“Hom Ntwe Mbɛn Me’’

Enuanom na nkyerɛbaa adɔfo, ɔyɛ enyigye ma me dɛ menye hom wɔ Jesus Christ N’Asɔr a ɔwɔ hɔ ma Nda a Odzi Ekyir Ahotseweefo ne wiadze mfɛndzanan ehyiadzi yi ase. Iyi nye N’Asɔr. Yɛaboa ano wɔ Ne dzin mu wɔ adan na efiefi mu wɔ wiadze nyina mu.

Yɛfa Ne dzin to hɛn do ber a yedua ahyɛmudzi mu dze hɛn N’ahenman no mu no. Ɔyɛ Nyame ne Ba enyimnyamfo a Ɔasoɛr efi owu mu. Yɛnnkye bo, na bɔn na owu tum hɛn. Naaso wɔ No dɔ a Ɔwɔ ma hɛn mu kor biara no, Ɔto nsa frɛ hɛn dɛ yɛmbɛn No yie.

Ne nsato ma hɛn nye yi: “Hom ntwe mbɛn me na mobɔtwe abɛn hom; hom nhwehwɛ me enyiberdo na hom bohu me; hom mbisa na hom nsa bɛkã; hom mbɔ mu, na wobobue ama hom.”

Ɔto mber binom a yɛtse dɛ yɛabɛn Agyenkwa Jesus Christ. Naaso, hɛn honandua mu nsɔhwɛ mber mu no, yɛtse dɛ yɛnye No ntamu atwe na yɛpɛ awerɛhyɛmu no dɛ Onyim dza ɔwɔ hɛn akoma mu na dɛ Ɔdɔ hɛn ankorankor.

Kwan a yebodua do atse dɛm awerɛhyɛmu no kã Agyenkwa no ne nsato no ho. Yɛnkaa No aber nyina mfa ntwe mbɛn No. Yɛndua kyerɛwsɛm adzesũa do mfa nhwehwɛ No enyiberdo. Dua akoma mu nokwar mpaabɔ do ma Ɔsor Egya fa tse dɛ abɛn No Dɔba no yie.

Kwan a ɔda famu wɔ hɔ a yebotum dze adwen ho. Ɔyɛ dza ebɛyɛ sɛ mber egu mu a enye anyɛnkofo adɔfo hɔn ntamu apaa a. Nkyɛ ibɔhwehwɛ kwan bi a enye hɔn benya nkitahodzi, na nsɛm biara ibɛtse efi hɔn nkyɛn no bɔsom wo bo, na ebɛyɛ biribiara ibotum ayɛ dze aboa hɔn.

Dɛm rokɔ do no, na ɔrekyɛr yie no, na anyɛnkoyɛ nkitahodzi no mu bɛhyɛ dzen, na hom bɛtse dɛ hom rebɛn homho ara yie. Sɛ mber pii twa mu na woennya nkitahodzi na kwan a wɔbɛyɛ adze aboa hɔnho nkorkor a, nkitahodzi no mu bɛyɛ mberɛw.

Jesus Christ dɔ hɛn mu kor biara. Ɔma hɛn kwan dɛ yɛmfa ntwe mbɛn No. Dɛ mbrɛ ebɛyɛ ama nyɛnko dɔfo, ebɛyɛ no dɛm kwan noara do, dɛ enye Ɔsor Egya bodua mpaabɔ do wɔ Jesus Christ ne dzin mu enya nkitahodzi, etsie kwankyerɛ a ɔsom bo fi Sunsum Krɔnkrɔn no hɔ, na nkyii ɔasom binom ama Agyenkwa no enyigye mu ara. Ɔnnkɛkyɛr ibɛtse eretwe abɛn No ne nhyira ho nkã.

Me mbabun ber mu no, minyaa enyigye a merebɛn Agyenkwa no a—na Ɔno rebɛn me no ho sũahu, ber a mereyɛ ndzeyɛɛ nketsenketse dɛ setsie ma mbrasɛm ara no. Ber a musuar no, nna sacrament no wɔma no ewimbir nhyiamu ase. Meda ho kaa ewimbir pɔkyee bi, bɔbor mfe 75 a wɔabɛsen, ber a nna abowano ayɛ sum na awɔw. Mekaa kan na hyew atsenkã ber a muhun dɛ mesie mbrasɛm no dɛ yɛnye Ahotseweefo no mboa ano na yendzi sacrament no, a yɛnye hɛn Ɔsor Egya ridzi ahyɛmu dɛ aber nyina yɛbɛkaa Ne Ba na yesie Ne mbrasɛm no.

Nhyiamu no baa ewiei dɛm anafua no, yɛtoow ndwom “Abide with Me; ’Tis Eventide,” a no mu nsɛm ayɛ atsenkã, “O Agyenkwa, nnye me ntsena anafua yi.”

