Mfesantsen n’Akyɛdze Akɛse horow: Jesus Christ no Werdambɔ, Owusoɛr, Nsanananmu

Mfe pii a abasen kɔ no, nna hɛn anapatutu asɛmpa adzesũafo sũa dze Bible nyiyimu gu hɔn etsir mu. Mo ntɔyɛɛ nye dɛ m’enyi gye nyiyimu ntsiantsia ho. Nna John 11:35 kã ho—nyiyimu tsiaba koraa a ɔwɔ kyerɛwsɛm no mu, nkasafua ebien pɛr—”Jesus sũi.”

Emi dze sesei, dɛ Jesus sũ wɔ awerɛhow na dɛwdzi mu gye anwanwadze ho dase ankasa: Nyankopɔn ne Ba krɔnkrɔn no baa ɔnnkyebo asetsena mu na osũae ɔnam honam afamu no mbrɛ aber nyina Obesi nye hɛn bɛtsena na Oehyira hɛn.

Sɛ wɔ yawdzi anaa dɛwdzi mu yesũ a, Jesus Christ tse ase emudzi mu ara. Obotum awɔ hɔ wɔ mber a yehia mfesantsen n’akyɛdze akɛse horow dodoodow mu no—Jesus Christ No Werdambɔ, Owusoɛr, nsanananmu.

Mary na Martha sũ ma hɔn nuabanyin Lazarus a, oewu. Ayamuhyehye kenyaan no no, Jesus sũ. Onyan Lazarus ba nkwa mu.

Jesus hwɛ Jerusalem adze rebɛkye ma woedzi Apaho no. Osũ, Onntum mboaboa No nkorɔfo ano dɛ mbrɛ akokɔ baatan bɛyɛ ne mba no. Ndɛ No Werdambɔ no ma hɛn enyidado sɛ yedzi awerɛhow ma dza nkyɛ obotum aba mu a.

Wenyin ture no Wura no sũ ber a Obisa No nkowaa, a hɛn dɛ nuambanyin na nkyerɛbaa a wɔrosom kã ho dɛ, “Ebɛnadze bio na nkyɛ ɔwɔ dɛ meyɛ mo ture no?”

Mary gyina gyina nda no ho a awerɛhow akyer no. Jesus bisa no bɔkɔɔ dɛ, “Ebɛnadze ntsi na irusũ?” Onyim dɛ “osũ ba bɔsoɛ anago, na enyigye ba anapa.” Owusoɛr dze ahanamakye brɛ hɛn nyinara.

Mormon Nwoma no mu nsaase do no, ber a nyimpadodow soɛr kɔ No hɔ no, Jesus n’enyigye hyɛ mã. Osũ.

“Na ɔfaa hɔn mbofraba no nkorkor, na ohyiraa hɔn, na ɔbɔɔ mpaa serɛɛ Egya no dze maa hɔn.

“Na ber a ɔyɛɛ dɛm wiei no osũu bio.”

Iyi yɛ Easter wɔ Jesus Christ mu: Ɔhyɛ hɛn akoma do ebisadze horow no mã na oyi hɛn akra ne nsɛmbisa ano. Ɔpepa hɛn nyinsuwa, gyedɛ hɛn enyigye nyinsuwa.

Sɛ hɛn nyinsuwa rugu no, ɔtɔfabi a yɛpa ho kyɛw, dɛ ɔyɛ fɛr. Naaso yenyim dɛ Jesus Christ tse abrabɔ ne yaw na enyigye ase no botum ama hɛn ahoɔdzen abor hɛnara hɛn dze do ber a yenya wenwen na dɛɛdɛw sũahu.

America Anaafo hɔ no, egya bi kyi nyinsuwa. N’abrabɔ mu enyigye, ne babaa kumabaa, ewu. “Medze biribiara bɛma dze ehu no bio,” osũ wɔ m’abaw mu. Moso musũ.

Puebla Mexico Temple tu hyɛ Nyame nsa ase no, enyigye nyinsuwa fɔɔw akyerɛbaa dɔfo bi n’enyim. N’enyim hyerɛn gyedzi na afɔrbɔ. Ɔkã dɛ, “Todos mis hijos están aquí en el templo hoy”—“Me mba nyinara wɔ temple ha ndɛ.” Mbasantsen a wɔboaboa ano wɔ Ewuradze fie no dze enyigye na ndaase nyisuwa ba.

