Sɔr

Mbrɛ yɛtaa sɔr a ohia kɛse no mu kor nye yɛboa ano wɔ bea a wɔatsew hɔ na yɛyɛ ndzeyɛɛ krɔnkrɔn dze sɔr. Ewuradze se, “Aama hom eetum aatsew homho efi wiadze nkekãa ho, hom nkɔ mpaabɔ fie wɔ me da krɔnkrɔn no mu nkedzi sacrament no.” Nyew, iyi nye hɛn nkenyan tsitsir ara a yesisi asɔrfi horow. Mbom, sɛ okehia a, bea a wɔnntseew hɔ beye sɛ yebotum esie ahotsew wɔ mu ara krakra a.

Dza yɛyɛ ber a yɛboa ano wɔ Ewuradze ne da no na ohia kɛse. Nyew, yɛhyɛ ntar a enyi tsew dɛ mbrɛ hɛn ahonya tse—nnyɛ hyerɛpɛɛ, mbom wɔ kwan a ɔdwe do a ɔkyerɛ hɛn bu na enyidzi ma Nyame. Dɛmara so na hɛn su yɛ enyidzi na obu. Yɛsɔr ber a yɛkã ho ma wɔbɔ mpaa, yɛtow asɔr ndwom dze sɔr (nnyɛ yeritsie ara mbom yɛrotow asɔr ndwom no); yɛsɔr ber a yɛkyerɛkyerɛ hɛn ho adze na yesũa adze fi hɛn ho hɔ nkorkor. Jesus se, “Hom nkaa dɛ Ewuradze ne da yi, ɔwɔ dɛ hom bɔ hom afɔr [ɔno kyerɛ dɛ, hom ’afɔrbɔ horow … ɔyɛ mber, talent horow, anaa hom ahonyadze, dze som Nyankopɔn na adasa’] na hom dzi hom sacrament no, na hom nkã hom bɔn nkyerɛ hom nuanom, na wɔ Ewuradze enyim.” Yɛbɔmu ba behyia mu nnyɛ dɛ yɛrebɛgye hɛn enyi anaa wɔrebɛgye hɛn enyi—bia wɔdze adwontofo kuw bi—mbom ama yɛakaa Ɔno na “ɔ[a]bɛkyerɛkyerɛ [hɛn] wɔ emudzi mbordo mu”, wɔ Ne asɛmpa nkyerɛkyerɛ mu.

Ndaansa yi ara wiadze mfɛndzanan ehyiadzi mu no, Elder Patrick Kearon kaa hɛn dɛ, “yɛmmboa ano Ahomgyeda dɛ yɛreba sacrament nhyiamu ara na yɛayɛ ahyɛnsew dɛ yɛaba. Yɛboa ano ba dɛ yɛrobɔsɔr. Nsonsonee kɛse da ebien no ntamu. Yɛreba kyerɛ dɛ yɛwɔ hɔ. Mbom yɛrosɔr nye yɛagye enyim ara rotonton na yeriyi hɛn Nyankopɔn ayɛw wɔ kwan a ɔsakyer hɛn do!”

Yerutu hɛn Ahomgyeda som ama Ewuradze na No botae ɔno ankasa yɛ ndzeyɛɛ dɛ yɛrosɔr. Mfe kakra abɛsen, aber no Elder Russell M. Nelson hyɛɛ no nsew dɛ: “Yesi dɛn sie Ahomgyeda no krɔnkrɔn? Ber a nna minnyinii pii no, musũaa dza binom akyerɛw no nkorkor a ɔfa ndzɛmba horow a ibotum bɛyɛ na ma nnkɛyɛ no Ahomgyeda no. Ekyir no koraa na musũaa fii kyerɛwsɛm no mu dɛ me ndzeyɛɛ na mo su wɔ Ahomgyeda no yɛ sɛnkyerɛdze a ɔda emi na mo Ɔsor Egya ntamu [hwɛ Exodus 31:13; Ezekiel 20:12, 20]. Minyaa dɛm ntseasee no, nna minnhia dza wɔakyerɛw no nkorkor a wɔyɛ anaa wɔnnyɛ. Sɛ ɔwɔ dɛ misi gyinae sɛ biribi ne nyɛe fata anaa ɔmmfata Ahomgyeda no a, mibisa moho sin ara dɛ, ‘Ebɛn sɛnkyerɛdze na mepɛ dɛ medze ma Nyankopɔn?’”

