Hɛn Ɔsor Kwankyerɛ Nhyehyɛɛ
Ber a yetsim hɛn abrabɔ wɔ Jesus Christ do no, yebohu hɛn fie kwan, a yɛrosɔw ekesi ewiei na yeridzi dɛw ekesi ewiei.
Jesus Christ sesaa m’abrabɔ ber a wonumaa me a nna medzi mfe 26 wɔ Frutillar, Chile. Ber no, m’edwuma dze me twaa Chile Patagonia fɛɛfɛw no no po, esutsen, na baka horow no. M’enuma ekyir no, muhun m’edwuma na m’abrabɔ wɔ kwan fofor do, muhun ampa ara dɛ “ndzɛmba nyina so kyerɛ dɛ Nyame wɔ hɔ.”
Ɔdomankoma abɔdze mu no, wɔwoo salmon wɔ esutsen ne fibea. Hɔn abrabɔ ne fã bi no, ohia dɛ wɔbor sian esutsen no kodur po mu, bea a wonya edziban pa na tsebea a ohia ma hɔn mpontu.
Mbom, po no so yɛ mbusu bea, bea a mbowa abɔyafo suma na enufo dze nkɔba hyɛnhyɛn a ɔsɛ edziban naaso ɔnnyɛ papa per dɛ wɔdze bɛkye salmon no. Sɛ salmon tum sɔw ehunahuna yinom a, wɔbɛyɛ krado dɛ wɔdze hɔn kwankyerɛ nhyehyɛɛ a ɔyɛ ndam no bɛsan akɔ bea noara a wɔwoo hɔn no, ehyia ɔhaw afofor nye dza wonyim dadaw no. Abɔdze nyansapɛfo esũa hɔn kwantu suban mfe pii na woehu dɛ wɔdze kwankyerɛdze bi a ɔtse dɛ GPS, dzi dwuma ma ɔkyerɛ hɔn kwan kɔ bea no a wɔrokɔ a mfom biara nnyi ho.
Hɛn nyina botum asan dakor akɔ sor fie no a yefi bae no. Na tse dɛ salmon, yɛwɔ hɛnara hɛn kwankyerɛdze—anaa Christ ne Kan, ma ɔaweɔn hɛn ekodur hɔ. “Jesus kyerɛkyerɛɛ N’esũafo dɛ, “Emi nye ɔkwan no, nye nokwar no, nye nkwa no: obi mmba Egya no hɔ, gyedɛ ɔnam mo do.”
Ber a yetsim hɛn abrabɔ wɔ Jesus Christ do no, yebohu hɛn fie kwan, a yɛrosɔw kesi ewiei na yeridzi dɛw kesi ewiei. President Russell M. Nelson kyerɛkyerɛɛ dɛ, “hɛn abrabɔ mu enyigye a yɛtse no mmfa gyinabew horow a yɛwɔ mu ho, mbom ɔfa adzebiara a hɛn abrabɔ tsim do ho.”
Hɛn Awosu Krɔnkrɔn na Nkrabea
Ebusua dawurbɔ mu no, yɛkenkan dɛ “[hɛn mu kor] biara yɛ sor awofo Hɔn sunsum dɔba banyin anaa dɔba ɔbaa, na dɛm ntsi, kor biara wɔ Nyamesu na nkrabea. … “Wɔ abrabɔ ansaana nyimpa reba asaase gyinabew mu no, nna sunsum mbabanyin na mbabaa nyim na wɔsoom Nyankopɔn dɛ hɔn Onnyiewiei Egya, na wɔgyee Ne nhyehyɛɛ a Ne mba botum edua do enya nyimpadua na woenya asaase do sũahu dze enya kan kɔ wɔ emudzi mu, na ewiei no, obiara enya no krɔnkrɔn nkrabea dɛ onnyiewiei adzedzinyi no, too mu.”
Ansaana wɔrobɔwoo No wɔ ɔnnkyebo abrabɔ mu no, Jesus Christ puei Moses do na ogyinaa Egya no ananmu nye no kasaa. Ɔkãa kyerɛɛ Moses dɛ Ɔwɔ edwuma ma no. Nhyiamu yi mu no, Ewuradze frɛɛ no “me babanyin” mpɛn pii.
Sũahu yi ekyir no, Satan bae bɔsɔɔ no hwɛe “rese dɛ, “Moses, nyimpa, ba som me!”
Moses yii nsɔhwɛ no ano ber a ɔkaa n’awosu krɔnkrɔn, see dɛ, “Woana nye wo? Na hwɛ, meyɛ Nyame ne ba.” Nokwar no mãa Moses fahodzi fii ɔtamfo no ne ɔsatu ho.
