Sunsum mu Emudzi wɔ No mu

Akwatafo du maa hɔn ndze do frɛɛ Agyenkwa no, “Hu hɛn mbɔbɔr.” Na Jesus yɛe. Ɔsee hɔn dɛ wɔmfa hɔn ho nkɛkyerɛ sɔfo no, na wɔrokɔ no, hɔn ho sanee.

Na hɔn mu kor hun dɛ no ho asan no, ɔdze ndze kɛse hyɛɛ Nyankopɔn enyimnyam. Na ɔsaan n’ekyir kɔr Agyenkwa no hɔ, dze n’enyim butuuw famu wɔ n’ananadze, na ɔdaa no ase.

Na Agyenkwa no see nyia ɔkyerɛ enyisɔ no, “Wo gyedzi agye wo.”

Jesus Christ saa akwatafo du yarba. Mbom ɔbaako, ɔsanee baa Agyenkwa no hɔ no, onyaa biribi kaa ho. Ɔmaa odzii mu.

Akwatafo akron nyaa honandua mu ayarsa.

Ɔbaako nyaa honandua mu ayarsa na sunsum mu emudzi.

Morodwendwen asɛm yi ho no, mebisa sɛ dza ɔnye no bɔ ebira no yɛ nokwar a. Sɛ ayarsa na emudzi nnyɛ adze kor a, ana obi botum enya sunsum mu emudzi efi No hɔ ber a honandua mu na atsenkã ayarsa nnyaa mmbae a?

Eduyɛfo Wura no bɛsa hɛn amandzehu—honandua mu na atsenkã—yarba wɔ Ne mber mu. Mbom erotweɔn ayarsa no, ibotum enya emudzi a?

Sunsum mu emudzi no n’asekyerɛ nye dɛn?

Yedzi mu wɔ Jesus Christ mu ber a yɛdze hɛn pɛ dzi dwuma wɔ gyedzi mu ka No do, gyaa hɛn akoma ma No ama Ɔaasesa no, dzi ne mbrasɛm do, na yɛnye No hɛn ahyɛmu nkitahodzi mu, botooyɛ mu ara yɛrosɔw na yerusũa fi asaase asetsena mu nkõdzen mu kɛpem dɛ yɛbɛsan akɔ N’enyim na yenya ayarsa wɔ kwan biara mu. Mubotum edzi mu ber a motweɔn ayarsa sɛ medze m’akoma nyina hyɛ nkitahodzi a menye No wɔ no mu a.

Gyedzi wɔ Jesus Christ mu dze enyidado ba. Minya enyidado wɔ emudzi ho mbɔdzembɔ mu—emudzi a gyedzi wɔ Jesus Christ mu dze ba. Gyedzi wɔ No mu ma m’ayarsã ho enyidado nyin, na dɛm enyidado no si me gyedzi wɔ Jesus Christ mu pi. Ɔyɛ dza a tumdzi wɔ mu.

Ewuradze see Enos dɛ ne gyedzi “agye no.” Emudzi bae ber a Enos dwendwen n’egya-nkɔnhyɛnyi, Jacob ne nsɛm ho, a ntseasee fa onnyiewiei nkwa ho kwan ho kɔm dzee no, ber a osũi frɛɛ Nyankopɔn wɔ mpaabɔ a ɔyɛ dzen mu. Na wɔ dɛm ɔpɛ na ahobrɛadze tsebea mu no, Ewuradze ne ndze baa no do, paa mu kãa dɛ wɔdze no bɔn akyɛ no. Na Enos bisaa Ewuradze, “Ɔyɛ dɛn yɛ?” Na Ewuradze see dɛ, “Osian wo gyedzi a ɔwɔ Christ mu, … wo gyedzi agye wo.”

Yɛnam hɛn gyedzi wɔ Jesus Christ mu no, yebotum ahwehwɛ sunsum mu emudzi ber a yɛdze enyidado tweɔn honandua mu na atsenkã ayarsa.

Osian No werdam afɔrbɔ no ntsi, na sɛ yenu hɛnho nokwar mu a, Agyenkwa no sa hɛn yar fi bɔn ho, dɛ mbrɛ ɔyɛɛ maa Enos no. No werdambɔ a ɔmmbɔadze no sõ hɛn yaw na awerɛhow do.

Naaso bia nna ɔnnkɛma ayarsa fi yarba na yarba horow ho—koannkɔ ɔyaw, ahomberɛw, tse dɛ multiple sclerosis, kokoram, dadwen, bahawtɔ, na ne saso. Dɛm ayarsa no wɔ Ewuradze ne mber do. Na aber yi mu no, yebotum asan mu eyi dɛ yebedzi mu ber a yɛdze hɛn gyedzi dzi dwuma wɔ no mu!

Ibedzi mu no kyerɛ dza woewie na wɔahyɛ mã. Tse dɛ mbaabun enyansafo beenum no a nna ngo wɔ hɔn nkandzea mu ber a ayeforkun no bae no, yebotum edzi mu wɔ Jesus Christ mu sɛ yɛdze nsakyeree ngo ma No hyɛ hɛn kandzea mã a. Dɛm kwan no do no, yesiesie hɛn ho ma ayeforhyia ngyinahɔmadze no, Ne Mbae a Otsĩa Ebien.

