Enyigye a Ɔnam Osuanyiyɛ Ahyɛmudzi do

Dakor bi wɔ afe 2023, nna Uyanga Altansukh wɔ edwuma mu wɔ Mongolian n’etsifi kurow a ɔwɔ Darkhan na asɛmpakã president a ɔwɔ Mongolia hɛɛn n’edwuma mu hɔ. Akyerɛbaa no kãa dɛ:

Muhun no na modween dɛ ma kan bi fi n’enyim rehyerɛn. Ɔkyerɛɛ ayamuyie na fewdzi maa hɔn no a woetwa ehyia noho no, na menyaa ahomka. Ansaana obefi hɔ no, mibisaa no nsɛmbisa bi. Ndafua kakra ekyir no ɔbaa m’edwuma mu bio bebisaa sɛ mubotum aba n’asɔr a. Modween dɛ ɔno botum ayɛ mboa. Nna merehaw wɔ me mba hɔn daakye ho, dɛ mbrɛ atseetsee na abagura ahyɛ ɔman no mu. Nna mepɛ dɛ me mba bɛyɛ tse dɛ dɛm barimba yi a kan hyerɛn n’enyim, retserɛw enyigye ma hɔn a woetwa ehyia hɔnho.

“Dakor bi asɛmpasomafo no kyerɛɛ hɛn ebupɛn du mbra no. Me mba no dze enyigye kãa dɛ, ‘Maame, ɔsɛ dɛ yetua hɛn ebupɛn du.’ Nna mutum hu me mba no hɔn gyedzi dɛm mber no mu. Ansaana mobɔdɔm Asɔr no, mohwɛɛ wiadze mfɛndzanan ehyiadzi na metsiee President Russell M. Nelson ne kasaa. Ɔbɔɔ nhyehyɛɛ ho dawur dɛ wobesi temple afofor wɔ wiadze nyina na ɔkaa dɛ wobesi temple fofor wɔ Ulaanbaatar, Mongolia. M’enyi gyee pii na mekyii nyinsuwa pii, mpo dɛ nna minnyim siantsir no. Medze dɛm enyigye yi no, mutumii hun dɛ me gyedzi na dasegye renyin.”

Uyanga, tse dɛ nyimpa ɔpepe no, ɔkã Israel mboano edwuma kese yi a wɔdze reyɛ ahosiesie ma Jesus Christ Ne mbae a Otsia Ebien. Ɔahyɛ n’akwantu ase wɔ ahyɛmu anamɔnkwan no do na ɔabɛyɛ Christ n’osuanyi. Ibɛyɛ Christ n’osuanyi no ase kyerɛ dɛn? M’enyisɔ Japan kasafua a ogyina hɔ ma osuanyi—deshi—de asekyerɛ onua kumaa, nna shi asekyerɛ abofra.

Jesus Christ kãa dɛ, “Na afei, nokwar, mese hom dɛ, ahyɛse no, nna menye Egya no wɔ hɔ, na emi nye Abakan no.” Ɔnam nyia a Ɔyɛ na dza Ɔayɛ ntsi, yɛsɔr No, yebu No, yɛhyɛ No enyimnyam, na yɛka No do. Christ apon hɛn, na yɛkɔ do da No ase daa wɔ No werdam afɔrbɔ a ɔmmbɔadze.

Yɛwɔ Ɔsor Egya a Ɔdɔ hɛn dɛ Ne mba. No dɔ ma hɛn no dzi mu. Jesus Christ na No ndwuma kyerɛ Nyankopɔn no dɔ ma hɛn. Dɛ mbrɛ John kyerɛwee no, “Na mbrɛ Nyankopɔn dɔɔ wiadze nye yi, dɛ ɔdze ne Ba a ɔwoo no kor no mae, ama obiara a ɔgye no dzi no ɔaannhera, na oeenya onyiewiei nkwa.’’

Hɛn ahwehwɛdze dɛ yɛbɛtse dza yɛnnyim ase mu no, ɔtɔfabi a yɛtwer hɛn honandua mu suahu, anaa ndzɛmba a yenyim. Mfatoho, yɛbotum anam hɛn baatanyɛ na ɔnnkyebo ebusua nkitahodzi do dze esũa biribi afa Nyame Egya no ho. Mbom, yɛnyɛ ahwɛyie wɔ yɛdze dɛm mfatoho yi dzi dwuma mbordo ber a yɛper dɛ yɛbɛtse hɛn Ɔsor Egya ase. Nyankopɔn No su tra emudzi a ɔtɔ sin su biara a nyimpa ɔahwe ase wɔ. Nyame Egya yɛ Egya a odzi mu. Ɔdɔ emudzi mu. yamuyiefo a, ɔwɔ abotar, ntseasee, na enyimnyam a odzi mu. Yɛbotum atwer No emudzi mu. Christ no dɔ da Nyame Egya no dɔ edzi na ogyina hɔ ma dɛm dɔ no.

