Wo Nnuhu Mmfa Adzesoadze Nnto Jesus Christ do; Ɔma N’Enyigye Yɛ Kɛse

Mfe pii a abasen kɔ a mokɔr Florida, nna metsena abɔntsen rekenkan buukuu bi. Nna buukuu no ne dzin susu dɛ yebotum akɔ heaven, ɔwɔ mu dɛ yenndzi mu seseiara. Ɔbaa bi a ɔresen kɔ bisaa dɛ, “Ana edwen ho dɛ obotum aba mu a?”

Memaa mitsir do a, nna munnhu dza ɔrekã no, na nkyii na muhun dɛ ɔrekã buukuu a merekenkan no ho asɛm. Mekãa biribi a ɔyɛ serew dɛ, “Mennkanee nnkɔr ekyir dɛm, mbom mebɛma ehu mbrɛ asɛm no bowie.”

Ao, me yamu a nnkyɛ mubotum asan m’ekyir etu kwan etwa mber mu! Nkyɛ mebɛkã akyerɛ no dɛ, “Nyew, obotum aba mu! Osiandɛ nnyɛ nkorɔfo a woedzi mu na heaven yɛ hɔn dze; heaven wɔ hɔ ma nkorɔfo a wɔdze hɔn bɔn akyɛ hɔn, na wɔsan mu yi Christ bio na bio.”

Ndɛ mepɛ dɛ mekasa kyerɛ hɛn mu binom a ɔyɛ a yɛdwen dɛ, “Ɔyɛ dɛ nnuhu na bɔnfakyɛ yɛ edwuma ma obiara kã emi.” Hɔn a kokoa mu no wɔdwendwen dɛ, “Ɔnam dɛ mokɔ do yɛ mfodo kor noara no, bia dza metse ara nye yi.” Hɔn a, tse dɛ emi, wɔwɔ nda binom a ɔyɛ dɛ ahyɛmu ananmɔnkwan no yɛ dzen ankasa!

Asɛmpasomafo nwanwanyi bi wɔ Australia, wɔfrɛ no Elder QaQa a ofi Fiji, kyɛɛ atsenka a ɔtse dɛm ber a ɔregye no nkɔree dasee: “Minyim dɛ Nyankopɔn dɔ me, mbom ɔyɛ a modwendwen dɛ, Ana Nyankopɔn nyim dɛ modɔ No a?’ Osiandɛ minndzi mu, na meda ho yɛ mfomdo.”

Dɛm adwenhaw asɛmbisa a ofi akoma mu a Elder QaQa bisae no bɔɔ dza metaa haw wɔ ho no tɔw. Bia a wo so rodwendwen dɛ, “Morobɔ mbɔdzen yie ara, mbom ana Nyankopɔn nyim dɛ mereyer moho ankasa a? Ber a meda ho tɔ sin no, ana Nyankopɔn nyim dɛ meda ho dɔ No a?”

Ɔyɛ me awerɛhow dɛ mekã iyi, naaso nna medze mbrɛ morobɔ bra emudzi mu susu me nkitahodzi a menye Agyenkwa no wɔ no. Nna modwen dɛ setsie abrabɔ kyerɛ dɛ mirinnhia dɛ munu moho dabiarada. Na nna sɛ mofom a, ɔyɛ dabiara no a, motwe moho fi Nyankopɔn ho a morodwendwen dɛ, “N’enyiwa nngye moho ketseketse mpo.”

Ɔnnyɛ nokwar.

Mesũa dɛ sɛ etweɔn kɛpem dɛ woho tsew yie anaa idzi mu yie ana akɔ Agyenkwa no hɔ a, ayew asɛm no koraa!

Na sɛ yɛdwen mbrasɛm na setsie ho wɔ kwan fofor do ɛ?

Megye dase dɛ ber a Nyankopɔn dwen hɛn mfomdo ho no, Ɔdwen yie mpo fa dza osi wɔ yɛayɛ mfomdo no ekyir no ho. Ana yɛbɛsan aba No hɔ bio na bio a? Ana yɛbɔkɔ do atsena ahyɛmudzi nkitahodzi yi mu?

