Hwɛ Yie wɔ Nsɔhwɛ no a Otsĩa Ebien ho
Mma nnsuma mmfi hɔn a wɔbɔdɔ na wɔaboa wo ho; mbom tu mbrika kɔ hɔn nkyɛn.
Mfe kakra a wɔabasen kɔ no, mber a midzii mfe 12 no, wɔtoo nsa frɛɛ me ne dza odzi kan, dɛ monkɔ me Aaron Asɔfodzi quorum asesebɔ a wɔda ma adze kye no. Nna matweɔn nsato yi akyɛr osiandɛ nna m’egya yɛ quorum baanodzinyi a nna ɔtaa nye mberantsɛ a wɔwɔ ward no kɔ asesebɔ na wogya me wɔ fie.
Ber a da no sõe no, m’enyi gyee. Na otwar dɛ megye to mu dɛ, nna medze ahoper pɛ dɛ medze moho bɔ mbanyimba mpanyimfo no ho. Nna mepɛ dɛ mekyerɛ biribi ma wɔgye me to mu. Mbɔdzembɔ mu no, annkyɛr na wɔsɔɔ me hwɛe sɛ mubotum ayɛ dza wɔrohwehwɛ no ma makã kuw no ho a.
Dwumadzi a wɔdze maa no nye dɛ mibeyi m’egya ne kaar nsaafee no ama yeetum dze agodzi adaadaa baanodzifo no. Mennkaa asɛm pɔkyee a mekãe ma m’egya gyee dzi, naaso ntsɛmara mutuu mbirika kɔr mberantsɛ kuw no hɔ a nna mikitsa nsaafee no, a dza meyɛɛ wiei no m’enyi agye ho.
Nkyii na dwumadzi a ɔtoa do no bae. Nna ɔwɔ dɛ mubue kaar n’abow no na medze duasin bi hyɛ egua a hɛnkanyi no dze n’ekyir twer mu na kaar n’abɛn ntamu. Nna ɔwɔ dɛ mesan tow abow no mu ama abɛn no ayɛ dede ewimbir ber no a wonnkotum enya kwan akɔ kaar no mu ekeyi efir bɔn no efi hɔ.
Ha nye beebi a asɛm no dan enyimguase yaayaayaw ma me no. Prɛko pɛr a medzi dua no hyɛɛ hɔ no, motoow abow no mu na mutuu mbirika ntsɛntsɛm dɛ mbrɛ mubotum na mokosumaa mfuw bi a ɔbɛn mu. Ber a mokotoow daadze no, metsee yaw hyeehyew bi nkã. Sum no mu na wɔ m’ahoɔhar mu no, metsenaa cactus nsoɛsoɛ bi do.
Abɛn ne dede no ntsi obiara anntse me yaw ne nkekamu no, na nna minnyi hwee yɛ dɛ motow apakye san kɔ kaar no ho, mekã mo “bɔn,” na mohwehwɛ ehiadze eduryɛ a ɔyɛ enyimguase.
Anafua no nyina, medaa me yafun do wɔ ntamadan bi mu ber a nna m’egya dze ɔdabaw no, yiyii cactus nsoɛsoɛ no fi me … oye, hom mma menkã dɛ nda beberee ekyir no manntsena ase yie.
Madwendwen dɛm sũahu no ho mber pii. Sesei mutum serew wɔ me mbabun mu nkwaseadze ho mpo ber a fapem etsitsir bi ayɛ pefee ama me.
Nhwɛdo horow pii wɔ nyimpa no suban mu a ɔyɛ dɛ ɔnnyɛ nã wɔ honammunyi no mu—ɔpɛ dɛ mebɛkã ho, ɔpɛ dɛ mekyerɛ dɛ mutum yɛ, suro dɛ mennkã ho, na nhyɛ no dɛ yehia dɛ yebosuma amma yennya no nsunsuando. Suban a odzi ewiei yi na mebetsim do ndɛ—yerusuma ekyir no a yehu dɛ yɛayɛ dza nkyɛ onnyi dɛ yɛyɛ no.
