Ndzɛmba Nyina Ahyɛananmu Mber

Sũahu nwanwa horow na osisii esiado esiado na ɔdze kowiee Jesus Christ N’Asɔr a ɔwɔ hɔ ma Nda a Odzi Ekyir Ahotseweefo ne nkyekyeree wɔ mbra kwan do. Dza odzi sũahu horow yinom ho kan no sii mfe 10 ana wɔ New York etsifi afamu.

Afe 1820 fefɛw ber mu akɔkowaba a wɔfrɛ no Joseph Smith kɔr ndua kwaa a ɔbɛn ne fie dɛ ɔrokɔbɔ mpaa. Nna ɔwɔ nsɛmbisa a ɔfa ne kra no nkwagye ho, na ɔpɛɛ dɛ obohu “asɔr horow no no mu dza oye, ama [o]eetum eehu dza [ɔ]nkɔdɔm.” Joseph nyaa awerɛhyɛmu dɛ Nyankopɔn beyi ne mpaabɔ no ano na Ɔakyerɛ no kwan.

Meserɛ hom nhyɛ no nsew dɛ Joseph ammbɔ mpaa ara dɛ ɔrohwehwɛ dza oye. Mbom, ɔbɔɔ mpaa dɛ obohu dza oye ama oeetum aayɛ dza oye. Joseph dze gyedzi bisaa na nna oesi nkitsi dɛ ɔbɛyɛ dza mbuae a obenya no bɛkyerɛ.

“Ne mpaabɔ ho [mbuae] mu no, Nyankopɔn Egya no na Ne Ba Jesus Christ, puee Joseph Smith do na ɔhyɛɛ ‘ndzɛmba nyina ahyɛananmu” (Ndwuma 3:21) no ase dɛ mbrɛ woedzi kan akã wɔ Bible mu no. Enyido-adzehu yi mu no, osũaa dɛ asɔpɔkan Asomafo no hɔn wu ekyir no, Christ N’Ahyɛmu Fofor Asɔr no yewee fii wiadze.” Joseph Smith bɛyɛ edwindadze wɔ Agyenkwa ne tsetse Asɔr no ne nkyerɛkyerɛ, no tumdzi, na ahyɛmudzi na ayɛdze horow no a wɔdze resan aba bio.

Joseph sii no pi dɛ: “Muhun Nyimpa-su beenu bi a hɔn hyerɛnee na hɔn enyimnyam no murunntum nnkã ho asɛm, dɛ wɔsensɛn mo sor wɔ wimu. Hɔn mu kor bɔɔ me dzin na ɔkasaa kyerɛɛ me, ɔtseen ne nsa wɔ kor no do—Oyi nye mo Dɔba no. Tsie No!”

Ɔnam nyikyerɛ yi do na sũahu krɔnkrɔn horow a odzii do no, Joseph Smith baa bɛtse ase dɛ Nyankopɔn na Jesus Christ nyim no ankasa, no onnyiewiei nkwagye ho hia Hɔn na wɔwɔ dwuma ma no a obedzi. Osũaa adzesuadze horow so a ohia tsitsir a ɔfa Nyame Tsir no su, suban na emudzi—na dɛ Egya na Ɔba no wɔyɛ Abɔdze soronko. Jesus Christ yɛ Egya Ne Ba ankasa wɔ sunsum mu na honam mu.

Joseph Smith paa mu kãa dɛ Ɔsor Egya na Jesus Christ yɛ nyimpadua abɔdze. Ɔkãa dɛ, “Egya no wɔ nyimpadua a ɔyɛ honam na mbiew dɛ mbrɛ nyimpa wɔ, Ɔba no so dɛmara, mbom Sunsum Krɔnkrɔn no nnyi nyimpadua a ɔyɛ honam na mbiew, mbom ɔyɛ Sunsum nyimpa-su.”

Megye dase dɛ Egya na Ɔba no Hɔn Joseph Smith nsera no nye adze kɛse a osii a ɔhyɛɛ “ndzɛmba nyinara a nkɔnhyɛfo krɔnkrɔn nyina dze hɔn ano kãe fi wiadze ahyɛse ne nsanananmu a ɔbɛba” no ase.

