Xkawilal qach’ool chiru rilob’aal li Dios

Ex was wiitz’in, ninb’antioxi naq ninru chi aatinak eerik’in, sa’ li xnimal ru ch’utub’aj-ib’ a’in. Ink’a’ chik neke’ilok chi us xsa’ li wu. B’antiox eere lee kuyum naq yookin chixyeeb’al li waatin.

Wanko sa’ jun kutan re nimla seeb’ank sa’ Lix Iglees li Jesukristo reheb’ laj Santil Paab’anel sa’ Roso’jikeb’ li Kutan. Nasaho’ li waam naq nawil li seeb’ank naxik chi uub’ej chi k’iila paay ru.

K’a’jo’ naq nasaho’ inch’ool chirixeb’ li saaj. K’a’jo’ xk’ihaleb’ li yookeb’ chi k’anjelak chiru ras riitz’ineb’. Yookeb’ chixsik’b’aleb’ lix xe’toonil ut chixb’aanunkileb’ li k’ojob’anb’il k’anjel sa’ li santil ochoch. K’a’jo’ xk’ihaleb’ li saaj winq ut ixq li yookeb’ chixtaqlankileb’ lix hu re xik sa’ mision jo’ maajun wa chalen chaq. Eb’ li saaj yookeb’ chixxaqab’ankil rib’ chi kaw jo’ aj taaqenel re li Jesukristo.

Toje’, xinnaw ru jun ak’ xrab’in li wimam. Naq nink’oxlak chirixeb’ li ch’a’ajkilal taanume’q wi’ sa’ xyu’am, k’a’jo’ naq nawaj xtenq’ankil a’an chixtawb’al xpaab’aal chirix li Jesukristo. Xyu’aminkil lix evangelio li Jesukristo jwal aajelaq ru re naq sahaq lix yu’am.

A’an, jo’ ajwi’ chiqajunilo, taayale’q rix. Chiqajunilo taqanumsi li yajerk, li raho’k, li aaleek, ut li sachk. Eb’ li ch’a’ajkilal a’an naru neke’xsach xkawilal qach’ool. A’b’an, eb’ li neke’taaqenk re li Jesukristo naru neke’xtaw jalan chik xkawilal.

Naq naqak’uleb’ ut naqapaab’eb’ li sumwank rik’in li Dios, lix kawilal qach’ool taayo’laaq rik’in li Musiq’ej. Li Qaawa’ kixye re li profeet aj Jose Smith naq truuq “taanimanq xmetzʼew lix kawilal qachʼool chiru li Dios.” K’oxlahomaq li sahilal naxk’e li wank chi kaw qach’ool chiru li Dios!

Naq nin’aatinak chirix li wank chi kaw qach’ool chiru li Dios, nin’aatinak chirix li kawilal re xaqliik chiru li Dios anajwan! Nin’aatinak chirix li tijok rik’in xnawb’al naq li qaChoxahil Yuwa’ nokorab’i, naq a’an naxtaw ru li naqaj ru tz’aqal wi’chik chiqu laa’o. Nin’aatinak chirix xnawb’al naq ink’a’ naqataw ru jo’ nimal lix rahom choq’ qe, naq a’an naxtaqlaheb’ li anjel re te’wanq qik’in ut rik’ineb’ li qakomon. Nin’aatinak chirix xnawb’al naq a’an naraj qatenq’ankil chixtawb’al li qachaab’ilal q’axal nim.

Anajwan ut, chan ta ru taanimanq xkawilal qach’ool chi jo’kan? Li Qaawa’ naxye chan ru: “Chiwanq … lix saʼ aachʼool chi nujenaq rikʼin rahok choqʼ rehebʼ chixjunil li winq, … ut li saq ruhil naʼlebʼ chirutzʼuʼuji rajlal laa kʼoxlahom; tojaʼ ut naq taanimanq xmetzʼew lix kawilal aachʼool chiru li Dios.

Chi jo’kanan! Sa’ ajwi’ li raatin li Qaawa’, li tz’aqal rahok ut li saq ruhil na’leb’ naxte li b’e naqak’ul wi’ xkawilal qach’ool chiru li Dios! Ex was wiitz’in, naru naqab’aanu a’in! Naru taanimanq lix kawilal qach’ool chiru li Dios, anajwan!

Chiqatz’ilaq rix li tz’aqal rahok ut li saq ruhil na’leb’.

Xb’een, li tz’aqal rahok. Wiib’ chihab’ chaq, kink’e qab’oqb’al, jo’ aj taaqenel re li Jesukristo sa’ li sumwank, naq chiqak’ojob’ li tuqtuukilal. Tinye wi’chik li kinye junxil: “Li josq’il maajo’q’e naq’unb’esink ch’oolej. Li xik’ ilok maa’ani naxwaklesi. Li wech’ok-ib’ maajun wa naxyoob’ li chaab’il na’leb’.”

Li tz’aqal rahok choq’ re chixjunileb’ li winq a’an reetalileb’ li neke’k’ojob’ank tuqtuukilal! Aajel ru naq wanq rahok sa’ chixjunil li naqaye. Ninb’antioxi eere laa’ex li ak xeyal xyu’aminkil li waatin. A’b’an toj tento toochaab’ilo’q.