Sesei no, meremmfa me mbaforber mu agodzi ndaadaa no nnto bɔn yaayaw ho, mbom yebotum esũa fapem horow bi efi mu a wɔbɛyɛ mfaso ber a wɔsɔ hɛn hwɛ wɔ hɛn ɔnnkyebo akwantu mu no.
Eden Ture mu no, Adam na Eve nyaa gyinabew a nna ɔyɛ ahomka—edziban mbordo, ture ne fɛw a ne saso nnyi hɔ—nnyɛ ture ne fɛw nko, mbom ture a mfuw anaa nsoɛsoɛ nnyi mu.
Naaso, yɛsan so nyim dɛ nna ture abrabɔ no twa hɔn kankɔ a wohia no do tsia. Nna ture no nnyɛ ewiei tsenabea, mbom nsɔhwɛ, pii a ɔbɛba ne dza odzi kan no, a ɔbɔsɔ hɔn ahwɛ, woesiesie hɔn, na wɔama hɔn kwan ma wɔakɔ kan akɔ hɔn ewiei tsenabea hɔ dɛ wɔbɛsan akɔ Egya na ne Ba hɔn enyim.
Hom bɛkaa dɛ nna ɔkõtsiafo wɔ ture no mu. Wɔmaa Lucifer kwan dɛ ɔnsɔ Adam na Eve nhwɛ. Odzii kan gyegyee Adam dɛ ondzi papa na bɔn ho nyimdzee dua no n’eduaba no bi. Ɔkaa mbrasɛm no dɛ mma wonndzi bi no, Adam powee. Nkyii na Eve a oehyira no no bae, nyia ɔsaan mu yii dɛ obedzi eduaba no, dɛfɛdɛfɛw Adam ma ɔyɛɛ dɛmara.
Ekyir no, Adam na Eve paa mu kãa dɛ nna egyinasi yi hia ma wɔahyɛ Ɔsor Egya ne nhyehyɛɛ mã. Naaso wodzii eduaba no, nna wɔato mbra no—mbra a wɔdze maa hɔn fi Egya no hɔ tɔɔtsen. Papa na bɔn no nsusuando na ne ntseasee a ɔhyɛɛ hɔn do no gyaa hɔn awerɛhow mu mber a wɔtsee Egya ne ndze dɛ Ɔresan aba ture no mu. Wohun dɛ wɔda adagyaw, nna ampaara so, a nokwar, nna wɔnnhyɛ efuradze biara, a nna wɔatsena tsebew bi mu a wonnyim hwee. Mbom bia dza ɔyɛɛ hɔn yaw yie kyɛn dɛ wɔda adagyaw dɛm mber mu no, nye hɔn mbrato a ɔdaa edzi no. Nna wɔyɛ mberɛw na wonntum nngye hɔn ho. Nna wɔda adagyaw ankasa.
Aber nyina nna Lucifer rohwehwɛ akwan a obenya ho mfaso, ohun hɔn adagyadzi na mberɛwyɛ tsebew no, sɔɔ hɔn hwɛɛ bio—mber yi dɛ wonnkosuma mmfi Nyankopɔn enyim.
Nsɔhwɛ yi, mebɛfrɛ no “nshɔwɛ no a otsĩa ebien“ no, nye nsɔhwɛ no a ɔdze nsunsuando kɛse bɛba sɛ yegyaa hɛnho dze ma no a. Nokwar ara, dɛ yebokwetsir nsɔhwɛ horow a odzi kan nyinara dɛ yɛbɔto Nyankopɔn ne mbra dzi mu, naaso yenyim dɛ hɛn nyinara begyaa hɛnho dze ama nsɔhwɛ asorɔtow a odzi kan no wɔ asaase do ha. Ber a yɛkɔ kan wɔ hɛn mpontu na ntseasee mu no, yɛwɔ enyidado dɛ hɛn ahoɔdzen dɛ yebokwetsir nsɔhwɛ a odzi kan no bɔkɔ do etu mpon ber a yɛper dɛ yɛbɛyɛ tse dɛ hɛn Agyenkwa, Jesus Christ yie.
