Nhyira Nhyɛananmu horow

Morosom wɔ Bishopfo Baanodzifo mu no, ɔayɛ me adom ma meehyia Latter-day Saintfo wɔ wiadze nyina wɔ mbeambea na kusum asorɔtow mu. Hom gyedzi a otsim na som ma Ewuradze Jesus Christ no akɔ do ekenyan me. Mbom so hom mu piinara nkõdzen gyinabew horow a wɔtaa hyia no ayɛ me awerɛhow—nsɔhwɛ tse dɛ yarba, dzɛmdzi, sika a ɔnnsõ, akwanhorow a onnyi hɔ ma awar anaa nwomasũa, binom bu hom enyimtsia, na akwansidze binom so. Mber bi no, nsɔhwɛ yinom bɛyɛ dɛ osiw hom kankɔ kwan na wɔama hom nokwar mbɔdzembɔ dɛ wɔdze asɛmpa no bɔbɔ bra yie no ayɛ dzen dodow dɛ hom bɔsom, hom bɔsɔr, na hom ahyɛ hom asodzi krɔnkrɔn no mã.

M’anyɛnkofo adɔfo, sɛ w’abrabɔ mu gyinabew horow ama aatse nkã dɛ etɔ sin anaa ndzɛmba nnkɔ yie da a, mepɛ dɛ hom hu iyi: Ewuradze dɔ hom ankasa. Onyim hom gyinabew horow, na Ne nhyira horow abow no Oebue no tɛtɛɛtɛr ama ɔwo a nsɔhwɛ biara a ihyia no mpo mmfa ho.

Menam mankasa musũahu do esũa nokwar yi dɛ, mpo ɔnnyɛ soronko biara dze, naaso ogyaa dza mowerɛ nnkefir da wɔ mo do. Midzii mfe 22 no, mber a nna morosom wɔ French Air Force wɔ Paris no, ɔyɛɛ me dɛw dɛ muhun dɛ Elder Neal A. Maxwell, Ewuradze no Ɔsomafo, rebɛkasa wɔ ehyiadzi ase wɔ Champs-Élysées. Naaso, ansaana ɔrebɛba do noara, na minyaa ɔhyɛ dɛ menfa kaar na menye me ɔfesa panyin nkɔ wimuhɛn gyinabea wɔ mber pɛpɛɛpɛ no a nna ehyiadzi no bɛhyɛ ase no.

M’abaw gurae. Nna mowɔ enyimpisi dɛ mobɔkɔ no, mekesiaan ɔfesa no na medze ahoɔhar kɔr ehyiadzi no ase. Minyaa beebi dze kaar no sii no, mutuu mbirika siansian Champs-Élysées kɔr nhyiamu bea hɔ na mukodur hɔ a nna munntum nngye ahom a nna ɔaka sima enum pɛr ma nhyiamu no aba ewiei. Mehɛɛn hɔ ara, metsee Elder Maxwell rekã dɛ, “Mebɛma hom ɔsomafo nhyira sesei.’’ Ber kor noara, minyaa sunsum mu sũahu, a nna ɔyɛ ahomkã a mowerɛ nnkefir da. Sunsum no hyɛɛ mo do na nhyira mu nsɛm no yɛɛ dɛ ɔrehɛn me kra no wer biara mu, dɛ mbrɛ nna wɔrekã ma me nko.

Sũahu a minyaa no dɛm da no nna ɔyɛ ndaedzi ketseketse naaso tum wɔ mu fa Nyankopɔn ne nhyehyɛɛ ho n’awerɛkyekyer ne fã ma Ne mba dɛ: Sɛ gyinabew horow a yennyi ho ahoɔdzen siw hɛn kwan ma yɛnnhyɛ hɛn akoma ne tsenenee apɛdze mã a, Ewuradze bɛhyɛ ananmu wɔ akwanhorow mu a ɔma hɛn kwan ma yeenya N’anohoba nhyira horow no.

Awerɛhyɛmu nokwar yi tsim dzendzen wɔ fapem ebiasa tsitsir wɔ Jesus Christ n’asɛmpa a wɔdze asan anamu aba no do:

1. Nyankopɔn dɔ hɛn mu kor biara emudzi mu ara. “Ɔto nsa frɛ [hɛn] nyinara dɛ [yɛ]mbra ne nkyɛn mbenya ne papayɛ.” No ɔpon ho nhyehyɛɛ no hwɛ no pefee dɛ obiara, wonnyi bi mmfi mu, benya kwan pɛrpɛr ma dakor bi oenya nkwagye na nkwagye ntowdo no nhyira horow no

2. Osiandɛ Nyankopɔn yɛ pɛrpɛr na mbɔbɔrhufo na Ne nhyehyɛɛ dzi mu no ntsi Ɔremma yemmbu nkontaa ma ndzɛmba a yennyi ho tum no. Elder Neal A. Maxwell kyerɛkyerɛɛ mu dɛ “Nyankopɔn … wɔ ehumbɔbɔr mu ara, mmbu hɛn apɛdze na hɛn ndzeyɛɛ horow ho nkontaa nko, mbom nkõdzen mpɛnpɛndo a hɛn gyinabew asorɔtow dze hyɛ hɛn do no so.’’

