“Ɔnam Iyi Do na Nyimpa Nyina Bohu Dɛ Hom Yɛ M’Esuafo”
Hɛn dɔ ma Nyankopɔn na Ne mba yɛ dasegye a ɔyɛ ndam ma wiadze no dɛ nokwar ara iyi nye Agyenkwa no N’Asɔr.
Mfe pii a abɛsen no nna emi na Akyerɛbaa Uchtdorf rutu kwan dua Germany anaafo afamu. Nna ɔka kakra ara ma Easter asõ, na yɛtoo nsa frɛɛ nyɛnko dɔfo bi a, ɔnnyɛ Asɔr no n’asɔrba dɛ ɔmbɛkã hɛnho wɔ hɛn Kwesida som mu. Yɛdɔ nyɛnko dɔfo yi, ntsi nna ɔyɛ hɛn su na ntɔyɛɛ dɛ yɛnye no kyɛ hɛn atsenkã a yenya wɔ Agyenkwa no na N’Asɔr ho na yɛtoo nsa frɛɛ no dɛ ɔmbra mbɔhwɛ! Ɔgyee nsato no too mu na ɔbɛkãa hɛnho wɔ nhyiamu horow no wɔ asɔr nkorbata bi a ɔbɛn mu.
Sɛ enye nyɛnko bi aba asɔr ne mber a odzi kan a, nkyɛ ibotum atse dza metsee no dɛm Kwesida anapa no ase yie. Nna mepɛ dɛ biribiara kɔ do pɛpɛɛpɛr. Hɛn nyɛnko no nna no nwomasũa akɔ ekyir ara yie, ɔwɔ sunsum mu atsenkã so. Nna ɔyɛ m’enyidado ara yie dɛ nkorbata yi mu nhyiamu horow no bɛyɛ enyisɔ ama no na wɔada Asɔr no edzi yie.
Nkorbata no nna wohyia mu wɔ abansor a wɔahire adan binom wɔ fiadze a wɔtɔn edziban ho ndzɛmba no sor. Ama yeetum aakɔ hɔ no, nna ɔwɔ dɛ yɛfa atwer a ɔwɔ dan n’ekyir a, yerutwa mu wɔ ndzɛmba a wɔdze esie hɔ a ne nkã yɛ dzen ho.
Sacrament nhyiamu no rehyɛ ase no, modween me nyɛnko yi ne mber a odzi kan a orinya sũahu yi ho, na ndzɛmba a mehyɛɛ no nsew no maa mefɛree kakra. Mfatoho, adwontow no annyɛ dɛ Tabernacle Adwontokuw dze no. Nna yetum tse mbofra a wonntum ntsena fakor sacrament mber mu no hɔn dede. Hɔn a wɔkasa no bɔɔ mbɔdzen ara yie, naaso nna wonyim dɔm mu kasa. Metsenaa nhyiamu n’ase a nna moho mmbaa me, dze enyidado dɛ bia Kwesida Skuul no bɛyɛ yie kakra.
Nna ɔnntse dɛm.
Anapa no nyina ɔyɛɛ me atseetsee dza hɛn nyɛnko no bɔdwen wɔ asɔr yi a yɛnye no akɔ no ho.
Ekyir no, ber a yɛrekã kaar akɔ fie no, medaan moho dɛ menye hɛn nyɛnko no bɛkasa. Nna mepɛ dɛ mekyerɛkyerɛ mu kyerɛ no dɛ iyi yɛ nkorbata kakrabaa na ɔnnda Asɔr mu no nyina edzi yie. Na ansaana asɛm no befi m’anomu epue no, ɔkasae.
Ɔsee dɛ, “Nna ɔyɛ ahomkã papa.”
Menntum emmbue m’ano.
Ɔsɔɔw do dɛ, “M’enyi agye mbrɛ wo nkorɔfo no nye hɔnho nya nkitahodzi wɔ w’asɔr mu dodow. Ɔyɛ dɛ hɔn nyina hɔn nkyir fir gyinabew ahorow, naaso ɔda edzi pefee dɛ wɔdodɔ hɔnho ampaara. Iyi nye dza modwen ho dɛ Christ pɛɛ dɛ N’Asɔr no bɛyɛ.”
Nyew, munuu moho ntsɛmara wɔ m’atsɛmbu su no ho. Nna mepɛ nhyiamu horow a biribiara kɔ do pɛpɛɛpɛ ma wɔayɛ me nyɛnko no enyisɔ. Na dza nkorbata yi mu asɔrmba yinom yɛe no yɛ ɔdɔ, ayamuyie, abotar, na ayamuhyehye sunsum a odzi mu.
