Ninb’aanu xb’aan naq ninra li Kolonel

Ma nekek’e reetal naq li qaraarokil profeet, li Awa’b’ej Russell M. Nelson, naxk’e qab’oqb’al chi kok’ aj xsa’? Moko sachab’ej ta naq kixk’e qab’oqb’al chixtzolb’al ut xtz’ilb’al rixeb’ li esil li xe’wotzman wiib’ ch’utub’aj-ib’ anajwan. Sa’ abril re 2024, a’an kixye, “nawoyb’eni naq teetz’ileb’ rix li aatin re li jolomil ch’utub’aj-ib’ a’in k’iila sut chiruheb’ li po chalkeb’ re.” Chirix a’an, sa’ octubre re 2024, xye: “Nintz’aama cheru naq teetzoleb’ li raatineb’ [li xe’aatinak]. Teeroksi li aatin a’an re xnawb’al k’a’ru li yaal ut k’a’ru moko yaal ta chiruheb’ li waqib’ po chalel.”

Eb’ li qab’oqb’al a’in naru te’xjunaji rib’ rik’ineb’ li profeetil aatin qab’ihom chiru chixjunil li qayu’am, jo’ ajwi’ li xqab’i sa’eb’ li chihab’ toje’ xe’nume’. Maare taqak’oxla naq eb’ li qab’oqb’al a’in, a’an yal xkomoneb’ li k’anjel naqatz’iib’a sa’ li qacalendario yal xmaak naq xoob’oqe’ chixb’aanunkil. A’b’an, ma wan li na’leb’ maji’ xqataw ru?

Naq xink’oxlak chirix a’in ut chixjunil li qab’oqb’al naqak’ul, xnaq sa’ inch’ool li xintzol ut li xinsik’ ru xb’aanunkil junxil chaq. Yookin chixyalb’al inq’e xb’aanunkil li k’a’aq re ru a’in li aajeleb’ ru choq’ we xb’aan naq laa’in ninra li Jesus; laa’in ninra li qaKolonel. A’an a’in xnimal ru xyaalal k’a’ut naq ninb’aanu li ninb’aanu, ut xchapom rib’ a’in rik’in lin rahom choq’ eere, ex inraarookil was wiitz’in.

Chenawaq naq nink’e eeb’oqb’al, jo’ tz’aqal inkomon, chirilb’al naq chixjunil li naqab’aanu naru naxk’am rib’ rik’in li qarahom choq’ re li Kolonel.

Xb’aanunkil a’in tooxtenq’a chixtawb’al ru k’a’ut chi yaalnaq naqab’aanu a’in jo’ xtzolom li Kolonel. A’an tooxtenq’a chixkawob’resinkil li qasumwank rik’in li Dios, ut taqataw ru lix choxahil na’leb’—a’an lix na’leb’ li maajo’q’e taajalaaq. A’aneb’ li na’leb’ chanchan li we’: “Xbʼaan naq li Dios kʼaʼjoʼ naq kixra li ruchichʼochʼ: kixkʼe chaq li Ralal jun chiribʼil re naq chixjunil li taapaabʼanq re, inkʼaʼ taasachq, wanq bʼan xyuʼam chi junelik.”

Relik chi yaal, wan naq li k’a’ru naqab’aanu chi k’iilasutinb’il nokoxk’aytesi chi junajwa, ut naqak’e xwankil chixtaqlankil chan ru took’anjelaq chixkawresinkil qapaab’aal chirix li Jesukristo. Anchal naqab’aanu xb’aan naq ak naqab’aanu chaq chiru k’iila chihab’, chi ink’a’ naqak’e reetal k’a’ru naxb’aanu qe sa’ li qasumwank rik’in li Kolonel.

Sa’ li qayu’am arin, k’aynaqo xkanab’ankil qach’ool sa’ li k’a’ru naqab’aanu ut sa’ li k’a’ru naqajayali. Rik’in li k’a’ru re musiq’ej, ink’a’ tento naq took’anjelaq yal xmaak naq xook’ay; naru b’an took’anjelaq xb’aan naq naqanaw k’a’ru aj-e li qak’anjel. Wi naqak’e reetal naq nokok’anjelak sa’ xk’ab’a’ li qarahom choq’ re li Kolonel ut li qaChoxahil Yuwa’, xb’aan naq xqatz’il rix k’a’ru aj-e li qak’anjel, taqak’e ajwi’ reetal naq xb’aanunkil li k’a’ru chaab’il, maare a’an li okenk sa’eb’ li k’anjel re li Iglees, naq naqil k’a’ru aj-e naqab’aanu, taqanaw chik k’a’ru xyaalal. Aran, ink’a’ chik yal yooqo chixb’aanunkil li k’a’ru us; yooqo aj b’an wi’ chixb’aanunkil chi us.