Binom botum abɔ mbɔdzen dɛ wobosuma efi Nyankopɔn hɔ osiandɛ wɔmmpɛ dɛ wobohu hɔn anaa wɔbɛda hɔn edzi, na hɔn enyi to anaa wodzi fɔ. Naaso, kyerɛwsɛm piigyan kyerɛkyerɛ dɛ ɔnnkɛyɛ yie dɛ ibosuma efi Nyankopɔn hɔ. Mebɛkyɛ kakra ara:
Ewuradze dua nsɛmbisa a odzi do no do kyerɛkyerɛ Jeremiah dɛ: “aso obi botum ehuntsa noho wɔ huntsabea bi a emi murunnhu no? Ewuradze na ɔse. Ana mennhyɛ ɔsor na asaase mã?“
Na wɔkyerɛkyerɛɛ Job dɛ:
“Na n’enyiwa wɔ nyimpa n’akwan do, na ohu no nkɔree nyinara.
“Sum bi nnyi hɔ, na owu nwinwin bi so nnyi hɔ, mbrɛ emumuyɛfo dze hɔnho bosuma.“
Ɔdwontonyi David, awensɛm mu ara tsẽa mu dɛ:
“Ewuradze, ɔwo ahwehwɛ mo mu, na ehu me.
“Ɔwo inyim m’asetsena na mosoɛr, Ɔwo etse m’adwen ase kɔ ekyirkyir. …
“Na asɛm biara nnyi me tɛkyerɛma do, na hwɛ, Ewuradze, ɔwo inyim ne nyinara kwar. …
Henfa na mibefi wo sunsum enyim makɔ? Anaa henfa na mibefi w’enyim m’eguan makɔ?
“Sɛ mofow kɔ sor a, ewɔ hɔ: sɛ mekɛsɛw me kɛtɛ wɔ sheol a, hwɛ, ewɔ hɔ.“
Nsakyereefo Afoforfo
Hɔn a wɔbɔdɔm Jesus Christ N’asɔr a ɔwɔ hɔ ma Nda a Odzi Ekyir Ahotseweefo nnkyɛree no, nsɔhwɛ a otsĩa ebien no bɛyɛ dɛ ɔhaw ara. Ɔnam hom euma do no, hom edzi ahyɛmu dɛ wɔbɛfa Jesus Christ ne dzin ato hom do, a hom mu pii no behia dɛ wɔsesa abrabɔ no su no kã ho. Obi resesa n’abrabɔ su no nnyɛ dza ɔyɛ mberɛw. Ɔtaa hia wo ma asesa suban na nyɛɛ horow na mpo mfɛfo ma akɔ kan akɔ Ɔsor Egya dɔfo hɔ.
Ɔsɛɛfo no nyim dɛ ibotum ayɛ mberɛw ama ne ndaadaa ekutukubɔ no. Ɔbɛma w’abrabɔ dadaw, a w’enyi anngye ho wɔ akwan dodow pii mu no, afei wɔayɛ dɛ ɔyɛ fɛɛfɛw dodoodow. Tõafo no, dɛ mbrɛ wɔfrɛ no wɔ Nyikyerɛ nwoma mu no, dze adwendwen a ɔtse dɛ iyi bɔsɔ wo ahwɛ dɛ: “Woho nnyɛ dzen biara a ebɛsesa w’abrabɔ; nnkotum ayɛ iyi; nnkã nkorɔfo yinom ho; wɔrenngye wo nto mu dabiarada; eyɛ mberɛw dodow.’’
Sɛ adwendwen yinom yɛ dɛ ɔyɛ nokwar ma hom a hom ahyɛ ase nye Nyankopɔn ridzi ahyɛmu a, yɛtotɔ serɛ hom dɛ mma hom nntsie tõafo no ne ndze. Yɛdɔ hom; hom botum ayɛ; yɛgye hom to mu; na, hom dze Agyenkwa no, hom benya ahoɔdzen dze ayɛ biribiara. Ber a hom hia hɛn dɔ na mboa dodow no, mma wɔnndaadaa hom ma hom nndwen dɛ yɛbɔpow hom sɛ hom tu ananmɔn san ekyir kɔ hom nkaano abrabɔ su no mu a. Ɔnam Jesus Christ No Werdambɔ a onnyi kãbea no tum do no, hom botum enya ahoɔdzen bio. Na sɛ isuma fi No hɔ na etwe woho fi wo gyedzi fofor kuw mu a, etwe woho fi fibea kor noara a obotum na ɔbɛma wo ahoɔdzen ma edzi nyim no ho.
