Li osob’tesink aj k’ehol eeqaj

Sa’ li Obiisp aj jolominel, kinruhan xnawb’aleb’ ru laj santil paab’anel sa’ chixjunil li ruchich’och’, li jalanq jalanq xwanjikeb’ ut xna’leb’eb’. Lee paab’aal ut lix q’axtesinkil eerib’ re li Qaawa’ Jesukristo xinxmusiq’a chi kok’ aj xsa’. A’b’an toch’b’ilin ajwi’ xb’aan li ch’a’ajkilal nekenumsi—maare a’an li yajel, li paaltil, xmaak’a’il tumin, xmaak’a’il li sumlaak malaj li tzolok, li muxe’k, malaj k’a’aq re ru ramb’ilex wi’. Wan naq eb’ li yalb’a-ix a’in neke’xt’il li qak’iijik ut lix yalb’al qaq’e chixyu’aminkil li evangelio, ut nokohe’xram chixtenq’ankil li qas qiitz’in, chi loq’onink, ut chixb’aanunkil li loq’laj k’anjel chiru li Dios.

Ex raarookil wamiiw, wi nekereek’a naq ch’a’aj choq’ eere li nekextawli wi’, nawaj naq teenaw a’in: Li Qaawa’ nekexxra chejunjunqalex. A’an naxnaw li nekextawli wi’, ut li rokeb’aal li osob’tesink teeto sa’ ka’kab’il choq’ eere, a’ yaal k’a’ru li ch’a’ajkilal nekenumsi.

Ninnaw naq yaal a’in sa’ xk’ab’a’ jun li na’leb’ kink’ul sa’ lin yu’am, li maare anchal yal jo’ maajo’, a’ut kixtoch’ inch’ool chi junajwa. Naq wan chaq 22 chihab’ we, yookin chaq chi k’anjelak sa’ li Fuerza Aerea Francesa aran Paris, ut jwal kisaho’ inch’ool xnawb’al naq li Elder Neal A. Maxwell, jun x’apostol li Qaawa’, taa’aatinaq sa’ jun li ch’utam sa’ li Campo Eliseos. A’b’anan, naq ok re chi tiklaak li ch’utam, kink’ul jun li teneb’aak naq tink’am jun li oficial sa’ li aeropuerto sa’ tz’aqal xhooril li ch’utam.

Kiraho’ inch’ool. A’ut, chi wan inch’ool re tz’aqonk, kinkanab’ li oficial ut kinsutq’i sa’ junpaat re tz’aqonk sa’ li ch’utam. Chirix naq kinkanab’ li b’eleb’aal ch’iich’, kin’alinak toj sa’ li Campos Eliseos ut chi jwal lub’luukin xinwulak naq yal oob’ minuut chik ma naraqe’ li ch’utam. Naq kin’ok, kiwab’i li Elder Maxwell chixyeeb’al, “Anajwan, jo’ apostol tink’e jun lee roso’b’tesinkil.” Sa’ li hoonal ajwi’ a’an, kink’ul li maajo’q’e taasachq sa’ inch’ool. Kinnujak rik’in li Musiq’ej, ut li raatinul li osob’tesink ki’ok sa’ junjunq xcha’al lin ch’ool, chanchan ta wi’ naq yoo chiwaatinankil laa’in injunes.

Li kink’ul sa’ li kutan a’an yal ka’ch’in, a’b’an jwal naxk’utb’esi jun li na’leb’ aj k’ojob’anel ch’oolej sa’ li k’a’ru kixk’uub’ chaq li Dios choq’ qe: Naq yal xmaak li qawanjik naq ink’a’ naru naqak’ul li k’a’ru naqaj chi tiik li qach’ool, li Qaawa’ naxk’e reeqaj re naq toj tooruuq chixk’ulb’al li osob’tesink xyeechi’i chaq.

Li na’leb’ a’in xaqxo sa’ xb’een oxib’ li na’leb’ re lix evangelio li Jesukristo li k’ojob’anb’il wi’chik:

1. Li Dios nokoxra chiqajunjunqal chi tz’aqal. “Nokoxbʼoq chiqajunilo chi chalk rikʼin ut chixyalbʼal lix chaabʼilal.” Li Dios kixk’uub’ xna’leb’ chirix li tojb’al-ix re naq sa’ junaq kutan taayeechi’imanq qe chiqajunilo, li junjunq ajwi’ qe, naq taqak’ul li qakolb’al ut lix taqsinkil li qaloq’al.

2. Xb’aan naq li Dios tiik xch’ool ut aj uxtaan ut kixk’uub’ xna’leb’ chi tz’aqal, moko tooxk’e ta chixtojb’al rix li k’a’aq re ru ink’a’ nokoru chixjalenkil. Li Elder Neal A. Maxwell kixch’olob’ naq “li Dios … jo’ aj uxtaananel moko ka’aj ta wi’ naxk’e sa’ ajl li qajom ut li qab’aanuhom, naril b’an ajwi’ lix ch’a’ajkil li k’a’aq re ru wan sa’ qab’een xnumsinkil.”

