Wiadze Mfɛndzanan Ehyiadzi
Awerɛhyɛmu wɔ Nyame Enyim.
Ebɔbira 2025 wiadze mfɛndzanan ehyiadzi
11:59

Awerɛhyɛmu wɔ Nyame Enyim.

President Russell M. Nelson ne Kasaa

Jesus Christ N’Asɔr a ɔwɔ hɔ ma Nda a Odzi Ekyir Ahotseweefo no ne President

Ber a yɛhwehwɛ enyiberdo dɛ yebenya ayamuyie na ɔbrapa ahyɛ hɛn abrabɔ mu mã no, hɛn awerɛhyɛmu dɛ yɛbɛbɛn Nyankopɔn no bɛyɛ kɛse.

Mo nuanom na nkyerɛbaa adɔfo, ɔyɛ me enyisɔ dɛ menye hom kasa ndɛ wɔ wiadze mfɛndzanan ehyiadzi nhyiamu soronko yi mu. M’enyiwa rokɔ do rokɔ mpanyin mu. Yɛda hom ase wɔ hom ntseasee ber a medze me nsɛm roto gua yi.

Yɛtse ase wɔ ahoɔhar kɛse nda mu wɔ Jesus Christ N’Asɔr a ɔwɔ hɔ ma Nda a Odzi Ekyir Ahotseweefo no. Enyigye hyɛ me mã ber a muhu mpontu wɔ apaamu pii.

Hɛn mbabun hyɛ me nkuran papaapa. Wɔdze ɔdodow na wɔdze rosom. Wɔrohwehwɛ hɔn ewuakɔr na wɔreyɛ ayɛdze horow wɔ temple mu. Hɛn young men na young women dze asɛmpakã som application reba a no dodow bi mmbaa pɛn. Ebusuasantsen a wɔreba no rosoɛr egyina dɛ Jesus Christ akadofo a wosi pi.

President Nelson nye ne nanasum basiaba.

Ndaansa yi mihyiaa nanaba basia sum fofor bi. Sɛ modwen ɔhaw a obehyia wɔ n’abrabɔ mu a, menya ɔpɛ kɛse ho atsenkã dɛ mo mboa no ma ɔnkyekyer ne gyedzi wɔ Jesus Christ mu. Ɔdze N’asɛmpa robɔ bra no hia papaapa ma ne ndaamba enyigye.

Ɔno, tse dɛ hɛn mu kor biara no, obehyia ɔhaw pii. Hɛn nyina yɛbɛyar, enya abawgura, ehyia nsɔhwɛ, na yɛahwer adze. Ɔhaw horow yinom botum apem hɛn awerɛhyɛmu. Naaso, Jesus Christ esuafo wɔ kwan wɔ awerɛhyɛmu soronko bi ho.

Ber a yɛnye Nyame dzi ahyɛmu na yesie no, yebotum enya awerɛhyɛmu a ofi Sunsum mu ba. Ewuradze see Nkɔnhyɛnyi Joseph Smith dɛ hɛn awerɛhyɛmu “wɔ Nyame enyim no bɛhyɛ dzen.” Hom nsusu ahotɔ a ɔbɛyɛ dɛ yebenya awerɛhyɛmu wɔ Nyame enyim!

Sɛ merekã yerenya awerɛhyɛmu wɔ Nyame enyim ho asɛm a, nna merekã yerenya awerɛhyɛmu abɛn Nyame seseiara! Merekyerɛ yɛdze awerɛhyɛmu robɔ mpaa dɛ Ɔsor Egya tsie hɛn, dɛ Ɔtse hɛn ehiadze ase koraa kyɛn dza yɛtse ase. Merekyerɛ yerenya awerɛhyɛmu dɛ Ɔdɔ hɛn kyɛn dza yebotum atse ase, dɛ Ɔsoma N’abɔfoe ma wɔbɛka hɛnho na hɔn a yɛdɔ hɔn ho. Merekyerɛ dɛ yɛwɔ awerɛhyɛmu dɛ Ɔpɛ dɛ Ɔboa hɛn mu kor biara ma yedu hɛn hyɛber a ɔkrɔn no.

Afei, yesi dɛn nya awerɛhyɛmu a ɔtse dɛm? Ewuradze dze nsɛmfua yinom yi asɛmbisa yi ano: “Ma ayamuyie nhyɛ w’abadaa mu mã … mfa mma nyimpa nyina,, … na ma ɔbrapa nsiesie w’adwen mu a onngyaa da, nkyii w’awerɛhyɛmu wɔ Nyame enyim bɛhyɛ dzen.”

Saafee no nye yi! Ewuradze Noara n’anomu asɛm mu, ayamuyie na ɔbrapa na obue kwan a yebenya awerɛhyɛmu wɔ Nyame enyim! Enuanom na nkyerɛbaa, yebotum ayɛ iyi! Hɛn awerɛhyɛmu botum ahyɛ dzen ampaara wɔ Nyame enyim, seseiara!

Hom mma yenhwɛ ebien no nyina, ayamuyie na ɔbrapa.

