Yɛreyɛ Nokwafo ama Gyedzi a Wɔasom Hɛn Awofo Bo

Ber a nna mereserɛ Nashville Tennessee Temple akɛyɛ temple nhwehwɛmu no, ɔyɛɛ me adom ma menantsewee duaa mu dɛ ɔkã dwumadzi yi ho, a morohwehwɛ Ewuradze fie fɛɛfɛw yi mu. Nkanka Mary Wanlass ne nsaano mfonyin a wɔfrɛ no Kɔ Do a ɔsɛɛn matron no ɔfese afasu no ho no na okenyaan me.

Iyi nye nsaano mfonyin no ho asɛm:

“Missouri afe 1862 mu no, mfe-14 Mary Wanlass bɔɔ ne maame no kora a nna oruwu no anohoba dɛ ɔbɔhwɛ dɛ n’egya a oedzi dzɛm na no nuanom nkakraba baanan no nyinara bodur Great Salt Lake Bɔnsa hɔ. … Mary twuuw anantwi nyin na anantwi ber a wɔtwee ntaabowhɛn a [nna n’egya a ɔakã mpa mu da mu no, na] ɔhwɛɛ no … nuanom. Dakor biara n’akwantu ekyir no, ɔhwehwɛ nhataw, nhyiren, na nduaba a wodzi dze ma n’ebusua edziban. Nna no kɔmpas nko nye nkyerɛkyerɛ a oenya dɛ ɔnkɔ do ntu kwan nkɔ anee ‘kɛpeem dɛ fua no abɛyɛ mbepɔw.’

“Wodur Utah Valley wɔ Fankwa, a nna woetu kwan wɔ fefɛw na ɔhyewber mu nyina. Wɔkɛtsenaa Utah County no annkyɛr koraa na n’egya wui, a ekyir no Mary waree na ɔtsetsee [ɔnoara] n’ebusua.”

Iyi yɛ mfe 14 ɔbaa kumabaa ne gyedzi na ahoɔdzen asɛm nwanwa a obotum aboa hɛn mu kor biara ndɛ dɛ “yɛnkɔ do ara.’’

“Kɔ Do Ara,’’—anaa wɔkyerɛ ase wɔ mo kurow mu Dutch kasa mu dɛ, Gewoon Doorgaan—so yɛ me maame na me papa hɔn fen a wodzi no hɔn abrabɔ mu nyina.

M’awofo na me nsewnom nye edzikamfo wɔ hɛn ebusua mu. Woetwa hɔnara hɔn “sar’’ dɛmara tse dɛ hɔn nyinara a wɔreba Asɔr no mu da biara no, Ewuradze no nguankuw. Hɔn nsɛm mmfa anantwi nyin na ntaabow ahɛn ho koraa mbom wɔwɔ nsunsuando kor noara wɔ ndaamba mbasantsen no do.

Wɔgyee asɛmpa no na wonumaa hɔn wɔ hɔn mbasirmba mfe mu. M’awofo beenu no nyina nyaa nkõdzen wɔ mbofra ber mu. M’egya nyinii wɔ Java supruw do wɔ Indonesia. Wiadze Ɔsatu II ber no, wɔdze nhyɛ paa no fii n’ebusua ho na wɔdze no kesiei efiadze, a ohun nkõdzen amandze a wɔnnkã wɔ ber a nna osuar no.

Wɔtsetsee me maame wɔ fie a nna awofo no egyaa awar na ɔno so hun Wiadze Ɔsatu II ho ɔkɔm na nkõdzen ho amandze. Ɔtɔ mber bi a nna ɔwɔ dɛ odzi nhyiren n’aba a wonndzi. Osian n’egya ne ndzeyɛɛ, na n’awar gyaa fi ne maame hɔ no nsunsuando ntsi, nna ɔtɔfabi a ɔyɛ dzen ma no dɛ obohu Ɔsor Egya dɛ Egya dɔfo.

M’awofo hyiaa wɔ Asɔr dwumadzi bi ase na annkyɛr na wosii gyinae dɛ wɔbɔwar na wɔsɔɔw hɔn ano wɔ Bern Switzerland Temple. Wɔrotweɔn wɔ keteke gyinabea, na woedzi hɔn sika kakra a wɔdze siei maa hɔn temple akwantu n’ase no, wɔdwendween mbrɛ wobesi bɔkɔ do mbom nna wɔwɔ ahotodo dɛ biribiara bɛyɛ yie. Na ɔyɛe!

