Hɛn Enyiwa Do Pɛɛ

Mo nuanom na nkyerɛbaa, ɔyɛ me enyigye dodow dɛ menye hom wɔ ha. Yɛdɔ hom; hɛn enyi sɔ hom; yɛtse nkã dɛ hom mpaabɔ hyira hɛn.

Russell M. Nelson kãa no wɔ hɛn ndaansa President ehyiadzi no ase dɛ: “Ana hom hu dza ɔrokɔ do wɔ hom enyiwa do? Mobɔ mpaa dɛ ber yi mu n’enyimnyam no hom bɛhyɛ no nsew yie! Ampaara Ewuradze rema N’edwuma rokɔ do ntsɛm.”

N’edwuma Rokɔ do Ntsɛm. “Rokɔ do ntsɛm” yɛ kasafua a ohia. Ɔkyerɛ ɔrokɔ ntsɛntsɛm, ahoɔhar do, na mpo ɔhyew do. Asɔr no nyinii na Christ ne nyehyɛɛ ho mu no, ndzɛmba rokɔ do ntsɛm. Na hɛn nyinara yɛkã ho.

Ebɔbira 1834 mu, wɔ Kirtland, Ohio no, Nkɔnhyɛnyi Joseph Smith boaboaa hɔn a wokitsa asɔfodzi no ano wɔ skuuldan kakraba bi mu, bɛyɛ ananmɔn 14 skwɛɛ (4.3 m). Yebotum ahyehyɛ skuul adan a wɔtsetse dɛm pii wɔ Ehyiadzi Asoe yi mu, a kwan bɛda hɔ. Joseph Smith kãa dɛ, “Asɔfodzi kakrabaa na hom hu no wɔ ha anafua yi, naaso Asɔr yi bɛhyɛ America Etsifi na Anaafo mã—ɔbɛhyɛ wiadze no mã.”

Nkɔnhyɛsɛm no rehyɛ mã “wɔ hɛn enyiwa do.” Jesus Christ N’Asɔr a ɔwɔ hɔ ma Nda a Odzi Ekyir Ahotseweefo no rinyin wɔ asɔrmba na ebusua ebusua, asɛmpakã mbew na asɛmpasomsafo, nhyiamu adan, na temple horow mu, na wɔ hɛn dodow mu wɔ hɛn seminary, institute, na esuapon ahorow mu wɔ wiadze nyinara.

Hɛn enyiwa sɔ dɛ yɛwɔ asaase do mber a Asɔr no rodɔr wɔ nkanee na nhyɛdo mu, mbom ma ohia dodow yie no wɔ n’asɔrmba hɔn akoma na abrabɔ mu. Wɔfrɛ hɛn dɛ yɛyɛ Jesus Christ n’esuafo. Yɛkyɛ hɛn dasee fa No ho, N’Asɔr, N’akwan horow, na N’ahyɛmudzi ananmɔnkwan ho. Yɛyɛ No nkorɔfo, na Ɔyɛ hɛn Agyenkwa.

Mohobow me wɔ dza President Nelson frɛ no “ber yi mu n’enyimnyam” na mekyerɛ enyisɔ a no mu dɔ ma Ewuradze na N’edwuma. Mehyɛ hɛn ho nkuran dɛ yengyina pintsinn dɛ N’esuafo, adasefo ma nkɔnhyɛsɛm ne mãhyɛ, tsetse mber na ndɛ mber ebien no.

Ekyingyefo wɔ hɔ a wɔtsẽatsẽa mu, “Hwɛ hɔ na hwɛ ha,” dɛmara dɛ wɔyɛɛ no wɔ Nkɔnhyɛnyi Joseph Smith mber mu no. Naaso, wɔyɛ na wɔbɛyɛ ase asɛnsin ara wɔ enyimnyam edwuma yi mu. Hom nkaa Nkɔnhyɛnyi Joseph Smith ne nsɛm dɛ: “Nsa a ho nntsew biara nnkotum asɛɛ edwuma no ne kankɔ; atseetsee bohur … ; Nyankopɔn no nokwar no bopuei akokodur mu, enyimnyam mu, na obegyina n’anan do, kɛpem dɛ, ɔakɛhɛn asaasetɔw biara mu, ɔakɔ mantɔw biara mu, ɔatserɛw ɔman biara mu, na ɔagyegye asowa biara mu, kɛpem dɛ Nyankopɔn no botae horow no bɛhyɛ mã, na Jehovah Kɛse no bɛkã dɛ Oewie edwuma no yɛ.”

