k’a’ruhaq q’axal chaq’al ru, saq ru, malaj tuulan chiru lix tij jun li ch’ina al? Chanchan naq wan li choxa aran. Tz’aqal yaal li Dios ut li Kristo, a’b’an moqon, wankeb’ li yal te’tijoq rik’in jo’maajo’il aatin.

Jo’ kixye li Elder Richard L. Evans 60 chihab’ chaq: “Naab’alo naqaye naq naqataaqe li Kristo, a’b’an … naqab’atz’unle. … Naqoxloq’i, a’b’an ink’a’ naqataaqe. … Naqaka’suti li raatin; a’ut ink’a’ naqayu’ami.” “Sa naqil, a’b’an ink’a’ naqaloq’oni.”

Jwal jalanaq raj li yu’am wi ta li ruchich’och’ wan naq taaroxloq’i raj li Jesus sa’ xna’aj xyeeb’al xk’ab’a’ chi maak’a’ xyaalal.

A’ut li kok’al k’a’jo’ naq neke’xra a’an, ut naru ajwi’ neke’rahok reheb’ li ras riitz’in chi jo’kan. Naq saajeb’, ak re naq li kok’al jwal neke’rahok ut neke’kuyuk maak sa’ junpaat, ut eb’ lix se’ naru naxtoch’ li ch’oolej li ani jwal kaw xch’ool.

Ut toj wan chik li na’leb’. Saqil ru ch’oolej? Li paab’ank? Li kawil ch’oolej? Li chaab’il wanjik?

Nawaj xwotzb’al eerik’in xtuulanil chiru li Dios jun li saaj wamiiw raaro inb’aan.

Sa’ li 5 re enero, 2025—91 kutan anajwan—laj Easton Darrin Jolley kik’ehe’ re li Tijonelil re Aaron ut kik’ojob’aak jo’ aj tenq’anel sa’ Lix Iglees li Jesukristo reheb’ laj Santil Paab’anel sa’ Roso’jikeb’ li Kutan.

Laj Easton junxil na’ok chiroyb’eninkil naq tixjek’i li loq’laj wa’ak chalen xjultiko’ re. A’b’an li oxloq’il oyb’enink a’in naxk’am chaq li xuwak, naq moko taa’elq ta chi uub’ej, naq yal re se’el malaj naq yal tixk’ut xxutaan lix junkab’al malaj xjunes rib’.

Laj Easton wan jun li yajel ink’a’ jwal nawb’il ru, li nasachok chi junajwa, li distrofia muscular congenital de Ullrich nayeemank re. Timil timil lix yu’am xnujak rik’in xninqal ch’a’ajkilal, toj reetal naq xsach li royb’enihom ut li rajom choq’ reheb’ li kutan chalel. Ink’a’ chik naab’al hoonal naq taakanaaq sa’ jun li silla de ruedas chi junelik. Lix junkab’al ink’a’ neke’aatinak chirix li k’a’ru tixk’ul chirix a’an.

Sa’ li domingo chirix naq kik’ojob’aak, laj Easton xjek’i li loq’laj wa’ak. Li k’a’ru kiraj sa’ xch’ool, a’an naq tixk’ut rib’ chiru, ut tixk’e li loq’laj wa’ak re lix yuwa’, a’an li obiisp sa’ lix teep. Rub’elaj xb’aanunkil li k’anjel a’an, xtz’aama ut xtz’aama, ut xyaab’ak ut xtz’aama naq maa’ani taatenq’anq re. A’an xreek’a sa’ xch’ool naq xraj xb’aanunkil xjunes li k’anjel a’an.

Chirix naq laj tij xjach li kaxlan wa ut xrosob’tesi— jun reetalil lix tib’el li Kristo li rahob’tesinb’il—laj Easton, rik’in xtib’el li rahob’tesinb’il, xnach’ok ut xk’ul lix na’aj li loq’laj wa’ak. A’b’anan re xjek’inkil a’an, tento tixtaqsi oxib’ li grada. Chirix naq xk’ul lix na’aj li loq’laj wa’ak, xyu’ rib’ ut xk’e a’an sa’ xb’een li chapleb’-ib’ wan aran. Chirix a’an, xchunla sa’ jun li grada ut rik’in li ruq’ xtaqsi lix seeb’ oq toj sa’ xb’een li grada. Chirix a’an xtaqsi lix tz’e oq toj b’ar wi wan li roq jun chik, ut chi jo’kan xb’aanu toj reetal naq xwulak toj sa’ xb’een lix tzuul Everest re oxib’ chi grada.

Chirix a’an, xnach’ok rik’in jun li oqech li xru wi’ xchapb’al rib’ toj reetal naq xru chi xaqliik. Xsutq’i xxokb’al lix na’aj li kaxlan wa. Wib’ oxib’ yokb’ chik xxaqli chiru li obiisp, a’ lix yuwa’, li t’aqt’aq li rilob’aal rik’in xya’al li ru, ut x’ajman xramb’al rib’ chiru xq’alunkil lix chaab’il ut tiikil alal. Laj Easton, rik’in jun xnimla se’, naru raj xye, “Xinnima ru [lin yuwa’] ut xinb’aanu chi tz’aqal li k’anjel xk’e chixb’aanu.”

Li paab’aal, li chaab’ilal, li saqilal, li oxloq’il, li tiikilal, ut li rahok choq’ re lix yuwa’ li k’a’jo’ naq kiraj xsahob’resinkil xch’ool. A’in ut naab’al chik li na’leb’ naxk’e chiqaye, “Ani tixkub’si rib’ jo’ li ch’ina al a’in, a’an li q’axal nim xwankil sa’ lix nimajwal wankilal li choxa.”

Ex was wiitz’in, lix chaq’al ru jalam-uuch wilom laa’in a’aneb’ re li k’uula’al, li kok’al, ut li saaj li neke’xyal xq’e ut ninqeb’ xloq’al jo’eb’ li xqaye resil anajwan. Ninch’olob’ xyaalal naq rik’ineb’ a’an nak’utun li rawa’b’ejihom li Dios sa’ xb’een li ruchich’och’, rik’in chixjunil lix wankilal ut xchaq’alil ru.

Ninch’olob’ ajwi’ xyaalal naq sa’ xch’ajomil, laj Jose Smith kiril li k’a’ru kixye naq kiril ut ki’aatinak rik’ineb’ li ani kixye naq ki’aatinak wi’. Ninnaw naq laj Russell M. Nelson, li tuulan ut saq ru xch’ool, a’an li profeet ut aj ilol na’leb’ k’ojob’anb’il ut sik’b’il ru xb’aan li Dios. Rik’in naq wilom naab’al sut chiru lin yu’am, ninnaw naq lix Hu laj Mormon a’an li hu q’axal chaab’il li wilom, ut naq tz’aqal yaal naq a’an li taqenaqil pek li xaqab’anb’il wi’ lin ch’ina kab’l sa’ li rawa’b’ejihom li Dios. Ninch’olob’ xyaalal naq li tijonelil ut eb’ li tij yookeb’ chixk’eeb’al inyu’am—lix tijonelil li Kristo ut lee tij laa’ex. Ninnaw naq tz’aqal yaal chixjunil a’in ut ninch’olob’ xyaalal a’an sa’ xk’ab’a’ li q’axal paab’ajel ut tuulan reheb’ chixjunileb’ li ralal li Dios—li Alfa ut Omega, li kik’ehe’ chiru krus, laj ch’olob’anel xyaalal—a’an ajwi’ li Qaawa’ Jesukristo, amen.