Me nyɛnko dɔfo bi, nsakyereenyi a ɔnnkyɛree, kyɛɛ mbrɛ osi yɛ dzen dɛ gyedzi betsim wɔ ankonamyɛ mu. Ahoɔdzen kɛse wɔ erebɛkã ho na akɔ do atsena mboa kuw mu ho—hɔn nyinara wɔfom naaso wɔkɔ kan ber a Agyenkwa Jesus Christ no dɔ hyira hɔn.
President Russell M. Nelson akyerɛkyerɛ dɛ “iridzi wiadze do konyim no nnyɛ dza osi da kor anaa nda ebien mu. Ɔba wɔ abrabɔ ber mu ber a yesi do fua Christ ne nkyerɛkyerɛ no. Yɛnyɛn gyedzi wɔ Jesus Christ mu ber a yerunu hɛn ho daa daa na yerisie ahyɛmudzi a ɔdze tum hyira hɛn. Yetsim wɔ ahyɛmu anamɔnkwan do na wɔdze sunsum mu ahoɔdzen, ankorankor nyikyerɛ, gyedzi nto mu, na abɔfo hɔn som hyira hɛn.
Sɛ inya honandua mu kur a, wo tsebew bɛsɛɛ na annhwɛ a wo nkwa bɛgye nsamu sɛ ennya eduryɛ papa a. Iyi yɛ nokwar ma sunsum mu epirakur dɛmara. Sunsum mu epirakur a wɔannhwɛ no yie nko na ɔbɛgye wo onnyiewiei nkwagye efi wo nsamu. Mma nnsuma mmfi hɔn a wɔbɔdɔ na wɔaboa wo ho; mbom tu mbrika kɔ hɔn nkyɛn. Bishopfo, branch presidentfo, na baanodzifo apapa botum aboa wo ma enya Jesus Christ No Werdambɔ no tum ayarsa ho kwan.
Hɔn a bia worusuma no, yɛserɛ hom dɛ hom nsan mbra. Hom hia dza asɛmpa no na Jesus Christ No Werdambɔ no dze ma, na yehia dza hom dze ma. Nyankopɔn nyim wo bɔn; nnkotum esuma efi No hɔ. Siesie woho wɔ N’enyim.
Dɛ N’ahotseweefo no, otwar dɛ hɛn mu kor biara kenyan mekã ho amambra wɔ Asɔr a wɔdɔ obiara, wɔgye obiara to mu, na wɔhyɛ obiara a ɔpɛ dɛ ɔkɔ kan wɔ N’anamɔnkwan no do nkuran.
Hwɛ yie na ammfa wo bɔn a ayɛ ennsuma! Dzi tsetse na ndɛ nkɔnhyɛfo no hɔn afotu do na hu dɛ nnkotum esuma efi Egya dɔfo hɔ.
Mbom, nya Jesus Christ no Werdambɔ ayarsa nwanwa tum no mfaso ma woho. Iyi nye hɛn asetsena no botae ankasa—dɛ yebenya ɔnnkyebo nyimpadua a ɔyɛ mberɛw na ɔyɛ a “yarba ahorow pii na ɔhaw [no]“ na awerɛhow mu ara, obegyaa noho mu ama nsɔhwɛ horow a odzi kan no; yɛbɔkɔ kan mpo sɛ nsɔhwɛ horow yinom dzi hɛn do nyim; na yɛãyɛ dɛm ekyir no, yɛahwehwɛ mboa krɔnkrɔn, ama yeetum yɛabɛyɛ tse dɛ hɛn Agyenkwa na hɛn Egya a ɔwɔ Sor yie. Ɔyɛ No kwan. Ɔno nye kwan kor pɛr. Nokwar yinom ho na megye dase wɔ Jesus Christ ne dzin mu, amen.