Ɔwo Nye Christ
(Matthew 16:16)
Yɛpɛ dɛ hɛn mba gye Jesus Christ dzi, wɔkã Jesus Christ ho na N’Asɔr ho a wodua ahyɛmudzi do, na wɔper bɛyɛ dɛ Jesus Christ.
Ber a nna hɛn babanyin Eli wɔ mangow anan no, ne classfo yɛɛ amanbu nsũansũa dwumadzi bi a ne mfɛfo toow amba maa no dɛ ɔnyɛ class ɔtsɛmbuafo. Dakor, ɔtsɛmbuafo a ɔtse egua do a ofi Utah Second District Asɛndzibea no bɛseraa hɔn, dze n’edwuma mu ntar hyɛɛ Eli, na ɔyɛɛ dzibew no ho nsewdzi maa hɔn class no. Iyi kenyaan wɔ Eli n’abofra ɔkra mu ɔdɔ no dɛ obosũa mbra, na Mbrahyɛfo Noara, Jesus Christ ho nsɛm.
Enyimia mbɔdzembɔ mfe pii ekyir no, Eli nyaa ɔfrɛ no dɛ ɔnkɔ mpɛnsampɛnsamu wɔ mbra skuul no mu kor a ɔpɛ papaapa mu. Ɔkãa dɛ, “Maa, wobisaa me nsɛmbisa 10. Nna asɛmbisa a odzi ekyir nye, ‘Henfa na inya wo kwankyerɛ su fi?’ Mekãa dɛ abakɔsɛm nyina mu no nyimpa enya suban pa ho nhyehyɛɛ wɔ hɔn abrabɔ mu a wɔhwɛ binom a wodzi mu hɔn abrabɔ do. Nyia odzi mu a ɔkyerɛ suban pa a mobɔ mbɔdzen hwɛ do bɔ me bra nye Jesus Christ. Mekãa dɛ sɛ nyimpa nyina bedzi Jesus Christ ne nkyerɛkyerɛ a ɔwɔ Bepɔw do Nkyerɛkyerɛ mu no do a, nkyɛ wiadze bɛyɛ bea papa, bea a asomdwee wɔ mu yie.” Nkyii mpɛnsampɛnsamu no baa ewiei, na ɔkãa no wɔ ne tsir mu dɛ, “Me mbafober mu adaaso no efi me nsa. Obiara nnyi wiadze nwomasũa mu a ɔpɛ dɛ ɔtse Jesus Christ no ho asɛm.”
Adapɛn ebien ekyir no, wɔfaa Eli a wɔmaa no scholarship kãa ho. Ana yɛregye ato mu no, yɛkɔr skuul hɔ nserahwɛ. Nna skuul no yɛ dɛ aban na osi sor wɔ kokwaa bi do a nsutae fɛɛfɛw bi da ase. Ɔyɛ hu dɛ, ber a yɛnantseew nwoma korabea nwanwa no mu nye akwan a ɔyɛ ahomka ara yie mu no, yehun su horow a ofi Bepɔw do Nkyerɛkyerɛ no mu a wɔakyerɛw no wɔ mfrankaa do na woekrukye wɔ abo mu so.
Ampaara Bepɔw do Nkyerɛkyerɛ no yɛ nkyerɛkyerɛ a ɔda nsew koraa a wɔdze ama da, nkyerɛkyerɛ a bi mmbaa da. Nkyerɛkyerɛ biara nnyi hɔ a kyɛn ɔno a obotum aboa hɛn ma yɛatse Jesus Christ no suban ase, No su krɔnkrɔn, na hɛn ewiei botae dɛ yɛbɛyɛ dɛ Ɔno ase yie.
Abrabɔ ber nyina dɛ Jesus Christ osuanyiyɛ hyɛ ase wɔ hɛn efiefi—na wɔ Primary ntsɛmara dɛ mbofra edzi abosoom 18. Yɛpɛ dɛ hɛn mba gye Jesus Christ dzi, wɔkã Jesus Christ ho na N’Asɔr ho a wodua ahyɛmudzi do, na wɔper bɛyɛ dɛ Jesus Christ.
Gye Jesus Christ Dzi
Odzi kan, gye Jesus Christ dzi.
Nkwa paanoo nkyerɛkyerɛ ekyir no, nna ɔyɛ dzen ma “[Ewuradze] n’esuafo pii” dɛ wɔbɛgye ne nkyerɛkyerɛ ato mu, na “[wɔ]saan ekyir na wɔnye no annantsew bio.” Afei Agyenkwa no danee kɔr Duebien no do na obisaa asɛmyaw bi: “Ana hom so hom pɛ dɛ hom kɔ a?”
