Tumdzi Krɔnkrɔn, Young Men Anwanwafo

Elder Anderson, yɛda wo ase, wɔ asɔfodzi tum na Agyenkwa no no Werdambɔ tum a akyerɛ.

Kwesida anapa bi wɔ Sanda yi, ber a metsena sacrament ehyiadzi ase no, young men bɔbor duebien na wɔmaa hɔn tsipia dɛ wɔnhyɛ hɔn Aaron Asɔfodzi. Metsee nkã dɛ ɔdze nsesa reba wiadze.

Ɔkaa me dɛ wiadze nyinara mu, bea biara na hɔn mber no, wɔ sacrament ehyiadzi ase a ɔtse dɛm mu no, wɔrema deaconfo, akyerɛkyerɛfo, na asɔfo mpempem—tse dɛ anapa yi President Holland ne nyɛnko, Easton—tsĩpia dɛ wɔbɛhyɛ hɔn asɔfo wɔ abrabɔ ber nyina mu asɔfodzi somdwuma mu a ɔwɔ Israel mboano ne fã beebiara mu no.

Sanda biara, wɔdze nsa gu young men bɛyɛ 100,000 hɔn etsir do na wodua ayɛdze do dze hɔn toa asɔfodzi tumdzi kyerɛpɛn kann do a ɔtsen ekyir dua Nsanananmu ber no fa Joseph na Oliver do, dze kɔ John Onumanyi no do na ɔdze kesi Jesus Christ do.

Afei, hɛn asɔr yi yɛnntaa nngye enyim ara nnyɛ adze nnkyerɛ. Yɛnnyɛ ndzɛmba ho dede wɔ ha.

Naaso, ɔno mpo a, muruhu dɔm a tum wɔ hɔn mu a wɔahyɛ hɔn asɔfodzi fofor a wɔwɔ asaase yi do nyina no, modween ho dɛ—wɔ “enyigye asɔr” mu kwan bi do no—nkyɛ ɔwɔ dɛ yegyina adan sor bɔ ho dawur. Modween ho dɛ, “Ndɛ, ɔsɛ dɛ yɛbɔ totorobɛnto na yɛbɔ akasaa mu na yɛtotow hwiipow dze hyɛ dwumadzi no ho fa. Ɔwɔ dɛ yɛtow santsen!”

Yenyim dza Nyankopɔn no tum tse ankasa no, nna ɔwɔ dɛ yehu dɛ sor tumdzi a ɔretserɛw asaase do no bɔtoto wiadze nhyehyɛɛ.

Asɔfohyɛ yi dze young men no hyɛ ɔsom mu hɔn nkwa nda nyina osiandɛ wobegyina nsɛnhia mbea na tsebew ahorow mu a hɔn ankasa na hɔn mpaabɔ na Nyankopɔn n’asɔfodzi tum a wokitsa no ho behia papaapa.

Dɛm dwumadzi ntoatoado a nhyehyɛɛ da ho no dze Nyankopɔn no bɔfoe somfo a Ɔsomaa no hyɛɛ ase. Tsetseber do John Onumanyi a ɔasoɛr efi owu mu no puee Joseph na Oliver do, dze ne nsa guu hɔn etsir do, na ɔkãa dɛ, “Me mfɛfo asomfo, wɔ Messiah ne dzin mu medze Aaron Asɔfodzi no ma hom, dza okitsa abɔfo hɔn som, nye nnuho asɛmpa no, na nsumuhyɛ enuma a wɔdze kɔ bɔnfakyɛ mu no ne nsaafee” (Nkyerɛkyerɛ na Ahyɛmudzi 13:1).

John frɛɛ dɛm tumdzi yi “Aaron Asɔfodzi,” a ɔdze too Moses no nuabanyin na asɔfodzi adamfo no. Tsetseber no, nna hɔn a wokitsa dɛm Aaron asɔfodzi no wɔdɛ wɔkyerɛkyerɛ na wɔboa wɔ ayɛdze nyɛe ho—ayɛdze a otsim osuanyiyɛ wɔ ndaamba Messiah, Ewuradze Jesus Christ no do (hwɛ Deuteronomy 33:10).