Ama Gyedzi Adɔɔ Sõ wɔ Asaase do
Mo nuanom na nkyerɛbaa adɔfo, m’anyɛnkofo adɔfo, modɔ Jesus Christ N’Asɔr a ɔwɔ hɔ ma Nda a Odzi Ekyir Ahotseweefo. Ɔyɛ Agyenkwa no no nokwar nye Asɔr tseasefo na ɔkyerɛkyerɛ Jesus Christ asɛmpa a wɔdze asan anamu aba no ne mãhyɛ. N’asɔfodzi tum na tumdzi wɔ ha. Jesus Christ nankasa dzi Asɔr yi kan, Odua n’asomfo a Ɔafrɛ hɔn na Ɔama hɔn tumdzi do, na nkɔnhyɛnyi tseasefo, President Russell M. Nelson mpo. Agyenkwa no ama Latter-day Saintfo dwuma soronko dɛ wɔmboa Nyankopɔn ne mba ano na wonsiesie wiadze no mma Agyenkwa no ne Mbae a Otsĩa Ebien no. Megye dase dɛ iyinom nyina yɛ nokwar.
Mbom ohia papaapa dɛ yɛbɛkaa dɛ nkorɔfo dodowara no, mber a odzi kan a wɔdze ba Jesus Christ N’Asɔr no, nna wɔronndwen asɔfodzi tumdzi anaa ayɛdze horow anaa Israel mboano ho. Dza wobedzi kan ahyɛ no nsew nye, atsenkã a wonya ber a wɔwɔ hɛn nkyɛn na mbrɛ yesi yɛnye hɛnho nya nkitahodzi.
Jesus see dɛ, “hom ndodɔ homho nkorkor.” “Ɔnam iyi do na nyimpa nyina bohu dɛ hom yɛ M’esuafo.” Ɔtaa dɛ obi ne dasegye wɔ Jesus Christ ho a odzi kan no, ɔba ber a onya ɔdɔ atsenka a ɔwɔ Jesus Christ esuafo mu.
Agyenkwa no paa mu kãa dɛ Ɔdze N’Asɔr asan ananmu aba “ama gyedzi … adɔɔ sõ wɔ asaase do.” Dɛm ntsi, ber a nkorɔfo bɛsera hɛn Asɔr nhyiamu horow no, Agyenkwa no pɛ dɛ wɔdze No ho gyedzi kɛse fir edzi kɔ. Ɔdɔ a hɛn anyɛnkofo tse ho nkã ber a wɔwɔ hɛn mu no bepegya hɔn abɛn Jesus Christ yie! Ɔno nye hɛn botae a ɔnnyɛ kyinkyinɛnn ber biara a yɛboa ano.
Obiara a ɔrohwehwɛ gyedzi kɛse wɔ Christ mu anaa Ɔsor Egya nkitahodzi a ɔkã hɛn bɛn no yie no, ɔsɛ dɛ onya ahomka dɛ ɔaba fie wɔ Jesus Christ N’Asɔr a ɔwɔ hɔ ma Nda a Odzi Ekyir Ahotseweefo mu. Yɛroto nsa afrɛ hɔn aba hɛn nhyiamu horow mu no botum ayɛ hɛn su na ntɔyɛɛ dɛ yɛroto nsa afrɛ hɔn aba hɛn efiefi.
Dza Ɔsɛ dɛ Ɔyɛ na Dza Ɔtse Ankasa
Afei, mehu dɛ merekasa fa dza ɔsɛ dɛ ɔyɛ ho. Na ɔnnkyebo abrabɔ yi mu no, yɛnntaa nnya dza ɔsɛ dɛ ɔyɛ ho sũahu. Na “dze kɛpem da a odzi mu no” ber biara kwan bɛda dza ɔsɛ dɛ ɔyɛ na dza ɔtse ankasa no ntamu. Ntsi, ebɛnadze na ɔsɛ dɛ yɛyɛ sɛ Asɔr no nntse dɛ da odzi mu no a? Ber a, ɔnam siantsir biara ntsi hɛn ward nnyɛn gyedzi na dɔ a odzi mu? Anaa ber a yenya atsenkã dɛ yɛatɔ mu?
Adze kor a ɔnnsɛ dɛ yɛyɛ nye yennkegyaa dza ɔsɛ dɛ ɔyɛ no ekyir hwehwɛ!
Mormon Nwoma ne dzin krataafa no dze kɔkɔbɔ a ohia yi kã ho: “Sɛ mfom bi wɔ mu a,” ɔkã dɛ, “nna ofi nyimpa; dɛm ntsi mma hom nnkasa nntsia ndzɛmba a Nyame ayɛ.”
