“Hom nsan mbra me nkyɛn… Ama Maasa Hom Yarba”

Ber bi nna yɛtse fie bi mu a ndua akɛse a ɔyɛ fɛw etwa ho ehyia. Nna willow dua fɛɛfɛw bi si kwan no n’ano ne nkyɛn pɛɛ. Anafua ahwerɛhow da bi ehum kɛse bi tui; willow dua no bɔhwee famu. Ɔda famu a no ndwow no epuei, nna ɔyɛ awerɛhow.

Nna mayɛ krado dɛ mobɔsɔ seradaa efir no dze etwitwa dua no ayɛ nyena ber a hɛn fipamfo no dze mbirika bae dɛ ɔrebesiw me kwan. Ɔkãa m’enyim dɛ merepa aba wɔ dua no ho na nokwar mu ara otuu hɛn fo dɛ mma yennyi dua no mmfi hɔ. Afei ɔdze ne nsa kyerɛɛ ndwow kor a ɔda ho hyɛ famu na ɔkãa dɛ sɛ yɛma dua no do si hɔ dze biribi wɔw no, twitwa no nkorbata na yɛnyɛn no a, ndwow no bɛsan egyina bio.

Nna m’adwen mu ayɛ me naa na megyee ho kyim wɔ mbrɛ dua a, ɔda edzi dɛ ɔahwe ase na ɔwɔ ɔhaw mu botum atsena ase na ɔasan aba nkwa mu. Mususuii dɛ sɛ ɔhyɛ ase nyin bio mpo a ekyingye biara nnyi ho dɛ orunntum nngyina ehum fofor a ɔbɛba no ano. Naaso yenyim dɛ hɛn fipamfo no gye dzi dɛ dua no da ho ara wɔ daakye ntsi, yɛgyee nhyehyɛɛ no too mu.

Na nsusuando no? Ber kakra ekyir no yehun nsɛnkyerɛdze a ɔfa nkwa ho dɛ dua no ahyɛ ase afa ndwow. Sesei, mfe 12 ekyir no, dua no ho ayɛ dzen na nkwa ahyɛ no mã a ɔwɔ ndwow a ɔyɛ dzen na ɔkɔ do dze fɛwyɛ ba asaase no do.

Ber a mihyia ahotseewfo wɔ wiadze nyina mu no mekae dɛm willowdua yi na mbrɛ enyidado wɔ hɔ mpo ber ɔyɛ dɛ ndzɛmba nyinara ayew. Binom enya dasegye pɛn fa nsɛmpa no ho a nna ɔyɛ dzen na wɔtse dɛ willowdua no. Afei, ɔnam ankorankor siantsir soronko bi ntsi, dɛm dasegye no yɛɛ mberɛw, ma wɔhweer gyedzi. Binom sensɛn ndwow tseaa koraa do a ɔkɔ nsɛmpa dɛtse mu.

Mpɛn pii nkorɔfo pii a wɔasan mu eyi dɛ wɔbɛhyɛ hɔn esuafoyɛ ase fofor na wɔasan aba hɔn Asɔr fie ho nsɛm kenyan me. Sen dɛ wɔbɔtow hɔn gyedzi na dza wɔagye edzi egu tse dɛ nyena a ɔnyɛ hwee no, mbom wɔagye sunsum ne nkenyan na ɔdɔ nsato dɛ wɔbɛsan aba.

Mokɔr stake ehyiadzi wɔ Korea beebi a asɔrba bi a ɔresan aba bɛkyɛɛ dɛ: “meda enuaunom ase wɔ ɔpɛ a wɔwɔ dɛ wɔbɛgye gyedzi a minnyi na me mberɛwyɛ ato mu, dɛ wɔhwehwɛɛ m’ekyir kwan na asɔrmba a daa wɔyɛɛ me ayamuyie. Meda ho ara wɔ ayɛnkofo pii a wɔbɛn me a wɔyɛ akɔtrɔbɔdwefo. Ɔyɛ serew, naaso wɔkã kyerɛ hɔnho nkorkor dɛ wɔnsan nkɔ Asɔr nkenya hɔn gyedzi bio. Mususu dɛ bia hɔn nyinara wɔ gyedzi ho akɔndɔ.”

Ma hɔn a wɔrohwehwɛ gyedzi nyina no, yɛto nsa frɛ hom dɛ hom nsan mbra. Mehyɛ hom bɔ dɛ hom botum ahyɛ hom gyedzi mu dzen ber a hom san nye Ahotseweefo no som bio no.