Qayehaq, naq nakak’uub’ aana’leb’ re naq taawil li loq’laj hu, tattijoq chi anchal aach’ool, malaj taakawresi jun li k’anjel sa’ laa junkab’al malaj li iglees, ma yal nakawaj xchoyb’aleb’ li k’anjel a’an? Malaj ut ma nakab’aanu li k’anjel a’an re naq taataw li na’leb’ xajayali chaq? Ma naqab’aanu li k’anjel yal xb’aan naq k’iila chihab’ xook’ay xb’aanunkil, ut naqaj xjuch’b’al naq xqab’aanu? Malaj ma naqab’aanu li k’anjel re naq tootzoloq, tootoche’q sa’ qaam, ut toolaq’ab’aaq rik’in li Kolonel?

Meek’oxla naq ink’a’ us xb’aanunkil li k’anjel sa’ iglees, li k’a’ru k’aytesinb’ilex wi’, malaj xk’eeb’al li meta ut xyalb’al eeq’e chixb’aanunkil; maak’a’ reek’ a’an. A’b’anan, nekexinb’oq chixteeb’al lee ch’ool ut lee k’a’uxl re xtawb’al ru k’a’ru xyaalal naq naqab’aanu li k’a’aq re ru a’in ut chan ru naqayu’ami li qapaab’aal.

Jun li na’leb’ li jwal us xk’aytesinkil qib’ chixb’aanunkil, a’an li kooxb’oq chixb’aanunkil li Awa’b’ej Dallin H. Oaks sa’ xk’ab’a’ li Xb’eenil Awa’b’ejil. Li Awa’b’ej Oaks kixye: “Sa’ xtiklajik li ak’ chihab’ a’in chiqakawresi qib’ choq’ re jun li Paswa re xninq’ehinkil li mayej aj tojol-ix re li Jesukristo. … Maak’a’ naxye k’a’ru neke’xpaab’ malaj neke’xb’aanu jalan, laa’o tento taqaninq’ehi lix waklijik laj Kolol qe rik’in xtzolb’al lix na’leb’ ut xtenq’ankil li qatenamit chixk’aytesinkil rib’ rik’in li k’anjel re Paswa, ut mas wi’chik sa’eb’ li qajunkab’al.” Teek’e reetal naq ink’a’ ka’ajwi’ xooxb’oq chixk’aytesinkil qib’ sa’eb’ li k’anjel. Naqak’aytesi qib’ rik’ineb’ li k’anjel a’in re aj b’an wi’ naq tootzoloq chirix li Kolonel ut lix waklijik chi yo’yo.

Wi jwal naqab’aanu wi’chik xb’aan naq naqara li Kolonel, jwal tooruuq ajwi’ chixtawb’al li k’a’ru aajel ru choq’ qe, malaj li k’a’ru naqasik’. Li Awa’b’ej Nelson kixye, “A’ yaal k’a’ru lee patz’om malaj lee ch’a’ajkilal, lix sumenkil rajlal wan sa’ xyu’am ut xk’utum li Jesukristo. Ut a’an kooxb’oq: “Tzolomaq eena’leb’ chirix lix tojb’al rix li maak, lix rahom, li ruxtaan, lix tzol’leb’, ut lix evangelio re k’irtesink ut chaab’ilo’k. Cheesik’ a’an! Chetaaqe a’an!”

Chetz’il rix a’in sa’ lee ch’ool ut sa’ lee k’a’uxl: Ma nekepaab’ naq li b’oqok kixk’e li Awa’b’ej Nelson kiwan rajom re qatenq’ankil chixkawresinkil jun li hu b’ar wi’ taqatz’iib’a li na’leb’ xqatzol ut li k’anjel xqab’aanu, re naq naru taqaye naq ak xqab’aanu? Malaj ma yoo chiqab’oqb’al chixtz’ilb’al rix li choxahil na’leb’ a’in re naq taqanaw k’a’ru aj-e li k’anjel, ut re naq taqalaq’ab’ lix rahom li Kolonel rik’in li naqab’aanu jo’ xtzolom?

Ink’utaq chan raj ru li na’leb’ a’in. Maare wan ani li tixk’oxla naq jwal us raj rilb’al chixjunil li aatin sa’ li hu re li jolomil ch’utub’aj-ib’, ut naq naraqe’ rilb’al, tixtz’iib’a resil naq ak xchoy li k’anjel a’an, ut maak’a’ chik tixb’aanu rik’in li aatin xril sa’ li hu. Ninnaw naq moko wankeb’ naab’al ta li te’xb’aanu chi jo’kan, a’b’an maare wankeb’ junjunq. Maare naab’aleb’ ink’a’ te’xb’aanu chi jo’kan, a’b’an toj wan xmajelal xna’leb’eb’.

Li b’oqb’ilo chixb’aanunkil, a’an xtzolb’al ut xtz’ilb’al rix li hu re li jolomil ch’utub’aj-ib’ re naq taqanaw chan ru taqachaab’ilob’resi qib’.