Ɔman mu ɔsatu yaayaw mu no, ebusua ebusua na fipamfo yɛɛ ndzɛmba yaayaw tsĩaa hɔnho. Nkakrankra no awerɛhow nyinsuwa dze enyidado reba. Ne ndze rowosow no, ɔbaa bi a ɔwɔ ekuraase kakraba bi mu kãa dɛ, “Fipamfo, ansaana mubowu no, mepɛ dɛ ihu beebi a ibohu w’ebusafo a wɔyeyewee no.’’

Wɔrosɔw ayefor ahoɔfɛwfo na ayefor kun a no ho fɛw ano wɔ Ewuradze fie. Ɔbaa no edzi mfe 70, dɛmara dɛ kun no. Ayefor fɛɛfɛɛfɛw, no atweɔn emudzi mu ara ama dɛm da yi. Fɛr mu ara ɔwosow n’ayefor atar n’ase ba ha a, na nkyii ɔdze kɔ hɔ no. Yekyii enyigye nyinsuwa. Nyankopɔn n’anohoba horow ahyɛ mã. N’ahyɛmudzi horow dze nhyira horow ba.

Ber a nna ɔyɛ akyerɛbaa kunafo bi fie akyerɛkyerɛ no, Boyd K. Packer a nna osuar sũaa awɔse adzesũadze bi. Ɔnye no kun nyaa akasakasa ekyir no, akyerɛbaa no dzii nkasaetwuw bi dze wiee n’asɛmkã. Akwanhyia a enyi nnda gyee no kun no nkwa dɛm da no. “Kunafo no kyii nyinsuwa. “Mfe eduonum nye yi, meedzi awerɛhow na mfehoekyir a minyim dɛ nsɛm a odzi ewiei a ɔtsee fii m’ano no yɛ nkasaetwuw, yaayaw.”

Easter wɔ Jesus Christ mu boa hɛn ma yesieise, yɛsan ka bɔ mu, na yɛtsentsen hɛn nkitahodzi, wɔ ntwamutam n’afã ebien nyina ho. Jesus botum asa ayawdzi yarba; Obotum ama bɔnfakyɛ. Obotum agye hɛn na binom efi ndzɛmba a hɛn yɛakã anaa yɛayɛ anaa hɔn wɔakã anaa wɔayɛ ho a ɔfa hɛn ndɔmmum.

Easter wɔ Jesus Christ mu ma yɛtse Nyankopɔn ne mpendo. Wiadze yi kã kyerɛ hɛn dɛ yɛyɛ tsentsen dodow, yɛyɛ etsia dodow, yɛtrɛ dodow, yɛtwem dodow—yennyim adze, hɛnho nnyɛ fɛw, anaa yennyin sunsum mu yie. Ɔnam sunsum mu nsesa wɔ Jesus Christ mu no yebotum efi dza yenndzi mu wɔ mu a ɔma yedzi awerɛhow ho.

Yɛdze Easter ber dɛwdzi no, yɛtow, “Oedzi Owu do konyim; nyimpa enya fahodzi. Christ edzi konyim no.” Christ no Owusoɛr no gye hɛn fi owu mu, fi mberɛwyɛ na honandua mu n’esintɔ horow mu. Jesus Christ no Werdambɔ so ma yɛsan nya nkwa sunsum mu. Bɔgya fii No honandua enyi kyii, kyerɛ dɛ osũu bɔgya, dze agye hɛn efi bɔn na mpaapaamu ho. Ɔsan ka hɛn bɔ mu, emu na krɔnkrɔn, a yɛnye hɛnho nkorkor na Nyankopɔn. Ndzɛmba pa nyinara mu no, Jesus Christ dze nsanananmu mbordo ba—nnyɛ dza nna ɔwɔ hɔ nko mbom dza obotum aba mu so.

Jesus n’abrabɔ na ne kan gye Nyankopɔn no dɔ ho dase ma Ne mba nyinara. Osiandɛ Nyankopɔn hɛn Egya dɔ Ne mba nyinara wɔ mber na asaase biara do no ntsi, yehu No dɔ nsato dɛ yɛmbra na yembenya asomdwee na enyigye wɔ No mu wɔ amambra na kusum ahorow mu. Beebiara, mber biara, hɛn nyimapa ban biara no, yɛkyɛ awosu krɔnkrɔn dɛ Bɔadze kor noara ne mba. Islam, Jewfo som, na Christian akadofo no kyɛ nkitahodzi no tse dɛ nyamesom egyapadze wɔ Egya Abraham mu na ahyɛmudzi nkitahodzi a ɔnam dza osisii wɔ tsetse Egypt hɔ mu no.

