Mma Hom Mmpirim Hom Akoma

Jesus Christ asɛmpa ne nsanananmu hyɛɛ ase ber a Nyame Egya no na Ne ba, Jesus Christ, puee akɔkowaba Joseph Smith do, yii n’ahobrɛadze mpaa ano. Ɔkã nsanananmu no ho no, Joseph Smith nam Nyankopɔn n’akyɛdze na no tum do kyerɛɛ tsetseberdo nkyerɛwee bi ase. Ɔyɛ kyerɛwsɛm a ɔfa mbrɛ Nyame sii nye tsetsemba a nna wɔtse America no nantsewee ho, na daapem asɛmpa ne mãhyɛ no wɔ mu.”

Ber a meyɛ banyimba no, nna mekenkan Mormon Nwoma no a, mpɛn pii modwendwen siantsir a Laman na Lemuel anngye nokwar a wɔdze maa hɔn no enndzi, mpo ber a Ewuradze no bɔfoe yii no ho kasaa kyerɛɛ hɔn pɛɛ. Dɛn ntsi na Laman na Lemuel enntum annyɛ ahobrɛadze na setsie amma hɔn Egya, Lehi na hɔn nuakuma Nephi hɔn nkyerɛkyerɛ?

Muhun nyiano kor bi maa dɛm asɛmbisa yi wɔ 1 Nephi, a ɔkã dɛ Nephi “dzii yaw wɔ hɔn akoma a epirim no ntsi.” Nephi bisaa no nuanom mpanyimfo dɛ “ɔyɛ dɛn ntsi na hom akoma ayɛ dzen dɛm na hom adwen mu efura hom yi?”

Ewɔ akomadzen a n’asekyerɛ nye dɛn?

Korea kasa nkyerɛase ma “dzendzen” wɔ Mormon Nwoma no mu nye 완악 (Wan-Aak: 頑惡). Dɛm asɛnsin yi dze China akyerɛwmba “Wan” (頑) asekyerɛ “ntsintsiman,” na “Aak” (惡), asekyerɛ “emumuyɛ.” Sɛ yepirim hɛn akoma a, hɛn enyi fura, na ndzɛmba pa nntum mmba hɛn akoma na hɛn adwen mu. Yɛyɛ ntsintsiman na yɛhyɛ ase tsim wɔ wiadze apɛdze do a, osiw hɛn akoma kwan ma Nyame ne ndzɛmba. Yɛsan mu yi dɛ yɛbetsim wɔ hɛnara hɛn adwen nko do a yɛpow binom hɔn adwenkyerɛ na akwankyerɛ. Yɛsan mu yi dɛ yɛnnkobue hɛn akoma ama Nyame ne ndzɛmba mbom yebue ma wiadze ndzɛmba na ɔsɛɛfo no ne nhyɛdo. Sɛ hɛn akoma yɛ dzendzen a yesiw Sunsum Krɔnkrɔn ne nhyɛdo kwan. Yɛyɛ “nyaa wɔ Ewuradze ne nkae ho” na mber rokɔ no “adze nntsɛ hɛn” wɔ Ne nsɛm ho.

Alma kyerɛkyerɛɛ nkorɔfo a wɔwɔ Ammonihah dɛ binom “so poow Nyankopɔn no Sunsum osian hɔn akomadzen.” Ɔkyerɛkyerɛɛ so dɛ “Na hɔn a wobepirim hɔn akoma no, hɔn na wɔbɛma hɔn asɛm no mu kumaabi kesi dɛ wonnkohu biribiara a ɔfa n’esumasɛm ho” Na ewiei no Sunsum no twe noho, na Nyame “beyi [N’asɛm]” efi hɔn a woepirim hɔn akoma, tse dɛ Laman na Lemuel no hɔn mu. Osiandɛ Laman na Lemuel kɔr do piriim hɔn akoma ntsi, wosiiw Sunsum Krɔnkrɔn n’atsenka kwan na wɔsaan mu yii dɛ wɔnnkɛgye hɔn egya na Nephi nkyerɛkyerɛ no ato mu, ewiei no wɔpoow onnyieiei nokwar a ofi Nyankopɔn hɔ.

Ɔnye Laman na Lemuel bɔ ebira no, Nephi kɔr do ahobrɛadze mu ara, hwehwɛɛ akwankyerɛ fii Nyame no Sunsum hɔ. Na Ewuradze goow Nephi n’akoma. Nephi kyɛɛ dɛ “musũi frɛɛ Ewuradze na hwɛ ɔbaa me nkyɛn, na ɔbɔdwedwee m’akoma ma megyee nsɛm nyinara a m’egya kãe no dzii.” Ewuradze boaa Nephi ma Nyankopɔn n’esumasɛm na Ne nsɛm nyina ɔgyee too mu, ɔtsee ase na ɔgyee dzii. Nephi tumii nyaa Sunsum Krɔnkrɔn N’ayɛnkoyɛ aber nyina.

