Fa Woho Hyɛ Mu yɛ Ahosiesie ma Christ Ne Nsan Mbae
Ɔfrɛ horow na akwan horow a yɛbɛyɛ Nyame edwuma no yɛ hɛn ahoboa wɔ kwan mapã do ma yekehyia Agyenkwa no.
Abosoom kakra ara a abɛsen no, nna migyina asado bi na Elder Neil L. Andersen nnantsewee bɛsenee. Nna mbrɛana wɔafrɛ me Wiadze Mfɛndzanan Tumdzifo fofor a. Ɔyɛ me dɛ ohun me mberɛwyɛ atsenkã no, ɔyerɛɛw n’ano na ɔkãa dɛ, “Oye, ɔyɛ dɛ banyin bi gyina hɔ a onnyim dza ɔwɔ dɛ ɔyɛ ho hwee.”
Na modween ho dɛ, “Nokwar nkɔnhyɛnyi na adzehunyi nye no.”
Nkyii Elder Andersen wɔsaa dɛ, “Mma nnhaw, Elder Shumway. Ɔyɛ yie—mfe enum anaa esia egu mu no.
Ana adwen ho pɛn siantsir a wobisa hɛn dɛ yɛnyɛ ndzɛmba horow a ɔbor hɛn do wɔ Nyankopɔn n’ahenman no mu? Abrabɔ yi mu ahwehwɛdze yi, ana ebisa siantsir a ohia mpo dɛ yebenya ɔfrɛ horow wɔ Asɔr no mu a? Oye, mayɛ.
Minyaa mbuae bi wɔ wiadze mfɛndzanan ehyiadzi ber a President Russell M. Nelson see dɛ, “Mber yi nye mber a emi na ɔwo wɔdɛ yɛbɛyɛ ahosiesie ama hɛn Ewuradze na Agyenkwa, Jesus Christ ne Mbae a Otsĩa Ebien no.” Ber a President kãa iyi no, Sunsum no kyerɛkyerɛɛ me dɛ sɛ yɛdze hɛnho hyɛ Nyame n’edwuma mu a, nna yɛreyɛ hɛnho na binom ho ahoboaboa ama Christ Ne nsan mbae. Ewuradze n’anohoba no tɔ asowa mu dɛ ɔfrɛ horow, erosom, temple sɔr, iridzi nkenyan do, na akwan binom so a yɛdze yɛ Nyame edwuma no ma yɛyɛ ahoboa wɔ kwan mapã do dɛ yebehyia Agyenkwa no.
Nyame N’Enyi Gye Sɛ Yɛyɛ N’Edwuma a
“Ber yi mu n’enyimnyam no,” ber a Nyankopɔn N’ahenman retra na temple horow sisi asaase do no, woekehia akra a wɔwɔ pɛ dɛ wɔbɛyɛ Nyame n’edwuma. Yɛrosom etuhoakyɛ mu nye Christ su osuanyiyɛ ankasa no. Mbom erosom nntaa nnyɛ ahotɔdze. Ntsi na m’enyi gye homho hom ahyɛmu-siefo esuafo, hɛn asɛmpasomafo adɔfo no kã ho, a hom dze hom apɛdze na ɔhaw horow to nkyɛn na hom som Ne mba dze som Nyankopɔn. Nyame “enyi gye dɛ ɔdze enyimnyam bɛma [hɔn a wɔsom No] wɔ tseneneeyɛ mu.” Ɔbɔ anohoba dɛ, [Hom] akatua bɛyɛ kɛse na onnyiewiei bɛyɛ [hom] enyimnyam.” Sɛ yɛgye do nyew dɛ yɛbɔsom a, nna yɛrekã nyew kyerɛ Jesus Christ. Na sɛ yɛkã nyew kyerɛ Christ a, nna yɛrekã nyew akyerɛ abrabɔ abɔso a yebotum enya.
