Hom Ngye N’Akyɛdze no

Akyɛdze mmae yɛ amambra a ɔwɔ kusum ahorow, aman horow mu, a ɔwɔ hɔ fir tsetse. Mber nyina mu no, nkorɔfo dze akyɛdze horow ma hɔn ho nkorkor dze hyɛ hɔn nkitahodzi mu dzen, dze kyerɛ ɔdɔ na enyisɔ na wɔdze hyɛ dza osisi a ohia no nsew, tse dɛ ayeforhyia, awoda nye afahyɛ horow. Na nnyɛ nyimpa nko nye Nyame abɔdze a wɔma hɔn ho adzekyɛdze! Mfatoho pii wɔ hɔ a yebotum akyerɛ, yenyim dɛ penguin dze mboba korkorba hyɛnhyɛn ma hɔn adɔfo a wɔpɛ dɛ wɔnye hɔn bɔ bra na bonobo (chimpanzee hɔn enuanom) dze eduaba ma dze tserɛw hɔn anyɛnkoyɛ mu.

Ebɛn akyɛdze na wɔdze ama wo? Dwen ber bi a ihunii—anaa eyɛɛ—akyɛdze no a odzi mu maa obi a edɔ no. Nna inyim ara yie dɛ akyɛdze no yɛ dza dɔfo yi rohwehwɛ na ɔbɔ som no bo. Akyɛdze no nna ebɛnadze a? Nna edze rema wo maame? nyɛnko bi? w’abofra a? kyerɛkyerɛnyi a? wo nanabanyin? Ihun akyɛdze yi nna w’atsenka tse dɛn? Ebɛn atsenkã na enyae ber a edween nyimpa yi a edɔ no no rubue akyɛdze no do? Dɛmara so, dabɛn na obi maa wo akyɛdze a odzi mu no, na egyee no na ɔtse dɛn?

Ber a nna medzi mfe esuon, a nye m’awofo tse wɔ Arabia no, wɔdze mbofra cene bi a wɔfrɛɛ no Chitty Chitty Band Bang puei guado. Cene no fa kaar a oyi nkongyaa, nankasa tum kã noho, ɔtsɛw nsu enyi, na otum tu mpo! Nna minyim dɛ wɔ fie wɔ England no wɔyɛ toykaar ketseketse tse dɛ Chitty Chitty Bang Bang, na o, nna mbrɛ me pɛ kor! Itum twe dadzeba bi nna toykaar ne ntsaban ebotuatua hɔ. M’egya kɔr edwumayɛ akwantu wɔ England na obisaa dɛ sɛ mepɛ dɛ ɔdze biribi fi hɔ brɛ me a, na mekãa kyerɛ no mbrɛ mebɛpɛ papaapa dɛ minya dɛm Chitty Chitty Bang Bang kaar no kor.

Ofii n’akwantu mu bae, na kaar biara emmpue. Ɔyɛɛ me awerɛhow papaapa na modween dɛ bia no werɛ firii. Mbom bɛyɛ nda 10 ekyir no nna m’awoda a, na adakaba a wɔakyekyer ho fɛfɛɛfɛw da hɔ rotweɔn me. Medze enyidakwan kɛse, na minnyi enyidado mbordo no, mubuei adzekyɛdze no do na muhun me kaar no. M’enyi gyee ara ma musũi. Motwee dadzeba no na ntsaban no botuatua hɔ, tse dɛ kaar no a ɔwɔ cene no mu no! O, mbrɛ misii daa m’egya ase wɔ akyɛdze a ɔsom bo kɛse yi. Medze dɛm kaar no dzii agor mfe pii, na medze siei mfe piigyan. Modwen ho dɛ me papa dɔɔ dɛ ɔdze kaar no maa me na annyɛ yie kora no, tse dɛ ma modɔɔ dɛ meregye no.

Yebotum adwen akyɛdze ne mmae ho dɛ ɔwɔ afã ebiasa.

1. Akyɛdze no ne mmae a ɔmafo no yiyi mu, ɔyɛ anaa osiesie akyɛdze no na ɔdze kɛma dɔfo no. Iyi gye adwen botae bi wɔ ɔmafo no n’afã dɛ ɔbɛma biribi a obeye.