3. Sa’ xk’ab’a’ li Jesukristo ut lix tojb’al rix li maak, naru naqataw li qakawilal re naq tookuyuq ut toj taqaq’ax ru chixjunil li ch’a’ajkilal re li qayu’am. Laj Alma kixye naq li Kolonel tixk’ul sa’ xb’een moko ka’aj ta wi’ lix maakeb’ li neke’xyot’ xch’ool, jo’kan b’an ajwi’ “lix rahileb’ ut lix yajeleb’ li tenamit.” Jo’kan naq ink’a’ yal nokoxkol chiru qamaak, a’b’an li ruxtaan ut li rusilal li Qaawa’ nokoxtenq’a ajwi’ rik’in li maa’usilal, li q’etq’etil, ut li majelal re li ruchich’och’.

Re xk’ulb’aleb’ li osob’tesink aj k’ehol eeqaj, wan k’a’ru tento sa’ qab’een. Li Qaawa’ naxye qe naq taqab’aanu “chixjunil li nokoru chixb’aanunkil” ut naq taqaq’axtesi “anchal li [qaam] choq’ mayej chiru.” Tento naq taqaj chi anchal qach’ool, naq tiikaq li qaam, ut naq taqayal qaq’e chixpaab’ankileb’ li taqlahom ut chixjayalinkil qib’ rik’in li rajom li Dios.

Naq lix yalb’al qaq’e moko naxtaw ta rib’ rik’in li qajayalihom xmaak li k’a’aq re ru ink’a’ nokoru chixjalenkil, li Qaawa’ naxk’ulub’a li rajom qach’ool jo’ li mayej k’ulub’ej. Li Awa’b’ej Dallin H. Oaks kixye, “too’osob’tesiiq sa’ xk’ab’a’ li k’a’ru qajom chi tiik li qach’ool, us ta wan xramok chiqu xk’anjelankil li qajom a’an.”

Naq li profeet aj Jose Smith yoo xk’a’uxl chirix li riitz’in, laj Alvin, li kikam chi ink’a’ kitz’aqon sa’eb’ li k’anjel k’ojob’anb’il sa’ li evangelio, kik’ojob’aak xch’ool rik’in li na’leb’ a’in: “Chixjunileb’ li te’kamq chalen anajwan chi maak’a’eb’ xnawom chirix [lin evangelio], li ke’xk’ul raj chi anchaleb’ xch’ool, te’wanq choq’ aj eechanihom re [lix choxahil awa’b’ejihom li Dios].” Toja’ naq li Qaawa’ kixye ajwi’, “Xb’aan naq laa’in, li Qaawa’, tinraqoq aatin chirix chixjunileb’ li winq jo’ chanru lix k’anjeleb’, jo’ chanru li rajomeb’ lix ch’ool.”

Li naril li Qaawa’, a’an maawa’ ma nokoru a’b’an ma naqaj xb’aanunkil chixjunil li naru chiqu re xtaaqenkil a’an jo’ laj Kolol qe.

Junxil chaq, jun li wamiiw kixk’ojob’ xch’ool jun li misioneer li kiraqe’ xmision sa’ xk’ab’a’ jun lix yajel, us ta kixtz’aama xtenq’ chiru li Dios ut jwal kiraj xb’aanunkil li k’anjel. Li wamiiw kixye re naq sa’ li loq’laj hu li Qaawa’ naxye naq wi eb’ li ralal xk’ajol “neke’xik chi anchaleb’ xmetz’ew” ut “ink’a’ neke’xkanab’ xyalb’aleb’ xq’e” chixb’aanunkil lix taqlahom, “ut eb’ li xik’ neke’ilok reheb’ [maare a’an ajwi’ li ch’a’ajkilal sa’ li qayu’am] neke’xrameb’ chixb’aanunkil li k’anjel a’an, k’ehomaq reetal, aajel ru chiwu naq ink’a’ chik tinteneb’ li k’anjel a’an sa’ ruq’eb’ [li kristiaan] a’an, tink’ulub’a b’an lix mayejahomeb’.”

Li wawiiw kixch’olob’ chiru li ch’ajom a’an naq li Dios naxnaw naq kixyal xq’e chixsumenkil lix b’oqb’al chi k’anjelak. Kixye ajwi’ naq li Qaawa’ kixk’ulub’a lix mayej ut naq moko ramb’ilaqeb’ ta chiru li osob’tesink yeechi’inb’il reheb’ li misioneer tiikeb’ xch’ool.