Musũaa adzesuadze yi ber a mereyɛ edwuma na murusũa chemical engineering wɔ esũapɔn. Wobisaa me dɛ menyɛ dwumadzi hyehyɛfo ma hɔn a wɔnnwaree hɔn ward. Nna ɔfrɛ no yɛ m’akomatudze kɛse. Naaso, mepenee, na ahyɛse no nna ɔnnyɛ enyigye koraa. Nkyii dwumadzi kor bi ase no ɔbaa fɛɛfɛw bi n’enyi gyee mbrɛ misii tsĩtsi ice-cream no. Ɔsanee baa mpɛn ebiasa, dze enyidado dɛ mebɛhyɛ no nsew. Ɔdɔ kyee hɛn, na dapɛn ebien ekyir ɔkãa kyerɛɛ me dɛ yɛntsena. Oye, bia na ɔannyɛ ntsɛm dɛm, na emi mbom nye nyia ɔkãa dɛ yɛntsena, naaso nokwar no nye dɛ, modwen ho a moho popo dɛ sɛ manngye ɔfrɛ no a nnkyɛ munnkohu Heidi.
Yɛdze Hɛnho Rehyɛ Mu no Yɛ Ahosiesie ma Christ Ne Nsan Mbae
Yɛyɛ Nyame n’edwuma nnyɛ dɛ Nyame hia hɛn mbom osiandɛ yehia Nyame na Ne nhyira akɛse no. Ɔbɔ anohoba dɛ, “Na, hwɛ, medze nhyira kɛse behyira hɔn a wɔyɛ edwuma wɔ mo wenyin ture mu nyina.” Hom mma menkyɛ fapem ebiasa a ɔkyerɛkyerɛ hɛn mbrɛ hɛnho a yɛdze hyɛ Nyame edwuma mu no boa hɛn ma yɛyɛ ahoboa dze kehyia Agyenkwa no.
Odzi kan, ber a yɛdze hɛnho hyɛ Nyame n’edwuma mu no, yenya mpontu nkakrankakra kɔ “[hɛn] mbɔe no botae” ho.”
Yesũa nhwɛdo yi wɔ Wiadze no Mbɔe ho nsɛm mu. Da kor biara edwuma ekyir no, Nyame gye mpontu a wɔayɛ no to mu ber a Ɔrekã dɛ “Oye.” Ɔannkã dɛ edwuma no woewie yɛ anaa dɛ odzi mu. Mbom dza Ɔkãa nye dɛ mpontu aba, na wɔ Nyame n’enyiwa do no, dɛm no ye!
Ɔfrɛ horow no nnkyerɛ anaa dɛ onndzi nyimpa no no bo a ɔsom anaa dɛ ɔfata ho dase. Mbom, ber a yɛnye Nyame yɛ edwuma wɔ kwan biara Ɔbɛse hɛn no, yenyin ba hɛnankasa hɛn mbɔe botae no ho.
Nyame dzi dɛw wɔ hɛn mpontu ho, na dɛm so ɔsɛ dɛ yɛyɛ, sɛ mpo yɛda ho wɔ edwuma a yɛyɛ a. Ɔtɔ mber binom a, yennkenya ahoɔdzen anaa ahom a yɛdze bɔsom wɔ ɔfrɛ bi mu. Dɛmara so no, yebotum ayɛ edwuma no na yedua akwan horow a oye do tse dɛ mpaabɔ na kyerɛwsɛm adzesũa do dze abɔ hɛn dasegye ho ban. Hɛn Ɔsor Egya dɔfo mmbu hɛn fɔ ber a yɛwɔ pɛ dɛ yɛbɔsom naaso yenntum nnsom.
Otsĩa ebien, yɛrosom pegya hɛn efiefi na Asɔr no ma wɔbɛyɛ mbea a yebotum esũasũa ahyɛmudzi abrabɔ.
Mfatoho, hɛn ahyɛmudzi dɛ yɛbɛkaa Christ aber nyina no yɛyɛ no ankorankor, naaso yedzi ahyɛmu yi do ber a yɛsom nkaafo. Ɔfrɛ horow dze kwan ahorow twa hɛnho hyia a yɛdze soasoa kor biara n’adzesoadze, ɔnam dɛm ntsi yɛahyɛ Christ ne mbra no mã. Sɛ yɛsom osiandɛ yɛdɔ Nyame na yɛpɛ dɛ yɛdze hɛn ahyɛmudzi horow no bɔ bra a, som a ɔyɛ dɛ ma ɔyɛ katsee na ɔgye ahoɔdzen no bɛyɛ enyigye na ɔdze nsesã pa ba.