Bia na etse Ewuradze ne nsɛm “Sɛ hom dɔ me a, hom ndzi me mbrasɛm do” etse abagura osiandɛ nndzii mbrasɛm ne nyinara do. Ma menkaa wo dɛ ɔyɛ mbra so dɛ ibonu woho! Nokwar, obotum dɛ ɔyɛ mbrasɛm a woesi do esi do koraa wɔ kyerɛwsɛm no mu.

Alma n’asɛm “O kɛtseankyɛ meyɛ ɔbɔfo, na metum enya m’akoma n’apɛdze, na … [ma]tsẽa mu akã nnuho ho asɛm” mu no, nna nnyɛ dɛ ɔrehyɛ hɛn enyito dɛ ɔrekã hɛn mfomdo ho asɛm. Nna ɔpɛ dɛ ɔbɔ nnuhu ho dawur ama emi na ɔwo eetum eekwetsir ɔberɛ wɔ wiadze mu. Siantsir kor a nna Alma kyir bɔn nye dɛ ɔdze yaw brɛ hɛn.

Ɔtɔfabi a ɔwɔ dɛ mekaa, tse dɛ akyerɛw bi a ɔfam mo moma do, dɛ mbrasɛm no yɛ kwan fi yaw ho. Na nnuhu so dɛm ara. Hɛn nkɔnhyɛnyi kãa dɛ, “Agyenkwa no dɔ hɛn aber nyina mbom nkanka ber a yenu hɛnho.”

Ntsi sɛ Ewuradze kã dɛ, “Hom nnu homho, hom nnu homho” a, susu no dɛ Ɔrekã dɛ, “Modɔ hom. Modɔ hom.” Susu no na hu No dɛ Ɔrototɔ serɛ wo dɛ gya suban a ɔdze yaw brɛ wo no wɔ ekyir, roto nsa frɛ wo dɛ fi sum mu na dan bra Ne kan ho.

Me babaa Carly no ward mu no, sɔfo fofor bi buu ntwɛr dɛ orihyira sacrament do, na nkyɛ ɔbɛkã dɛ, “Ama wɔayɛ dze akaa wo Ba no bɔgyaa” no, mbom ɔnndze enyidaho no ɔkãa dɛ, “Ama wɔayɛ dze akaa wo Ba no dɔ” no. Nyinsuwa hyɛɛ Carly n’enyiwa mu mã ber a ɔtsee nokwar a ɔwɔ nsɛm no mu n’ase yie.

Nna hɛn Agyenkwa ayɛ krado dɛ Ɔbɛfa No Werdambɔ ɔyaw no mu osiandɛ Ɔdɔ wo ntsi. Nokwar, ɔwo nye “dɛw a wɔdze sii n’enyim” ber a oruhu amandze no.

Nsato no dɛ yennu hɛnho no kyerɛ Nyankopɔn no dɔ.

Yɛregye nsato no ato mu no kyerɛ hɛn dɔ.

Susu Christ no mfonyin a epɛ papaapa wɔ w’adwen mu. Nkyii susu dɛ Ɔreserew enyigye mu ara ber biara a edze n’akyɛdze dzi dwuma, osiandɛ Ɔno nye “enyidado a ɔhyerɛn na odzi mu.”

Nyew, wo nnuho mmfa adzesoadze nnto Jesus Christ do; ɔma N’enyigye yɛ kɛse!

Hom mma yɛnkyerɛkyerɛ ɔno!

Osiandɛ nnuhu yɛ asɛm papa mapã ma hɛn!

Nnyɛ yɛnnkɔfom da na ɔbɛma yɛaka ahyɛmu anamɔnkwan no do. Yerunu hɛnho dabiara na ɔbɛma yɛaka anamɔnkwan no do.

