Yɛrema Nkwa Asom Hɛn Bo
Nkwa nye hɛn Egya ne nhyehyɛɛ a odzi mu no n’afã a ɔsom bo papaapa, na ɔnam No ɔmom do nkwa som hɛn bo na yɛbɔ ho ban.
Hɛn Agyenkwa, Jesus Christ, kyerɛkyerɛɛ hɛn dɛ, “Ɔnam iyi do na nyimpa nyina bohu dɛ hom yɛ m’esuafo, sɛ hom wɔ ɔdɔ ma homho nkorkor a.”
Bishop bi a ɔwɔ Utah ndaansa yi nye me kyɛɛ ɔdɔ kɛse bi a no wardfo dze kyerɛɛ akataasiaba bi na n’ebusua. Ɔnam nsɛm dɛw a osisii do, awofo no sii nkitsi dɛ wɔbɛsan aba Agyenkwa no hɔ na N’Asɔr mu. Mber a wɔnye Asɔr no ntamu twee no, hɔn ababaawa abasirba nye aberantsɛba bi hyehyɛɛ hɔ. Wɔresan no, ababaawa yi tsee ɔdɔ soronko nkã fii no Ɔsor Egya hɔ ber a ɔwɔ Young Women dasegye nhyiamu bi ase. Ɔyɛɛ n’adwen dɛ obesie mbrasɛm no emudzi mu. Ɔkyerɛɛw dɛ, “Menye me bishop hyɛɛ nnuhu kwan no ase.”
Ɔno ekyir no, ɔannkyɛr na ɔbɛyaree. N’asɛm mu no: “Test [kor bi] kyerɛɛ dɛ minyinsɛn. Mehyɛɛ ase dɛ murusũ. … M’egya dze n’abasa bebaar mo ho na ɔmaa me awerɛhyɛmu dɛ biribiara [bɛyɛ] OK. … Mo boyfriend kãa kyerɛ me dɛ minkeyi abodomaba no ngu. … Mannyɛ.”
Yɛrohwɛ Hɔn a wɔwɔ Hia mu no Do
Ɔsɔɔw do dɛ: “Menya dɔ na bambɔ kɛse efi mo ward ebusua hɔ. Nna ɔbor mo do. [Me] bishop na Young Women president ayɛ dza ɔbor do dze akyerɛ hɔn dɔ na abamba. … Mehu Ewuradze n’abasa … Ɔrema emi na m’ebusua akwankyerɛ. … Ward a ɔtse dɛ medze yi na obiara hia, nkankara akataasiaba a ɔwɔ me gyinabew mu.”
Kwakwar bosoom abɛsen mu no, ɔno na n’ebusua na ward ebusua no yɛɛ n’abodomaba banyimba etuu ɔdɔ mu ara.
President Russell M. Nelson kãa dɛ, “Dza ɔda Ewuradze no nokwar tseasefo Asɔr no edzi ber biara bɛyɛ mbɔdzembɔ a wɔayɛ ho nhyehyɛɛ … dɛ wɔbɔsom Nyame ne mba ankorankor … [a wɔdze ɔdɔ-ayamuyie rosom] ɔbaako no, tse dɛ ma Ɔyɛe no.”
Yɛroboa Tsenenee Nsanmuyi horow
Sɛ basia ɔhokwafo hu dɛ onyinsɛn ba a ennyi nnda kwan a, apɔwmudzen ho adwendwen, sunsum mu atseetsee, enyito, sikasɛm ho adwendwen, nwomasũa ho adwen, awar sɛ ɔbɛba do o, na adaaso enyidado a ayɛ gyan ho yaw botum wɔ ber a onnhu dza ɔnyɛ no, begya basia no ma ɔafa kwan a ɔdze yaw kɛse na mfehoekyir bɛba.
Obiara a oritsie na ɔatse yaw kɛse na mfehoekyir dɛ oetu nyinsɛn egu anaa ɔdze noho ahyɛ nyinsɛn-tu gu mu no, meserɛ kaa: Yennkotum asesã dza wɔabɛsen no dze, naaso Nyankopɔn botum asa dza wɔabɛsen no yarba. Bɔnfakyɛ botum edua No ɔpon adom n’anwanwadze mu aba, ber a edze ahobrɛadze na nnuho akoma dan kɔ No hɔ
Nsɛmfua ebien a wɔtaa dze fam ɔnnkyebo awoo no krɔnkrɔnyɛ ho nye: nkwa na nsanmuyi. Nkwa nye hɛn Egya ne nhyehyɛɛ a odzi mu no n’afã a ɔsom bo papaapa, na ɔnam No ɔmom do nkwa som hɛn bo na yɛbɔ ho ban, na yɛsan mu yi nkwa ntoado woenya enyinsɛn no no. Hɛn pɛ su akyɛdze—som hɛn bo na ɔboa ma wɔhyɛ tsenenee nsanmuyi horow a Nyankopɔn apen do na ɔdze onnyiewiei enyigye ba no dzen.