Nsɛmfua yinom dze Sunsum no atsenkã a ɔhyɛɛ mo do kɛsenara, meyɛ banyimba no mpo. Metsee Agyenkwa No dɔ na dɛ odua Sunsum Krɔnkrɔn no n’awerɛkyekyer do Ɔbɛn me dɛm ewimbir no.

Mfe pii ekyir no, mepɛɛ dɛ mekenyan Agyenkwa no dɔ na ne mbɛnee a metsee Ewuradze hɔ no wɔ dɛm sacrament nhyiamu ase wɔ me mbabun ber mu no. Ntsi mesiee mbrasɛm kor so a ɔnnyɛ dzen: Mohwehwɛɛ kyerɛwsɛm no mu.

Luke nwoma mu no mekenkaan dɛ nda ebiasa a odzi Ne Mbeamuduabɔ na funsie ekyir no, ber a asomfo nokwafo, dze dɔ ma Agyenkwa no, baa dɛ wɔrebɛsera No honandua no ngo. Wokodurii no, wohun dɛ woepireew ɔbo no efi nda no ho, na wohun dɛ No honandua nnyi hɔ.

Abɔfo beenu gyinaa hɔ na wobisaa hɔn dɛ dɛn ntsi na wosuro:

“Ɔyɛ dɛn na hom rohwehwɛ nyia ɔtse ase no wɔ ewufo mu yi?

“Onnyi ha, na ɔasoɛr: hom nkaa mbrɛ ɔda ho wɔ Galilee no, ɔkãa kyerɛɛ hom,

“Dɛ, ɔsɛ Nyimpa Ba no dɛ wobeyi no ahyɛ ndzebɔnyɛfo nsa na wɔabɔ no mbeamudua mu, na da a otsĩa ebiasa no ɔasoɛr bio.”

Dɛm ewimbibaamu no, esuafo beenu nantsewee fi Jerusalem wɔ Emmaus kwan no do, na Ewuradze a Ɔasoɛr puei na Ɔnye hɔn nantsewee.

Luke nwoma no ma hɛn kwan ma yɛnye hɔn tu anamɔn dɛm ewimbir no:

“Na ɔbaa dɛ, woridzi nkɔmbɔ na woribisabisa hɔnho no, Jesus nankasa twee bɛɛn hɔn nye hɔn siaan anan kɔreee.

“Na wosuoo hɔn enyiwa mu, ma woennhu ne nyimpa ban.

“Na ɔsee hɔn dɛ, Ebɛn nsɛm nye yi a hom dze ridzi nkɔmbɔ nam yi, na hom werɛ ahow yi?

“Na hɔn mu ɔbaako a ne dzin dze Cleopas see no dɛ, Ɔwo nko na eyɛ ɔhɔho wɔ Jerusalem, na innyim dza ɔaba nda yi mu?”

Wɔkãa kyerɛɛ No hɔn yaw dɛ Jesus ewu, Ɔno a wɔtweer no dɛ Ɔbɛyɛ Israel Pomfo no.

Mbrɛ ɔbɛdan biara no Ewuradze a Ɔasoɛr no dze ɔdɔ ndze ber a Ɔkasaa kyerɛɛ esuafo beenu yinom a woridzi awerɛhow na worusũ yi.

Ber a mokɔr do kenkanee no, nsɛmfua yinom a ɔdwedwee m’akoma, tse dɛ ma metsee ber a nna meyɛ banyimba kakraba no:

“Na wɔbɛɛn ekuroba a wɔrokɔ mu no, nna ɔyɛɛ dɛ dza ɔrokɔ n’enyim.

“Na wɔhyɛɛ no dɛ, Nye hɛn ntsena: na orudu ewimbir, na adze reyɛ asa. Na ɔmanee dɛ ɔnye hɔn bɛtsena.”

Agyenkwa no gyee too mu anafua dɛ ɔbɛhɛn N’esuafo no fie. Ɔnye hɔn tsenaa ase dzidzii. Ɔfaa paanoo, na ohyiraa do, na obubui maa hɔn. Na hɔn enyiwa buei; na wohun No. Nkyii Ɔyeew hɔn enyiwa do.

Luke kyerɛɛw esuafo a woehyira hɔn no hɔn nkã-tse maa hɛn: “Na wɔsee hɔnho dɛ, Ɔnye hɛn rekasa wɔ kwan mu, na obuee kyerɛwsɛm no mu kyerɛɛ hɛn no, hɛn akoma annhyehye hɛn mu anaa?”

Esuafo beenu no nkyii wɔfaa twitwi sii mu kɔr Jerusalem ntsɛmara bɛkãa dza woesi hɔn do no kyerɛɛ Asomafo dubiako no. Ber a wogu do rekyɛ dza woesi hɔn do no, Agyenkwa no puei bio.