Egya Abraham baa Egypt na wohyiraa no.

Joseph, a wɔtɔɔn no kɔr nkowasom wɔ Egypt no, nna onyim dɛ Pharaoah n’adaaso no kyerɛɛ mfe esuon a edziban piinara bɛba na mfe esuon ɔkɔm a odzi ekyir. Joseph gyee n’ebusua na no nkorɔfo. Joseph sũi mber a ɔtsee Nyankopɔn no botae horow ase wɔ no sũahu horow nyinara mu, bea a hɔn a wosie hɔn ahyɛmudzi no adze nyina bɔ mu yɛ edwuma ma hɔn yie.

Moses, wɔtsetsee no wɔ Egypt wɔ Pharaoh ne fidua mu no, ɔgyee nsaafee no a wɔdze boaboa Nyankopɔn ne mba ano na ekyir no ɔdze saan ananamu bae.

Wɔrehyɛ nkɔnhyɛsɛm mã no, Joseph, Mary, na abɔdomaba Christ abofra no hwehwɛɛ guandɔbea wɔ Egypt. Cairo hɔ no, Muslimnyi gyedzinyi bi obu mu ara kã dɛ: “Quran no kyerɛkyerɛ dɛ Joseph, Mary, na abɔdomaba Jesus nyaa ahotɔ na guandɔbea wɔ mo kurow mu. Mo kurow mu no, Jesus a nna ɔyɛ abofraba a orusũa nantsew no dzii hɛn edziban, tuu N’ananmɔn a odzi kan, kãa Ne kasaa a odzi kan. Mo kurow mu no, yɛgye dzi dɛ ndua bɔɔ hɔn mu adze maa Ɔno na N’ebusua eduaba. Ɔno a nna ɔwɔ mo kurow mu no, hyiraa hɛn nkorɔfo na asaase no.”

Nyankopɔn ne nhyehyɛɛ fa suban pa na ɔnnkyebo asetsena mu pɛ no ma hɛn kwan ma yedua hɛnara hɛn sũahu mu sũa adze. Hɛn abrabɔ n’adzesũadze horow akɛse no mu bi fi ndzɛmba a nnkyɛ yɛnnkɛsan mu eyi dabiarada mu ba. Ɔdɔ mu no, Jesus Christ sianee baa ndzɛmba nyinara ase na ɔfowee kɔr ndzɛmba nyinara sor. Odzi ehurusi wɔ hɛn ahom krɔnkrɔn horow mu wɔ dza yebɛyɛ na hɛn enyigye, ayamuyie a akatua enyidado nnka ho, gyedzi kɔ nnuho na bɔnfakyɛ mu. Na Osũ wɔ awerɛhow mu wɔ hɛn nyimpa amandzehu, ayakayakadze, na nsisi ne kɛsenara ho—a nyimpa ne nsanmuyi taa dze ba—dɛ mbrɛ ɔsorsor na sor Nyankopɔn nye hɔn sũ no.

Easter fefɛw ber biara gye dase dɛ sunsum mu nhyehyɛɛ na nkabɔmu nyina no kã werdambɔ, owusoɛr, na nsanananmu a ɔnam Jesus Christ no nhwɛdo krɔnkrɔn no do. Sɛnkyerɛdze nkabɔmu krɔnkrɔn yi nnyɛ dza yennyim anaa osi ara kwa. Mberɛnkɔnson Kwesida, Dapɛn Krɔnkrɔn, na Easter hyɛ Christ No Werdambɔ na Owusoɛr ho fa. Tse dɛ ndɛ, mbrɛ Ebɔbira 6 biara no yɛkaa Jesus Christ N’Asɔr a ɔwɔ hɔ ma Nda a Odzi Ekyir Ahotseweefo ne nkyekyeree na nhyehyɛɛ no. Nsanananmu yi nye siantsir kor a yɛboa ano wɔ Ebɔbira Kwesida a odzi kan biara wɔ wiadze mfɛndzanan ehyiadzi mu.