Sɛ ɔbaa na ɔbarimba wɔ mber a ɔyɛ dzen dɛm mu a, worihyia nsanmuyi a ohia ara yie a, hɛn nsɛm, hɛn nsa, hɛn adwen—sunsum mu, atsenkã mu, na sikasɛm mu—botum aboa hɔn ma wɔatse Agyenkwa no dɔ nkã na, dɛ mbrɛ President Henry B. Eyring akã no, ɔdze ntseasee abrɛ hɔn sunsum mu enyiwa, fi “dza wɔdwen dɛ wohu” akɔ “dza wonnkotum ehu sesei.”
Ɔnnkyebo Abrabɔ Nkyerɛkyerɛ no
President Dallin H. Oaks akã dɛ: “Hɛn su wɔ nyinsɛn-tu gu ho nngyina ber a ɔnnkyebo abrabɔ yi hyɛ ase ho nyimdzee do. … Dza osi no pi nye hɛn nyimdzee dɛ … Nyame no sunsum mu mba nyina otwar dɛ wɔba asaase yi do wɔ enyimnyam botae do, na dɛ ankorankor ne nyimpa ban hyɛɛ ase ansaana wɔrenyinsɛn no na ɔbɔkɔ do afebɔɔ kesi afebɔɔ.”
Ewuradze n’asɛm a ɔfa hɔn a wonnyaa nnwoo hɔn, a wɔdze President a Odzi Kan na n’Apamfo na Asomafo Duebien no hɔn Quorum no hɔn ndze akã no, nsesaa na ɔgyegye wɔ nkɔnhyɛfo hɔn nsɛm mu mfe nyina mu a, ɔma sor pefeeyɛ wɔ dza Ewuradze ase hɛn no.
“Jesus Christ N’Asɔr a ɔwɔ hɔ ma Nda a Odzi Ekyir Ahotseweefo no gye nyimpa no nkwa no krɔnkrɔnyɛ dzi. Dɛm ntsi, Asɔr no tsia nyinsɛn-tu gu a ankorankor yɛ ma hɔnankasa hɔn ho anaa hɔn dzibew ho ahotɔ ho, na otu n’asɔrmba fo dɛ mma wɔnnyɛ, wɔnnhyɛ nkuran dɛ wɔnyɛ, wonntua ho kaw, anaa wɔnnyɛ nhyehyɛɛ mma nyinsɛn-tu gu a ɔtsetse dɛm.
[Ewuradze] ma dza obotum dɛ ɔnnkã ho … ber a:
-
Nyinsɛn no yɛ mbɔndarto anaa bɔgya fora nsunsuando, anaa
-
Datser a ɔawea kyerɛ dɛ enã no no nkwa anaa n’apɔwmudzen nnyɛ koraa, anaa
-
“Datser a ɔawea kyerɛ dɛ ba no wɔ esintɔ bi a sɛ wɔwo no a ɔnnkotum atsena ase.”
President a Odzi Kan na n’Apamfo kɔ do dɛ: “Nyinsɛn-tu gu yɛ asɛm kɛse papaapa. [Gyinabew horow yinom mu mpo a ɔnntaa nsisi no] ɔsɛ dɛ wɔdwen ho ekyir no a hɔn a wɔwɔ ho asodzi no edua mpaabɔ mu dze enya ho pisi,” na wɔnye binom so afa ho apam.
Mfe eduasa a abasen kɔ no, Ewuradze no nkɔnhyɛfo dze mpaamukã maa wiadze. Nsɛmfua yinom kã ho:
“Yɛ … paa mu kã dɛ Nyankopɔn ahyɛ mbra dɛ awo ho tum krɔnkrɔn no wɔdɛ odzi dwuma wɔ banyin na ɔbaa a wɔawar wɔ mbra kwan do, dɛ kun na yer, nkotsee ntamu.
“Yɛpaa mu kã dɛ kwan a wodua do dze bɔ nkwa a ɔnnkyebo yi ho yɛ Nyame ahyɛdze. Yesi nkwa no krɔnkrɔnyɛ, na no ho hia tsitsir wɔ Nyankopɔn no onnyiewiei nhyehyɛɛ mu pi.”