Jesus Christ nye fasusu na kwan no. Wɔ Christ mu no yebotum enya Egya no su na No botae ho nteasee mapã. Ɔnam Christ do, wɔama hɛn anwanwa tum a yɛdze dzi honammufo, mbanyin na mbaa ntɔyɛɛ do konyim, ama yɛaabɛyɛ tse dɛ Egya no.

Tse dɛ hɛn Ɔsor Egya, Jesus Christ, yɛ mbɔbɔrhufo na pɛrpɛr emudzi mu. Suban krɔnkrɔn yinom, pɛrpɛryɛ na ehumbɔbɔr, mmbɔ ebira. Wɔhyɛ hɔn ho mã. Pɛrpɛryɛ na ehumbɔbɔr da Nyankpɔn No dɔ mapã ma Ne mba edzi. Yebotum atwer Nyame Egya na Jesus Christ osiandɛ wɔkyerɛ pɛrpɛrdzi na ayamuyie ma hɛn nyina.

Nyame Egya na Ne ba Jesus Christ, saa emudzi mu wɔ botae na ɔdɔ mu. Osiandɛ Nyankopɔn na Jesus Christ dɔ hɛn ntsi, wɔama hɛn kwan na ndzinoa dɛ esuafo nokwafo no yɛnye Hɔn ndzi ahyɛmu. Yɛreyɛ dɛm no nna yɛnye Christ nkitahodzi renyin: “Na afei, osian ahyɛmu a hom edzi yi ntsi wɔbɛfrɛ hom Christ ne mba, ne mbabanyin nye ne mbabaa; na hwɛ, ndɛ da yi wɔawo hom wɔ sunsum mu; na hom kã dɛ hom akoma enya nsakyer ɔnam dɛ woenya gyedzi wɔ ne dzin mu ntsi; dɛm ntsi, ɔawo hom ma hom abɛyɛ ne mbabanyin nye ne mbabaa.”

Dɛ esuafo no ber a yedzi ahyɛmu krɔnkrɔn na yesie no, wɔdze sunsum mu tum hyira hɛn. Yɛnye Christ na Nyakopɔn wɔ nkitahodzi soronko bi a ɔma yetum nya Hɔn dɔ na enyigye wɔ kwan a woesie ama hɔn a woedzi ahyɛmu na wosie. Yɛbotum atse Nyankopɔn No dɔ ne mãhyɛ nkã anaa yɛaakɔ do wɔ No dɔ mu no gyina hɛn tsenenee apɛdze na ndzeyɛɛ do.

John tsir 15, nyiyimu 9 mu no, yɛkenkan dɛ, “Dɛ mbrɛ Egya no dɔ me no, na mo so maadɔ hom.” Na afei wɔto nsa frɛ hɛn dɛ, “Hom ntsena mo dɔ mu.”

Nyiyimu a odzi do mu no, wɔma hɛn kwan no a yɛdze bɛtsena No dɔ mu: “Sɛ hom sie me mbransɛm a, hom bɛtsena mo dɔ mu, dɛ mbrɛ mo so mesie m’Egya ne mbransɛm na metsena no dɔ mu.”

Nyiyimu 11 mu no, yehu yerisie mbrasɛm no botae: “Maka yinom aakyerɛ hom ama dɛw aatsena hom mu, na hom dɛw aahyɛ mã.”

Ɔnam nokwar osuanyiyɛ ahyɛmudzi do, yɛbotum ahyɛ ase enya ntseasee mapã wɔ Nyankopɔn No su na enyigye a Ɔpɛ dɛ Ne mba nyina nya ho. Yɛbotum so ahyɛ ase atse nhyehyɛɛ bi a ahyɛse no ɔma adwen mu yɛ konsẽe no ase. Mfatoho, Nyakopɔn si dɛn nya enyigye a ɔhyɛ mã ber a Ne mba binom ruhu amandze beberee? Nyiano no wɔ Nyakopɔn no nhumu a odzi mu na Ne nhyehyɛɛ a odzi mu no mu. Ohu hɛn fitsi ahyɛse dze kɔ hɛn enyimnyam nkrabea ndaamba. Ɔnam Ne ba Jesus Christ do abɔ kwan, ama yeedzi, yaw, amandzehu, bɔn, afɔdzi, na ankonamyɛ a ɔwɔ ɔnnkyebo asetsena mu no do. Nyankopɔn abɔ kwan no na Ɔama hɛn nsanmuyi no.