Dza otsia ebien wɔ sũahu nwanwa horow a osisii esiado esiado na ɔdze kowiee Agyenkwa no N’Asɔr a wɔdze asananamu aba no ne nkyekyeree wɔ mbra kwan do no nye Mormon Nwoma ne nkyerɛasee na orupue guado.

“Wɔmaa Joseph Smith Nyame akyɛdze na tum dɛ ɔmfa nkyerɛ tsetse kyerɛwee ase: Mormon Nwoma no—Jesus Christ n’Ahyɛmu Kor so. … Jesus Christ Nankasa No somdwuma wɔ nkorɔfo a wɔwɔ Anee Wiadze Afamu wɔ No Wusoɛr ekyir ara no, no ho nsɛm kã nwoma krɔnkrɔn yi ho. [Mormon Nwoma no] kyerɛkyerɛ hɛn abrabɔ no botae na ɔkyerɛkyerɛ Christ ne nkyerɛkyerɛ mu a, ɔyɛ dɛm botae no ne fapem. Dɛ ɔyɛ kyerɛwsɛm a ɔnye Bible no nam dɛ adamfo no, Mormon Nwoma no gye dase dɛ adasa nyina yɛ Egya a ɔwɔ Sor dɔfo ne mbabanyin na ne mbabaa, dɛ Ɔwɔ nhyehyɛɛ krɔnkrɔn ma hɛn abrabɔ, na dɛ Ne Ba, Jesus Christ, kasa ndɛ tse dɛ tsetse ber so mu no.”

Dɛ yɛyɛ Agyenkwa no N’Asɔr no a wɔdze asan ananmu aba asɔrmba no, “Yɛgye Bible no dzi dɛ ɔyɛ Nyame n’asɛm wɔ aber a wɔakyerɛ ase yie; yɛgye Mormon Nwoma no so dzi dɛ ɔyɛ Nyame n’asɛm.” Mormon Nwoma no yɛ Jesus Christ n’ahyɛmu kor so, osi Bible no nokwaryɛ no pi, na nokwar nsɛm a ɔda ndzɛmba edzi pefee na ɔsom bo a ɔyewee fii Bible no mu no ɔdze asan ananmu aba.

Jesus Christ N’Asɔr a ɔwɔ hɔ Ma Nda a Odzi Ekyir Ahotseweefo no kyerɛkyerɛ dɛ asɔpɔkan Asɔr no a Agyenkwa no kyekyeree no, a ɔwɔ ɔsor tum, nkyerɛkyerɛ, na ahyɛmudzi horow no, ɔyewee fii wiadze. Dɛ mbrɛ ɔkã ndzɛmba nyina ho nsanananmu wɔ nda a odzi ekyir yinom mu a wɔhyɛɛ ho nkɔm no, tsetse nkɔnhyɛfo na asomafo ankasa dze asɔfodzi tumdzi no hyɛɛ Joseph Smith na wɔdze asɔfodzi nsafee horow no maa no. Iyi nye dza otsĩa ebiasa wɔ sũahu nwanwa horow a osisii esiado esiado na ɔdze kowiee Agyenkwa no N’Asɔr a wɔdze asananamu aba no ne nkyekyeree wɔ mbra kwan do no.

Asɔfodzi tumdzi ma Nyame no somfo kwan ma “wogyina ma [No] na wɔyɛ adze wɔ Ne dzin mu.” Asɔfodzi nsaafee nye tumdzi a wɔdze ma kwankyerɛ wɔ asɔfodzi dwumadzi ho, wɔ Nyankopɔn ne mba hɔn afã.”

Egya na Ɔba Hɔn kwankyerɛ ase no, John Onumanyi a ɔasoɛr no dze tumdzi a wɔdze yɛ nsumuhyɛ enuma ma bɔnfakyɛ no saan ananmu baa afe 1829. Dɛm afe noara mu no, aspɔkan Asomafo duebien mu baasa—Peter, James, na John—dze ɔsomafoyɛ na asɔfodzi tumdzi na nsaafee binom kã ho san ananmu bae.

Mfe esia ekyir a wɔkyekyeer Asɔr no wɔ mbra kwan do no, wɔ Kirtland Temple mu no, Moses, Elias, na Elijah maa Joseph Smith tumdzi binom kãa ho a ohia ma wɔdze bɛyɛ Nyankopɔn n’edwuma wɔ nda a odzi ekyir yinom mu.

