Ehumbɔbɔr ho Nhyehyɛɛ no

Mfeda Ebɔbira, nsɛm dɛw dɛ Asɔr no atɔ Kirtland Temple, n’ekyir ntsɛmara no, President Russell M. Nelson too nsa frɛɛ hɛn dɛ yensũa Kirtland Temple no tu hyɛ Nyame nsa mpaabɔ no, a wɔakyerɛɛw no wɔ Nkyerɛkyerɛ na Ahyɛmudzi no ɔfã 109 no. President Nelson kãa dɛ, tu hyɛ Nyame nsa mpaabɔ no yɛ adzesũadze a ɔfa mbrɛ temple no ma emi na ɔwo tum a yɛdze behyia abrabɔ mu ɔhaw wɔ nda a odzi ekyir yinom mu.”

Minyim pefee dɛ w’adzesũa fa ɔfã 109 no maa nhumu a ohyiraa wo. Ewimbir yi, mekyɛ ndzɛmba kakra a musũae ber a midzii hɛn nkɔnkyɛnyi ne nsato do no. M’adzesũa no maa minyaa asomdwee dɛ Ewuradze yɛ mbɔbɔrhufo na hɛn Ɔsor Egya no nkwagye ho nhyehyɛɛ no nokwar mu ara yɛ ehumbɔbɔr ho nhyehyɛɛ.

Dɛ mbrɛ bia hom nyim no, “wɔhyɛ asɛmpasomafo afoforfo a wɔãfrɛ hɔn no nkuran dɛ wɔngye temple endowment no ntsɛmpanara dɛ mbrɛ ɔbɛyɛ yie no na wɔntaa nkɔ temple dɛ mbrɛ gyinabew horow bɛma ho kwan.” Wɔayɛ hɔn endowment ewie no, bia “wobotum so asom dɛ temple … edwumayɛfo ansaana wɔahyɛ hɔn asɛmpasomafo som ase.”

Mber a wodzi no wɔ temple ansaana wɔakɔ asɛmpasomafo ntsetsee asoɛ (MTC) no botum ayɛ nhyira nwanwa ama asɛmpasomafo afoforfo ber a wosũa temple ahyɛmudzi horow ho nsɛm ansaana wɔnye wiadze no akyɛ n’ahyɛmudzi horow ho nhyira no.

Naaso, murusũa ɔfã 109 no, musũae dɛ, temple mu no, Nyankopɔn dze tum hyɛ asɛmpasomafo afoforfo no—nokwar hɛn nyinara—wɔ kwan krɔnkrɔn, bi a ɔkã ho mu. Tu hyɛ Nyame nsa mpaabɔ no a wɔnam nyikyerɛ do dze mae no, Nkɔnhyɛnyi Joseph Smith bɔɔ mpaa dɛ “sɛ wo nkowaa befi wo fie mu efir edzi … dɛ wɔrekɛgye wo dzin ho dase a,” ama “nyimpa nyinara—nye “asaase do etsitsir” na “ehiafo na abɔbɔfo nyina, na [hɔn] a wɔhaw hɔn “akoma” ”aadwe.” Ɔbɔɔ mpaa dɛ “ama hɔn adwen bɔn no eefi akɔ sɛ wohu nokwar enyim no a, na wo nkorɔfo enya enyimpa wɔ obiara enyim; ama asaase ano nyina eehu dɛ hɛn, wo nkowaa, yɛatse wo ndze, na dɛ ɔwo na asoma hɛn.”

Iyi yɛ anohoba a ɔyɛ ahomka ma asɛmpasomafo afoforfo a wɔafrɛ hɔn—dɛ ɔbɛma adwen bɔn no “eefi akɔ wɔ nokwar enyim,” na “[wo]enya enyimpa wɔ obiara enyim,” [wɔama] wiadze ehu dɛ Ewuradze na Ɔasoma hɔn. Nokwar ara hɛn mu kor biara hia nhyira horow kor yinom ara. Ebɛn nhyira na ɔbɛyɛ dɛ akoma bɔgow ber a yɛnye hɛn fipamfo na edwumayɛfo afɛfo nya nkitahodzi. Tu hyɛ Nyame nsa mpaabɔ no nnkyerɛkyerɛ hɛn pɔkyee ara mbrɛ mber a yedzi no wɔ temple no besi bɔgow nkaafo hɔn akoma mu, naaso mowɔ gyedzi dɛ ɔnye mbrɛ mber wɔ Ewuradze fie si gow hɛnara hɛn akoma ber a otsim hɛn wɔ Jesus Christ na N’ehumbɔbɔr do no nam.