Ana nwoma bi—anaa asɔr bi anaa nyimpa bi—botum enya “mfom” na ɔada ho ayɛ Nyame ne nsaano edwuma?
Me nyiano yɛ nyew kɛsenara!
Ntsi ber a hɛnankasa yedzi Ewuradze ne gyinapɛn a ɔkrɔn do no, hom mma yenya abotar mma hɛnho nkorkor. Hɛn mu kor biara yɛ edwumadze a wogu do reyɛ, na hɛn nyina yɛtwer Agyenkwa no wɔ mpontu biara a yɛyɛ ho. Dɛm no yɛ nokwar ma hɛn dɛ ankorankor, na ɔyɛ nokwar so ma Nyankopɔn n’ahenman wɔ asaase yi do.
Ewuradze to nsa frɛ hɛn dɛ mma yɛmmbɛka N’ahenman ho ara mbom so yɛmfa enyimpi nsi. Nyame enyi da nkorɔfo a wɔwɔ “akoma kor na adwen kor” do. Ama yɛayɛ akoma kor no, otwar dɛ yenya akoma a no mu tsew , na ɔno hia akoma mu nsakyer kɛse.
Naaso ɔno nnkyerɛ dɛ mebɛsesa m’akoma ma ɔnye wodze asaa. Nna ɔnnkyerɛ so dɛ ebɛsesa w’akoma ma ɔnye medze asaa. Ɔkyerɛ dɛ hɛn nyina yɛbɛsesa hɛn akoma ma ɔnye Agyenkwa no asaa.
Sɛ yennyae nndur hɔ a, hom nkaa dɛ, yɛdze Ewuradze no mboa no, biribiara nnyi hɔ a orunntum nnyɛ yie.
Yɛfata na Yɛkaho
Na sɛ ɔyɛ na inya atsenkã dɛ atɔ mu a, meserɛ hu dɛ nnyɛ ɔwo nko. Hɛn nyina yenhyiaa abrabɔ gyinabew horow a yɛtse dɛ yɛayɛ ahohɔ wɔ bea hɔ? Meenya iyi ho sũahu, bɔbor mpɛn kor. Ber a nna medzi mfe 11 no, wɔhyɛɛ m’ebusua ma yetuii fi hɛn fie kɔr mantaw bi mu a yennyim hɔ. Nna biribiara asesa fi dza nna minyim no ho. Me kasaa mpo daa no edzi kyerɛɛ mbofra nkaa no dɛ ɔson emi na dza hɔn wonyim no. Ber a nna mihia anyɛnkoyɛ na mbɛkaho papaapa no, meyɛɛ ankonam a woetu me efi fie.
Asaase yi do no, dza ɔyɛ nsonsonee kɛse a yɛhyɛ no nsew—nsonsonoee horow a hɛn mu binom dze kyekyɛ hɔnho mu no—nye asaase do ndzɛmba, tse dɛ nyimpadua no hwɛbea, ɔman a ifi mu, kasa, efuradze, kusum amambra, na dza ɔkekã ho. Naaso “Ewuradze nnhwɛ dɛ mbrɛ nyimpa hwɛ. Nyimpa hwɛ dza opue n’enyiwa do, na Ewuradze dze ɔhwɛ akoma mu.”
Fi No nhumu mu no, nkyekyɛmu kor na odzi nkaa no nyina kan: Nyame ne ba. Na hɛn nyina yɛfata iyi emudzi mu.
Ɔyɛ hɛnankasa hɛn su dɛ yɛpɛ dɛ hɔn a wɔtse dɛ hɛn, wɔkasa, yɛ ndzeyɛɛ, na wɔdwen dɛ hɛn no twa hɛnho hyia. Kwan da hɔ ma dɛm ne yɛ.
Mbom wɔ Agyenkwa N’Asɔr mu no, yɛboa hɔn nyinara a wɔyɛ Nyame ne mba a wɔwɔ pɛ dɛ wɔbɔboa hɔn ano na wɔhwehwɛ nokwar no ano. Ɔnnyɛ hɛn nyimpadua no hwɛbew, hɛn amanyɛsɛm ho adwen, hɛn amambra, anaa hɛn ebusuakuw na ɔdze hɛn boa ano. Ɔnnyɛ hɛn nkyir na ɔkã hɛn bɔ mu. Ɔyɛ hɛn botae kor, hɛn dɔ ma Nyankopɔn na hɛn dɔ ma fipamfo, hɛn enyimpisi ma Jesus Christ na N’asɛmpa a wɔdze asan anan mu aba no. Yɛyɛ “kor wɔ Christ mu.”