Li josq’il naqil sa’ xyanqeb’ li kristiaan ut sa’eb’ li redes sociales jwal xiwxiw. Li aatinak rik’in xik’ ilok jwal xiwxiw. Li wech’ok-ib’ naxram li qochb’eeninkil rajlal xb’aan li Musiq’ej.

Jo’ xtzolom li Jesukristo, tento taqak’ojob’ li tuqtuukilal. Naq li tz’aqal rahok naxe’en sa’ li qaam, ink’a’ chik naqaj xkub’sinkil xwankileb’ li qas qiitz’in. Ink’a’ chik taqaraq aatin chirixeb’. Taqaraheb’ b’an chixjunileb’ li qas qiitz’in. Li tz’aqal rahok choq’ re chixjunileb’ a’an aajel ru sa’ li qak’iijik. Li tz’aqal rahok naxk’ub’ela li diosilal.

Chiqatz’aama chiru li qaChoxahil Yuwa’ naq tixnujob’resi li qach’ool rik’in li tz’aqal rahok—choq’ reheb’ ajwi’ li ani ch’a’aj xraab’aleb’—xb’aan naq a’an li qaChoxahil Yuwa’ li nasihok rahok reheb’ li neke’taaqenk re li Jesukristo chi yaal. Li Kolonel a’an li Awa’b’ej re Tuqtuukilal. Laa’o lix k’anjeleb’aal re xk’ojob’ankil li tuqtuukilal.

Anajwan, chiqatz’il rix li saq ruhil na’leb’. Li Qaawa’ nokoxtaqla chirutzʼuʼujinkil rajlal li qakʼoxlahom rik’in saq ruhil na’leb’. K’oxla chan ru naq taanimanq xchaab’ilal laa k’oxlahom wi taajunaji rik’in saq ruhil na’leb’. Li saq ruhil na’leb’ nachaab’ilob’resin ut nasahob’resin! Chi jo’kan ajwi’, k’oxla k’a’ru taak’ulmanq wi taawoksi li saq ruhil na’leb’ sa’ junaq aak’oxlahom li yib’ ru, xik’, malaj ra. Li saq ruhil na’leb’ taarisiheb’ li k’oxlahom a’an. Li saq ruhil na’leb’ tatrach’ab’ chiruheb’ laa k’oxlahom li neke’tawasin ut neke’rahob’tesin.

Ex was wiitz’in, yoo chi tamk li maa’usilal sa’ li ruchich’och’, jo’kan naq tento naq saqaq wi’chik qu. Li naqak’oxla, naqaye, ut naqab’aanu tento naq saqaq tz’aqal ru, ut nujenaqaq rik’in lix saq ruhil rahom li Jesukristo choq’ re chixjunileb’. Li qateneb’ankil a’an wulak jo’ naraj li Dios naq toowanq.

Li loq’onink chi kok’ aj xsa’ sa’ li rochoch li Qaawa’ nokoxtenq’a chixk’ulb’al li saq ruhil na’leb’ ut li rahok. Chi jo’kan, li wank sa’ li santil ochoch naxkawresi lix kawilal qach’ool chiru li Qaawa’. Li wank sa’ li santil ochoch tooxkawresi choq’ re li xkab’ xk’ulunik laj Kolol qe, li Jesukristo. Ink’a’ naqanaw jo’q’e taak’ulunq. A’b’an ninnaw naq li Qaawa’ yoo chinmusiq’ankil chixyeeb’al naq taqakawresi qib’ choq’ re li “xnimal ru ut xuwajel kutan aʼan.”

Naq naqasik’ xnujob’resinkil li qayu’am rik’in li tz’aqal rahok ut li saq ruhil na’leb’, taanimanq xkawilal qach’ool chiru li Dios. Nekexinb’oq chixnimob’resinkil lix kawilal lee ch’ool chiru li Qaawa’. Ut naq taqasik’ li qaChoxahil Yuwa’ chi kaw chik li qach’ool, k’a’jo’ wi’chik naq taasaho’q qach’ool, ut k’a’jo’ wi’chik naq taanimanq li qapaab’aal chirix li Jesukristo. Too’ok chixk’ulb’al musiq’ejil metz’ew li maajun wa qoyb’enihom.

Naqab’antioxi re li Qaawa’ lix seeb’ankil xkab’lankileb’ li santil ochoch chiruheb’ li chihab’ a’in. Chi b’eresinb’il xb’aan a’an, anajwan naqaj xyeeb’al naq te’kab’lamanq li santil ochoch sa’eb’ 15 chi na’ajej a’in:

• Reynosa, Mexico

• Chorrillos, Peru

• Rivera, Uruguay

• Campo Grande, Brasil

• Porto, Portugal

• Uyo, Nigeria

• San Jose del Monte, Filipinas

• Numea, Nueva Caledonia

• Liverpool, Australia

• Caldwell, Idaho

• Flagstaff, Arizona

• Rapid City, South Dakota

• Greenville, Carolina del Sur

• Norfolk, Virginia

• Spanish Fork, Utah

Ninch’olob’ xyaalal naq li Jesukristo, laj Tojol rix laj Israel, naxjolomil lix Iglees. A’an naxkawresi rib’ re k’ulunk wi’chik. Chiqakawresi ajwi’ qib’ re xk’ulb’al. A’an a’in li nintz’aama, sa’ xk’ab’a’ li Jesukristo, amen.