K’iila sut, li Qaawa’ naxtaqla qe li osob’tesink aj k’ehol eeqaj rik’ineb’ li qas qiitz’in li nokohe’xtenq’a chixb’aanunkil li k’a’ru ink’a’ naru taqab’aanu qajunes qib’. Nanaq sa’ inch’ool naq junxil, najt qayanq rik’in jun li qako’ aran Francia, ut ink’a’ kooru chixtenq’ankil xk’irajik naq xyo’la xk’uula’al. Sa’ li xamaan a’an li qateep sa’ li Iglees arin Utah kixsik’ li tenq’ choq’ re jun li na’b’ej li toje’ xyo’la lix lut. Li wixaqil xValérie, kixyeechi’ rib’ xk’amb’al li tib’el wa, chi wan li tij sa’ raam chirix li na’b’ej a’in jo’ ajwi’ chirix li qako’ li wan sa’ rajb’al ru. Tikto kiqab’i resil naq eb’ li komon ixq’ sa’ li Iglees aran Francia b’ar wi’ natz’aqon li qako’ ke’xk’uub’ rib’ re xk’amb’al xtzakemq. Naq xqil laa’o, li Dios kixsume li qatij rik’in xtaqlankileb’ li anjel re xk’ojob’ankil xch’ool naq moko kooru ta laa’o.

Naq wanqo sa’ ch’a’ajkilal ut ramb’ilaqo, qak’ehaq reetal li qosob’tesinkil laa’o—li qamaatan, li k’a’ru qe, ut li qahoonal—ut taqoksi re xtenq’ankileb’ li wankeb’ sa’ rajb’al ru. Naq naqab’aanu a’an, moko ka’aj ta wi’ naqatenq’aheb’ jalan, laa’o ajwi’ nokok’irtesiik ut naqak’ul reeqaj li k’a’ru xsach chiqu.

Jun li b’e q’axal nim xwankil nokoru wi’ chixtenq’ankil li Dios chixk’eeb’al li osob’tesink aj k’ehol eeqaj, a’an li k’anjel naqab’aanu sa’ xk’ab’a’eb’ li qakamenaq sa’ li rochoch li Qaawa’. Naq naqab’aanu li k’anjel chirixeb’ a’an, nokotz’aqon sa’ lix nimal ru k’anjel li Qaawa’ re kolok, ut yooko chiroksinkil li qamaatan ut li qaseeb’al re rosob’tesinkileb’ li moko ke’ru ta chixk’ulb’al li k’anjel naq ke’wan sa’ ruchich’och’.

Li k’anjel naqab’aanu sa’eb’ li santil ochoch naxjultika qe naq li rusilal li Kolonel naxq’ax ru li yu’am a’in. Sa’ li yu’am chalel, maare naru taqayal chi ak’il xb’aanunkil li ink’a’ xooru chixb’aanunkil sa’ li yu’am a’in. Naq ki’aatinak rik’ineb’ li komon ixq li maji’ neke’xtaw junaq lix sum aatin, li Awa’b’ej Lorenzo Snow kixye rik’in rahok: “Maajun laj Santil Paab’anel sa’ Roso’jikeb’ li Kutan li nakam chirix naq kixnumsi xyu’am chi tiik xch’ool taasachq rosob’tesinkil sa’ xk’ab’a’ naq ink’a’ kiwan lix b’e re xb’aanunkil junjunq li k’a’aq re ru. … Te’xk’ul chixjunil li osob’tesink, li taqenaqil loq’al ut li loq’alil li tixk’ul yalaq winq malaj ixq li kiwan xb’e re xb’aanunkil li k’a’aq re ru a’an.”

Li esil a’in li naxk’e qayo’onihom ut naxk’ojob’ qach’ool, wan choq’ re chixjunileb’ li ralal li Dios. Maajun qe laa’o naru taa’eeleliq chiru li yalb’a-ix ut li majelal re li yu’am sa’ ruchich’och’. Relik chi yaal, ak qe chiqajunilo naq nokoyo’la chi maak’a’ qawankil chixkolb’al qib’. A’b’anan, wan jun li qaKolonel aj rahonel ut “naqanaw naq a’ sa’ lix k’ab’a’ li [rusilal] naq nokokole’, chirix chixjunil li nokoru chixb’aanunkil laa’o.”

Ninnaw naq us ta wan li k’a’aq re ru sa’ qayu’am li ink’a’ naru xjalenkil, maajun qe ink’a’ natawe’ xb’aan li xnimal ru rosob’tesihom li Dios. Rik’in lix mayej aj tojol-ix, li Kolonel naxk’e reeqaj chixjunil li majelal ut li k’a’ru ink’a’ tiik wi naqaq’axtesi anchal li qaam re a’an. Sa’ xk’ab’a’ li Jesukristo, amen.