Enuanom na nkyerɛbaa, ɔnnkyebo abrabɔ no nkɔba wɔ hɔ ampaara. Wɔtaa yɛ dza ɔbɔtwetwe wo ma ayɛ biribi, mbom hɔn botae yɛ kor: dɛ wɔbɔtwe hɛn efi nkwa esu kwan no a ɔtsen kɔ Egya no hɔ na onnyiewiei nkwa.
Minyim mbrɛ ɔnnkyebo abrabɔ no nkɔba yi botum ayɛ ankasa. Kwesida bi, dɛ meyɛ asɔrba fofor no, nna merekyerɛ asɔfodzi adzesũa bi adze na nkɔmbɔ twetwe a ɔyɛ atseetsee kakra maa no mu do. Meperee wie adzesũadze no. Mobo fuwii na minyaa atsenkã dɛ wɔafa me afõ. Mannkasa no, mupuei, a adwen no dɛ mennkɛsan aba asɔr mber kakra no, hyɛ me tsir mu.
Mber yi ara mu no, obi a okita asɔfodzi tumdzi a asɛm yi hiaa no no gyinaa m’enyim. Ɔdɔ mu ara, ɔtoo nsa frɛ me dɛ mintsim wɔ Christ do na nnyɛ asɛm a yenya ho sũahu wɔ adzesũabea hɔ no. Morohwɛ ekyir wɔ sũahu a menye no nyae yi, ɔnye me kyɛɛ dɛ ɔtsee ndze bi reka kyerɛ no, “Ka no do; no ho hia me.”
M’anyɛnkofo adɔfo, hɛn nyina ho hia ma No. President Nelson kyerɛkyerɛɛ dɛ “osian hɛn ahyɛmu a yɛnye Nyame edzi ntsi, Ɔnnkɛberɛ dabiarada wɔ No mbɔdzembɔ mu dɛ Ɔbɔboa hɛn, na N’ehumbɔbɔr abotar a Ɔwɔ ma hɛn no nnkɛpa dabiarada.” Hɛn awosu krɔnkrɔn na ahyɛmudzi nkitahodzi a yɛnye Nyame wɔ no ma hɛn ɔsor mboa ho ndzinoa.
Edziban Pa Ho Hia a Ohia
Dɛ mbrɛ salmon hia edziban pa wɔ po mu enyin no, dɛmara so na ohia dɛ yedzi sunsum mu edziban pa ama yeekwetsir sunsum mu owu na yarba. Mpaabɔ, kyerɛwsɛm, temple, na hɛn Kwesida nhyaimu a yɛtaa kɔ no hia wɔ hɛn sunsum mu edziban ma no.
Ɔberɛfɛw 1956 mu no, Ricardo Garcia hɛɛn enuma esu no mu wɔ Chile, a ɔbɛyɛɛ Asɔrba a odzi kan wɔ me man Chile mu. Ɔka dakor pɛ ana oruwu no, ɔpaa mu kãa wɔ n’ebusua na ayɛnkofo enyim dɛ, “Mfe pii a abasen kɔ no asɛmpasomafo too nsa frɛɛ no dɛ ɔno na n’ebusua enyi ngye. Meyɛ ɔbarimba a n’enyiwa agye. Hom nkã kyerɛ obiara a ɔwɔ Chile dɛ asɛmpa no yɛ enyigye.”
Onyaa Jesus Christ n’asɛmpa mu edziban pa yie no, Ricardo tuu n’abrabɔ nyina sii hɔ ma Nyame na ne fipamfo som wɔ ɔdɔ mu. N’osuanyiyɛ fasusu ehyira mbasantsen pii, a mekã ho. Nkɔnhyɛnyi Joseph Smith kyerɛkyerɛɛ dɛ “nyimpa a Nyame ho dɔ ahyɛ no mã no, nnyɛ n’ebusua nko na ɔsɔ n’enyi dɛ ɔboa hɔn, mbom okyin wiadze mu nyina, dze ahoɔhar kɔboa adasamba nyina”
Nsanee kɔ Hɛn Ɔsor Fie.