Afe yi m’edwumayɛ mu no, manakasa medzi kan ehu Ewuradze a ɔrema N’edwuma rokɔ do ntsɛm. Asɔr no risisi temple wɔ kwan a bi mmba da mu, a ɔrema asɔrmba beberee kwan ma wɔasɔr wɔ Ewuradze fie. Otsĩa ebien, asɛmpasomafo edwuma roboaboa dɔm ano akã Guanhwɛfo Pa, Jesus Christ no nguankuw ho. Na otsĩa ebiasa, Asɔr nwomasũa wɔ akwan pii mu no kɔ sor koraa a wɔrekyerɛkyerɛ hɔn a “wɔrohwehwɛ Jesus yi.”

Ndɛ Asɔr no wɔ temple horow 367 wɔ gyinabew ahorow mu wɔ hɔn nhyehyɛɛ, nsii, anaa wɔyɛ mu edwuma, mu. Na no botae nye dɛn? Ne nyiano no wɔakyerɛw wɔ temple biara ho dɛ: ”Krɔnkrɔnyɛ ma Ewuradze.” Temple no bue nhyira horow a ɔkrɔn a hɛn Egya a ɔwɔ Sor wɔ ma hɛn mu kor biara ho kwan. Nuanom na nkyerɛbaa, yɛrema hɛn krɔnkrɔnyɛ akɔ do ntsɛm ber a yɛbɔbra a ɔfata temple, ber a yɛsɔr wɔ Ewuradze fie, na ber a yɛnye Nyankopɔn yɛ ahyɛmudzi horow ma hɛnankasa hɛnho na yegyina hɛn ewuakɔrfo anan mu wɔ ntwamutam n’afã ho yɛ ma hɔn.

President Nelson akã dɛ: Otsĩafo no kõ a ɔkõ tsia no rodɔɔ sõ papaapa, wɔ ne dzenyɛ na n’ahorow mu. Hia a ohia dɛ yɛtaa kɔ temple nnkehiaa kɛse nnkyɛn ber biara. Mototɔ serɛ hom dɛ mpaabɔ mu ara hom nhwɛ mbrɛ hom si dzi hom mber.” Ne fie no, yetum tse Ewuradze n’enyimnyam krɔnkrɔn na asomdwee mbordo nkã.

Mfeda no, ɔyɛɛ me adom dɛ monkɔhwɛ Mendoza Argentina Temple no tu hyɛ Nyame nsa no do. M’asɛm mu no, mekãa Elder Melvin J. Ballard ne 1926 nkɔnhyɛsɛm dɛ Ewuradze n’edwuma no benyin bɔkɔɔ bɛyɛ mber kakra wɔ South America, “dɛmara dɛ odum fir bɔkɔɔ fi aba mu. Orimmfir da kor,“ naaso mpempem bɔdɔm Asɔr no, na South America amanaman no bɛyɛ “dza ɔbɛhyɛ Asɔr no dzen.” Muhun dɛ dɛm nkɔnhyɛsɛm ahyɛ mã wɔ m’enyiwa do pɛɛ.

Mendoza, nna nkyɛ ɔyɛ aba ketseketse, abɛyɛ odum okunyin. Nyin no repetse wɔ asaase tɔw na wɔ po nsupruw do.

Yehu dɛ Ewuradze rema N’edwuma rokɔ do ntsɛm wɔ asɛmpakã mbew do. Afe 2024 mu no, nna asɛmpasomafo 80,000 na wɔrosom wɔ asɛmpakã mbew 450 mu. No mu eduasa-esia yɛ asɛmpakã mbew afofor. Mfeda no, asɛmpasomafo edwuma dze asɔrmba afoforfo bɔbor 300,00 baa Asɔr no mu. Ɔtra nkanee no, mboaboano sunsum no dze akra rebrɛ Jesus Christ na N’asɛmpa no.