Moses maa nsaafee a wɔdze boa Israel ano.

Elias dze Abraham n’asɛmpa ne mberano, a Abraham ahyɛmudzi nsanananmu kã ho mae.

Elijah dze nsɔwano tum saafee no mae, a ɔma tumdzi ho kwan ma wɔyɛ ayɛdze horow wɔ asaase do ma ɔkyekyer daapem, tse dɛ wɔrekã ebusua ebusua abɔ mu wɔ onnyiewiei nkitahodzi a ɔtra owu

Ber a Joseph Smith rekyerɛ Mormon Nwoma ase no, onyaa nyikyerɛ a ɔkyerɛ dɛ Jesus Christ N’Asɔr no wɔbɛsan akyekyer. Mbom Ewuradze hyɛɛ Joseph dɛ mma ɔnnhyehyɛ N’Asɔr no amonmu ara. Mbom, “[ɔ]nam nkɔnhyɛ na nyikyerɛ sunsum do” Ewuradze yii kyerɛɛ Joseph “da kor a … wɔbɛkyekyer N’Asɔr bio wɔ asaase do.”

Wɔkyekyeer Asɔr no wɔ esiado kwan pa do wɔ asɔfodzi nsanananmu na Mormon Nwoma ne ntsintsimii ekyir no. Nsa tumii kãa Mormon Nwoma a odzi kan a wotsintsimii no wɔ Ebɔw 26, 1830, na Asɔr no wɔkyekyeer no mbra kwan do wɔ Ebɔbira 6.

Jesus Christ N’Asɔr a ɔwɔ hɔ ma Nda a Odzi Ekyir Ahotseweefo no … yɛ Christ N’Ahyɛmu Fofor Asɔr no a wɔdze asan ananmu aba no. Asɔr no tsim no kotowdo-bo tsitsir, Jesus Christ N’emudzi abraba do, na No Werdambɔ a ɔmmbɔadze da na No Wusoɛr ampaara no do. Jesus Christ asan afrɛ Asomafo bio na Ɔama hɔn asɔfodzi tumdzi. Ɔto nsa frɛ hɛn nyina dɛ yɛmbra Ne nkyɛn na N’Asɔr mu, mbɛgye Sunsum Krɔnkrɔn, nkwagye ayɛdze horow, na yenya enyigye a ɔmmbɔadze da”

Egya na Ɔba no a wopuei Joseph Smith do, Mormon Nwoma no ne nkyerɛasee na orupue guado, na asɔfodzi tumdzi na ne nsaafee ne nsanananmu yɛ dza ohia tsitsir a ɔsɛ dɛ ɔba ansaana wɔakyekyer Ewuradze N’Asɔr a wɔdze asan anamu aba no, ndɛ da yi mfe 195 a abɛsen.

Ahyɛmu Dadaw mu no, nkɔnhyɛnyi Daniel kyerɛɛ adaaso bi ɔfa ɔbo bi a wobotwa wɔ bepɔw mu a wɔnnkɛfa nsa etwa na ɔbɛhyɛ wiadze nyina mã. Afe kor ekyir a wɔkyekyeer Asɔr no, Ewuradze hyɛɛ Joseph Smith dɛ Nyankopɔn n’ahenman ne nsaafee no wɔdze asan “ama nyimpa wɔ asaase do” na “ [Jesus Christ] asɛmpa no bepirepirew akɔ asaase ano nyina, tse dɛ ɔbo bi a wɔnndze nsa twae fii bepɔw mu no.

Megye dase: Ewuradze rehyɛ N’anohoba mã. Agyenkwa no N’Asɔr a wɔdze asananamu aba no wogu do rekyekyer no wiadze nyina mu na ɔyɛ edwindadze a Nyame bodua do dze “bɛkã ndzɛmba nyina abɔ mu kor wɔ Christ mu, ɔsorsor ndzɛmba o, asaase do ndzɛmba o, mese, wɔ no mu.”