3. Ɔnam Jesus Christ na No Werdambɔ no do ntsi, yebotum enya ahoɔdzen dze asɔw na ewiei no yedzi abrabɔ no nsɔhwɛ nyinara do konyim. Dɛ mbrɛ Alma kyerɛkyerɛɛ no, Agyenkwa no ammfa nyia a oenu nuho no bɔn nko annto No do mbom ɔsanee so faa “no nkorɔfo hɔn yaw na yarba’’ na “hɔn mberɛwyɛ.’’ Dɛm ntsi, ɔbor dɛ ɔropon hɛn efi hɛn mfomdo mu no, Ewuradze n’ehumbɔbɔr na adom ma hɛn mboa wɔ nsisi, esintɔ na akwansidze biara a hɛn ɔnnkyebo sũahu dze hyɛ hɛn do no.

Yerenya nhyira nhyɛananmu horow yinom no nye nhyehyɛɛ horow binom nam. Ewuradze se hɛn dɛ yɛnyɛ “dza yebotum ayɛ nyinra’’ na “hom mfa [hom] akra nyinara mbɔ afɔr mma no.” Iyi hia ɔpɛ a ɔdɔ bun mu, nokwar na akoma nokwafo, na hɛn enyimia koraa wɔ yerisie Ne mbrasɛm na yɛdze hɛn pɛ rebata Ne dze ho.

Sɛ hɛn enyiber mbɔdzembɔ tɔ sin fa hɛn enyidar a osian gyinabew horow a yennyi ho tum ntsi a, Ewuradze bɛda ho agye hɛn akoma n’apɛdze horow dɛ afɔr a odzi mu. President Dallin H. Oaks kyerɛkyerɛɛ dɛ, “Wobehyira hɛn wɔ hɛn akoma ne tsenenee apɛdze ho mpo sɛ gyinabew bi a yennkotum asesa amma yenntum ennya hɛn apɛdze horow no a.’’

Mber a Nkɔnhyɛnyi Joseph hawee wɔ no nuabanyin Alvin, a nna oewu a oennya asɛmpa ayɛdze horow etsitsir no no, onyaa awerɛkyekyer nyikyerɛ yi dɛ: “Hɔn so a wobowuwu fi ndɛ dze kɔ no, a woennya [asɛmpa no] ho nyimdzee no, a sɛ wonyae a, nkyɛ wɔdze hɔn akoma nyina bɛgye no, bɛyɛ dɛm ahenman [Nyankopɔn ne celestial ahenman] no mu adzedzifo.’’ Nkyii Ewuradze dze kãa ho dɛ, “Osiandɛ emi, Ewuradze bobu nyimpa nyinara atsɛn dɛ mbrɛ hɔn ndwuma tse, dɛ mbrɛ hɔn akoma n’apɛdze tse.’’

Dza ohia ma Ewuradze no nnyɛ sɛ yebotum a, mbom sɛ yɛwɔ pɛ dɛ yɛbɛyɛ dza yebotum ayɛ nyinara dze aka No do dɛ hɛn Agyenkwa a.

Mber bi nyɛnko bi maa asɛmpasomafo kumabaa bi awerɛkyekyer osian dɛ nna oridzi yaw dɛ wɔmaa ɔkɔr fie ntsɛm osian n’apɔwmudzen a nna ɔnnyɛ ntsi, no nokwar mpaabɔ na n’enyiber dɛ ɔbɔsom nyina ekyir no. Ɔkyɛɛ kyerɛwsɛm bi a Ewuradze paa mu kãa dɛ sɛ Ne mba “wɔdze hɔn ahoɔdzen nyina’’ nye “dza wɔwɔ nyina yɛ dɛm edwuma no’’ dze ahyɛ Ne mbrasɛm mã, “na hɔn atamfo [a gyinabew horow a wɔnnkɔ yie wɔ hɛn abrabɔ kã ho] … siw hɔn kwan amma woenntum annyɛ dɛm edwuma no a, hwɛ, minnkebisa dɛm edwuma no ho asɛm efi dɛm [adasamba] no nkyɛn bio, mbom mebɛgye hɔn afɔrbɔdze ato mu.’’