Nkanee nwoma no kyerɛ asodzi pefee ma hɔn a wokitsa Aaron asɔfodzi no dɛ hɔn na wɔhwɛ ayɛdze nkuraba no do. “Na yi Aaron nye ne mbabanyin no si hɔ … hɔn ahwɛdze nye … ɔpon no … nye ahotseweebea ndzɛmba no a wɔdze som no” (Nkanee 3:10, 31).

Ahyɛmu Dadaw mbowa afɔrbɔ ayɛdze no hyɛɛ mã na Agyenkwa no n’abrabɔ na Werdambɔ no hyɛɛ ananmu. Dɛm tsetse ayɛdze no wɔdze ayɛdze a sesei yɛfrɛ no Ewuradze Edzidzi sacrament no hyɛɛ ananmu.

Ewuradze ma hɔn a ndɛ wokitsa Aaron asɔfodzi no asodzi dɛ wɔnyɛ ndzɛmba kor noara a tsetse ber do nna wɔyɛ no: wɔnkyerɛkyerɛ na wɔnyɛ ayɛdze mma—ne nyina dɛ wɔbɛma yɛakaa No Werdambɔ no.

Sɛ deaconfo, akyerɛkyerɛfo, na asɔfo boa wɔ sacrament ho a, wonya ho nhyira tse dɛ ma obiara nya no: ber a worisie ahyɛmudzi a wɔyɛ no ber a ankorankor dzi paanoo na wɔnom nsu no. Mbom wɔ asodzi krɔnkrɔn yinom ne nyɛe mu no, wɔsan so sũa yie fa hɔn asɔfodzi asodzi na edwuma horow ho.

Wɔfrɛ Aaron Asɔfodzi no ahosiesie asɔfodzi, ne fã bi no, osiandɛ n’ayɛdze horow no ma hɔn kwan ma wonya asodzi na dɛwdzi a ɔwɔ erosom Ewuradze mu ho sũahu, na osiesie hɔn ma ndaamba asɔfodzi som, ber a wɔbɛfrɛ hɔn ma wɔasom wɔ akwan pii a wonntum nnhu mu—a wɔrema nkenyan nhyira wɔ mber a enyidado na adaaso, mpo nkwa na owu, sensɛn esian mu.

Enyidakwan wɔ enyiber mber yinom ho no hia enyiber ahosiesie.

Nkyerɛkyerɛ na Ahyɛmudzi nwoma no kyerɛkyerɛ mu dɛ deaconfo na akyerɛkyerɛfo wɔdɛ “wɔbɔ kɔkɔ, wosansan nsɛm mu, wotu fo, wɔkyerɛkyerɛ hɔn, na wɔto nsa frɛ obiara dɛ ɔmbra Christ hɔ” (Nkyerɛkyerɛ na Ahyɛmudzi 20:59). Ɔka ndwuma yinom ho no, asɔfo wɔdɛ “[w]ɔkã asɛmpa no … na [w]onuma” (Nkyerɛkyerɛ na Ahyɛmudzi 20:50).

Oye, ne nyina yɛ dɛ ɔdɔɔ sõ, naaso wɔ wiadze yi ankasa mu no, dɛm ndzɛmba yi kɔ do ntɔyɛɛ mu ara na wɔ wiadze nyina mu.

Bishop bi kyerɛkyerɛɛ ne deaconfo quorum presidency afoforfo no dɛm asodzi yinom. Ntsi presidencyfo a wonnyinii no hyɛɛ ase dzii nkɔmbɔ faa mbrɛ wobotum ayɛ iyi wɔ hɔn quorum na ward mu. Wosii gyinae dɛ wɔbɛhyɛ ase aserasera ward mba a wɔayɛ mpanyin no na woehu dza wohia na wɔayɛ ama hɔn.

Hɔn a wɔsoom hɔn no hɔn mu kor nye Alan, nyɛnko a ɔyɛ basabasa, ɔtaa kã kasa fĩ, na ɔtɔfabi a ɔyɛ enyitandze. Alan ne yer, Wanda, bɛyɛɛ Asɔrba, mbom Alan dze, dɛ mbrɛ yɛkã no, nna edwuma wɔ no ho.