Odzi kan, ayamuyie. Mfe ebien a abɛsen kɔ no, mefrɛɛ hɛn dɛ, yɛyɛ Jesus Christ ahyɛmu akadofo no, yɛnyɛ esiesiefo. Misi dza mekãa dɛm aber no do: “Ebufuw nntu aso dabiarada. Yerɛwyerɛwyɛ mmboa obiara. Wentwiwentwi mmfa nkenyan nyiano mmba dabiarada.”

Nokwar ayamuyie ma nyimpa nyina nye esiesiefo hɔn ahyɛnsewdze! Ohia papaapa dɛ yenya ayamuyie wɔ hɛn kasaa mu, bagua mu na kokoa mu. Meda hɔn a wɔfaa me mfeda afotu no too hɔn akoma do no ase. Mbom yebotum ayɛ no yie akyɛn dɛm.

Sesei ebufuw a ɔwɔ bagua mu kasa nkitahodzi na wɔ social media do yɛ hu dodow. Ɔtan nsɛm yɛ bɔr akõdze. Wentwiwentwi siw Sunsum Krɔnkrɔn no kwan ma Ɔmbɛyɛ hɛn daa daa adamfo.

Dɛ yɛyɛ Jesus Christ akadofo yi, ɔsɛ dɛ yedzi kan wɔ kwan no do dɛ esiesiefo. Ber a ayamuyie bɛkã hɛn su ho no, yebegyae dza ɔhyɛ hɛn dɛ yembu binom enyimtsia no. Yebegyaa dɛ yebua nkaafo atsɛn. Yebenya ayamuyie ama hɔn a wɔwɔ abrabɔ mu gyinabew nyina mu. Ayamuyie ma nyimpa nyina no ohia papaapa ma hɛn mpontu. Ayamuyie yɛ nyame-su ne fapem.

Hom mma yɛntotɔ nserɛ hɛn Ɔsor Egya ma Ɔmmfa ayamuyie kɛse nhyɛ hɛn akoma mu mã—nkanka ma nkorɔfo a ɔyɛ dzen dɛ yɛbɔdɔ hɔn.—osiandɛ ayamuyie yɛ akyɛdze fi hɛn Ɔsor Egya hɔ ma Jesus Christ akadofo nokwafo. Agyenkwa no nye Asomdwee Hen no. Ɔsɛ dɛ yɛyɛ N’edwindadze a ɔtahye asomdwee.

Afei, hom mma yɛnkã ɔbrapa ho asɛm. Ewuradze se hɛn dɛ yɛmma ɔbrapa nsiesie hɛn adwen a onngyaa da. Yensusu dɛ, adwen pa biara no sɛ yɛdze ɔbrapa kã ho a, mbrɛ yebesi benya mpegya. Ɔbrapa ma biribiara yɛ yie na enyigye mu ara so. Naaso n’afã ha no, susu dza ɔbɛba sɛ edze ɔbrapa kã adwen a no mu nntsew, ewurkadze adwen, anaa abagura adwen ho a. Ɔbrapa bepĩa dɛm adwendwen no akyen. Ɔbrapa bɛma enya ahotɔ efi ɔhaw adwendwen ho.

Enuanom na nkyerɛbaa, ber a wiadze reyɛ tsirmɔdzendze kɛse no, yehia dɛ hɛnho tsew yie. Hɛn adwendwen, kasa, na ndzeyɛe hia dɛ ɔyɛ ɔbrapa a kyim biara nnyi ho na Jesus Christ no dɔ mapã ma nkorɔfo nyina no hyɛ hɛn mã. Kwan kɛse da hɛn enyim dɛ yɛbɛyɛ nkorɔfo a Nyankopɔn hia hɛn ma yɛabɛyɛ no.

Yɛtaa sɔr wɔ Ewuradze ne fie a ɔma yetum tow hɛn ɔbrapa na ayamuyie mu. Dɛm ntsi, mber a yedzi wɔ temple mu no ma hɛn awerɛhyɛmu wɔ Ewuradze enyim no yɛ kɛse. Yeridzi mber pii wɔ temple no so boa siesie hɛn ma hɛn Agyenkwa, Jesus Christ ne Mbae a Otsĩa Ebien no. Yennyim Ne Mbaa da anaa dɔn no. Mbom minyim dɛ Ewuradze rekenyan me dɛ muntu hɛn fo dɛ yɛnyɛ krado mma dɛm “da kɛse no a ɔyɛ hu.”

Ber a yɛhwehwɛ enyiberdo dɛ yebenya ayamuyie na ɔbrapa ahyɛ hɛn abrabɔ mu mã no, hɛn awerɛhyɛmu dɛ yɛbɛbɛn Nyankopɔn no bɛyɛ kɛse. Moto nsa frɛ hom dɛ hom ngye enyim ara ntutu anamɔn a ɔbɛma hom awerɛhyɛmu wɔ Nyame enyim no enyin. Nkyii, ber a yɛdze awerɛhyɛmu kɛse kɔ hɛn Ɔsor Egya hɔ no, enyigye kɛse bɛhyɛ hɛn mã, na hɛn gyedzi wɔ Jesus Christ mu mo bɛyɛ kɛse. Yɛbɛhyɛ ase enya sunsum mu tum a ɔbor hɛn enyidado kɛse biara do.