Ber a musũaa Kirtland tu hyɛ Nyame nsa mpaabɔ no, okenyaa me dɛ Joseph wɔɔw do, na osii do totɔe serɛɛ ehumbɔbɔr—maa Asɔrmba, maa Asɔr n’atamfo, maa ɔman ne baanodzifo, maa asaase do amnaman. Na, ɔnoara ankasa so, ɔtotɔe serɛɛ Ewuradze dɛ ɔnkaa no na onhu no dɔfo Emma na hɔn mba mbɔbɔr.

Ebɛn atsenkã na Joseph nyae ber a, dapɛn kor ekyir, Easter anapa, Ebɔbira 3, wɔ Kirtland Temple no, Agyenkwa no puee ɔno na Oliver Cowdery do na, dɛ mbrɛ wɔakyerɛɛw no wɔ Nkyerɛkyerɛ na Ahyɛmudzi no ɔfã 110 mu, kãa dɛ, “Maagye fi yi ato mu, na me dzin bɛda do, na mbɔbɔrhu mu na mibeyi moho akyerɛ mo nkorɔfo wɔ fi yi mu.” Ehumbɔbɔr anohoba yi bɛyɛ mfaso tsitsir ama Joseph. Na dɛ mbrɛ President Nelson kyerɛkyerɛɛ no mfeda Ebɔbira no, anohoba yi so “fa temple biara a woetu ahyɛ Nyame nsa ndɛ ho.”

Akwan horow pii wɔ hɔ a hɛn mu kor biara botum enya ehumbɔbɔr wɔ Ewuradze fie mu. Iyi ayɛ nokwar ofitsi ber a Ewuradze dzii kan hyɛɛ Israel mbra dɛ wonsi ehyiadzibuw na wɔmfa “mbɔbɔrhu egua” no nsi ne finimfin.’’ Temple mu no, yenya ehumbɔbɔr wɔ ahyɛmudzi horow a yɛyɛ no mu. Ahyɛmudzi horow no a enuma ahyɛmudzi kã ho no, kyekyer hɛn fam Egya na Ba no Hɔnho na ɔma hɛn kwan mbordo wɔ dza President Nelson akyerɛkyerɛ dɛ ɔyɛ “ɔdɔ soronko tsitsir na ehumbɔbɔr bi a … wɔfrɛ no hesed’’ wɔ Hebrew kasa mu.

Yenya ehumbɔbɔr wɔ kwan no dɛ wɔsɔw hɛn nye hɛn ebusua ebusua ano ma mfesantsen mu. Temple mu no, yɛba bɛtse ase pefeeyɛ kɛsenara mu dɛ Mbɔe no, Asehwe no, Agyenkwa no werdam afɔrbɔ, na hɛn ahom dɛ yɛbɛhɛn Ɔsor Egya n’enyim bio no—nokwar, nkwagye ho nhyehyɛɛ ne fã biara no—yɛ ehumbɔbɔr a ɔda edzi. Wobotum akã dɛ nkwagye ho nhyehyɛɛ no yɛ enyigye ho nhyehyɛɛ pɛpɛɛpɛ osiandɛ ɔyɛ “ehumbɔbɔr ho nhyehyɛɛ.”

M’enyi sɔ ahomka anohoba no wɔ ɔfã 110 mu dɛ ehumbɔbɔr mu na Ewuradze beyi Noho akyerɛ wɔ Ne temple horow mu. M’enyi so sɔ dza oyi kyerɛ fa mbrɛ Ewuradze besi beyi Noho akyerɛ ho wɔ ehumbɔbɔr mu mber biara a hɛn, tse dɛ Joseph no, totɔ serɛ ehumbɔbɔr.