Abɛbusɛm no mu no, nna mbaabun du no nyina wɔ bea a ɔtsen, rotweɔn ayeforkun no. Hɔn mu kor biara dze kandzea bae.

Mbom ber a Ɔbae no, esuom ber a nna enyi nnda kwan no, nna nkwasea beenum no nnyi ngo ma hɔn nkandzea. Wɔannkã dɛ wɔyɛ emumuyɛfo mbom nkwasea. Nkwasea no annyɛ ahoboa mapã a ɔbɛma hɔn nkandzea no akɔ do dze nsakyeree ngo adzɛw.

Na ntsi, oriyi hɔn totɔserɛ dɛ wɔbɛhɛn ayeforhyia ewimbir edzidzi no ase ano no, ayeforkun no kãa dɛ, “Hom nnyim me.”

Dze rekyerɛ, nkyii, dɛ mbaabun enyansafo beenum no nna wonyim No. Ɔmaa wodzii mu wɔ No mu.

Nna nsakyeree ngo a ɔsom bo ahyɛ hɔn kandzea mã a, ɔmaa mbaabun enyansafo no kwan ma wɔhɛn ayeforhyia no ase wɔ ayeforkun n’abanyimfa.

Dɛ mbrɛ Agyenkwa no see no, “Hom ndzi nokwar, na hom mbɔ mpaa dabaa, na hom nsiesie hom nkandzea ma ɔndzɛw na hom mfa ngo so, ama hom aayɛ krado dze atweɔn Ayeforkun no ne mbae.”

Mbaabun enyansafo beenum, Ben Hammond yɛɛ nsaano mfonyin no.

Ndaansa yi mu, wɔdze nsaano edwin nwanwa bi a ɔkyerɛ mbaabun enyansafo beenum yi esi Temple Square, wɔ Relief Society Dan no mbobow ano na wɔ Salt Lake Temple no nwin mu.

Ɔyɛ bea a ɔfata abɛbusɛm yi ne nkyerɛkyerɛ no. Osiandɛ sɛ yɛyɛ na yesie ahyɛmudzi horow a, nkanka dza ɔwɔ Ewuradze ne fie a, yɛdze nsakyeree ngo hyɛ hɛn nkandzea mã.

Susuampaara dɛ mbaa a wogyina hɔ ma mbaabun beenum no rennkyɛ hɔn nsakyeree ngo no, wɔrekyɛ hɔn kan ber a wɔma hɔn nkandzea a ngo ahyɛ no mã na ɔredzɛw rehyerɛn no do. Tsitsir ara wɔda hɔn edzi dɛ wɔroboa hɔn ho—abatsir to abatsir, abasa fua abasa, rohwɛ enyim na enyim roto nsa frɛ binom dɛ wɔmbra kan no mu.

Nokwar, “[Yɛ]yɛ wiadze kan no.” Agyenkwa no paa mu kãa dɛ:

“Mayɛ hom kan ama nkorɔfo yi. Kurow a ɔda koko do nntum nnsuma.

“… Ana [yɛ]sɔ kandzea dze hyɛ kuruw ase? Oho, mbom wɔdze si kandzeadua do, ma ɔhyerɛn ma hɔn a wɔwɔ fie nyina;

“Dɛm ntsi hom mma hom kan nhyerɛn wɔ nkorɔfo yi enyim, ama woeehu hom ndwuma pa na wɔahyɛ hom Egya a ɔwɔ sor enyimnyam.”

Wɔahyɛ hɛn dɛ yɛnkyɛ Ne kan no. Ntsi ma nsakyeree kɔ Jesus Christ hɔ ho ngo no nhyɛ wo kandzea mã na siesie wo ho dɛ ebɛma wo kandzea no adzɛw ahyerɛn. Na ma dɛm kan no nhyerɛn. Sɛ yɛnye binom kyɛ hɛn kan no a, yɛdze Jesus Christ n’ahotɔ brɛ hɔn, hɛn nsakyeree ma No no kɔ bun mu, na yebotum edzi mu mpo ber a yɛtweɔn ayarsa. Na ber a yɛma hɛn kan hyerɛn no, yebotum edzi dɛw mpo wɔ ber a yɛtweɔn.

Kyerɛwsɛm mu mfatoho ye ma yerisi nkyerɛkyerɛ dɛ yebotum edzi mu ber a yɛasakyer ama Jesus Christ na yɛtwe ahoɔdzen fi No mu, mpo wɔ ber a yɛtweɔn ayarsa no pi.