Mfatoho fa hɔn a woenya enyigye a ɔnam osuanyiyɛ do botum aboa hɛn ma yɛatse dɛm adwenkyerɛ yi ase. Bia atse dɛm asɛnsin yi dɛ hɛn enyigye wiei wɔ hɛn ba a ɔwɔ awerɛhow kɛse no mu. Meehu dɛ nnyɛ dɛm na ɔsɛ dɛ ɔyɛ. Me nã a woedzi mfe 94 n’asefo bɔbor 200 na wɔtse ase. Mber biara mu no, annyɛ yie koraa 200 no mu baako enyi renngye. Sɛ dɛm asɛm yi yɛ nokwar a ɔno nkyɛ me nã bɔwɔ awerɛhow tsebew mu daa, eso ɔnntse dɛm. Hɔn a wonyim no nyim mberɛ n’enyigye tse

Mepɛ dɛ mekyɛ suahu bi so bio. Sanda 2019 mu no, wɔtoo nsa frɛɛ emi na me yer Debbie dɛ yɛnkɔ President Nelson no ɔfese. Nna ɔdze egua esi hɔ a ɔbɛn hɛn ara ma yɛtsena do no nkyɛ hɛn anankoroma rehyia. Ɔdze hɛn ɔfrɛ a yɛwɔ no ndɛ maa hɛn wiei no, President Nelson danee hwɛɛ Debbie na otsim wɔ no do. Ɔkyerɛ ayamuyie, ɔdwe, na enyigye ahyɛ no mã tse egya anaa nana banyin. Osuoo Debbie ne nsa mu dze ne nsa fefaa ho, maa no awerɛhyɛmu dɛ ɔbɛyɛ yie na hɛn ebusua benya nhyira. Dɛm aber no ɔyɛɛ hɛn dɛ hɛnho hia ma no kyɛn obiara na ɔwɔ mber pii ma hɛn. Yɛdze awerɛhyɛmu, ɔdɔ, na enyigye atsenkã fii no ɔfese dɛm Fida ewiaber no.

Dwowda no yɛhun kaseɛbɔ no. Dɛm da noara President Nelson nye hɛn dzii mber no, nna n’akyerɛbaa kor nam kokoram yarba do efi mu. Ahobow kãa hɛn. Hɛn akoma hyɛɛ mã ber a yedzii awerɛhow maa ɔno na n’ebusua. Ndaase so hyɛɛ hɛn akoma mu mã wɔ ne Christsu kwan a ɔkyɛɛn n’aso maa hɛn ber a oridzi awerɛhow wɔ n’akyerɛbaa a ɔrehaw ho.

Yɛdwendwen sũahu yi ho no, yebisa hɛnho dɛ, “Osi dɛn na otum kyerɛ ayamuyie na dɔ, na mpo enyigye wɔ mber dzendzen yi mu? Nyiano nye osiandɛ onyim. Onyim dɛ Christ edzi konyim. Onyim dɛ ɔbeka n’akyerɛbaa ho bio na ɔnye no atsena onnyiewiei mu. Dɛw na onnyiewiei nhumu ba wɔ ber a iridzi na irisie ahyɛmu na Christsu osuanyiyɛ dze akyekyer woho afam Agyenkwa no.

President Nelson akyerɛkyerɛ dɛ “Dɛm ara dɛ Agyenkwa no ma ‘asomdwee a ɔtra ntseasee nyina,’ [Philipifo 4:7] no. Ɔma dɛwdzi kɛse, a no mu trɛ na ɔbor nyimpa n’adwen anaa ɔnnkyebo ntseasee do so. Mfatoho, ɔyɛ dɛ onnkotum ayɛ yie dɛ ibenya enyigye ber a w’abofra hu amandze wɔ yarba a wonnkotum asã, anaa ber a w’edwuma efi wo nsa, anaa wo kun anaa wo yer yi wo ma. Naaso ɔno nye enyigye pɔkyee no a Agyenkwa dze ma.”

Ber yedzi ahyɛmu na yesie no, yɛnndwen hɛn nko hɛnho na yenya pɛ dɛ yɛboa binom ma woenya dɛwdzi na dɔ a yɛtse wɔ hɛn ahyɛmu nkitahodzi horow mu no. Yɛbotum aka adze kɛsenara wɔ asaase no do ndɛ—Israel mboano no ho. Yɛbotum aboa dze Nyankopɔn Ne mba aba Christ hɔ. Dɛ mbrɛ nkɔnhyɛnyi Jacob akyerɛkyerɛ dɛ, “Na nhyira akã hom; osiandɛ hom nye me ayɛ edwuma dzen do wɔ mo wenyin ture mu, na hom edzi me mbrasɛm do, na hom dze ɔnoara n’eduaba pa asan abrɛ me bio, … hom nye me bedzi dɛw osian mo wenyin ture mu eduaba no ntsi.”

Ber yɛkyekyer hɛnho dɛ yebedzi dwuma dɛ ahyɛmu esuafo no, ma hɛn tum tse biara no, yɛnye Egya na Ɔba nkitahodzi hyɛ mã, hɛn dɛw tu mpon na hɛn onyiewiei nhumu tserɛw. Na wɔdze tum behyira hɛn na yebotum atse dɛw a woesie ama Nyankopɔn nokwar ahyɛmu esuafo no. Jesus Christ ne dzin krɔnkrɔn no mu, amen.