Nna Joseph Smith n’ehumbɔbɔr ntotɔserɛ a ɔwɔ ɔfã 109 no nnyɛ mber a odzi kan a n’ehumbɔbɔr ntotɔserɛ kenyaan nyikyerɛ. Kwaa krɔnkrɔn mu no, Joseph kumabaa bɔɔ mpaa nnyɛ dɛ obohu Asɔr a ɔyɛ nokwar ara, mbom ɔkãa so dɛ “osũi frɛɛ Ewuradze dɛ obenya ehumbɔbɔr, osiandɛ nna obiara nnyi hɔ a obotum enya ehumbɔbɔr efi no hɔ.” Biribi ntsi, n’adzehu dɛ nna ohia ehumbɔbɔr a Ewuradze nko botum dze ama no boae buee ɔsor ntokura no. Mfe ebiasa ekyir no, Bɔfo Moroni yii noho kyerɛe, a odzi dza Joseph kãa dɛ ɔyɛ ne “mpaabɔ na ntotɔserɛ ma Otumfo Nyankopɔn ma ɔdze mo bɔn na mo mfom nyinara akyɛ me” n’ekyir no.

Nyikyerɛ ho nhwɛdo yi a odzi ehumbɔbɔr ntotɔserɛ ekyir no, yɛ dza yenyim wɔ kyerɛwsɛm mu. Enos tsee Ewuradze ne ndze nko wɔ no bɔnfakyɛ mpaa ekyir no. Ɔhen Lamoni n’egya ne nsakyeree no dze ne mpaabɔ hyɛɛ ase dɛ: “Mibegyaa mo bɔn nyina yɛ ama meehu wo.” Bia wɔnnkɛfa sũahu horow nwanwa kor noara dɛ iyinom ehyira hɛn, naaso hɔn a ɔtɔfabi a wodzi aper dɛ wɔbɛtse mpaabɔ nyiano no, wɔrohwehwɛ Ewuradze n’ehumbɔbɔr nye akwan horow dodow mu kor a tum wɔ mu dɛ ebɛtse Sunsum Krɔnkrɔn ne dase nkã.

Wɔakyerɛkyerɛ fapem a ɔsɛ ahomka mu ara wɔ Moroni 10:3–5. Yɛtaa bɔ nyiyimu yinom tɔw dze kyerɛkyerɛ dɛ, ɔnam nokwar mpaabɔ do no, yebotum esũa sɛ Mormon Nwoma no yɛ nokwar a. Naaso tɔwbɔ yi botum ebu enyi egu ehumbɔbɔr no dwuma a ohia do. Hom ntsie mbrɛ Moroni si hyɛ n’afotu ase: “Hwɛ, mutu hom fo, dɛ sɛ hom kenkan dɛm ndzɛmba yi, … hom nkaa mbrɛ Ewuradze n’ehumbɔbɔr a ɔwɔ ma adasamba no tse, fitsi ber a wɔbɔɔ Adam mpo dze besi ber a hom nsa bɛkã dɛm ndzɛmba yi na hom adwendwen ho wɔ hom akoma mu.”

Moroni hyɛ hɛn dɛ mma yɛnnkenkan ndzɛmba yinom nko—nkyerɛwɛɛ no a nna ɔrobɔsɔw ano no—mbom yɛndwendwen ho so dza Mormon Nwoma no yi kyerɛ fa ho wɔ hɛn akoma mu “mbrɛ Ewuradze n’ehumbɔbɔr a ɔwɔ adasamba do no tse.” Yɛrodwendwen Ewuradze n’ehumbɔbɔr ho na osiesie hɛn ma “[ye]bisa Nyankopɔn, Onnyiewiei Egya no wɔ Christ ne dzin mu, dɛ sɛ dɛm ndzɛmba yinom nnyɛ nokwar a.”

Ber a yɛdwendwen Mormon Nwoma ho no, yebotum ebisa dɛ: Ana ɔyɛ nokwar ankasa, dɛ mbrɛ Alma kyerɛkyerɛɛ no, dɛ Nyankopɔn n’ehumbɔbɔr ho nhyehyɛɛ no ma nyimpa biara a ɔatsena asaase yi do da no awerɛhyɛmu dɛ ɔbɔsoɛr efi owu mu na ndzɛmba nyina “bɛsan ananmu esisi ne sibew … ma edzi mu’’ Ana Amulek yɛ nokwafo—Agyenkwa n’ehumbɔbɔr no botum apata pɛrpɛrdzi n’ebisadze wenwen ankasa nyinara a nkyɛ wɔbɛhyɛ hɛn ma yeetua na mbom ɔdze ahotɔ abasa “[etwa hɛnho] ehyia’’?