Ebɛnadze na yebotum ayɛ ama hɛn akoma annyɛ dzendzen?

Odzi kan, yebotum enya daa daa nnuhu.

Hɛn Agyenkwa kyerɛkyerɛ dɛ, “Obiara a obonu noho na ɔayɛ dɛ abofra na ɔaba mo hɔ no, ɔno na mebɛgye no.” Hɛn nkɔnhyɛnyi dɔfo, President Russell M. Nelson , akyerɛkyerɛ dɛ:

Nnuhu nye saafee a yɛdze nya mpontu. Gyedzi a ho tsew ma yɛkɔ kan wɔ ahyɛmu anamɔnkwan no do.

“Meserɛ mma hom nnsuro anaa hom nntwentweɔn nnuhu. W’awerɛhowdzi yɛ Satan dɛw. … Hyɛ ase ndɛ dɛ irinya enyigye a ofi eropɔr honammunyi no egu. Agyenkwa no dɔ hɛn aber nyina mbom nkanka ber a yenu hɛnho.”

Ber a yenya dɛw a ɔnam yɛredwedwe hɛn akoma na yɛreba Ewuradze hɔ no yɛbɛyɛ dɛ “abofra, na ogyaa noho ma; ɔdwe, ahobrɛadze, onya abotar, ɔdɔ hyɛ no mã, onya pɛ dɛ ɔbɔsɔw biribiara a Ewuradze noara nyim dɛ oye dɛ ɔdze ba no do, koraa mpo ɔyɛ dɛ mbrɛ abofra gyaa noho ma n’egya no.”

Otsĩa ebien, yebotum enya ahobrɛadze.

Daa daa nnuhu dze ahobrɛadze bɛba hɛn akoma mu. Ɔsɛ dɛ yɛbrɛ hɛnho adze wɔ Ewuradze n’enyim, tse dɛ abofra a ɔyɛ setsie ma n’egya. Na aber nyina yebenya Sunsum Krɔnkrɔn ma ɔnye hɛn atsena, na hɛn akoma bɔgow.

Emi na me yer, Sue, nyim awarfo nwanwafo bi mfe anan nye yi. Yehyiaa hɔn ahyɛse no, nna no kun yɛ asɔrba fofor na ne yer nye asɛmpakafo no rusũa nsɛmpa no. Asɛmpasomafo pii hyiaa no ama wɔaaboa no ma wɔaba Christ hɔ. Yɛtsee nkã dɛ ɔwɔ tum dasegye wɔ nsɛmpa no ho, na onyim dɛ Asɔr no yɛ nokwar. Ɔtsee Sunsum ne nkã mpɛn pii ber a yɛkɛsera no na ɔdze noho hyɛɛ dwumadzi nyina mu ahokeka mu ara. Nna ɔdɔ dɛ ɔnye asɔrmba afɛfɛw a wɔwɔ ward no mu nya nkitahodzi. Mbom, nna ɔyɛ dzen ma no dɛ ɔbɛhɛn enuma nsubura no mu. Dakor bi nna ɔrekenkan Moroni 7:43–44, a ɔkenkan dɛ:

“Na hwɛ bio, mekã kyerɛ hom bio dɛ orunntum nnya gyedzi nye enyidado, gyedɛ ɔdwe na onya botooyɛ akoma.

Sɛ ɔtse dɛm dze a, nna [wo] gyedzi nye [w]’enyidado no yɛ egyangyandze, osiandɛ obiara nndzi mu wɔ Nyankopɔn enyim, gyedɛ hɔn a wɔdwe na wɔwɔ botooyɛ akoma.”

Ɔkenkan dɛm nyiyimu wiei no obohun dza ohia dɛ ɔyɛ. Ɔdween dɛ ɔatse ɔdwe na ahobrɛadzee ase. Mbom, nna ne ntseasee no nnsõ pii a ɔbɛma oenya gyedzi na awerɛhyɛmu dze edzi Nyankopɔn ne mbrasɛm do. Nna ɔwɔ dɛ ogyaa n’asokyew na ɔnoara ne nyansaa mu. Ɔhyɛɛ ase nam nnuhu nokwar mu do brɛɛ no ho adze. Ɔhyɛɛ ase tsee ahobrɛadze ase wɔ Nyankopɔn no nhumu kwan do. Ɔtweer Ɔsor Egya na ɔbɔɔ mpaa ama ɔnoara n’akoma agow. Ɔnam mpaabɔ yinom do onyaa Sunsum ne dasegye dɛ no Ɔsor Egya pɛ dɛ wonuma no.