2. Akyɛdze no ne ngyentomu na no mbueido no, yɛ ber a ɔgyefo no pen akyɛdze no a ofi ɔmafo hɔ no do, ɔtaa dɛ ɔdze ahobow, enyisɔ, na enyigye, ansaana oebue do, ɔtɔfabi a osian ahoma a wɔdze akyekyer no na oyiyi adaka no ho dze ekopue akyɛdze no do.

3. Na nkyii, bia ɔfã a ohia papaapa no nye akyɛdze no ne ngyee no. Ama aagye akyɛdze a wɔdze ama wo no nokwar mu no, ɔbor koraa kyɛn eregye ato mu na nkyii irubue do. Ɔbor, mpo, kyɛn dɛ ibohu akyɛdze no no bo a ɔsom na erekyerɛ w’enyisɔ ma ɔmafo no. Ama aagye akyɛdze nokwar mu no, yɛba bohu no bo a ɔsom ma hɛnho, yɛdze dzi dwuma yie wɔ hɛn abrabɔ mu, na yɛdze ndaase kaa ɔmafo no.

Eregye akyɛdze nnyɛ dza wobu enyi gu do ara mbom ɔyɛ enyidahɔ na kwan a ntseasee wɔ mu na ɔtra irubue adakaba a ɔhyɛ mu no do ara. Eregye nye irinya enyisɔ na enye akyɛdze no na ɔmafo rinya nkitahodzi wɔ kwan a ɔhyɛ nkitahodzi a ɔwɔ ɔmafo na ɔgyefo no hɔn ntamu dzen. Morodwen dɛm toykaar no ho a ɔdze nkaadze dɛɛdɛw pii ba, ber a metse m’egya no dɔ kɛse a ɔwɔ ma me no na ɔhwɛ mo do yie, a dɛm akyɛdze no gyina hɔ ma nye ayamuyie ndzeyɛɛ pii a wonntum nnkan.

Hɛn Ɔsor Egya wɔ kan na nokwar akyɛdze horow pii a Ɔayɛ no krado dɛ Ɔbohue egu hɛn mu kor biara do, yɛyɛ Ne mba a yɛsom bo. Wɔpem fi hɛn Bafuu Ɔmafo N’ayamuyie akoma mu tse dɛ nsunyiwa a ɔrepem wɔ sar do. “Akyɛdze pa nye adom adze a odzi mu nyina fi sor, ofir kan Egya no nkyɛn na osian ba.” Hɛn ahyɛmu nkyekyeree a yɛnye Egya no wɔ no, ber biara Ɔno nye Ɔmafo na hɛn nye ɔgyefo ahobrɛadzefo.

Mbom yennkotum agye biribiara a Egya N’akyɛdze nyinara no mu a dza ɔsõ kɛse no, N’eguambaa dɔfo, Ne Ba, Jesus Christ, nnkã ho. Hɛn Egya n’akyɛdze horow nyina pem fi na wokenyan fi Agyenkwa ne pɛ afɔrbɔ wɔ Gethsemane na wɔ mbeamudua no do na No Wusoɛr Konyimdzi mu. Jesus Christ, hɛn Pomfo mbɔbɔrhufo, nye akyɛdze a ɔkrɔn a ofi Hɛn kan Egya hɔ. Nyame nam akyɛdze a ɔyɛ ne Ba no mu esiesie kwan [ama hɛn] a oye kyɛn biribiara.”