Wɔhyɛɛ ase dɛ wɔretsetse hɔn ebusua fi dan ba a ɔnnyɛ kyinkyinann kor mu a ɔwɔ aborasan bi no sor wɔ Amsternam kurow ne finimfin. Mfe beberee ekyir a nna wɔdze hɔn nsa hor hɔn ntar no, ewiei no wosiei sika a oye a wɔdze tɔ efir a wɔdze hor adze. Wɔrobɔtɔ efir noara no, nna bishop no kɛseraa hɔn, obisaa hɔn, hɔn ntoboa a wɔdze besi asɔr dan no wɔ Amsterdam. Wosii gyinae dɛ wɔdze dza wɔdze siei a wɔdze bɔtɔ efir a wɔdze hor adze no nyinara bɛma na wɔakɔ do dze hɔn nsa ahor adze.

Dɛ ebusua no yeduaa nkõdzen mu dɛmara tse dɛ ebusua biara bi so. Iyinom amma yɛannhyɛ dzen yie nko, na wɔama hɛn gyedzi wɔ Ewuradze Jesus Christ no mu adɔ; dɛmara tse dɛ mber a nna Alma nye ne ba Helaman rekyɛ n’asɛm no, a ɔkãa kyerɛɛ no dɛ “onyaa mboa wɔ nsɔhwɛ na ɔhaw biara mu’’ osiandɛ ɔdze no werɛ hyɛɛ Ewuradze Jesus Christ mu.

Osii dɛn na nkorɔfo beenu a wohyiaa nsɔhwɛ dodow pii wɔ hɔn mbasirmba ber mu no bɛyɛɛ awofo apapa ankasa a mubotum enya da? Nyiano no nnyɛ dzen: wɔgyee asɛmpa no emu mu na wɔdze ahyɛmudzi horow no bɔ bra besi ndɛ!

Mfe 65 awar ekyir no, me maame, a nna ɔyar Alzheimer yarba no, fii mu Kwakwar bosoom mu. M’egya, a oedzi mfe 92 na ɔda ho tse fie no, nna ɔtaa bɛsera no dɛ mbrɛ obotum kɛpem dɛ ofii mu. Mber bi a ɔabasen no ɔkãa kyerɛɛ mo nuanom nkakraba no dɛ sũahu huhuihu wɔ efiadze wɔ Indonesia wɔ Wiadze Ɔsatu II ber no na osiesiei no ma abotar mu ara ɔhwɛɛ ne yer, mfe pii a ɔyaree na yarba yaayaw yi maa ɔyɛɛ wesee, na da bɔn no nna ɔwɔ dɛ ɔdze n’edwuma tsitsir dɛ ɔhwɛ no hyɛ binom nsa na oenntum anntsena ne nkyɛn bio. Nna hɔn afɛdzi kasa nye na ɔda ho yɛ “Kɔ do ara,’’ a wɔwɔ enyidado a odzi mu wɔ Christ mu dɛ da a odzi ewiei no wɔbɔsoɛr na wɔnye No atsena wɔ enyimnyam mu afebɔɔ.

Hɔn gyedzi na dasee nye nkenyan ahoɔdzen ma mbasantsen a woedzi hɔn ekyir no.

Ekurase a me yer nyinii wɔ no, n’awofo, a nna wɔyɛ nkorɔfo apapa a wɔkɔ asɔr no gyee asɛmpa no ber a nna wɔyɛ awarfo kumabaa a nna me yer nye hɔn babaa a oedzi mfe ebien na ɔno nko nye hɔn abofra dɛm mber no. Hɔn gyinasi dɛ wɔbɛyɛ Jesus Christ N’Asɔr a ɔwɔ hɔ ma Nda a Odzi Ekyir Ahotseweefo mba no nyaa nsunsuando kɛse wɔ hɔn abrabɔ do ber a nkurabaasefo no na hɔn ebusua poow hɔn. Ɔgyee mfe bebereebe, ɔdɔ nsɛnsin a wɔkyerɛw ma ebusuafo, na sɔn mu som ansaana ewiei no wɔregye hɔn ato mu.

Ber bi, mber a nna me yer n’egya rosom dɛ bishop no, wotwaa asɛm too no do na ntsɛmara wosiaan no. Ɔyɛɛ m’asew yaw ara ma obisaa no kun sɛ wɔnkɔ do nkɔ asɔr a. Oyii ano dɛ nokwar wɔbɔkɔ do akɔ asɔr osiandɛ iyi nnyɛ nyimpa n’asɔr, mbom iyi yɛ Jesus Christ N’Asɔr.

Ɔkyɛree ansaana nokwar no reda edzi na wɔmaa akyɛpa. Dza nkyɛ obotum ebubu hɔn no dze bi kãa hɔn ahoɔdzen na pisi ho.