Naq naqak’ulub’a li qab’oqb’al rik’in xtawb’al ru k’a’ru aj-e, mas wi’chik tooruuq chi nach’ok rik’in laj Kolol qe. Too’ok chixtawb’al ru naq sa’ xk’ab’a’ naq ninra li Kolonel nawaj xtzolb’al xkomon chik chirix a’an rik’in xtzolb’aleb’ li raatineb’ yo’yookil profeet. Ut xb’aan naq ninraheb’ li was wiitz’in, tinwotz lix k’utumeb’ li profeet, aj ilol na’leb’, ut aj k’utb’esinel, xb’een wa rik’ineb’ li raarookeb’ inb’aan.

Ma nakab’aanu chanchan li xb’een malaj li xkab’ li xinye, toj yookat chixb’aanunkil li us. Li xb’een, chanchan naq a’an roksinkileb’ li k’anjeleb’aal xe’xk’e qe li qaChoxahil Yuwa’ ut li Kolonel, a’aneb’ li esil neke’wotzman sa’ li jolomil ch’utub’aj-ib’. Li xkab’ naxtaw li nimla usilal re xnawb’al k’a’ru aj-e li k’a’aq re ru, ut naxk’ut li b’e re xtawb’al ru li na’leb’ ut li usilal li yeechi’inb’il reheb’ li neke’ril xk’utum ut xyu’am li Jesukristo jo’ tz’aqal xjayalihomeb’.

Ex inraarookil was wiitz’in, nawoyb’eni naq teereek’a ut teeril naq aajel ru nach’ok sa’ xjunajinkil li qab’aanuhom rik’in qarahom choq’ re li Kolonel. Sa’ li ruchich’och’ anajwan, teerab’i k’iila paay ru chi na’leb’, ut wankeb’ li te’raj naq tex’ok chixk’oxlankil naq ink’a’ aajel ru li xb’eenileb’ na’leb’ re lix evangelio li Jesukristo. Te’xye naq moko aajel ta ru li na’leb’ li naxye naq ki’ajman xk’ojob’ankil li evangelio chi ak’il sa’ qakutankil anajwan, jo’ ajwi’ xk’ojob’ankil li rawa’b’ejihom li Dios sa’ li ruchich’och’, li uuchilanb’il xb’aan Lix Iglees li Jesukristo reheb’ laj Santil Paab’anel sa’ Roso’jikeb’ li Kutan.

Maare teerab’i xyaab’ kuxej li neke’xye naq tz’aqal li ok sa’ aatin rik’in li Kolonel yal eejunes eerib’, ut naq li paab’aal malaj li iglees k’ojob’anb’il wi’chik moko aajel ta ru. Nekexinb’oq chixkawresinkil eerib’ re naq ink’a’ teeraj malaj ink’a’ texruuq chixpaab’ankil li b’alaq’il na’leb’ a’in, ut re naq jwal junpaat wi’chik teek’oxla li k’a’ru ak kixye li Kolonel chalen chalen—li natikla rik’in lix rahom li qaChoxahil Yuwa’ ut li Jesukristo choq’ qe ut xtaaqenkileb’ xb’aan naq naqaraheb’.

Li Dios Yuwa’b’ej ut li Ralal ke’chal ut ke’aatinak rik’in laj Jose Smith re xk’ojob’ankil wi’chik lix Iglees li Jesukristo ut re xtikib’ankil lix k’ojlajik lix tz’aqalil ru li kutan, a’an lix awa’b’ejihom sa’ li ruchich’och’. Jo’kan ut, Lix Iglees li Jesukristo reheb’ laj Santil Paab’anel sa’ Roso’jikeb’ li Kutan a’an li k’anjeleb’aal xaqab’anb’il xb’aan li Choxahil Yuwa’b’ej re ok sa’eb’ li sumwank li nokohe’xtenq’a chi sutq’iik sa’ qochoch. Jo’kan ut, ink’a’ na’ajman naq yal toowanq qajunes qib’ sa’ aatin rik’in li qaChoxahil Yuwa’ ut li Ralal; na’ajman b’an ru li k’ojob’anb’il k’anjel re li tijonelil li noko’ok wi’ sa’ sumwank rik’ineb’ a’an. Chi jo’kan, laq’looko rik’ineb’ sa’ sumwank ut naqak’ul xrahomeb’ sa’ li sumwank, ut naru toowulaq sa’ li awa’b’ejihom re loq’alil jwal taqenaq, li kawresinb’il choq’ re chixjunileb’ li tiikeb’ chixpaab’ankil li sumwank.

Rik’in x’anchalil xmetz’ew li waam, ninch’olob’ xyaalal lix yaalalil ut lix choxahilal laj Kolol qe, li Jesukristo. A’an nekexxra. A’an naxnaw li k’a’ru yoo chi k’ulmank sa’ lee yu’am. Teeto xtel chek’ulb’al, ut naxye eere, “Chalqex wik’in, … ut laa’in texinhiltasi.”

Ninra li Kolonel, ut lin rahom choq’ re, a’an li naxik wi’ lin ch’ool. Sa’ xk’ab’a’ li Jesukristo, amen.