Yɛkyerɛ hɛn enyisɔ ma Ewuradze wɔ temple ne nsisii a ɔrokɔ do ntsɛm ndansa mfe yinom mu. No kwankyerɛ ase no, ndɛ, yɛbɔ nhyehyɛɛ ho dawur dɛ yebesisi temple wɔ mbea 15 yi mu kor biara do.

  • Reynosa, Mexico

  • Chorrillos, Peru

  • Rivera, Uruguay

  • Campo Grande, Brazil

  • Porto, Portugal

  • Uyo, Nigeria

  • San Jose del Monte, Philippines

  • Nouméa, New Caledonia

  • Liverpool, Australia

  • Caldwell, Idaho

  • Flagstaff, Arizona

  • Rapid City, South Dakota

  • Greenville, South Carolina

  • Norfolk, Virginia

  • Spanish Fork, Utah

Megye dase dɛ Jesus Christ, Israel Pomfo no, Odzi iyi, N’Asɔr no kan. Ɔreyɛ ahoboa aba bio. Nkyɛ hɛn so yɛayɛ ahoboa dɛmara dze agye No. Iyi ho na mobɔ mpaa wɔ Jesus Christ ne dzin mu, amen.

Nsɛnsin

  1. Boba kakraba no a nkɔnhyɛnyi Daniel hunii wɔ ne nda a odzi ekyir ho adaaso mu no [re]pirepirew ekesi dɛ ɔbɛtahye asaase nyina do (hwɛ Daniel 2:31–45; Nkyerɛkyerɛ na Ahyɛmudzi 65:2)

  2. Nkyerɛkyerɛ na Ahyɛmudzi 121:45.

  3. “Osiandɛ mibedzi hom enyim. Mibedzi hom nyimfa na hom bankum, na mo sunsum bɛhɛn hom akoma mu, na m’abɔfoe etwa hom ho ehyia, na wɔasoa hom” (Nkyerɛkyerɛ na Ahyɛmudzi 84:88

  4. Nkyerɛkyerɛ na Ahyɛmudzi 121:45, woetsĩ mu akã ho; hwɛ iyi so nyiyimu 46.

  5. Russell M. Nelson, “Peacemakers Needed,” Liahona, Esusow Aketseaba 2023, 98.

  6. Eresan mu eyi enye nkorɔfo edzi aper no nye eresan mu eyi dɛ ebɔbɔ wo bra a nnkenya Sunsum Krɔnkrɔn no kwankyerɛ.

  7. Ɔsɛ dɛ yenya ayamuyie “ma nyimpa nyina, nye gyedzi fifo no” (Nkyerɛkyerɛ na Ahyɛmudzi 121:45).

  8. Iyi kyerɛ dɛ erobɔ mpaa a “[edze] akoma mu ahoɔdzen nyina” (Moroni 7:48).

  9. Hwɛ Moroni 7:48.

  10. Hwɛ Isaiah 9:6.

  11. Dɛ mbrɛ Joseph Smith kyerɛkyerɛɛ no, “Sɛ [yɛpɛ] yɛakɔ bea a Nyankopɔn wɔ a, otwar dɛ [yɛyɛ] tse dɛ Nyankopɔn, anaa yenya nhyehyɛɛ no a Ɔwɔ no” (Teachings of Presidents of the Church: Joseph Smith [2007], 72). Dɛmara so, Ɔsomafo Paul tuu hɛn fo dɛ “hom mma yɛmfa ndam mbra adom ahengua no enyim ama yeenya ehumbɔbɔr na yeehu adom a ɔboa hɛn ber a ohia mu.”Hebrewfo 4:16).

  12. Hwɛ Matthew 24:36–37.

  13. Malachi 4:5; hwɛ iyi so Zephaniah 1:14–18.

  14. Ewuradze akã akyerɛ hɛn dɛ “hom nkaa gyedzi, ɔbra pa, nyimdzee, ahohyɛdo, abotar, enuadɔ, nyamesu, ayamuyie, ahobrɛadze, [na] mbɔdzembɔ” Nkyerɛkyerɛ na Ahyɛmudzi 4:6). Sɛ yɛyɛ a, hɛn awerɛhyɛmu bɔkɔ sor, na nkyii, wɔ Nankasa N’asɛm mu no, sɛ yebisa a, hɛn nsa bɛkã Na sɛ yɛbɔ mu a wobobue ama hɛn. (Hwɛ Nkyerɛkyerɛ na Ahyɛmudzi 14:7.)

  15. Bia yebenya dza Ɔhen Benjamin no nkorɔfo yɛe no ho sũahu: “Dɛw hyɛɛ hɔn mã, nna woenya bɔnfakyɛ nye adwenmutsewee, osian gyedzi mbordo a wonyaa wɔ Jesus Christ [mu]” (Mosiah 4:3).