Ebɛnadze ntsi na hɛn mu binom enyi nnsɔ hɛn awofo a wɔ hɔn nkõdzen nyinara mu no wɔayɛ anokwafo ma hɔn gyedzi na dase? Ana hɛn adwendwen yɛ hɛn dɛ wɔnntse ndzɛmba ase yie a? Wɔanndaadaa hɔn na wɔnndaadaa hɔn! Sunsum no ama woeenya sũahu horow beberee na wobotum nye Nkɔnhyɛnyi Joseph Smith akã dɛ, “Minyim dɛm, … na munnkotum apow.’’

Ana hom mmpɛ ndwom no a ɔfa Helaman no nsordaafo no ho, a yehu no wɔ Children’s Songbook mu no?

Mpo sɛ woenntum ammba no dɛm , dɛ mbrɛ me maame nyae dɛ abofra no a, hom botum abɛyɛ “awofo mapã a wɔdɔ Ewuradze’’ na wɔayɛ fasusu tsenenee ama binom.

Ana sɛ yɛtow a yɛtse dɛ iyi yɛ nokwar trɔdɔdɔ? Ana hom tse nkã dɛ hom “tse dɛ Helaman no nsordaafo no’’ na dɛ hom “bɛyɛ Ewuradze n’asɛmpasomafo dze no nokwar abrɛ wiadze no’’? Matse no mber pii ber a morotow ndwom yi wɔ FSY nhyehyɛɛ na mbabun mboaboano beberee ase.

Anaa sɛ yɛtow asɔr ndwom “True to the Faith’’ a ebɛn atsenkã na yenya?

Ɔkɔ ma mbasantsen a wɔreba no, beebiara hom wɔ na wɔ gyinabew biara a hom hu homho wɔ mu no, meserɛ hom nsũa na wonya ahoɔdzen mfi hɔn a wodzii hom kan no hɔn gyedzi na dase mu. Ɔbɔboa hom ma hom atse ase dɛ ama hom eenya anaa hom dasee enyin no, obehia dɛ hom bɔ afɔr na dɛ “afɔrbɔ dze ɔsor nhyira horow ba.’’

Hom rodwendwen afɔrbɔ a nokwar ara obehyira hom abrabɔ ho no, meserɛ hom nhwɛ na hom mbɔ mpaa mfa hɛn nkɔnhyɛnyi dɔfo, President Russell M. Nelson, ne nsato ho, mber a ɔsee dɛ “aberantsɛ a ɔfata, na obotum “biara dɛ ɔnyɛ ahoboa na ɔnsom asɛmpakã dwuma. Latter-day Saintfo mberantsɛ no, asɛmpakã som yɛ asɔfodzi asodzi. …

“Hom … nkyerɛbaa no a hom botum no, asɛmpakã dwuma no so yɛ ndam, mbom kwan a sɛ hom pɛ a.’’

Wobotum afrɛ wo dɛ ɔsom anaa nkyerɛkyerɛ asɛmpasomafo. Asɛmpasomafo ahorow ebien no ma botae kor noara dɛ wɔdze akra reba Christ hɔ, kor biara wɔ hɔnara hɔn kwan soronko na tum wɔ mu.

Ɔsom ahorow ebien mu no, ebɛkyerɛ Ewuradze dɛ edɔ No na dɛ epɛ dɛ ihu No yie. Kaa dɛ, “Na ɔbɛyɛ dɛn bɛyɛ na nyimpa bohu dɛ obi yɛ no wura wɔ ber a ɔnnsoom no da, na ɔyɛ hɔho ma no, ɔno na n’adwen nye n’akoma mu nsusui ntamu twe koraa?”

Hɛn nyinara, sɛ yɛyɛ mbasantsen a wodzi kan wɔ asɛmpa no mu anaa dza otsia enum o, ɔsɛ dɛ yebisa hɛnho dɛ ebɛn gyedzi, ahoɔdzen, na celestial enyimpisi nsɛm na yɛdze bɛma mbasantsen a wɔtoa do no?

Hom mma hɛn nyinara nkɔ do wɔ hɛn mbɔdzembɔ mu mfa nhu hɛn Agyenkwa, Jesus Christ, yie na yɛmfa No nsi hɛn abrabɔ ne finimfin. Ɔno nye ɔbotan no a otwar dɛ yesi wɔ ama sɛ mber yɛ dzen a, yebotum egyina dzen.

Hom mma “yɛreyɛ nokwafo ama hɛn egyanom edzikamfo hɔn gyedzi, yɛreyɛ nokwafo ama nokwar a hɔn a wokum hɔn wɔ hɔn gyedzi ntsi wui ho, ma Nyankopɔn ne mbra, yɛdze ɔkra, akoma, na nsa, yebegyina dɛ anokwafo na nokwafo daa.’’ Jesus Christ ne dzin mu, amen.