Ewuradze ne nda a odzi ekyir edwuma no “yɛ adze a Nyame no nkorɔfo a wɔwɔ ber biara mu no hɔn enyi agye ho; ɔyɛ asɛngyinado a nkɔnhyɛfo, asɔfo na ahemfo dze enyigye adwen ho; wɔdze dɛwdzi ahwɛ hɛn nda a yɛtse mu yi kwan, na ɔsor enyigye ekenyan hɔn no, wɔatow hɛn nda yi ho ndwom na wɔakyerɛw ho nsɛm na wɔahyɛ ho nkɔm.”

Asɛmpa mberano nyina mu abɔso na odzi ewiei yi mu no, “nkabɔmu a odzi mu, nye mberano nyina, nye nsaafee, nye etum, nye enyimnyam nyina ne nkabɔmu no aaba, na wɔbɛda no edzi fitsi Adam n’aber do dze ebesi aber yi mu. Na nnyɛ iyi nkõ, mbom ndzɛmba a wɔnndaa no edzi da fi wiadze ne fapem … wɔbɛda no edzi … wɔ dɛm mberano ne mãhyɛ yi mu.”

Nkɔnhyɛnyi Joseph Smith kyerɛkyerɛɛ mu bi kãa ho dɛ, “Ayɛdze horow na ndwuma horow nyina a Asɔfodzi no ahwehwɛ pɛn, wɔ Otumfo no no kwankyerɛ na mbrasɛm mu wɔ berano biara mu no, ne nyina nsa bɛkã no wɔ berano a odzi ewiei no mu, … ɔdze nsanananmu a nkɔnhyɛfo krɔnkrɔn nyina dze hɔn ano kãe no bɛba.”

Mabɔ mbɔdzen dɛ mubotwutwa ahyɛse ndzɛmba horow a ho hia tsitsir na ɔyɛ enyimnyam “asɛmpa” a obiara ɔwɔ bebiara wɔ wiadze yi mu botum enya da no do sin—asɛm no dɛ Jesus Christ dze N’asɛmpa na Asɔr no asan ananmu aba wɔ nda a odzi ekyir yi mu.

Moto nsa frɛ obiara dɛ onsũa asɛm yi ho nsɛm na ɔnsɔ nhwɛ. Mobɔ hom anohoba dɛ ankorankor “a mpaabɔ mu ara wosũa Nsanananmu ho asɛm na wɔdze gyedzi dzi dwuma no, [wobodua Sunsum Krɔnkrɔn no tum do] ehyira hɔn ma woenya hɔnankasa hɔn dasegye wɔ no krɔnkrɔnyɛ na no botae ho, dɛ obesiesie wiadze no ama hɛn Ewuradze na hɛn Agyenkwa, Jesus Christ ne Mbae a Otsĩa Ebien a wɔabɔ ho anohoba no.’’ Ber a hom bɔ mpaa enyiberdo a hom dze enyidahɔ hwɛ kwan dɛ hom bɛgye na hom dze mbuae a ofi Nyame hɔ edzi dwuma no, hom tum dɛ hom bohu na hom edzi dase krɔnkrɔn no do bɛyɛ kɛse.

Megye dase dɛ Nyankopɔn Onnyiewiei Egya no nye hɛn Egya. Megye dase na meyɛ dasefo ma hom dɛ Jesus Christ nye Egya no No Dɔ Ba a Wɔwoo no Kortonoo wɔ honam mu. Ɔyɛ hɛn Agyenkwa na hɛn Pomfo.

Na megye dase enyigye mu ara dɛ Egya no na Ɔba no puei banyimba Joseph Smith do, dɛm ntsi wɔhyɛɛ Agyenkwa n’asɛmpa wɔ nda a odzi ekyir yi mu ne Nsanananmu no ase. Mormon Nwoma no yɛ Jesus Christ n’ahyɛmu kor so na Nyame n’asɛm wɔ mu. Asɔfodzi tumdzi a wɔdze gyina hɔ ma Agyenkwa no na wodzi dwuma wɔ Ne dzin mu aba asaase do bio. Na Jesus Christ N’Asɔr a ɔwɔ hɔ ma Nda a Odzi Ekyir Ahotseweefo no nye Christ N’Ahyɛmu Fofor Asɔr no a wɔdze asan ananmu aba no. Megye mo nokwar dase dɛ ndzɛmba yinom nyina yɛ nokwar wɔ Jesus Christ ne dzin krɔnkrɔn no mu, amen.