Koryɛ no a yɛrohwehwɛ no nnyɛ yɛbɛma obiara egyina fakor; ɔyɛ ma obiara bɔhwɛ fakor noara—ɔbɔhwɛ Jesus Christ. Yɛyɛ kor nnyɛ osian sũahu a yeenya mbom osian bea a yɛreper akɔ, nnyɛ osian hɛn nyimpa ban, mbom nyia yɛrohwehwɛ abɛyɛ no.
Ɔno nye Christ no nokwar Asɔr no botae ne nyina.
Nyimpadua Kor
Sɛ edɔ Nyankopɔn, sɛ epɛ dɛ eka Ne Ba no do dze hu no yie a, nna ekã ho wɔ ha. Sɛ erohwehwɛ enyiber do dɛ ibesie Agyenkwa no ne mbrasɛm a—ɔwɔ mu dɛ innyae nndzi mu wɔ ho dze—nna efata emudzi mu ara ma Jesus Christ N’Asɔr a ɔwɔ hɔ ma Nda a Odzi Ekyir Ahotseweefo.
Na sɛ ɔson ɔwo na nkorɔfo a woetwa woho ehyia no so ɛ? Ɔno mma nnyɛ obi a ɔmmfata—ɔma eyɛ Christ nyimpadua n’afã a wohia. Wohia obiara wɔ Christ nyimpadua no mu. Asowa tse nsɛm a enyiwa nnkotum ehu da. Anan no yɛ ndzɛmba horow a nsa nnkotum ayɛ no yie.
Ɔno nnkyerɛ dɛ w’edwuma nye ebɛsesa obiara ma wɔayɛ tse dɛ ɔwo ankasa. Mbom ɔkyerɛ dɛ ewɔ biribi a ohia a edze bɛma—na dɛ ewɔ biribi a ohia, sũa.
Ndze Kor
Wiadze mfɛndzanan ehyiadzi nhyiamu biara mu no, ɔyɛ hɛn adom ma yɛtse nkenyan ndwom fi adwontokuw ahorow a wɔawea hɔ. Ber a iritsie no, bia ebɛhyɛ no nsew dɛ hɔn a wɔtow ndwom no nntow ndze kor noara. Ɔtɔfabi a afã bi ma do, ɔtɔfabi a afã kor so. Mbom hɔn nyina ma hɔn kyɛfa ma ngyegyee dɛɛdɛw no, na wɔyɛ no koryɛ a odzi mu mu. Adwontokuw mu adwontofo kor biara wɔ botae kor noara: dɛ obeyi Nyame ayɛw na oepegya hɛn akoma ama No. Otwar dɛ kor biara dze ɔsor botae kor noara to n’adwen na n’akoma do. Na sɛ dɛm ba a, wɔba bɛyɛ ndze kor ampaara.
Sɛ innyae mmbɛyɛɛ Jesus Christ N’Asɔr a ɔwɔ hɔ ma Nda a Odzi Ekyir Ahotseweefo no n’asɔrba a, yɛto nsa frɛ wo dɛ beka hɛnho ber a yedzi ehurusi wɔ Agyenkwa no no “ɔpon ho ɔdɔ ndwom” mu. Yehia hom. Yɛdɔ hom. Wo mbɔdzembɔ dɛ ebɔsom Ewuradze na Ne mba no bɛma Asɔr no ayɛ yie.
Sɛ edua enuma mu, edua enye Nyankopɔn ridzi ahyɛmu do dada, dze akyerɛ wo pɛ dɛ “hom bɛba Nyame no nguanbuw mu, na wɔafrɛ hom no nkorɔfo [a],” yɛda wo ase dɛ eka edwuma krɔnkrɔn kɛse yi ho na eroboa ma Jesus Christ N’Asɔr ɔayɛ mbrɛ Agyenkwa no rohwehwɛ ma ɔayɛ.
Dɛ mbrɛ musũaa fii me nyɛnko no hɔ wɔ Germany no, hɛn dɔ ma Nyankopɔn na Ne mba yɛ dasegye a ɔyɛ ndam ma wiadze no dɛ nokwar ara iyi nye Agyenkwa no N’Asɔr.
Nyame nhyira hɛn ma abotar mu ara mbom enyiber do yɛnhwehwɛ dɛ yɛdze hɛn Agyenkwa, Pomfo, na Owura ne tsirmpɔw a Ɔahyehyɛ ama hɛn no abɔ bra—ama nyimpa nyinara eehu dɛ yɛyɛ N’esuafo. Jesus Christ ne dzin krɔnkrɔn no mu, amen.