Mepɛ dɛ mekã onnyiewiei nokwar akyɛdze kor a ofua biribiara a ɔyɛ hɛn fapem dze dɛ yebotum agye biribiara a hɛn Egya pɛ dɛ ɔdze hyira hɛn ho asɛm—akyɛdze tsitsir a sɛ wɔgye to mu emu mu na wɔgye no ɔkra no bun mu a ɔkyerɛ hɛn abrabɔ mu enyigye na nkõdzen mu yie na hɛn nsɛmbisa horow a wonnyi ano: Ɔno nye dɛ yɛyɛ Nyame ne mba ampaara. Dɛm nokwar no yɛ nwanwa mbordo! Ɔyɛ dɛw dodow! Na iyi yɛ pɛpɛɛpɛr

Susu dɛ mbrɛana eretse no fofor a! Eyɛ Ne babaa ankasa a esom bo. Eyɛ Ne babanyin ankasa a esom bo. Na anamɔnkwan a enam do no nye N’enyigye ho nhyehyɛɛ. Ɔdze No dɔ a onyim adze nyina no, Onyim wo nyimpa ban pɛpɛɛpɛ ansaana wɔrosoma wo aba asaase do dza edua mu nyina besi ndɛ wɔ wo ɔnnkyebo abrabɔ yi mu na ehumbɔbɔr mu ara Ɔayɛ nhyehyɛɛ ama da biara a ɔda w’enyim. Na o, mbrɛ Ɔpɛ ara yie dɛ da kor ebɛsan akɔ No hɔ akɛgye botae tsitsir wɔ N’akyɛdze fɛɛfɛw nyina mu no enye No enya onnyiewiei nkwa.

Asɛmbisa no nnyɛ sɛ nokwar akyɛdze yi wɔ hɔ ampaara a mbom dɛ yebohu na yɛagye. Egya no dze akyɛdze yi ama hɛn dada. Akyɛdze yi no botae tsitsir no Agyenkwa no etua ho kaw dada. Mbom sɛ wɔakyerɛ wo iyi, atow ho ndwom mfe pii a, bia no nwanwa mapã no apa dadaw na nntse no tum na n’asomdwee bio.

Sɛ ntseasee akyɛdze yi a wonntwa ho bo—na papayɛ, asomdwee, na enyidado a ɔpem fi mu ba no nyina—wogyaa mu a wɔammpen do, woemmbue do, na wɔanngye a, nna adze kɛse a yɛayew no a! Ebɛn awerɛhow na ɔbɛhyɛ Ɔmafo no mã! “Na ebɛn mfaso na sɛ wɔma nyimpa akyɛdze na ɔanngye dɛm akyɛdze no a onya? Hwɛ n’enyi nngye dza wɔdze ama no no ho, nna n’enyi nngye nyia ɔdze akyɛdze rema no no ho.”

Moto nsa frɛ wo dɛ gye, bia mber a odzi kan anaa mbordo kɛse akyɛn aber biara, enyimnyam ntseasee dɛ ampaara eyɛ Nyame no dɔba. Otwar dɛ esian ahoma a ɔkyekyer ho no, etsew krataa a wɔdze edura ho, ibue adaka no do, na ahoɔhyew mu ara egye dze enyisɔ ahobrɛadze, nokwar ntseasee krɔngyenn, fa fapem nokwar yi ho. Sunsum Krɔnkrɔn no botum agye dase ahyɛ hɛn akoma mu dɛ eyɛ Ɔsorsornyi no Ne ba.

Sɛ eyɛ enyimnyam nokwar yi etuu wɔ wo kra ankasa mu na etse n’awerɛkyekyer na enyigye no a, w’abrabɔ ngyinado nyina bɛsesa! Ibotum atse No dɔ nkã, atse Ne ndze, na ehu Ne nsa, a dza ɔrokɔ do anaa ɔronnkɔ do wɔ w’abrabɔ mu biara mmfa ho. Ibotum asesã mbrɛ isi hu woho na nkaafo. W’ahyɛmu nkyekyeree a enye Agyenkwa no wɔ ba bɛyɛ dzen yie, na edua akyɛdze dɛɛdɛw n’ahwehwɛenyiwa mu no, abrabɔ fa hyerɛnee fofor fɛɛfɛw, na enyidado.

Mɛserɛ, ana hom bɔbɔ mpaa dze enya ntseasee sɛ hom regye nyimdzee a ɔsakyer yi to hom akra no bun mu ampaara? Mɛserɛ ana hom bɛgye akyɛdze no? Ana hom bɛgye akɔ bun mu ara yie, na mbordo akyɛn ma hom ayɛ biara da a—na hom reyɛ dɛm no wɔdze akyɛdze horow nkaa no ɔnye no nam no apetse hom do?