Asɛmpasomafo bi a ofi Africa a nna oewie n’edwuma kyerɛɛw asɔr baanodzifo panyin bi, repakyew na ɔrohwehwɛ bɔnfakyɛ ɔnam ne nkyerɛkyerɛ a ɔfa kusum amandze binom ho ma ofii asɔr no mu. Ɔdze ahobrɛase kãa dɛ: “awerɛhowsɛm nye dɛ, nokwar memaa mobo fuwii mfe 15 a abɛsen kɔ no ama meetua ho kaw kɛsenara. Mohweer pii—kyɛn dza madwen pɛn. M’enyi ewu papaapa wɔ ɔhaw bi a medze baa wɔ kwan no do, naaso ɔsen adze nyina no m’enyi agye dɛ mehu kwan asan aba.“

Ma hɔn a wohu dza wɔahwer nyina, yɛto nsa frɛ hɔn dɛ wɔnsan mbra ama woeetum aasan eedzi asɛmpa no mu aba a enyigye wɔ mu no bio.

Nna akyerɛbaa bi a ɔwɔ United States efi Asɔr no mu mfe pii. N’asɛm a ɔfa ɔresan aba ho dze adzesuadze kɛse ma awofo na ebusuafo a wodzi ahwerɛhow fa adɔfo a wɔtwe hɔnho no. Ɔkyerɛɛw dɛ:

“Mubotum akyerɛw siantsir pii a medze fii Asɔr, nsɛmpa, na kwan bi do no, m’ebusua mu. Naaso wɔmmfa ho koraa. Mennsi gyinae kɛse kor dɛ mirigyae Asɔr—bia meyɛɛ nsanmuyi apem. Naaso adze kor a minyim daa nye dɛ m’awofo sii ngyinae kɛse kor na wogyinaa do pintsinn. Wosii gyinae dɛ wɔbɔdɔ me.

“Murunntum nnhu nyinsuwa dodow a woekyi, anafua a wɔanda, mpaabɔ nsɛm dodow a ofi akoma mu a wɔbɔe wɔ emi ntsi. Wɔammbɔ me dawur wɔ bɔn ho, mbom, wɔdaa ɔdɔ edzi kyerɛ me na wɔboaa me wɔ mo bɔn ho. Wɔamma manntse nka dɛ wɔnngye me nntum wɔ hɔn fie na ebusua nhyiamu ase; dɛm atsenka no mu biara yɛ m’ankasa me nyɛɛ. Mbom, wɔkɔr do gyee me too mu. Ɔbɛyɛ dɛ wohun dɛ m’ahokeka do atsew mber rokɔ no. Naaso nna wonyim dɛ nyimpa nna meyɛ mber a etwa mu no annkyerɛ nyimpa mubotum abɛyɛ.

“Dɛ mbrɛ nna mo kwan a medze fii Asɔr no mu yɛ huenyann no dɛm ara na mo kwan dze resan aba no so yɛɛ. Naaso adze kor a nna ɔnnyɛ dzen wɔ mebɛsan aba nye atsenka dɛ masan aba fie, bea a meka ho.“

M’asɛm a ɔwɔ hɔ ndɛ kɔ nkanka ma hɔn a wɔatse Sunsum ne nkã da mbom wobisa dɛ ana kwan bi wɔhɔ dze san ba, ana kwan wɔ hɔ ma hɔn wɔ Jesus Christ N’Asɔr a wɔdze asan ananmu aba. Ɔsan so kɔ ma obiara a ɔreper dɛ obegyina anaa onya nsɔhwɛ dɛ omfi Asɔr no mu.

Dɛm nsɛm yi nnyɛ taferbanyimbɔmu na ɔnnyɛ afɔbu. Ɔyɛ nsato a wɔda no edzi wɔ ɔdɔ mu dze nokwar ahwehwɛ dɛ wɔbɛma wo akwaaba aba wo sunsum mu fie.

Mabɔ mpae dɛ ebɛtse Sunsum Krɔnkrɔn ne dasegye dɛ mbrɛ sesei etse dɛm nsato a ɔdɔ wɔ mu yi na bɔhyɛ kɛse a ofi Agyenkwa Jesus Christ hɔ no:

“Ana hom rennsan mmba me nkyɛn, na hom nnu homho wɔ hom bɔn ho, ma wɔasakyer hom ama maasa hom yarba?”