Peter buae dɛ:
“Ewuradze, woana hɔ na yɛbɔkɔ? Ɔwo na ewɔ onnyiewiei nkwa ho nsɛm.”
“… Yɛagye edzi na yenyim dɛ ɔwo nye Christ, Nyame tseasefo no Hotseweenyi no.”
Dɛ mbrɛ Peter kyerɛe no, gyedzi nye dɛ ibenya gyedzi wɔ obi mu anaadɛ ebɛgye biribi ato mu dɛ ɔyɛ nokwar.” Na ama hɛn gyedzi eegya aakɔ nkwagye mu no, otwar dɛ ogyina Ewuradze Jesus Christ no do. “Yɛkyerɛ … gyedzi wɔ [Jesus] Christ mu ber a yɛwɔ awerɛhyɛmu dɛ Ɔtse ase, yɛwɔ ntseasee fa No su [ankasa] ho, na nyimdzee dɛ yɛreper abɔ bra dɛ mbrɛ Ne pɛ tse.”
Hɛn nkɔnhyɛnyi dɔfo, President Russell M. Nelson kãa dɛ, “Gyedzi wɔ Jesus Christ mu nye dza yɛgye dzi nyina ne fapem na kwan a wodua do nya ɔsor tum.”
Yebesi dɛn botum aboa mbofra ma wɔahyɛ hɔn gyedzi wɔ Jesus Christ mu dzen na woenya No tum krɔnkrɔn no? Onnhia dɛ yɛbɔhwɛ atra do kyɛn hɛn Agyenkwa no Nankasa.
“[Ewuradze] kasaa kyerɛɛ nkorɔfo no see dɛ:
“Hom nhwɛ, Emi nye Jesus Christ. …
“Hom nsoɛr mbra. …
“… Nyimpadodow no kɔree, na wɔdze hɔn nsa kãa ne mfemu, na wohun mprɛgow n’ananmu wɔ ne nsa nye n’anan ho, na dɛm na hɔn nyinara yɛɛ, wɔkɔr no nkorkor … na wɔdze hɔn enyiwa hunii na wɔdze hɔn nsa so kãa hwɛe hun nokwar no na wɔgyee ho dase, dɛ ɔyɛ ɔno.”
Moto nsa frɛ hom dɛ hom ndwendwen mbrɛ iyi besi bɛyɛ wɔ mbofra nkakraba hɔn abrabɔ mu. Ana wɔtse dasegye fa Jesus Christ na N’asɛmpa no ho? Ana wohu obu mapã, ɔsom tsebea ho mfonyin a ɔfa No somdwuma na nyameyɛ ho? Ana wɔtse nka na wohu dɛ Sunsum Krɔnkrɔn no regye dase wɔ No nokwaryɛ na krɔnkrɔnyɛ ho? Ana wonyim N’asɛm na No ndwuma?
Kã Jesus Christ na N’Asɔr ho
Otsĩa ebien, kã Jesus Christ na N’Asɔr ho.
Ɔhen Benjamin no nkorɔfo nyaa akoma nsakyer kɛse na wɔnam ahyɛmudzi do tuu hɔn abrabɔ sii hɔ dɛ wɔbɛyɛ Nyame ne pɛ. Osian ahyɛmu a wɔnye Nyankopɔn na Jesus Christ dzii no ntsi “wɔfrɛɛ hɔn Christ ne mba, ne mbabanyin nye ne mbabaa.” Dɛ Jesus Christ N’Asɔr a ɔwɔ hɔ Nda a Odzi Ekyir Ahotseweefo mu mba no, yɛwɔ ahyɛmu asodzi dɛ yesi N’Ahenman na yɛyɛ nsiesie ma Ne nsanee.
Yebesi dɛn botum aboa mbofra ma wɔayɛ na woesie ahyɛmudzi krɔnkrɔn? Bra, Bɛka Mo Do mu, Abɔekyir A na B mu no, yehu nkɔmbɔdzi ahyɛse ndzɛmba na adzesũa horow a ɔbɛhyɛ ebusua ebusua dzen na wɔaboa akyerɛkyerɛfo na baanodzifo wɔ hɔn asodzii krɔnkrɔn no mu dɛ wosiesie mobfra ma abrabɔ mber nyina wɔ Nyankopɔn n’ahyɛmu anamɔnkwan no do.
Bra bɛyɛ dɛ Jesus Christ
Otsĩa ebiasa, bra bɛyɛ dɛ Jesus Christ.
Mormon Nwoma mu no, Agyenkwa no tuu N’esuafo afoforfo a wɔafrɛ hɔn no fo dɛ wonsũansũa No yie ankasa: “Ebɛn nyimpa ne saso na ɔsɛ dɛ hom yɛ? Nokwar mese hom dɛ, dɛ ma metse mpo.”