Ayɛdze horow no nngye hɛn nkwa osiandɛ yɛayɛ dza wɔakyerɛw no nkorkor wɔ sor. Mbom, sɛ yɛdze ahyɛmudzi horow a ɔfam ayɛdze yinom ho no bɔ bra a, yɛba bɛyɛ nyimpa a ɔpɛ dɛ ɔba Nyame n’enyim. Ntseasee yi dzi twentweɔnee dɛ yɛbɔsom anaa yɛpɛ dɛ yɛnnkɔsom do. Hɛn ahoboaboa dze ekehyia Jesus Christ no bɔkɔ ntsɛm sɛ yegyaa dɛ yebisa dza Nyame bɛma ho kwan na yɛhyɛ ase bisa dza Nyame bɛpɛ.
Otsĩa ebiasa, yɛreyɛ Nyame n’edwuma no boa hɛn ma yenya Nyame n’adom akyɛdze na yɛtse No dɔ kɛse no.
Yennya akatua sika mu wɔ hɛn som ho. Mbom, kyerɛwsɛm no kyerɛkyerɛ dɛ “mbom [hɛn] ndwuma n’akatua nye dɛ [hɛn] nsa bɛkã Nyame n’adom, dɛ [yɛ]bɛyɛ dzen wɔ Sunsum mu, na yenya Nyame ne nyimdzee, [na] [yɛ]dze ahoɔdzen nye tum a ofi Nyankopɔn hɔ akyerɛkyerɛ.” Dɛm yɛ guadzi papa!
Osian Nyame n’adom ntsi, hɛn tum-ayɛ anaa yenntum nnyɛ no nnyɛ siantsir a ohia tsitsir a wogyina do ma ɔfrɛ anaa yɛdze gye ɔfrɛ. Nyame enyi nnda mbɔdzembɔ a odzi mu anaa talent soronko do ma wɔdze ayɛ n’edwuma. Sɛ ɔtse dɛm a nkyɛ Ɔhembaa Esther anngye ne man, nkyɛ Peter nnkedzi asɔpɔkan Asɔr no ne kan, na Joseph Smith nnkɛyɛ Nsanananmu Nkɔnhyɛnyi no.
Ber a yɛdze gyedzi yɛ biribi a ɔbor hɛn tum do no, hɛn mberɛwyɛ da edzi. Ɔnnyɛ ahotɔ dabiarada, mbom ohia dɛ “[yehu] dɛ ɔnam [Nyankopɔn] n’adom do … na ɔma yenya tum dze yɛ ndzɛmba yinom.
Yɛbɔhwe famu mpen pii ber a yɛreyɛ Nyame edwuma no. Mbom hɛn mbɔdzembɔ mu no, Jesus Christ suo hɛn mu. Nkakrankakra no Ɔama hɛn do ma yenya nkwagye efi hɛn nkogu na suro na atsenkã dɛ yɛnnkɛfata dabiarada mu. Yetu hɛn mbɔdzembɔ nyina si hɔ, osuar mpo a, Nyame ma ɔyɛ kɛse. Yɛbɔ afɔr ma Christ a, Ɔtsew hɛn ho. Iyi nye Nyame n’adom a ɔdze nsesã pa tum ba no. Yɛrosom no, yenyin wɔ Nyame n’adom mu kesi dɛ yɛyɛ krado dɛ “Egya no bɛma [hɛn] do wɔ sor, na [y]ebegyina [Jesus Christ] enyim.”
Boa Nkaafo Ma Wonya na Dzi Dɛw wɔ Ɔfrɛ Horow Akyɛdze no mu
Minnyim adze nyina a Agyenkwa no bebisa me ber a migyina N’enyim no, mbom bia asɛmbisa no kor bɛyɛ, “Woana na enye no bae?” Ɔfrɛ horow yɛ akyɛdze krɔnkrɔn horow a ofi Ɔsor Egya dɔfo hɔ dze aboa ma yɛnye binom akã hɛn ho akɔ Jesus Christ nkyɛn. Ntsi moto nsa frɛ hɛn mu kor biara, dɛ wɔngye enyim ara nhwehwɛ hɔn a wonnyi ɔfrɛ biara. Hom nhyɛ hɔn nkuran na wɔmboa hɔn ma wɔnyɛ Nyame n’edwuma ma ɔboa hɔn ma wɔmfa nyɛ ahoboa mma Christ ne nsan mbae.
Nna John mmbɔ hyew wɔ Asɔr no mu ber a no bishop kɛseraa no na ɔkãa kyerɛɛ no dɛ Ewuradze wɔ edwuma ma no dɛ ɔnyɛ. Ɔtoo nsa frɛɛ John dɛ ongyaa sigyarɛt nom. Nna John abɔ mbɔdzen mpɛn pii dɛ obegyaa dze, naaso aber yi mu onyaa atsenkã dɛ tum bi a wonnhu roboa no.