Na sɛ yerunu hɛnho a, Nyankopɔn dze kyɛ hɛn a Ɔnnhyɛ hɛn enyito, Ɔmmfa hɛn nntoto obi fofor biara ho, anaa Ɔnnkã hɛn enyim osiandɛ iyi nye adze kor noara nna yerunu hɛnho wɔ ho dapɛn a abasen no.

Odzi dɛw ber biara a Ohu hɛn wɔ hɛn nkotodwe enyim. Ɔyɛ no enyisɔ dɛ Ɔdze hɛn bɔn bɛkyɛ hɛn osiandɛ yɛyɛ enyisɔdze ma No!

Nntse nnkã dɛ iyi yɛ nokwar ara a?

Nna dɛn ntsi na ɔyɛ dzen ma hɛn dɛ yɛbɛgye edzi?!

Abɔnsam, ɔtõatoafo nye daadaafo kɛse no, dze enyito dzi dwuma twe hɛn fi Nyankopɔn nkyɛn. Enyito yɛ sum a ɔyɛ dur ara ma sɛ iyi fi wo mu to hɔ a, ebɛtse no dur no ankasa.

Enyito nye ndze a ɔhwe wo, kã dɛ, “Nna edwen ebɛnadze ho?” “Ana ɔwo etum ayɛ tsenenee wɔ biribi mu da?”

Enyito nnkã nnkyerɛ hɛn dɛ yɛayɛ mfom bi; ɔkã kyerɛ hɛn dɛ hɛn mfom nye hɛnara. Ibotum mpo atse dɛ, “Suma.” Ɔsɛɛfo no yɛ dza ɔwɔ no tum mu biara dɛ yebesie enyito wɔ hɛn mu, a ɔrekã kyerɛ hɛn dɛ nnuhu bo no sõ dodow, na ɔbɔgow dɛ bɔn yi bɛka nsumaamu, a oriyi enyidado nyinara fi hɔ.

Abɔnsam yɛ enyidado n’owifo.

Na ohia dɛ etse iyi, ntsi mebɛma me ndze do akã nsɛm yi: Nnyɛ ɔwo nye ndze no a ɔwɔ wo tsir mu no anaadɛ mfomdo a ayɛ no. Bia a obehia dɛ ɔwo so bɔbɔ mu akã. Kã kyerɛ Abɔnsam dɛ, “Nnyɛ ndɛ.” Ma onfi wo do.

Tse dɛm nkã a ɔtwe wo no, Nyankopɔn kwan do awerɛhow a ɔdan wo kyerɛ Agyenkwa no do no, na hwɛ N’adom a ɔhɛn w’abrabɔ mu na w’adɔfo so hɔn abrabɔ mu. Mobɔ anohoba dɛ mber noara a akokodur mu ara yɛdze akoma a abobɔ ba Ne nkyɛn no, Ɔwɔ hɔ ntsɛmpanara.

Sɛ ihu dɛ nsu remem obi a, nnkɛtsen wo nsa na agye no a? Ana ibotum esusu w’Agyenkwa a oriyi wo nsa a atsen no akwa a? Mususu No dɛ ɔrodɔ esukɔ, esian ndzɛmba nyinara ase abɛmaa hɛn do aba sor ama yɛagye ahom pa! Obiara runntum mmem nnkɔ ase kyɛn bea a Christ ne kan hyerɛn du no.

Agyenkwa no hyerɛn kyɛn enyito no sum no afebɔɔ. Orummbu wo enyimtsia da. Ntsi hwɛ no yie.

• Susu dɛ dɛm nsa yi gyina hɔ ma bo a esom.

• Dɛm nsa yi gyina hɔ ma setsie. Bia esoɛr anapa yi, ebɔɔ mpaa nokwar mu, hwehwɛɛ kyerɛwsɛm no mu dze tsiee Nyankopɔn ne ndze. Ayɛ gyinaesi apapa na edze Christ su rohwɛ hɔn a woetwa woho ehyia no. Iritsie wiadze mfɛndzanan ehyiadzi! Wo setsie wɔ ha!