Yebesi dɛn botum aboa mbofra a woenuma hɔn na woesi hɔn pi ma wɔahyɛ hɔn ahyɛmudzi asodzii no mã dɛ wɔbɔboa hɔnara hɔn ho na binom ano ama Jesus Christ? Abrabɔ nyina mu osũanyiyɛ hia hɛn dɛ “yɛyɛ asɛm no ayɛfo, na mma yɛnnyɛ etsiefo nko.”
Sɛ erema Ewuradze n’esuafo nkakraba koraa no nsato a, meserɛ, fa kwan biara a ibotum do dzi hɔn enyim kan, weɔn hɔn, enye hɔn nnantsew, na boa hɔn ma wonhu Kwan No. Enye mbofra nkakraba a wɔsom bo yi ndwen mbɔ mu ber a wɔreyɛ ahoboa akyerɛ adze, agye dase, abɔ mpaa, anaa wɔakɔsom ama woeenya ahotodo na woenya dɛwdzi ber a wɔyɛ hɔn asodzi horow no. Hwehwɛ nkenyan akwan fa boa hɔn ma wombohu dɛ iyi nye hɔn Asɔr na wɔwɔ asodzi tsitsir yɛ wɔ nsiesie ma Agyenkwa no Ne nsanee no mu.
Ber a Jesus Christ ba bɛyɛ dza hɛn abrabɔ tsim do no, dza yɛpɛ, na mbrɛ yesi pɛ no no, sesa afebɔɔ. Nsakyeree sesa biribiara! Ɔsesa hɛn su dɛ “yennyi pɛ biara bio dɛ yɛbɛyɛ bɔn, na mbom dɛ yɛbɛyɛ papa aber nyina.” Ɔsesa mbrɛ yesi dzi hɛn mber, hɛn ahodze; dza yɛkenkan, yɛhwɛ, yetsie, na yɛkyɛ. Mpo ɔsesa mbrɛ yesi ma mbuae wɔ sũapɔn mpɛnsampɛnsamu soronko a ɔbɛkyerɛ edwuma a yɛbɛyɛ mu.
Yehia dɛ yɛdze Jesus Christ ne Kan no hɛnhɛn hɛn abrabɔ no dodoo biara mu. Sɛ yɛrenngye dase wɔ Ne nyameyɛ ana Ɔreba asaase do ho no nokwar, No dwuma krɔnkrɔn, na No Wusoɛr a obuee efiadze no nokwaryɛ ho wɔ hɛn efiefi na wɔ Asɔr yi ne nhyiamu kor biara mu a, nna ɔno hɛn ɔdɔ nsɛm, ɔsom, nokwardzi, ahobrɛadze, enyisɔ, na ayamuhyehye nsɛm no nnyɛ biribiara kyɛn nkuranhyɛ nsɛnkãa ara fa asetsena pa ho. Jesus Christ nnyi mu a tum biara nnyi hɔ a yɛdze bɛsesa, botae biara nnyi hɔ a hɛn enyi bɛda kwan, na abrabɔ nkunkuhwease no nsɔwano biara nnyi hɔ. Sɛ yɛma hɛn osuanyiyɛ ma Jesus Christ bɛyɛ biara biara a obotum ayɛ esian kɛse ama hɛn mba.
Sɛ yɛkã kyerɛ hɛn mba dɛ yɛdɔ hɔn a, ana yɛsan so kã kyerɛ hɔn dɛ hɔn Ɔsor Egya na Agyenkwa Jesus Christ dɔ hɔn a? Hɛn dɔ botum akyekye werɛ na woekenyan, mbom Hɔn dɔ botum atsew ho, ama ntowdo, na wɔasa yarba.
Dɛm Jesus yi nnsɛ dɛ ɔyɛ anansesɛm Jesus bi, anaa Jesus tootooba bi, anaa Jesus a onnyi honam, anaa Jesus biara biara, anaadɛ Jesus a wonnyim no, mbom nyia wɔahyɛ no enyimnyam, Ɔwɔ tum nyinara, Oewu asoɛr, Ɔkrɔn, wɔsɔr no, tumfo Nyankopɔn ne Ba a Wɔwoo no Kortoo no, a Ɔyɛ nyia Otum gye nkwa. Na dɛ mbrɛ abofra kakraba bi a ɔwɔ Philippines gyee dase nkenyan mu ara kyerɛɛ me da kor no, “Yɛsom bo dɛ wɔgye hɛn!” Wɔ Nyia “Nyankopɔn dze no sii hɔ dɛ mpatadze [kɛse no],” Jesus Christ, amen.