Yɛrenyɛn na yɛrobɔ nkwa a wonnyaa nnwoo no ho ban no nnyɛ amanyɛsɛm ho gyinabew. Ɔyɛ ɔbra pa ho mbra a Ewuradze edua No nkɔnhyɛfo mu esi no pi.
Yɛrepaa Mu Akã no
Asɛm bi a President J. Reuben Clark Kakraba, a ɔsoom wɔ President a Odzi Kan na n’Apamfo mu no, kã ndɛ mbabun ho asɛm fɛfɛɛfɛw. “Ndɛ Asɔr mu mbabun no Sunsum mu ndzɛmba ho kɔm dze hɔn; wɔdze enyimia pɛ dɛ wosũa asɛmpa no, na wɔpɛ no tɔɔtsen, a wɔnnforafora mu. Wɔpɛ dɛ wohu … hɛn gyedzi ho nsɛm; wɔpɛ dɛ wonya nokwar [no] ho dasegye. Wɔyɛ … ahwehwɛmufo, rohwehwɛ nokwar no.” Hom mma yentaa mfa gyedzi na ayamuhyehye nkasa wɔ hɛn ebusua ebusua mu, hɛn efiefi mu, nye hɛn ho nkorkor, na wɔ hɛn Relief Society na elderfo quorum nhyiamu horow mu mfa Ewuradze n’ahosan mbra no, nkwa no krɔnkrɔnyɛ ho, na mbrɛ wosi hwɛ hɔn a wonnyaa nnwoo hɔn na hɔn nãnom.
Akyerɛbaa dɔfo kyerɛɛw dza ɔtoo no mfe du mfe du abasen kɔ ho asɛm brɛɛ me: “Meyɛ mfe 17-baa no … , muhun dɛ minyinsɛn a mo boyfriend no mboa yɛ kakrabaa. Ɔyɛɛ me enyito na meyɛɛ ankonam [mbom] mennsusu dabiarada [dɛ mibeyi egu]. … Nna [mowɔ] ebusua adɔfo na me bishop a, metaa nye no hyia gye kwankyerɛ. … Medanee kɔr Nyame hɔ. Mekenkaan kyerɛwsɛm no … na mobɔɔ mpaa [na] muduaa m’Agyenkwa na nnuho kwan no do nyaa ahoɔdzen. … Minyaa [me mpaabɔ ho] mbuae a munnkotum apow. … Nna ɔyɛ akomabubu, naaso nna minyim dɛ medze me babaa no bɛma ma abanyɛn. … Mobɔɔ mpaa hwehwɛɛ akokodur [na] muduaa nnuhu mu tsee Agyenkwa no dɔ pefee, minyim dɛ Nyankopɔn … yi mpaabɔ ano na Ɔhyɛ hɛn dzen.
Awarfo adɔfo bi paa abodomaba akyerɛbaa a ɔsom bo no abanyɛn na wɔkyerɛkyerɛɛ no asɛmpa no. Sesei ɔawar a ɔwɔ nankasa n’ebusua fɛɛfɛw.
Ɔtɔ mber bi a, ɔyɛ dzen papaapa na yennyim dza ɔbɛba botum afa nkwa ne bambɔ ho.
Ndaansa yi awarfo kumabaa a emi na Kathy dɔ hɔn kyerɛɛw me faa abodomaba a ɔsom bo hɔn enyi da n’awoo do ho asɛm.
Egya kyerɛɛw dɛ: “[Ber a me yer wɔ] ne nyinsɛn adapɛn 10 mu yehun dɛ hɛn abodomaba nwanwafo no wɔ awoosu bi a wɔtaa frɛɛ no Down syndrome no. Yɛtsee nhyɛ … fi ayarhwɛfo asoɛe dɛ yɛndwen ho mpon no. Adapɛn kakra ekyir no yehun dɛ … hɛn ba a wɔnnwoo no no … behia akoma ɔprehyɛn ahorow wɔ n’afe a odzi kan no mu. Iyi rokɔ do no ber a yɛbɔɔ mpaa enyiberdo rohwehwɛ ɔsor mboa no, … yɛtsee Sunsum ne nkã dɛ ɔrema hɛn awerɛkyekyer. Yenyaa nyikyerɛ na ntseasee dɛ hɛn babaa no yɛ Ɔsor Egya ne ba soronko na ɔwɔ pɛ dzendzen dɛ ɔba hɛn ebusua mu na ɔba asaase do.