Yɛrosɔr Ahomgyeda no, mbrɛ yesi tsim wɔ Jesus Christ no werdam afɔrbɔ kɛse no do na ɔda nsew. No kwan do ara no yɛhyɛ No Wusoɛr ho fa soronko wɔ Easter ber naaso dapɛn biara yedzi sacrament a ɔyɛ No Werdambɔ ho asɛnkyerɛdze, a No Wusoɛr ka ho. Ma nyia oenya nnuhu no, oridzi sacrament no nye ɔrosɔr Ahomgyeda dza ɔda edzi kɛse.

Yɛrobɔ mu asɔr dɛ “Christ nyimpadua no” wɔ tum soronko na mfaso pii ber a yɛkyerɛkyerɛ adze, yɛsom, na yɛma hɛnho nkorkor tsĩpia. Ɔyɛ enyigye dɛ, ndaansa yi nhwehwɛmu adzesũa hun dɛ hɔn a wɔhwɛ hɔn sunsum mu abrabɔ dɛ ɔyɛ kokoa mu asɛm koraa no wɔnntaa mma sunsum mpontu nnhia hɔn, anaa wɔbɛkã dɛ hɔn gyedzi ho hia ara yie, anaa ofi ber to ber no wobenya mber nye Nyame asɔr. Dɛ yɛyɛ Ahotseweefo fɛkuw yi, yɛhyɛ hɛnho nkorkor dzen wɔ yɛrosɔr na wɔ gyedzi mu.

Ɔno mpo no, hɛn werɛ nnkefir daa daa ndzeyɛɛ a yɛdze sɔr a yɛyɛ no ankorankor na wɔ fie. Agyenkwa no kaa hɛn dɛ, “Naaso, hom tum bɔ hom anohoba wɔ tseneneeyɛ mu da biara na aber biara.” Akyerɛbaa kor bi hyɛɛ no nsew nyansa mu ara dɛ, “Munnkotum adwen kwan a odzi mu ara yie a yɛdze bɔsɔr Nyankopɔn akyɛn yɛbegye Ne mba nkakraba aba hɛn abrabɔ mu na yɛahwɛ hɔn na yɛakyerɛkyerɛ hɔn Ne nhyehyɛɛ ma hɔn.”

Alma na Amulek kyerɛkyerɛɛ Zoramfo no a wɔabra hɔn efi hɔn nhyiamudan mu dɛ wɔbɔsom Nyankopɔn no nnyɛ dapɛn dapɛn nko mbom aber nyina, “na wɔ beebiara a hom wɔ.” Wɔkãa mpaabɔ ho asɛm dɛ yɛ asɔryɛ:

“Ɔsɛ dɛ hom hue hom akra gu wɔ hom mpia mu, nye hom sumabea, nye hom sar do.

“Nyew, na sɛ hom ennsũ ammfrɛ Ewuradze a, hom mma mpaabɔ nhyɛ hom akoma mu mã daa nyina.”

Wɔkãa erohwehwɛ kyerɛwsɛm mu, eregye Christ ho dase, ayamuyie ho ndzeyɛɛ na som, eregye Sunsum Krɔnkrɔn no, na eretsena ndaase mu daa daa ho nsɛm. Hom nsusu dɛm adwen no: “eretsena ndaase mu daa daa.” Ɔno kã m’adwenkyerɛ a otsĩa ebien no ho asɛm dɛ:

Yerinya na yɛrekyerɛ enyisɔ ma Nyame, ampaara no, nye dza ɔdze enyigye hyɛ hɛn mu ber a yɛrosɔr kyɛn dɛ yehu dɛ ɔyɛ dwuma kor bi so ara.

Yɛrosɔr nokwar mu n’asekyerɛ nye dɛ yɛrodɔ Nyame na yerigyaa hɛn pɛ mu ma No—akyɛdze a ɔsom bo kɛse a yebotum dze ama. Ber a wobisaa mbra no mu asɛnkɛse nye dɛn no, Jesus buaa dɛ, “Dɔ Ewuradze wo Nyankopɔn wɔ w’akoma nyina mu, nye wo kra nyina mu, nye w’adwen nyina mu.” Ɔfrɛɛ iyi so mbrasɛm mu dza odzi kan no.