Ɔno n’ekyir nyina no mpo, deaconfo no yɛɛ edwuma, a paserew kwan do no wɔannkasa n’ahorbahyehyɛ ho, ber a woritsitsi esukwankyɛba gu nkyɛn na woyii nwura kɔtowee gui. Ɔyɛ dzen dɛ ebɛtan deaconfo, na ekyir no Alan hyɛɛ ase dɛ ɔrodɔ hɔn. Odur mber bi no wɔtoo nsa frɛɛ no dɛ ɔmbra asɔr.

Obuaa dɛ, “Memmpɛ asɔr.”

Wɔkãa dɛ, “Oye, epɛ hɛn asɛm.” “Ntsi bra bɛka hɛn ho. Ibotum aba hɛn quorum nhyiamu ase ara sɛ epɛ a.”

Na bishop agye ato mu no, ɔbae—na ɔkɔr do bae.

Deaconfo no bɛyɛɛ akyerɛkyerɛfo, na wɔkɔr do som no no, ɔkyerɛkyerɛɛ hɔn mbrɛ wosi yɛ kaar ho edwuma na wɔhyehyɛ ndzɛmba. Odur ber a deaconfo a wɔabɛyɛ akyerɛkyerɛfo no bɛyɛɛ asɔfo no, nna Alan frɛ hɔn “me mbanyimba.”

Nna worisesie hɔn ho akɔ asɛmpasomafo dwuma na wobisaa no sɛ wobotum nye no ayɛ asɛmpasomafo adzesũadze horow no ho esũaesũa a. Ɔpaa mu kãa dɛ orinntsie da na ɔnnkɛgye edzi da, mbom, ɔpeen do, dɛ wobotum ayɛ esũasũa no wɔ ne fie.

Na nkyii Alan yaree. Na ɔgowee.

Na dakor quorum nhyiamu ase bi no, ɔserɛɛ fi n’akoma mu ara dɛ wɔmbɔ mpaa mma no ma ongyaa sigyarɛt nom, ntsi wɔyɛe. Mbom nkyii wodzii n’ekyir kɔr fie na woyiyii no towa a wɔaboa ano pii no fii hɔ.

Ber a Alan n’apɔwmudzen do gu do ruhuan a ɔdze no kefir asopitsi horow na nsiesie mbea horow no, “ne mbanyimba” no soom no, kommyɛ mu ara wɔdze asɔfodzi tum na ɔdɔ a ndabraba biara nnyi mu ridzi dwuma (hwɛ Nkyerɛkyerɛ na Ahyɛmudzi 121:41).

Anwanwadze no kɔr do ber a Alan serɛɛ dɛ wonnuma no —mbom iyi enntum amba mu na ɔdze fii mu. Dɛ mbrɛ ɔpɛ no, ne deaconfo a wɔabɛyɛ asɔfo no na wɔsoaa no fundaka na wɔkasaa wɔ n’eyiadze, bea a—ɔfata ara no—wɔbɔɔ kɔkɔ, sansaan mu, tuu fo, kyerɛkyerɛe, na wɔtoo nsa frɛɛ obiara dɛ ɔmbra Christ hɔ.

Ekyir no, wɔ temple no, ɔyɛ “Alan ne mbanyimba” hɔn mu kor na ogyinaa ananmu maa Alan, na onumaa nkaano deaconfo quorum president no.

Biribiara a John Onumanyi no kãa dɛ ɔwɔ dɛ wɔyɛ no, wɔyɛe. Wɔyɛɛ dza deaconfo, akyerɛkyerɛfo, na asɔfo a wɔwɔ Asɔr yi nyina mu na wiadze nyina mu yɛ no.

Ndzɛmba a wɔdze ahyɛ hɔn a wokitsa Aaron asɔfodzi nsa no no mu kor nye sacrament ayɛdze no.

Mfeda mihyiaa bishop bi a ɔwɔ adom nye ne yer nwanwafo. Memenda anapa bi a ɔnkyɛree, nna worutwuw kaar akɔ hɔn babanyin n’enuma na dza ɔyɛ hu too hɔn na mpofirmu ara wɔhweer hɔn babaa dɔfo Tess a woedzi mfe ebien.