Modwen Asomafo Brigham Young na Heber C. Kimball a afe 1839 mu no wotuu kwan dɛ asɛmpasomafo kɔr British Isles ho. Nna wɔyar; wɔdze yarba na ohia gyaa hɔn ebusua ebusua hɔ. Naaso, beenufo no foow ntaabowhɛn, na ber a nna wɔda ho hu hɔn adɔfo no, Heber kãa dɛ, “Ma yɛnsoɛr na yɛmma hɔn awerɛhyɛmu.’’ Beenufo no dze mbɔdzembɔ soɛreee gyinaa hɔn anan do na wɔtsẽaa mu dɛ, “Hurrah, hurrah nka Israel.“

Muhun dɛm ahokekã noara bi ma Ewuradze n’edwuma wɔ Lima, Peru, mber a menye asɛmpasomafo a wofi asɛmpasomafo ntsetsee bea na asɛmpakã mbew do dzii ehyia wɔ Lima. Nna ɔyɛ ahobowdze! Muhun ɔrokɔ do ntsɛm wɔ m’enyiwa do. Seseiara asɛmpakã mbew do esuon na ɔwɔ Lima kuropɔn mu hɔ ara.

Hɛn nhyiamu n’ewiei no, asɛmpasomafo no maa me ahobowdze tsitsir bi. Hɔn nyinara soɛree gyinaa hɔ na wɔtsẽaa mu dɛ, “Hurrah nka Israel.“ Mo werɛ nnkefir dɛm mber no dabiarada; me yamu a ankyɛ nna hom nyinara botum awɔ hɔ. Mankasa m’enyiwa do no nna asɛmpasomafo a nna wɔdze “wiadze yi mu ndzɛmba“ ato nkyɛn dze bɔsom Ewuradze na wɔaboa ma Ne mbae no akɔ do ntsɛm wɔ hɔ.

Yehu Ewuradze a ɔrema nwomasũa akwanhorow ma hɛn asɔrmba, na mpo hɔn a wonnyi hɛn gyedzi mu, wɔ wiadze nyina no akɔ do ntsɛm. Ndzɛmba no mu kor a ɔda hɛn edzi dɛ Asɔr no nye hɛn nwomasũa a yetsĩ mu no. Ewuradze hyɛɛ mbra wɔ Nsanananmu n’ahyɛse no dɛ “[yen]nsũa nwoma na [yen]dua adzesua mpo nye gyedzi so do.” Orisi ndɛ na ɔfata “hurrah“ ntsẽamu a ahoɔdzen wɔ mu.

Seseiara no adzesũafo bɔbor 800,000 wɔ wiadze nyina na wɔkɔ seminary na institute, hɔn dodow a ɔsõ koraa wɔ Asɔr n’abakɔsɛm mu. Hɛn mbabun boaboa hɔn ano wɔ akwan asorɔtow mu, fi anapatutu, anapa, na mpo ewimbir adzesũa kesi online, na wɔ fie adzesũa mu. Wɔyɛ ekunyin na nsordaafo atseneneefo, wonya ahoɔdzen fi hɔnho nkorkor ber a wosũa Jesus Christ ho asɛm, wɔka No do, na wɔgye No ho dase dɛ Nyankopɔn ne Ba.

Ndaansa awɔwber no, mekasaa wɔ mpaabɔsom ase kyerɛɛ seminary na institute adzesũafo na hɔn awofo a wɔhyɛɛ agodzibea hɔ mã wɔ Utah Esuapon. Hɔn dodow no kãa pii fa hɔn pɛ ho asɛm dɛ wobohu na wɔaka Jesus Christ do. Nna m’asɛm ma adzesũafo no yɛ pefee: Nya mber pɛpɛɛpɛr ma Ewuradze. Mutuu hɔn fo dɛ wɔmfa nokwar adzesũa a ɔkrɔn, mpo “Nyankopɔn tseasefo ne Ba“ ho adzesũa no, nka hɔn adzesũa ho pɛpɛɛpɛr.

Mibisa obiara asɛm kor noara ndɛ: Adze biara a ɔkã wo ndzɛmba a ahyehyɛ dɛ ɔsɛ dɛ eyɛ ho no, fa mber pɛpɛɛpɛr, nnyɛ mber a wɔaka, ma Ewuradze wɔ wankasa wo kyerɛwsɛm adzesũa mu, ebusua adzesũa wɔ Bra, Bɛka Mo Do ho, mpaabɔ, Asɔr ɔfrɛ, ɔsom, yeridzi sacrament, yɛrosɔr wɔ temple, na yɛrodwendwen Nyankopɔn ne ndzɛmba ho. Hɛn Ewuradze na Agyenkwa akã dɛ, “Hom nsũa me … na hom benya ahomgye ama hom kra.” Gye No Dzi. Na ma No mber pɛr.