Nsanananmu bae so ber a Jesus Christ, a Ɔasoɛr efi owu mu, Moses, Elias, na Elijah, dze asɔfodzi nsaafee na tumdzi sanee bae wɔ Kirtland Temple a woetu ahyɛ Nyame ne nsa fofor no wɔ Easter Kwesida, Ebɔbira 3, 1836. Dɛm nhyehyɛɛ mu no wɔ dɛm da no Jesus Christ N’Asɔr a wɔdze asan ananmu aba no nyaa Nyankopɔn no tumdzi na nhyira horow a ɔdze bɔboaboa Ne mba ano, esiesie Ne mba ma wɔasan akɔ No hɔ, na wɔaka ebusua ebusua abɔ mu ama mfesantsen. Nsanananmu dɛm da no hyɛɛ nkɔnhyɛsɛm mã ber a ebien no nyina sii wɔ Easter na Apaho da no.

Kirtland Temple kã ho no, ɔnnkyɛree na meserɛɛ mbeambea krɔnkrɔn wɔ Ohio bea a Nkɔnhyɛnyi Joseph na nkaafo hun Nyankopɔn hɛn Egya na ne Ba, Jesus Christ wɔ enyido-adzehu mu. Nkɔnhyɛnyi Joseph hun dza sor hɔ tse. Sor hɔ no, Ɔsor Egya, nam Jesus Christ do, “gye ne nsaano ndwuma nyina nkwa” kɔ enyimnyam ahenman bi mu. Hɔn a wɔnnkã ho nye hɔn a ɔpɛ mu ara “Egya no yii Ɔba no kyerɛɛ ekyir no wɔpoow no no nko.”

Ber a No ɔnnkyebo somdwuma hyɛɛ ase no, Jesus paa mu kãa No somdwuma dɛ ɔdze adze nyinara a yɛpɛ dɛ yɛgye no behyira hɛn mu kor biara—wɔ mber biara, asaase biara, wɔ gyinabew biara mu. Odzii mbuada nda 40 ekyir no, Jesus kɔr nhyiamudan mu na Ɔkekaan: “Ewuradze no Sunsum wɔ mo do, osiandɛ ɔasera me dɛ membɛkã nsɛmpa nkyerɛ ehiafo; Ɔasoma me dɛ membɛsa akoma a ebubu yar, membɛpaa ɔgye mma ndɔmmum, nye adzehu mma enyifurafo, na membɛgye hɔn a woepirapira hɔn.”

Ehiafo, akoma a ebubu, ndɔmmum, enyifurafo, hɔn a woepirapira hɔn—ɔno nye hɛn mu kor biara.

Isaiah nwoma no kɔ do kã Messiah n’enyidado anohoba, ɔgye, awerɛhyɛmu no: “Dɛ menhyehyɛ mma hɔn a wodzi nkɔmbɔ wɔ Zion, … mma hɔn abɔtsir nhyɛ nso ananamu, enyigye ngo nhyɛ nkɔmbɔdzi ananmu, ayɛyi atar nhyɛ awerɛhow sunsum ananmu.”

Dɛm ntsi, yɛpaa mu kã dɛ, “Mibedzi ehurusi kɛse wɔ Ewuradze mu, me kra enyi bɛgye Nyankopɔn mu; na ɔdze nkwagye ntar ahyɛ me, ɔdze tsenenee bataker ewura me.”

Easter ber biara no yɛhyɛ fa, dɛ sɛnkyerɛdze emu no, mfesantsen n’akyɛdze horow akɛse a ɔnam Jesus Christ do No Werdambɔ, Ɔno (na hɛn anohoba ho) nokwar Owusoɛr; Ne nda a odzi-ekyir Asɔr a asɔfodzi nsaafee na tumdzi a wɔdze behyira Nyankopɔn ne mba nyinara ne Nsanananmu. Yedzi ehurusi wɔ nkwagye ntar no ho na tsenenee bataker no ho. Yɛtsẽa mu dɛ, “Hosanna nkã Nyame na Eguambaa no!”

“Na mbrɛ Nyankopɔn dɔɔ wiadze nye yi, dɛ ɔdze ne Ba a ɔwoo no kor no mae, ama obiara a ɔgye no dzi no ɔaannhera, na oeenya onyiewiei nkwa.’’

Hom mma hɛn mu kor biara nnya wɔ Jesus Christ mu no werdambɔ, owusoɛr, na nsanananmu mu—asomdwee, yɛrebɛyɛ, na mbɛkãho—dza daapem mu ara ɔyɛ nokwar na dɛwdzi, enyigye na afebɔɔ, mobɔ ho mpaa, wɔ Jesus Christ, Ne dzin krɔnkrɔn mu, amen.