Bia na erodwen ho dɛ, “Ebɛnadze na ɔsɛ dɛ meyɛ ama maagye akyɛdze yi fi Nyame hɔ?” Oye, nokwar ara, nnyɛ hwee. Ɔyɛ akyɛdze a ofi Ɔmafo no hɔ. Ne sin ara nye dɛ ɔyɛ nokwar. Ma ɔmbra mu ara. Eyɛ Ne ba. Ɔdɔ wo. Mma mma ɔnnyɛ dzen. Mma mmfa adwendwen bi dɛ ɔyɛ dɛ ma mmfata nnsiw akyɛdze yi ne ngyee ho kwan. Nokwar no nye dɛ hɛn mu biara nnyi hɔ a “ɔfata”—Egya n’akyɛdze horow no nyina wodua Messiah Krɔnkrɔn n’adom, ehumbɔbɔr na no ndwuma pa nko do na wɔdze gye, mbom mbrɛ n’ayamuyie akoma no pɛ dɛ Ne mba nyina gye ne nyina a! Nkyii, ber a inya ntseasee fofor no, dzi dɛw wɔ ndaase ma akyɛdze yi ne Mafo no mu.

Fitsi me mfe 20 finimfin a muhun me gyedzi no, masoɛr aba ebohu dɛ ampaara meyɛ Nyame ne ba. Mber dodow a medze akyɛdze yi hyɛɛ mu mu no, enyigye mu ara na muhu me nyimpa ban na mbrɛ wosi dɔ me emudzi mu. Ndzɛmba binom a wɔaboa me ma menyin wɔ ntseasee mu nye kyerɛwsɛm mu nsɛm, me patriarch nhyira, temple sɔr, morosom nkaafo, na mpaabɔ krɔnkrɔn a mobɔ ma m’Egya. Ɔyɛ me ahobow mbrɛ ahyɛse no awerɛhow na yaw wɔ m’abrabɔ mu no nkyɛ wɔbɛhyehyɛ no fofor, adwedwe no, na medzi ne kɛse do konyim sɛ nna nkyɛ minyim nokwar dɛɛdɛw yi a.

Moroni tu hɛn fo dɛ “mma [yɛmm]pow Nyankopɔn n’akyɛdze” mbom “yɛ]mbra Christ hɔ, na [ye]nsuo akyɛdze pa nyinara mu yie.” Ibotum aba Christ hɔ a edze awerɛhyɛmu wɔ n’adɔyɛ ayamuyie mu na agye N’akyɛdze horow nyina a ɔyɛ enyigye, asomdwee, enyidado, kan, nokwar, nyikyerɛ, nyimdzee, na nyansa—a ama wo tsir do, atsen w’abasa mu, na ebue wo nsa mu a, ayɛ krado dɛ ebɛgye. Na ibotum agye akyɛdze yinom osiandɛ esi pi na etsim wɔ nyimdzee no mu dɛ eyɛ Nyame ne babaa dɔfo, eyɛ Nyame ne babanyin a ɔsom bo na Ɔdze Ne Ba krɔnkrɔn a odzi mu no akyɛ wo dɛ Ɔmpon wo, Ɔmma dzi bem na Ɔntsew woho.

Eyɛ Nyame Ne Ba! Iyi nnyɛ ndwom a ɔyɛ dɛw ara a yɛtow. Mɛserɛ ana ebɛgye ato mu, ebue, na agye nyimdzee na ntseasee akyɛdze yi efi No hɔ? Ana ibosuo mu yie dɛ egudzi a ɔsom bo a ɔyɛ no a? Gye akyɛdze yi bio, anaa bia gye no nokwar mu wo mber a odzi kan yi, na ma ɔnsesã w’abrabɔ ne fã biara. Iyi nye kwan a oye kyɛn biribiara a Nyame nam Ne ba akyɛdze do esiesie ama wo. Etse ase ama enya enyigye ampaara! Jesus Christ ne dzin mu, amen.