• Anaadɛ ndzɛmba nnhyɛɛ da ara nnkɔr yie. Ndaansa yi aper dɛ ebɛyɛ ndzɛmba nketsenketse a ɔda famu a ɔdze hɛn fam heaven. Esi gyinae binom a emmpɛ.

• Wo bo a esom wɔ hen? Ana nsa yi efi hɔ a?

Wo bo a esom nngyina setsie do. Wo bo a esom tsim hɔ daa; ɔnnsesa da. Nyankopɔn na ɔdze maa wo, na biribiara nnyi hɔ a ɔwo anaa obiara botum ayɛ dze asesa no. Setsie dze nhyira ba; ɔno yɛ nokwar. Mbom wo bo a esom nnyɛ nhyira no no mu kor. Wo bo a esom no ɔyɛ “kɛse wɔ Nyame enyim,” dabaa, ɔmmfa ho bea a wo gyinaesi horow dze wo ekegyina.

Ber a mofom no, mepɛ dɛ metsena menye Christ ahyɛmudzi nkitahodzi no mu, na mebɛkã siantsir no akyerɛ hom.

Mirinyin no megyee erodɔ esukɔ ho adzesũa nkyerɛkyerɛ, na musũaa dɛ sɛ atsɛmbuafo no rema amba wɔ obi a wɔadɔ esukɔ ho a, wɔhwɛ mbrɛ osii yɛɛ no. Ana ɔkɛhyɛɛ nsu no mu no nna ne nyimpadua yɛ tsenn hwɛ famu a, n’anansɔba atsen na wɔammbɔ nsu no apetse kɛse? Nkyii wɔyɛ biribi soronko. Wɔdze mbrɛ ɔyɛ dzen dodow no kã ho.

Obiara dze nankasa ne ɔdzen dodow rodɔ esukɔ. Na w’Agyenkwa nko nye nyia nokwar mu ara Onyim ɔdzen a edze rodɔ esukɔ no. Mepɛ dɛ menye dɛm nyimpa a ɔno nko na ɔtse me ase, onyim m’akoma na mbrɛ mesi robɔ mbɔdzen no nya nkitahodzi!

Onyim dɛ sum ehubɔwhubɔw risian wɔ Ne mba akwantufo nyinara do na dɛ hɛn kwan no da esutsen fĩfĩ no ho—ntsi mpo dɛ yɛdze dadze poma no mu no, bi botum apetse egu hɛnho.

Ereba Christ hɔ nye erekã dɛ, “Ana ebɔboa me a?” edze enyidado, ahotodo a woeyi akyerɛ dɛ Ne nsa tsen ma wo aber nyinara. Megye dzi dɛ dɛm nhumu fofor fa nnuhu ho yi kyerɛ dɛ, ɔwɔ mu dɛ yennyi setsie emudzi seseiara dze, eso yɛbɔ mbɔdzen wɔ ɔdɔ setsie ho seseiara, a yɛrefa dɛ yɛbɛtsena mu, bio na bio, osiandɛ yɛdɔ No.

Ekaa Ɔhen Benjamin no nkorɔfo, a nna wonnyi pɛ biara bio dɛ wɔbɛyɛ bɔn, na mbom dɛ wɔbɛyɛ papa aber nyina no? Ana edwen dɛ wɔbobɔɔw hɔn ntamadan, kɔr fie a wɔannyɛ mfomdo kor so da a? Oho! Nsonsonee no nye dɛ nna wɔmmpɛ dɛ wɔbɛyɛ bɔn bio. Nna wɔwɔ ɔdɔ setsie! Nna wɔadan hɔn akoma ama Nyame ber a wɔreper!