Kun na yer beenu yi kyɛɛ dɛ mpɛn dodow ara a wonyaa ahobrɛadze no wotumii tsee Nyankopɔn ne nsɛm ase, na hɔn akoma gowee ma wodzii Ewuradze Jesus Christ ne nkyerɛkyerɛ do.

Otsĩa ebiasa, yebotum atwer hɛn Agyenkwa.

Nna Nephi yɛ fasusu kɛse fa ɔrotwer Ewuradze ma n’akoma agow ho. Ɔkyerɛkyerɛe, “medze mo werɛ atwer wo, na wo mu na medze mo werɛ bɔtwer afebɔɔ. Meremmfa mo werɛ nntwer honam abasa” Dɛm ara so, wɔ nyikyerɛ a wɔdze maa Joseph Smith mu, Ewuradze kãa dɛ, “Fa wo werɛ hyɛ Sunsum no a ogya wo ma eyɛ papa—nyew, ma ɔma idzi pɛrpɛr, ɔma enantsew ahobrɛadze mu.” Yɛdze hɛn werɛ hyɛ Ewuradze mu na yɛtwer No a, Ɔbɛma hɛn akoma agow, na yebenya abamba wɔ hɛn ɔhaw, ɔfona, na amandze mu.

Sɛ yenu hɛnho nokwar mu, yɛbrɛ hɛnho adze, na yɛdze hɛn werɛ hyɛ na yɛtwer Ewuradze a hɛn akoma bɔgow. Na afei Obohue No Sunsum na Ɔakyerɛ hɛn sor esumasɛm. Yɛbɛgye Ne nsɛm a Ɔakyerɛkyerɛ nyina edzi, na hɛn ntseasee mu bɔdɔ.

Hɛn Agyenkwa, Jesus Christ, nye ɔdwe ne fasusu kɛse. 2 Nephi 31:7 mu no, yɛkenkan dɛ, “Mbom ɔno a ɔyɛ krɔnkrɔn no ɔyɛe dze kyerɛɛ adasamba dɛ, ɔnam honam afamu brɛɛ noho adze wɔ Egya n’enyim, na ɔdze gyee dase kyerɛɛ Egya no dɛ ɔbɛyɛ setsie ama no na oedzi ne mbrasɛm do.” Ɔwɔ mu dɛ Ɔyɛ krɔnkrɔn na Odzi mu, eso Ɔbrɛɛ noho adze wɔ Egya n’enyim na ɔyɛɛ setsie maa No ma wonumaa no.

Owiee No ɔnnkyebo abrabɔ no, Jesus Christ dze Nankasa Ne pɛ maa N’Egya na Ɔnom kuraba wenwen no. Dɛm amandzehu yi maa “[n]oho popoe osian yaw ntsi, na bɔgya fii [n]o honandua enyi nyina kyii, na [o]hun amandze wɔ honam nye sunsum mu.” Agyenkwa no bisaa dɛ “nkyɛ [Ɔ]nnkɔnom kuraba wenwen no ano na [ɔ]awodow.” Ɔkãa dɛ, “Naaso, enyimnyam nkã Egya no, na [Ɔ]nomee na [O]wiee [No] mboaboaho biara yɛ dze maa adasamba.”

Enuanom na nkyerɛbaa wɔama hɛn hɛn pɛ su. Yebotum yɛasan mu epirim hɛn akoma, anaa .yebotum yɛasan mu agow hɛn akoma. Hɛn daa daa abrabɔ mu no, yebotum yɛasan mu ayɛ ndzɛmba a ɔma Nyame no Sunsum bɛtsena hɛn akoma mu. Minyim dɛ asomdwee na enyigye wɔ dɛm nsanmuyi no mu.

Hom mma yɛmmfa Jesus Christ a Odzi Egya ne pɛ do ne fasusu no do. Yɛreyɛ no Ewuradze abɔ hɛn anohoba dɛ, ,“Na, hwɛ, sɛ woemmpirim hɔn akoma a, mobɔboaboa hɔn ano dɛ mbrɛ akokɔbaatan boaboa ne mba ano hyɛ ne ntsaban ase no.” Jesus Christ ne dzin mu, amen.