Dapɛn biara nyimpa pii regye Agyenkwa no nsato ber wɔ san kɔ osuanyiyɛ dzinn na wɔdze ahobrɛase hwehwɛ Jesus N’anohoba ayarsa no. Na dza ɔnye nsɛm ahorow a ɔtafabi a opue guado no, hɛn mbabun dodow refa dɛ wɔbɔkɔ do egyina na woetu hɔn gyedzi wɔ Jesus Christ mu mpon.

Ber a Jesus n’akadofo binom a wɔwɔ Capernaum hun dɛ ne nkyerɛkyerɛ yɛ dzen na wɔ san mu yii dɛ wɔbɛsan hɔn ekyir no, Ɔdanee kɔr N’asomafo no nkyɛn bisae dɛ, “Hom so pɛ dɛ hom kɔ a?”

Iyi nye asɛmbisa a otwar dɛ hɛn mu biara yi ano ber a yehyia hɛn ankorankor nsɔhwɛ mber no. Peter ne nyiano no fata mber nyina na ɔgyegye: “Ewuradze, woana hɔ na yɛbɔkɔ? Ɔwo na ewɔ onnyiewiei nkwa ho nsɛm.”

Ntsi esusu Agyenkwa ne nsato dɛ san bra No hɔ no, ebɛnadze na ibotum esua fi willow dua no ho asɛm no mu?

1. Mpɛn pii no akwantu a wɔdze san ba no nnyɛ mberɛw anaa ahotɔ, naaso ɔfata. Ber a yɛdze hɛn willowdua no sanee gyinaa hɔ no, nna woetwitwa n’abaw nyina egu. Nna ɔnnyɛ fɛw. Hɛn so yɛbɛtse nkã dɛ woegya hɛn adagyaw ber a yɛtow akwan dadaw no gu na yeyi ahantan fi hɔ. Edze wo gyedzi tsim Jesus Christ na N’asɛmpa do— ɔyɛ ndwow na dua no—bɛma wo awerɛhyɛmu na akokodur ma edze etu anamɔn a odzi kan asan aba.

2. Ogyee mfe pii ansaana hɛn willow dua no rinya n’ahoɔdzen na n’ahoɔfɛw bio. Seseiara no ho yɛ dzen na no ho yɛ fɛw kyɛn ahyɛse no mpo. Nya abotar ber a wo gyedzi na wo dasee so nyin no. Ɔkã iyi ho nye dɛ yɛremma kwan ma nsɛm a wɔanndwen ho ana wɔrekã nnyɛ fintsidua tse dɛ “Mfe pii yi nyina nna ehyɛ hen?”

3. Nkyɛ willow dua no nnkotum atsena ase sɛ oennya hwɛ pa na wɔankɔ do anyɛn no daa daa a. Ebɛnyɛn wo gyedzi na dasegye ber a emee wɔ sacrament pon ho dapɛn biara na esom wɔ Nyankopɔn Ne fie.

4. Tse dɛ ma willow dua no hia ewia ne kan ma no nkorbata na nhataw etum efir bio no, dɛmara so na wo dasegye benyin ber a eyɛ aso ara yie ma Sunsum no n’atsenkã na dase. Hom nsũa mfi Amulek hɔ, a ɔkãa ne mber a nna ɔmmbɔ hyew dɛ asɔrba no ho asɛm rese dɛ, “ɔfrɛɛ me mpɛn pii na menntsie.”

5. Nna me fipamfo no nyim dza willow dua no botum abɛyɛ bio. Dɛmara so na Nyankopɔn nyim wo nkrabea krɔnkrɔn na dza wo gyedzi na wo dasegye botum abɛyɛ. Orinngyaa wo da. Ɔnam Jesus Christ No Werdambɔ no do, dza woebubu nyina benya ayarsa.

Medzi dase dɛ enyigye wɔ sor wɔ hɔn a wɔasan aba ho. Wohia wo, na wɔdɔ wo. Megye dase dɛ Jesus Christ nye hɛn Agyenkwa na Ɔdze asomdwee kɛse na enyigye kɛse hyira hɔn nyina a wɔsan ba Ne nkyɛn. N’ehumbɔbɔr abasa no ɔmmbobɔw mu mbom oebue mu na ɔatserew mu ama wo. Ɔnnkaa ekyir dodow dɛ ebɛsan aba. Yɛdze dɔ a ɔwɔ hɛn akoma mu no, yɛma hom akwaaba ba fie. Jesus Christ ne dzin mu, amen.