Abodomaba no ne nã kyerɛɛw dɛ: “[Ɔyɛɛ hɛn ahobow kɛse, hɛn adwen yɛɛ konsẽe, na nokwar ara asɛm no tsetseew hɛn. … Me nyinsɛn wɔ adapɛn 14 mu no, yehun dɛ hɛn abodomaba no wɔ akoma mu yarba horow a wɔdze bɔwo no a obotum ayɛ esian. Yehun adatserfo na hɔn a wɔawea pii fi nyinsɛn adapɛn 10–18. … Ber biara a yehyia hɔn no, wobisaa hɛn dɛ ana yɛpɛ dɛ nyinsɛn no kɔ do anaa wontwa do. … Agyenkwa no saa m’akoma yarba na Ɔmaa me asomdwee atsenkã na hɛn abodomaba basiaba no ho enyigye. … {Ɔsor Egya] akyerɛ me ofi mber to mber dɛ Ɔwɔ nhyehyɛɛ a odzi mu ma me [na] mowɔ awerɛhyɛmu wɔ No mu.”
Wɔyɛɛ hɔn abodomaba basiaba akwaaba enyigye mu ara dapɛn kor ara nye ndɛ. Ɔyɛ hɔn dze na wɔyɛ ne dze afebɔɔ.
Gyedzi a onnhihihim na akokodur soronko na Jesus Christ esuafo da no edzi.
Gyedzi Fasusu Nwanwa bi
Mfe egu mu no, menya ndzinoa dɛ mihyia mbanyin na mbaa a wɔahwehwɛ ahobrɛadze mu ara dɛ wɔbɛsan aba ahyɛmudzi anamɔn kwan no do na hɔn asɔfodzi na temple nhyira horow mu mfe pii ekyir a wɔayew hɔn asɔrbayɛ no.
Ber kor bi, nna ɔwɔ dɛ meyɛ banyin bi yɛ kokoamu mpɛnsapɛnsamu wɔ n’asɔfodzi na temple nhyira horow no nsanananmu ho ma President a Odzi Kan na n’Apamfo.
N’awar ekyir wɔ temple krɔnkrɔn mu no, na oenya mba nwanwafo baasa no, banyin yi enndzi nokwar amma ne yer na n’ahyɛmudzi krɔnkrɔn no. Ɔbaa ɔhokwafo nyinsɛnee na ɔpɛɛ dɛ otu gu.
Okun no ne yer bɔbɔfo no totɔe serɛɛ ɔbaa no dɛ ɔnwo abodomaba no na ɔbɔɔ anohoba dɛ ɔwo abodomaba no a ɔdze ba no bɛkã nankasa ne mba ho atsetse hɔn.
Ɔbaa ɔhokwafo no dween ho yie na ɔpeen do dɛ orunntwa nyinsɛn no do.
Sesei mfe 10 nye yi. Akyerɛbaa bɔbɔfo a ɔtsena m’enyim yi dɔɔ banyimba no dɛ nankasa nedze na ɔkãa kyerɛɛ me no kun no mbɔdzembɔ ɔayɛ dze repata na ɔrodɔ ɔno na n’ebusua no ho asɛm. Egya no sũi ber a ɔyer no rekasa no.
Osi dɛn na Nyame no ɔbaa enyimnyamfo yi fa abofra no dɛ nankasa nedze a obotum ɔakaa no no kun ne ndabraba da biara? Osi dɛn yɛ? Osiandɛ onyaa ahoɔdzen wɔ Jesus Christ mu na ɔgyee nkwa no krɔnkrɔnyɛ dzii. Nna onyim dɛ ba no a wɔnnwoo no no yɛ Nyame ne ba, onnyim hwee na no ho tsew.
Mo nuanom na nkyerɛbaa adɔfo, dɔ ma ba a wonnyaa nnwoo no no rokɔ famu wɔ wiadze nyina mu no yɛ dza ɔyɛ haw kɛse. Nkwa som Nyankopɔn bo. Ɔyɛ N’edwuma na N’enyimnyam dɛ Ɔdze bɛkyebo na onnyiewiei nkwa bɔbɔ adze. Dɛ yɛyɛ Jesus Christ esuafo no, nkwa som hɛn bo. “Ɔnam iyi do na nyimpa nyina bohu dɛ hom yɛ m’esuafo, sɛ hom wɔ ɔdɔ wɔ homho nkorkor a.” Yɛnye hɔn a wohia hɛn dɔ dzendzenndzen no nkyɛ hɛn dɔ mbordo mu. Mekyerɛ mo dɔ ma hom na hɛn Ɔsor Egya no dɔ ma Ne mba a wɔreba asaase yi do. Jesus Christ ne dzin mu, amen.