Nna Ɔsomafo Paul wɔ amandzehu bi—dza ɔkyerɛɛ dɛ ɔtse dɛ “honam mu nsoɛ,” a mpɛn ebiasa na oebisaa Ewuradze dɛ ɔmma omfi no do. Na Ewuradze see Paul dɛ, “M’adom dɔɔ sõ ma wo: na m’ahoɔdzen dzi mu wɔ mberɛwyɛ mu.” Paul yii ano paa mu kaa dɛ:

“Dɛm ntsi medze enyigye pii hyehyɛ moho mbom wɔ me mberɛwyɛ mu, ama Chirst ahoɔdzen aabɔsoɛ mo do.

Dɛm ntsi minya enyigye wɔ mbrɛwyɛ mu, … ahomtsew mu wɔ Christ ntsi: na meyɛ mberɛw a, nna mbom meyɛ dzen.”

Paul ne fasusu kyerɛ dɛ hɛn mberɛwyɛ mu mpo no, hɛn ahoɔdzen wɔ Jesus Christ mu botum edzi mu—dza ɔhyɛ mã na odzi mu. Hɔn a wɔnye ɔnnkyebo asetsena yi mu aperdzi horow dzi aper no na wɔdze gyedzi dan kɔ Nyankopɔn hɔ tse dɛ Paul no botum enya nhyira a ofi enye Nyankopɔn ridzi nkitaho no mu ba.

Paul ennya ayarsã wɔ n’amandzehu ho, mbom onyaa sunsum mu emudzi wɔ Jesus Christ mu. Na mpo wɔ n’akotorka mu no, ne nsakyeree ma Jesus Christ na ahoɔdzen a ofi Jesus Christ mu kan no hyerɛnee, na odzii dɛw. Nwoma a ɔkyerɛwee kɛmaa Philippifo mu no, ɔtsẽaa mu dɛ, “Hom ndzi dɛw wɔ Ewuradze mu daa: na misi do bio dɛ, hom ndzi dɛw.”

Nkyerɛbaa na nuambanyin, nyiano no nye nyew, yebotum edzi mu wɔ sunsum mu ber a yɛtweɔn honandua mu na atsenkã mu ayarsa. Emudzi nnnkyerɛ honandua mu na atsenkã yiedzi wɔ abrabɔ yi mu nko. Emudzi fi gyedzi na nsakyeree ma Jesus Christ na erema dɛm nsakyeree kan no hyerɛn mu ba.

“Wɔafrɛ dodowara, mbom kumaabi [san mu yi dɛ wɔbɛfrɛ hɔn] hɔn a woeyi hɔn.”

Adze nyinara benya honandua mu na atsenkã mu ayarsa wɔ Wusoɛr ber no mu. Naaso ebɛsan mu eyi sesei dɛ ibedzi mu wɔ No mu?

Medze enyigye paa mu kã dɛ masakyer aba Ewuradze Jesus Christ hɔ. Morobɔ mbɔdzen dɛ mibedzi mu wɔ No mu. Megye dzi dɛ ndzɛmba nyina bɛsan ananmu na ayarsa bɛba, wɔ Ne mber mu, osiandɛ Ɔtse ase.

Nna Mary Magdalene yɛ ɔbaa a Jesus Christ asa no yarba. Na nna ɔyɛ ɔbaa a odzi mu wɔ Jesus Christ mu. Dɛ No sũanyi no, ɔkaa Agyenkwa no do wɔ Galilee mu nyina na ɔsoom No.

Nna ɔwɔ mbeamudua no ase, No wu ho dasefo.

Ɔkɔr Ne nda ho dɛ orukowie ewufo ho ahosiesie no na ohun dɛ woeyi ɔbo no efi nda no ano, na dɛ Ewuradze no fun efi nda no mu. Nna Mary wɔ nda no ho rusũ ber a abɔfo no dzi kan bisaa no, na nkyii Agyenkwa Noara bisaa no, “Ɔbaa, ebɛnadze ntsi na irusũ?”

Mary sũi, “Woeyi m’Ewuradze kɔ, na minnyim mbrɛ wɔdze no akɔto”

Na Jesus ehumbɔbɔr mu ara frɛɛ no, “Mary.” Na ohun No na obu mu ara ɔsee dɛ, “Rabboni; … Owura.”

Ɔrehyɛ Agyenkwa no ho nkɔm no, Isaiah kãa dɛ, “Ɔbɛmen owu wɔ konyimdzi mu; na Ewuradze Nyankopɔn bɛpepa enyiwa nyina ho nyinsuwa.”

No Wusoɛr maa ho kwan ma wɔpepaa Mary ne nyinsuwa. Ampaara Ɔbɛpepa wodze so.

Mary nye Agyenkwa no a oewu asoɛr no ne dasefo a odzi kan. Na ɔno na odzi kan dzii dase faa dza oehu no ho kyerɛɛ adasa.

Ahobrɛadze mu ara medze me dasegye ka Mary ne dze ho. Ɔasoɛr. Jesus Christ tse ase. Ewiei no adze nyinara benya ayarsa, honandua mu na atsenkã mu, wɔ No mu. Na yɛrotweɔn dɛm ayarsa no, gyedzi wɔ Eduyɛfo Wura no mu bɛma yedzi mu wɔ sunsum mu. Jesus Christ ne dzin mu, amen.