Me nyɛnko no gyee dase kyerɛɛ aberantsɛba yi dɛ Nyankopɔn nyim dɛ ɔdze dza ɔwɔ no ne papa ankasa gyee ɔfrɛɛ no do kɔsomee. Ɔmaa no awerɛhyɛmu dɛ Ewuradze agye n’afɔrbɔdze no ato mu na nhyira horow a wɔdze bɔɔ asɛmpasomafo anokwafo anohoba no wɔmmkɛfa akam no.

Ewuradze ne nhyira nhyɛananmu horow no taa dua ayamuyie na som a yɛdze ma binom a wɔboa hɛn ma yɛyɛ dza hɛnara yennkotum ayɛ no mu ba. Mekaa mber bi a, nna yɛnntse mbɛn hɛn mbabaa no kor wɔ France no, nna yenntum mmboa no ber a ɔkɔr awoe a nna ɔyɛ dzen mu ekyir no. Dapɛn noara mu no, hɛn ward wɔ Utah hwehwɛɛ mboa maa maame bi a nna ɔwoo ntafo nnkyɛree. Me yer, Valérie, gyee too no do dɛ ɔbɔkɔ akɛma no edziban, a ɔdze mpaabɔ wɔ n’akoma mu ma enã fofor yi na hɛn babaa no a wɔwɔ ahohiahia mu no. Annkyɛr, na yɛtsee dɛ nkyerɛbaa a wɔwɔ hɛn babaa no ward wɔ France no ahyehyɛ hɔn ho akɛma n’ebusua edziban. Hɛndze, Nyankopɔn yii hɛn mpaabɔ ano, ɔsomaa N’abɔfoe ma wɔmaa awerɛkyekyer mber a nna yennkotum ayɛ.

Sɛ yehyia akwansidze na nsɔhwɛ a, hom mma yenhu hɛnara hɛn nhyira horow—hɛn akyɛdze, mboa, na mber ahorow—na yɛmfa ndzi dwuma nsom hɔn a wɔwɔ ahohia mu. Yɛreyɛ dɛm no, yennkehyira binom nko mbom yɛdze ayarsa na nhyɛananmu bɛba hɛnara hɛn abrabɔ mu.

Akwanhorow mu kor a tum wɔ mu dodow a yebotum dze aboa Nyankopɔn nhyira nhyɛananmu horow nye edwuma a yegyina yɛyɛ ma hɛn ewuakɔr wɔ Ewuradze fie. Ber a yegyina hɔn ananmu yɛ ayɛdze horow no, yɛdze hyewbɔ hyɛ Ewuradze no nkwagye edwuma kɛse no mu, a yɛdze hɛn akyɛdze horow na ahoɔdzen dze nhyira horow ma hɔn a woennya kwan anngye wɔ hɔn ɔnnkyebo abrabɔ mu no.

Ɔdɔ som a yɛdze ma wɔ temple krɔnkrɔn no bɔ hɛn nkaa dɛ Agyenkwa n’adom no tserɛw kɔ abrabɔ yi ekyir. Abrabɔ a ɔbɛba mu no, bia wɔbɛma hɛn akwan fofor ma yeewie dza yenntum annyɛ wɔ ɔnnkyebo abrabɔ yi mu no. Ɔrekasa kyerɛ nkyerɛbaa a nna wonnyae nnya hɔn onnyiewiei hokafo no, ɔdɔ mu ara President Lorenzo Snow kãa dɛ: “Latter-day Saintnyi biara a ɔabɔ nokwar bra nnyi hɔ a sɛ owu a ɔbɛyew biribi osian ndzɛmba bi a ɔwɔ hɔ a ɔannyɛ ntsi ber a wɔamma no ho akwanhorow. … Wobenya nhyira horow, nkwagye ntowdo, na enyimnyam nyinara a ɔbarimba anaa ɔbaa biara benya a onyaa kwan yi.’’

Enyidado na awerɛkyekyer asɛm yi yɛ hɛn nyinara dze, Nyankopɔn ne mba. Hɛn mu biara nnkefi ɔnnkyebo no nsɔhwɛ na akwansidze ho. Ne nyinara ekyir no, wɔdze awosu tum bi woo hɛn ma yɛagye hɛnankasa hɛn ho. Naaso, yɛwɔ Agyenkwa dɔfo, na “yenyim dɛ dza yebotum ayɛ nyinara ekyir no wɔnam [N’]adom do na wɔbɛgye hɛn nkwa.”

Megye dase dɛ, ber a gyinabew horow pii wɔ abrabɔ mu a yenntum nhyɛ do no, hɛn mu biara mmbor dɛ nsa bɛkã Ewuradze ne nhyira horow a ɔmmbɔadze no. Ɔnam No werdam afɔrbɔ do no, Agyenkwa no bɛhyɛ hɛn ananmu wɔ dza yenntum annyɛ na nsisi biara ho sɛ yɛdze hɛn akra nyinara bɔ afɔr ma No a. Jesus Christ ne dzin mu, amen.