Obegyinaa hɔn finimfin na “ɔsee hɔn dɛ, Asomdwee nkã hom.” Na nkyii Obue nkɔnhyɛ a ɔfa No ndwuma ho dɛ Ɔbɔbɔ werdam ama N’Egya ne mba nyina hɔn bɔn, na oebubu owu mpokyerɛ mu.

“Na ɔsee hɔn dɛ, Dɛmara na wɔakyerɛw no, dɛ Christ no bohu amandze na da a otsĩa ebiasa no ɔasoɛr efi ewufo mu:

“Na woedua ne dzin do akɛkã nnuho nye bɔnfakyɛ akyerɛ amanaman nyina, wobefitsi ase wɔ Jerusalem.

“Na hom yɛ iyinom ho adasefo.”

Tse dɛ N’esuafo adɔfo no, Ɔsor Egya ne ba kor biara a ɔsan mu yi dɛ obodua enuma abobow no mu no wɔ ahyɛmudzi ase dɛ ɔbɛyɛ dasefo ama Agyenkwa no na ɔahwɛ hɔn a wɔwɔ hia mu wɔ no ɔnnkyebo abrabɔ nyina mu. Pisi yi Mormon Nwoma nkɔnhyɛnyi okunyin Alma ayɛ no pefee ama hɛn mfe aha pii a abɛsen no wɔ Mormon Esu no ho:

“Hom enya pɛ dɛ hom bɛba Nyame no nguanbuw mu na wɔafrɛ [hom] no nkorɔfo, na hom wɔ pɛ dɛ hom soasoa kor biara n’adzesoadze ama ɔayɛ har;

“Nyew, na hom pɛ dɛ hom nye hɔn a hɔn werɛ ahow dzi hɔn yaw, nyew, na wɔkyekye hɔn a wohia awerɛkyekyer no hɔn werɛ, na wogyina dɛ Nyankopɔn n’adasefo aber nyina wɔ adze nyina mu … , kesi owu mu mpo, ama Nyankopɔn apon hom, … ama hom eenya onnyiewiei nkwa.”

Sɛ hom dzi nokwar ma anohoba horow yinom a, hom bohu dɛ Ewuradze sie N’anohoba dɛ Ɔbɛka hom ho wɔ hom som mu, ama hom adzesoadze ayɛ har. Hom bɛba ebohu Agyenkwa no, na mber rugu mu no hom bɛba abɛyɛ dɛ Ɔno na “hom edzi mu wɔ no mu.” Eroboa nkorɔfo ama Agyenkwa no, ebɛba ebohu dɛ erotwe bɛn No yie.

Hom mu dodowara wɔ adɔfo a wɔaman efi onnyiewiei kwan no do. Hom bosusu dɛ, dɛn bio na hom botum ayɛ a ɔdze hɔn bɛsan aba. Hom botum atwer Ewuradze dɛ Ɔbɔtwe abɛn hɔn ber a hom dze gyedzi som No.

Hom kaa Ewuradze N’anohoba a Ɔdze bɔɔ Joseph Smith na Sidney Rigdon ber a nna woefi hɔn ebusuafo nkyɛn wɔ N’edwuma ho ntsi: “M’anyɛnkofo Sidney Rigdon na Joseph, hom ebusuafo ho ye; wɔhyɛ me nsamu, na dza oye ma me no na mebɛyɛ ama hɔn; na mo mu na tum nyina wɔ.”

Ber a ekyekyer hɔn a wɔwɔ hia mu hɔn ekur no, Ewuradze no tum bɛgye wo abamba. Ɔbɛtsen N’abasa mu aka wodze ho, dze aboa na woehyira Ɔsor Egya Ne mba.

Jesus Christ ahyɛmu-somfo biara benya No kwankyerɛ efi Sunsum no hɔ ber a ohyira na ɔsom nkaafo ma No. Nkyii wɔbɛtse Agyenkwa no dɔ nkã na woenya enyigye dɛ wɔatwe abɛn No no.

Meyɛ Ewuradze No Wusoɛr ho dasefo ampaara tse dɛ nkyɛ menye esuafo beenu wɔ fie a ɔwɔ Emmaus kwan no do. Minyim dɛ Ɔtse ase.

Iyi nye No nokwar Asɔr no—Jesus Christ N’Asɔr. Yebegyina Agyenkwa N’enyim, enyim na enyim Atsɛmbu Da no mu. Ɔbɛyɛ enyigye mber kɛse ma hɔn a, abrabɔ yi mu yi, wɔatwe abɛn No wɔ No som mu na wobotum enyi ada dɛ wɔbɛtse Ne nsɛmfua enyiberdo: “Mbo, akowa pa nye nokwafo.”

Megye dase dɛ dasefo wɔ Agyenkwa No a Ɔasoɛr no na hɛn Pomfo No, wɔ Jesus Christ dzin mu, amen.