Adzekyee a odzi do no, hɔn ward mba boaa ano baa sacrament nhyiamu a nna ayamuhyehye ahyɛ hɔn mã a, wɔsan so ridzi yaw wɔ basiaba kakraba a odzi mu yi a oewu no ho. Nna obiara n’enyi nnda kwan dɛ bishop n’ebusua bɛba asɔr dɛm anapa no, naaso sima kakra ana wɔrebɛhyɛ nhyiamu no ase no, dzinn mu ara wɔhɛn hɔ kɛtsenaa ase.

Bishop no kɔr enyim hɔ na ɔnantsewee paa no ntɔyɛɛ tsenabea wɔ n’apamfo ebien no ntamu ho na mbom ɔkɛtsenaa n’asɔfo no hɔn ntamu wɔ sacrament pon no ho.

Anafua ɔyaw mu a oenntum annda a ɔrohwehwɛ ntseasee na asomdwee no, onyaa nkenyan dzendzen wɔ dza n’ebusua hia kɛse—na dza no ward hia kɛse ho. Ɔno nye dɛ wɔbɛtse hɔn bishop, hɔn Aaron Asɔfodzi president, na hɔn papa a ɔwɔ yaw mu no ne ndze, dɛ—ɔrekã sacrament ahyɛmudzi ho anohoba no.

Ntsi, mber sõe no, ɔnye asɔfo no buu ntwɛr na ɔkasaa kyerɛɛ N’Egya. Awerɛhow ber a ɔtse dɛm mu no, ɔkãa nsɛm a tum wɔ mu papaapa a wɔma obi kwan ma obue n’ano kã wɔ abrabɔ yi mu.

Nsɛm a ɔwɔ onnyiewiei nsunsuando.

Ayɛdze nsɛm.

Ahyɛmudzi nsɛm.

Nkyerɛkyerɛ a ɔdze hɛn fam abrabɔ no botae papaapa ho—na ɔsan dze hɛn fam nsunsuando a ɔkrɔn a ofi Ɔsor Egya ne nhyehyɛɛ ma hɛn mu no ho.

Ibotum esusu dza asɔrmba no tsee no wɔ asɔrfi hɔ—nkenyan a wonyae wɔ nsɛm a yɛtse no Kwesida biara wɔ hɛn asɔrfi mu?

“O Nyankopɔn, Onnyiewiei Egya, yɛserɛ wo wɔ wo Ba, Jesus Christ ne dzin mu, dɛ hyira dɛm paanoo yi do na tsew ho ma akra a wobedzi nyina, ama woedzi dze akaa wo Ba no honandua, na wɔagye dase dze ama wo, O Nyankopɔn, Onnyiewiei Egya, dɛ woenya pɛ dɛ wɔbɛfa wo Ba ne dzin ato hɔn do, na wɔakaa no aber nyina na woedzi ne mbrasɛm a ɔdze ama hɔn no do; ama aber nyina woenya no Sunsum ma ɔnye hɔn atsena. Amen” (Nkyerɛkyerɛ na Ahyɛmudzi 20:77).

Na nkyii: “O Nyankopɔn, Onnyiewiei Egya, yɛserɛ wo wɔ wo Ba Jesus Christ ne dzin mu, dɛ hyira dɛm [nsu] yi do na tsew ho ma akra a wɔbɔnom nyina, ama wɔayɛ dze akaa wo Ba no bɔgyaa a okyii maa hɔn; ama wɔagye dase dze ama wo, O Nyankopɔn, Onnyiewiei Egya, na wɔakaa no aber nyina, ama woenya no Sunsum ma ɔnye hɔn atsena. Amen” (Nkyerɛkyerɛ na Ahyɛmudzi 20:79).

Dɛm egya na nã yi dzii dase dɛ dɛm anohoba no ahyɛ mã. Ampaara, wonyaa “no Sunsum ma ɔnye hɔn tsenaa,” maa hɔn onnyiewiei awerɛkyekyer.

M’enyi sɔ afebɔɔ dɛ hɔn a wokitsa Aaron Asɔfodzi no, a no tum, ayɛdze, na asodzi ka ho no, hyira hɛn nyinara a odua abɔfo hɔn som, nye nnuhu asɛmpa no, na nsumuhyɛ enuma a wɔdze kɔ bɔnfakyɛ mu no ne nsaafee” do (Nkyerɛkyerɛ na Ahyɛmudzi 13:1). Wɔ Jesus Christ ne dzin mu, amen.