Dapɛn ebiasa ekyir ara no, stake President no kɛseraa John. Ɔfrɛɛ no dɛ ɔnsom wɔ bishop na n’apamfo mu. John noho boow no. Ɔkãa kyerɛɛ stake president no dɛ ogyaa sigyarɛt nom no ɔnnkyeree. Sɛ ɔfrɛ yi bɛkyerɛ dɛ onngyaa no ntɔyɛɛ dɛ ɔkɔhwɛ bɔɔl akansi Kwesida biara a, nna ɔno dze ɔbɛyɛ dzen dodow. Stake president no ne nkenyan mbuae no yɛɛ tsiabaa dɛ: “John, nnyɛ emi na miribisa wo; Ewuradze no a.”
Ɔno ho na John buaa dɛ, “Sɛ dɛm dza, mobɔsom.”
John kãa kyerɛɛ me dɛm afɔrbɔ horow yinom a ɔdze somee no yɛɛ sunsum mu nkenyan kɛse maa ɔno na n’ebusua.
Gyama yenya bea bi a yennhu hɔ, yɛmmfrɛ ankorankor a, hɛn honam enyi do no, wɔyɛ dɛ mbrɛ wɔnnsɛ anaa wɔmmfata. Anaa mbɔdzembɔ wɔ ɔfrɛ mu behia hɛn akyɛn mpontu nkyerɛkyerɛ, wobu hɔn enyi gu mbrɛ Agyenkwa no ma hɔn a wɔnnsɛ na wɔnnyɛ bi da no ahom na kwan horow a wɔdze som.
Elder David A. Bednar kyerɛkyerɛ sunsum mu ahyɛdze no ho hia a ohia dɛ “wɔmma [banyin na basia] biara nsũa [hɔn] dwuma, na [wondzi] dwuma.” Ana yɛyɛ iyi a? Sɛ baanodzifo na awofo ma nkaafo kwan ma wosũa na wodzi dwuma ma hɔnho a wɔpaa nhyiren na wɔyɛ frɔmfrɔm. Kwan a ɔyɛ mberɛw bia ɔbɛyɛ ebɛma asɔrmba anokwafo ɔfrɛ a otsĩa ebien, mbom kwan a oye kyɛn biribiara nye ebɔto nsa afrɛ hɔn a wɔnnsɛ dɛ wɔnsom na ama hɔn kwan ma woesũa na woenyin.
Sɛ Christ wɔ ha wɔ nyimpadua mu a, nkyɛ Ɔbɛsera ayarfo, Ɔakyerɛkyerɛ Kwesida Skuul class, Ɔnye young woman a n’akoma ebubu atsena ase, na Oehyira mbofra. Obotum ayɛ nankasa N’edwuma. Mbom Odzi nhyehyɛɛ yi do dɛ Ɔma hɛn kwan ma yedzi dwuma na yesũa, ntsi Ɔsoma hɛn wɔ N’ananmu.
Yɛreyɛ Nyame edwuma no dze “kyɛfa, ndzinoa, na asodzi dɛ yebegyina Ewuradze [Jesus Christ] n’ananmu” ba. Sɛ yɛsom dɛ yɛbɔkrɔn Christ na nnyɛ hɛnankasa hɛn ho a, hɛn som no ba bɛyɛ enyigye. Sɛ binom fi hɛn class, nhyiamu, anaa erosom ho nsera, anaa dwumadzi bi ase na ɔkaa Christ yie kyɛn ɔkaa hɛn a, nna edwuma no yɛ nkuranhyɛ.
Ber a yɛrohwehwɛ enyiberdo dɛ yebegyina Agyenkwa n’ananmu no, yɛba bɛyɛ tse dɛ Ɔno ara yie. Dɛm nye ahosiesie a odzi mu ankasa ma dɛm krɔnkrɔn ber no hɛn mu kor biara bobu nkotodwe na wɔase dɛ Jesus nye Christ no, a megye ho dase dɛ Ɔyɛ no, na dɛ President Russell M. Nelson nye Ne “ndze a ɔkɔ asaase ano nyina” dze aboa hɛn ma “yɛayɛ ahosiesie … [a]ma dza ɔreba no.” Jesus Christ ne dzin krɔnkrɔn no mu, amen.