Nna iyi yɛ Jesus nankasa mbrɛ Osii sɔɔr Egya no no nhwɛdo. Otuu N’abrabɔ na No werdam afɔrbɔ no sii hɔ maa Egya no n’enyinyam. Yɛdze awerɛhow kaa Jesus a Ɔreserɛ fi N’akoma a ɔretsew mu ber a Ɔwɔ yaw na amandzehu a yennkotum esusu mu dɛ: “Egya sɛ ɔbɛyɛ a, ma kuraba yi mpa mo ho nkɔ: naaso nnyɛ dɛ mbrɛ mepɛ bi a, na mbrɛ ɔwo epɛ a.”

Yɛrosɔr nye yɛrobɔ mbɔdzen edzi fasusu a odzi mu yi do. Yennkenya emudziyɛ wɔ adzesũadze yi mu adzekye enyim ara, mbom sɛ dabiara “afɔr a [yɛ]bɔbɔ ama [No] nye akoma a abobɔ nye sunsum a abotow [ɔyɛ setsie a],” Ɔdze No Sunsum bonuma hɛn bio na Ɔdze N’adom ahyɛ hɛn mã.

Nkyerɛkyerɛ na Ahyɛmudzi ɔfã a odzi kan mu no, Ewuradze da N’afɔbu ma wiadze no edzi dɛ:

“Woefi me nhyehyɛɛ ho, na wɔatõ m’ahyɛmu a ɔwɔ hɔ daapem no;

“Wɔnnhwehwɛ Ewuradze ma ne tseneneeyɛ nnda edzi, mbom obiara fa nankasa no kwan do, na odze dzi nankasa ne nyame ne saso ekyir, dza ne saso tse dɛ wiadze dze.”

Oye ma hɛn dɛ yɛbɛkaa Jewfo mberantsɛ baasa Hananiah, Mishael, na Azariah a, wɔsoaa hɔn kɔr Babylon ndɔmmum mu mber kakra ekyir a Lehi na n’ebusua fii Jerusalem no hɔn fasusu. Babylon panyin bi maa hɔn edzin fofor Shadrach, Meshach, na Abed-nego. Ekyir no, ber a baasa yinom poow dɛ wɔbɔsɔr ohonyi bi a Nebuchadnezzar esi hɔ no, ɔhyɛɛ mbra dɛ wɔntow hɔn ngu fononoo gya framfram no mu, rese hɔn dɛ, “na [Nyame] kor a ɔbɛgye hom efi me nsamu nye woana?“

Hom kaa hɔn nyiano ndamyɛ mu no dɛ:

“Hɛn Nyankopɔn a yɛsom no no obotum dɛ ɔgye hɛn fi fononoo gya framfram no mu, na ɔno na ɔbɛgye hɛn efi ɔwo, ɔhen wo nsamu.

“Na sɛ annyɛ dɛm mpo a, hu dɛ … yɛronnsom wo abosom, yɛronnkotow nnsɔr ohonyi a edze esi hɔ no.”

Osiandɛ fononoo no adɔ mbordo ntsi okum hɔn a wɔtoow hɔn guu mu no, mbom Shadrach, Meshach, na Abed-nego dze hwee annyɛ hɔn. “Nkyii Nebuchadnezzar kasae, na ɔkãa dɛ, “Nhyira nkã Shadrach, Meshach, na Abed-nego hɔn Nyankopɔn a … ɔabɛgye no nkowaa a wɔdze hɔn werɛ tweer no, … na oegyaa hɔn nyimpadua mu ama, amma wɔannsom ɔbosom biara, … gyedɛ hɔnankasa hɔn Nyankopɔn.” Wɔdze hɔn werɛ tweer Jehovah dɛ Ɔbɛgye hɔn, “na sɛ annyɛ dɛm mpo a,” ɔkyerɛ dɛ, mpo sɛ Nyankopɔn wɔ Ne nyansaa mu no Oennsiw hɔn wu kwan a, wɔbɛda ho edzi nokwar ama No.

Biribiara a odzi yɛrosɔr Egya na Ɔba no enyim kan no ba bɛyɛ ohonyi. Hɔn a wɔpow dɛ Nyankopɔn bɛyɛ nokwar ne farbaa no, anaa wɔpow dɛ wobobu nkontaabu ama No no, nna ɔyɛ dɛ ma wɔayɛ hɔnankasa hɔnho dɛ hɔn enyame. Nyia ɔdze ne gyedzi nyina hyɛ kuw anaa nhyehyɛɛ bi mu a ogya ɔsor kwankyerɛ ekyir no rosɔr ɔbosom ɔtorfo. Hɔn mpo a wɔse wɔrosom Nyankopɔn na mbom wonnsie Ne mbrasɛm no renantsew wɔ hɔn ara hɔn akwan do: “Wɔdze hɔn anofamfa twe bɛn me, na mbom hɔn akoma dze ɔnye me ntamu twe kɛse.” Hɛn botae imu a yɛdze sɔr nye “nokwar Nyame kor no, nye nyia [Ɔ]somaa no, mekyerɛ Jesus Christ.”