Ɔpɛ dɛ yɛbɛsan akɔ hɛn ɔsor fie wɔ hɛn mu kor biara no mu kɔ bun mu, na Jesus Christ nye hɛn ɔsor kwankyerɛ nhyehyɛɛ. Ɔno nye kwan no. No werdam afɔrbɔ ma ɔyɛ yie dɛ yɛnye Nyame bɛyɛ ahyɛmudzi krɔnkrɔn horow. Prɛko pɛr a yɛyɛ ahyɛmudzi horow no, aber nyina yebohu dɛ yɛrobor tsia nsu no kwankyerɛ no. Mbusu, abawgura, nsɔhwɛ, na amandzehu bɔsɔ hɛn gyedzi na sunsum mu ahoɔdzen ahwɛ. Serɛ mboa. Jesus Christ tse ase na daa Ɔpɛ papaapa dɛ Ɔnye hɛn bɔsoa hɛn adzesoa.
Kae dɛ Ɔyɛ nyia wonyim no dɛ “ɔyɛ, awerɛhow nyimpa, a yaw abra no.” Agyenkwa no kyerɛkyerɛe dɛ, “Wiadze mu dze, hom wɔ ahohia: naaso hom nhyɛ dzen; medzi wiadze do konyim.” No werdam afɔrbɔ ma hɛn bɔnfakyɛ, kesi dɛ Ɔnnkaa no bio.
Bia hɛn werɛ nnkefir hɛn bɔn dɛ ɔkã hɛn ɔnnkyebo adzesũa ho, ntsi yɛbɛkaa dɛ yɛnnkɛyɛ no bio. Mbom, yɛbɛkaa No ber a yedzi sacrament wɔ asɔr Kwesida biara. Ayɛdze yi yɛ ehiadze wɔ asɔryɛ na sunsum mu mpontu mu. Dɛwdzi ba sɛ yɛtse ase dɛ iyi nnyɛ da biara kwa a. “Ahomgyeda no wɔyɛɛ maa nyimpa,” a botae no nye dɛ ɔbɛma hɛn ahomgye efi wiadze ho na wɔayɛ hɛn nyimpadua na sunsum fofor.
Yɛsan so kaa No sɛ yɛkɔ temple a—Ewuradze ne fie no. Temple ma hɛn nyimdzee kɔ bun mu fa Jesus Christ ho dɛ ɔyɛ ahyɛmudzi a ogya hɛn kɔ onnyiewiei nkwa, “akyɛdze a ɔsõ … kyɛn Nyame n’akyɛdze nyina ne tsitsir.”
Temple nkɔree ama me awerɛkyekyer na enyidado kɛse fa hɛn onnyiewiei nkrabea ho. Menye nkorɔfo enya ɔsor nkitahodzi horow sũahu wɔ ntwamutam n’afã ebien nyina. Mehu ayarsa nwanwa wɔ me mbofra nkakramba hɔn abrabɔ mu, hɔn mu beenu a wɔwɔ yarba horow a enyiwa nnhu a ohia dɛ daa daa wɔbɔhwɛ hɔn nkwa da yi mu nyina.
Hɛn ebusua dzi dɛw ber a yɛkyɛ enyigye nhyehyɛɛ no ho asɛm. Me mba enyim hyerɛn sɛ wɔtse dɛ ndaase nka Jesus Christ, hɔn “akotorka na amandzehu no ɔnnkɛkyɛr” Yɛdɔ hɛn mba kɔ bun mu, na yenyim dɛ dabi, dɛ mbrɛ President Jeffrey R. Holland kyerɛkyerɛe dɛ, “wobegyina hɛn enyim wɔ enyimnyam kɛse, fɛw a ɔyɛ nwanwa, na honandua na adwen mu emudzi mapã mu.” Hɛn ahyɛmudzi horow dze hɛn bɛn Nyame kesi dɛ ɔma dza ɔnnyɛ yie no yɛ yie, dze kan na asomdwee hyɛ sum na ekyinge kwan biara mã.
Ndaase nka Jesus Christ, enyidado na siantsir horow mapã wɔ hɔ dɛ yɛbɔkɔ do yɛadɔ, yɛabɔ mpaa, na yɛaboa hɔn a yɛdwen hɔnho no.
Minyim dɛ Ɔtse ase. Onyim hɛn na Ɔdɔ hɛn. Ɔno nye kwan no, nokwar no, na wiadze nkwa no.
Moto nsa frɛ hɛn nyinara ndɛ dɛ yentsim hɛn abrabɔ wɔ Jesus Christ na Ne nkyerɛkyerɛ no do. Yɛreyɛ dɛm no bɔboa hɛn ma yekwetsir nsɔhwɛ, mfom, na akorankor tsebea mu ɔhaw no nkɔba ahorow no. Yebegyina tse dɛ temple—krɔnkrɔn, na otsim, hɔ daa. Yɛbɔsɔw ehum no, na yebodur fie, ber a yɛrosɔw kesi ewiei na yeridzi dɛw kesi ewiei. Jesus Christ ne dzin mu, amen.