Ana ɔyɛ nokwar, dɛ mbrɛ Alma gyee dase, dɛ Christ ennhu hɛn bɔn ho amandze nko mbom hɛn “bɔn na haw’’ so amandze ama Oetum “ehu … mbrɛ obesi aboa no nkorɔfo dɛ mbrɛ hɔn mberɛwyɛ tse’’? Ana ɔyɛ nokwar dɛ Ewuradze yɛ mbɔbɔrhufo ankasa dodow, dɛ mbrɛ Ɔhen Benjamin kyerɛkyerɛɛ dɛ, dɛ akyɛdze kwa no, Ɔbɔɔ “hɔn a … wowui a nna wonnyim Nyankopɔn ne pɛ fa hɔnho no, anaa hɔn a wɔyɛɛ bɔn a nna wonnyim no’’?

Ana ɔyɛ nokwar, dɛ mbrɛ Lehi kãa dɛ “Adam hwee ase ama adasa aabɛtesna ase, ama woeenyas enyigye’’? Na ɔyɛ nokwar ankasa, dɛ mbrɛ Abinadi gyee ho dase, a ɔserɛɛ kãa Isaiah, dɛ Jesus Christ “wopiraa no wɔ hɛn mbrato ntsi, woposoow no wɔ hɛn emumuyɛ ntsi; wɔdze hɛn asomdwee ho ntsẽa too no do; na ne mbaa ano na wɔdze asa hɛn yarba’’?

Yɛbɔ no tɔw a, ana Egya ne nhyehyɛɛ no dɛ mbrɛ wɔakyerɛkyerɛɛ wɔ Mormon Nwoma mu no yɛ mbɔbɔhu ankasa? Megye dase dɛ ɔyɛ nokwar na dɛ asomdwee na enyidado ehumbɔbɔr nkyerɛkyerɛ a ɔwɔ Mormon Nwoma mu no yɛ nokwar.

Meda ho susu dɛ bia binom ridzi aper, a hom nokwar akenkan na mpaabɔ nyina ekyir no, dɛ wobohu Moroni n’anohoba dɛ Ɔsor Egya “ɔnam Sunsum Krɔnkrɔn no tum do bɛda nokwar a ɔwɔ mu no edzi akyerɛ hom.’’ Minyim aperdzi yi osiandɛ metsee ne nkã, mfe pii a abɛsen kɔ no mber a mara mo Mormon Nwoma n’ahyɛse akenkan ber no ɔamma me mpaabɔ ne nyiano pefee hɔ noara.

Sɛ hom ridzi aper a, hom mma monto nsa mfrɛ hom dɛ hom ndzi Moroni n’afotu do dɛ hom ndwenden akwan horow a Mormon Nwoma no kyerɛkyerɛ “mbrɛ Ewuradze esi akyerɛ mbɔbɔrhu [ama[ adasamba’’? Mara mo sũahu do no, mowɔ enyidado dɛ sɛ hom yɛ a, Sunsum Krɔnkrɔn n’asomdwee no botum ahɛn hom akoma mu, na hom hu, agye edzi, na hom atse nkã dɛ Mormon Nwoma na ehumbɔbɔr ho nhyehyɛɛ a ɔkyerɛkyerɛ no yɛ nokwar.

Mekyerɛ m’enyisɔ ma Egya no n’ehumbɔbɔr ho nhyehyɛɛ kɛse na Agyenkwa no ne pɛ dɛ ɔbɛma wɔaba mu no. Minyim dɛ obeyi Noho akyerɛ wɔ ehumbɔbɔr mu wɔ Ne temple krɔnkrɔn mu na wɔ hɛn abrabɔ n’afã biara mu sɛ yɛbɔhwehwɛ No a. Jesus Christ ne dzin mu, amen.