Ewiei no, bia mbrɛ yesi bɔ hɛn bra no, bɛyɛ nokwar kwan mapã a, yɛdze sɔr. Yɛrekyerɛ hɛn som n’asekyerɛ nye dɛ yɛreyɛ dɛ Egya na Ɔba no—yɛrefa Hɔn su na suban wɔ hɛn ankasa hɛn mu. Sɛ, dɛ mbrɛ wɔtaa kã no, esũasũa nye atorsɛm mu nokwar papaapa a, nna bia ɔfa Nyame ho no, yerusũa ayɛ dɛ Ɔno nye nokwar obu kɛse no. Iyi kyerɛ mbɔdzembɔ a yɛgye enyim na yɛkɔ do yɛ dɛ hɛn afamu dze a yɛdze rohwehwɛ krɔnkrɔnyɛ. Na yɛreyɛ tse dɛ Christ yie no so yɛ dza ofi hɛn som ndzeyɛɛ no nsunsuando mu ba. Elder Kearon ne kasasin a medzi kan akã ho asɛm no a ɔfa yɛrosɔr ho, “wɔ kwan a ɔsakyer hɛn” do no, hia papaapa. Yɛrosɔr nokwar mu no dze nsakyeree ba.

Iyi nye ahyɛmudzi anamɔn kwan ne fɛw no—yɛrosɔr, ɔdɔ, na nokwardzi ma Nyankopɔn. Yedua enuma mu dze hɛn dɛm anamɔnkwan no do, a yɛbɔ anohoba dɛ yɛbɛfa Christ ne dzin ato hɛn do na yesie Ne mbrasɛm. Yenya Sunsum Krɔnkrɔn n’akyɛdze no, Agyenkwa n’adom somafo no a ɔpon na ɔtsew hɛnho fi bɔn ho sɛ yenu hɛnho a. Yebotum mpo akã dɛ yerunu hɛn ho no nna yɛrosɔr No.

Asɔfodzi ayɛdze horow dzi do na ahyɛmudzi horow a yedzi no wɔ Ewuradze ne fie a ɔtsew hɛnho bi kã ho. Temple nyɛe na ayɛdze horow no yɛ kwan a ɔkrɔn a yɛfa do sɔr.

President Russell M. Nelson etsĩ mu akã dɛ, “banyin biara na basia biara a ɔdze noho hyɛ asɔfodzi ayɛdze horow mu na wɔnye Nyankopɔn dzi ahyɛmu horow na wosie no nya akwantsen kwan kɔ Nyankopɔn no tum no ho.” Ɔnnyɛ tum a yɛtwe dze som na yɛdze hyira nko. Ɔyɛ ɔsor tum so a odzi dwuma wɔ hɛn mu tsew hɛnho ma yɛyɛ krɔngyenn. Ber a yɛnantsew ahyɛmudzi anamɔnkwan do no, nyamesu mu tum ahotsew no da edzi” wɔ hɛn mu.

Nkyɛ hɛn so, tse dɛ tsetse Nephifo na Lamanfo no, “[ye]twa [a]hwe Jesus n’ananadze, na [yɛa]sɔɔr no.” Nkyɛ hɛn so, dɛ mbrɛ Jesus ahyɛ hɛn no, “yeetwa ahwe afamu na yɛasɔr Egya no wɔ [Ba no ne] dzin mu.” Nkyɛ yɛngye Sunsum Krɔnkrɔn no na yengyaa hɛn akoma mu mma Nyankopɔn na mma yennya nyame fofor biara wɔ N’enyim, na dɛ Jesus Christ esuafo no yɛmfa No suban wɔ hɛnankasa hɛn abrabɔ mu. Megye dase dɛ sɛ yɛyɛ dɛm a, yebenya dɛwdzi sũahu wɔ yɛrosɔr mu. Jesus Christ ne dzin mu, amen.