Dakor bi a nna mowɔ mpoano, muhun anoma bi a orutu akɛhyɛ ehum no mu a, ɔrobɔ ne ntsaban mu dzendzenndzen, mbom nna ogyina fakor. Nkyii muhun anoma kor so, wɔ sor koraa. Nna ɔda mframa dzen a ɔfow sor no mu na ɔda mu fãa a, mframa no nnhaw no. Ɔno nye nsonsonee a ɔda hɛnankasa yɛrobɔ mbɔdzen ayɛ adze na yɛredan akɔ hɛn Agyenkwa hɔ ntamu, yɛrema Ɔamaa hɛn do, a ɔdze “ayarsa wɔ ne ntsaban mu.”

Dɛ asɛmpasomafo banodzifo wɔ Australia no, hɛn nhyiamu a odzi ewiei a yehyiaa asɛmpasomafo kor biara mu no, yɛkasaa faa 3 Nephi 17 ho, bea a nna nkorɔfo no bɛn Agyenkwa no na wɔtsee dɛ Ɔrobɔ mpaa ma hɔn. Yebisaa dɛ, “sɛ ibotum atse dɛ Agyenkwa no robɔ mpaa ama wo a, ebɛnadze na edwen dɛ nkyɛ Ɔbɛkã?”

Yeritsie hɔn nyiano no yɛ Sunsum mu suahu a ɔsõ papaapa wɔ m’abrabɔ mu no mu kor. Asɛmpasomafo no mu kor biara gyinae kakra, na nyinsuwa hyɛɛ hɔn enyiwa mu mã ber a yɛkaa hɔn dɛ, “W’Agyenkwa nyim ɔdzen dodow a erefa mu. Ɔafa mu da!”

Dza asɛmpasomafo no kyɛɛ no kommyɛ, berɛww mu ara nye yi: Akyerɛbaa kor kãa dɛ, “Jesus bɛkã akyerɛ Egya no dɛ, ‘Ɔreyɛ dza obotum papaapa. Minyim mbrɛ osi robɔ mbɔdzen.’” Elder bi kãa dɛ, “Dza woesi wɔ n’abrabɔ mu nyina no, m’enyi gye no ho dodow.”

Yɛmbɔ mbɔdzen nyɛ adze yi. Anafua yi, ansaana ebɔbɔ mpaa no, susu dɛ Jesus Christ bɛn wo nkyɛn hɔ. Ɔyɛ wo Dzimafo wɔ Egya no nkyɛn. Bisa woho dɛ, “Ebɛnadze na m’Agyenkwa bɛkã afa mo ho akyerɛ Egya no?”

Na nkyii yɛ dzinn.

Tsie ndze no a ɔkã ndzɛmba apapa fa wo ho no—Agyenkwa ne ndze no, wo nyɛnko pa mapã no, na wo Sor Egya a ɔwɔ hɔ ankasa. Kaa dɛ, Hɔn dɔ na wo bo a esom no yɛ kɛse daa daa, gyinabew biribiara mu mpo!

Migyina ha dzi dase dɛ Jesus Christ ma hɔn a wɔtse sum mu no kan. Ntsi nda binom mu a etse dɛ ndze no rekã kyerɛ wo dɛ suma, dɛ ɔwo nko wɔ dɛ isuma dan sunkamm bi mu no, moto nsa frɛ wo dɛ nya akokodur na gye Christ dzi! Nantsew kɔsɔ Kandzea no—hɛn Enyidado a Ɔhyerɛn na Odzi Mu.

Ne kan eguar wo no, ibohu nkorɔfo a woetwa woho ehyia pii a hɔn so wɔatse ankonamyɛ nkã, naaso sesei dze, kan no si do no, ɔwo nye hɔn bɔdwendwen dɛ, “Nna ebɛnadze ntsi na yesuroo dodoodow wɔ sum no mu? Na ebɛnadze ntsi na yɛtsenaa hɔ kyɛree dɛm?”

“Hom mma Kan Nyina Wura mfua hom wɔ N’abasa mu na ɔnkyekye hom werɛ na ɔndɔ hom daa nye daa.” Hom mma yɛndɔ No na yɛnkɔ do yɛnsan mu nyi No bio na bio. Jesus Christ ne dzin mu, amen.