President Nelson akã dɛ: “Mototɔ serɛ hom dɛ hom mma Nyankopɔn ndzi nyim wɔ hom abrabɔ mu. Hom mma No mber mu dodow a oye. Hom reyɛ dɛm no, hom nhyɛ mbrɛ hom sunsum mu ahoɔhar pa bɛyɛ no nsew.”

Yehu dɛ dɛm ahoɔhar no risisi wɔ seminary, institute, na Asɔr esuapon horow mu. Mbea yinom hɔ no, Ewuradze na odzi kan. Ntsi no ɔsɛ dɛ Ɔwɔ hɛn mu kor biara n’abrabɔ mu.

Bea kor so a ɔkyerɛ nwomasũa a ɔrokɔ sor wɔ Asɔr mu no nye BYU–Pathway. Wiadze mu nyina no, nyimpa dodow no atra 75,000 na ɔrokɔ do nyin ntsɛntsɛm. Hɔn mu dodow yɛ asɔrmba, na bɔbor nkyɛmu ebiasa no mu kor wɔ Africa. Pathway no botae nye dɛ nkorɔfo pii benya nwomasũa ho kwan. Ibowie adzesũa kyerɛ dɛ ibenya kwan ayɛ edwuma, na enya kwan ayɛ edwuma kyerɛ abrabɔ a oye ma ebusua ebusua na akwanhorow dɛ edze bɔsom Ewuradze.

Mber a nna menye stake baanodzifo reyɛ nhyiamu wɔ Uganda no, musũaa dɛ stake presidency no nyina dze hɔn ho ahyɛ BYU–Pathway mu. Honandua mu na sunsum mu ahoboa a yɛyɛ no yie no, nna yebotum ara yie esiw ɔsɛɛfo ne ndaadaa a ɔdze bɔ hɛn do ntoa no kwan a. Hom nkaa Peter ne nsɛm dɛ: “Tamfo abɔnsam tse dɛ gyata a ɔropɔw, nenam rohwehwɛ nyia a obenya amen no.“

Muhu dɛ wɔ asɛmpa ne nsɛm dɛw ne finimfin no, binom wɔ hɔ a wodzi aper, a wɔwɔ gyedzi ho taferbanyinmbɔmu, ekyingye, na nsɛmbisa a ɔyɛ dɛ wonnyi nyiano. Enuanom na nkyerɛbaa, Jesus Christ nye nyiano no. Enye No nhyɛ ase. Hwewhwɛ Ne nhyɛdo wɔ w’abrabɔ mu. Tsie No. “Mma hom akoma ntutu,“ Ɔkãa kyerɛɛ N’esuafo no wɔ Ne mber a odzi ewiei mu ansaana Gethsemane, ansaana Ɔrosoa Ne mbeamudua afa Jerusalem stiitsi mu, ansaana Golgotha, a okowiee No werdam afɔrbɔ, dza Ɔno nko, Nyankopɔn ne Ba kortonoo botum ayɛ.

Hu dɛ Ɔtse ase. Ɔfaa hɛn bɔn nyinara too Noho do, mfomdo, ayawdzi, na nda bɔn biara, ama yeetum yɛnye hɛn Ɔsor Egya atsena bio wɔ mfesantsen mu. Ɔakã dɛ, “Hom nhwɛ me wɔ hom adwendwen biribiara mu; mma hom nngye kyim, mma hom nnsuro.“ Gyedzi wɔ Jesus Christ mu botum epagya wo na ɔasa wo kra a ɔyar no yarba. Nya awerɛhyɛmu wɔ No mu na edze ntsɛmyɛ bɛsan akɔ “No dɔ abasa no mu.“

Mitsĩ hɛn nkɔnhyɛnyi tseasefo ne nsɛm mu bio dɛ: “Ana hom hu dza ɔrokɔ do wɔ hɛn enyiwa do? Mobɔ mpaa dɛ ber yi mu n’enyimnyam no yɛbɛhyɛ no nsew yie! Ampaara Ewuradze rema N’edwuma rokɔ do ntsɛm.” Hom mma dɛ hɛn nda mu esuafo no yɛntsẽa mu dɛ, “Hurrah nkã Israel,“ ber a yɛyɛ ahoboa ma hɛn Ewuradze na Agyenkwa ne nsanee. Jesus Christ ne dzin mu, amen.