Ayamuyie—Osuanyiyɛ Mapã ho Asɛnkyerɛdze

Osuanyi yɛ obi a odzi obi ekyir anaa obi no suanyi. Esuafo yɛ “edwumasuafo” a wotu hɔnho si hɔ dɛ wɔbɛyɛ tse dɛ hɔn kyerɛkyerɛnyi. Ereyɛ Jesus Christ osuanyi no bor irinya enyidado anaa eregye Ne nkyerɛkyerɛ na N’asɛm edzi ara do. Ɔkyerɛ pii mpo kyɛn egye No krɔnkrɔnyɛ to mu na egye No to mu dɛ hɛn Agyenkwa na Pomfo, a ohia papaapa no.

President Dallin H. Oaks kyerɛkyerɛɛ mu dɛ: “Yɛreka Jesus Christ do nnyɛ adzebiara adzebiara anaa dza wɔyɛ no dakor dakor. Ɔyɛ pisi a yɛwɔw do na abrabɔ kwan a ɔsɛ dɛ ɔma hɛn akwankyerɛ mber nyina na wɔ mbeambea nyina.” Osuanyiyɛ yɛ akwantu a yɛhyɛ da tu dze bɛsakyer ɔnam Ewuradze no werdam afɔrbɔ na N’anwanwa tum do. Osuanyiyɛ no botae tsitsir nye dɛ nokwar mu ara yɛbɛyɛ tse dɛ ma Jesus Christ tse no—mpo dze kɛpem dɛ No “su da edzi wɔ [hɛn] enyim.”

Dɛ yɛbɛyɛ Ewuradze n’esuafo no, ɔwɔ dɛ yɛhyɛ da sũasũa N’adwendwen na Ne ndzeyɛɛ dabiara—mfatoho, Ne setsie, ahobrɛadze, na abotar. Ber a yɛdze su ahorow yi ka hɛnankasa hɛn su ho nkakrankakra no, ɔma “[y]enya [No] suban krɔnkrɔn no bi.” Agyenkwa no suban yi a wosũasũa no yɛ adze tsitsir wɔ yɛrosom No ho. Dɛ mbrɛ President Nelson kyerɛkyerɛɛ no, “Yɛda hɛn ntonton a yɛdze ma Jesus no edzi papaapa ber a yesũasũa Jesus.”

Jesus Christ no su krɔnkrɔn ahorow nyina ɔsɛ dɛ yesũasũa no, kor gyina hɔ kyɛn nkaa no nyina na nkaa no nyina hyɛ mu. Su no nye No dɔ mapã, anaa ayamuyie. Nkɔnhyɛnyi Mormon na Ɔsomafo Paul nyina kaa hɛn dɛ sɛ yennyi ayamuyie a “[yɛ]nnsɛ hwee.” Anaa, dɛ mbrɛ woyii kyerɛɛ Nkɔnhyɛnyi Joseph Smith no, “ayamuyie nnyi hɔ a, [yɛ]runntum nnyɛ hwee.”

Agyenkwa Nankasa daa ɔdɔ edzi dɛ ahyɛnsewdze anaa asɛnkyerɛdze a wɔdze bohu N’esuafo nokwafo ber a Ɔkãa dɛ:

“Mbrasɛm fofor na medze mema hom, Dɛ hom ndodɔ homho nkorkor; dɛ mbrɛ mado hom no, hom so ndodɔ homho dɛmara.

“Ɔnam iyi do na nyimpa nyina bohu dɛ hom yɛ m’esuafo, sɛ hom wɔ ɔdɔ wɔ homho nkorkor a.”

Ayamuyie yɛ adwen a ntseasee wɔ mu a obotum ayɛ dzen dɛ wɔbɛkyerɛ mu naaso hɔn a ɔka hɔn no tse ase ara yie. Preach My Gospel kyerɛkyerɛ dɛ “ayamuyie, tse dɛ gyedzi, ogya ndzeyɛɛ.” Nokwar, wobotum akã dɛ ayamuyie yɛ “ɔdɔ a ɔda edzi wɔ ndzeyɛɛ mu.” Nkyerɛkyerɛmu yi ma nhumu kɛse wɔ Agyenkwa no ho asɛm a wɔabɔ no tɔw mu—“Okyinii yɛɛ yie.”

Dɛ yɛyɛ Jesus Christ akadofo no, ɔsɛ dɛ yɛhwehwɛ sũasũa kwan a hɛn Wura daa No dɔ mapã no edzi kyerɛɛ nkaafo. Ɔwɔ mu dɛ Agyenkwa no da ayamuyie edzi wɔ akwan pii mu, naaso mepɛ dɛ motwe adwen si N’ayamuyie nhwɛdo ahorow ebiasa a wohu no wɔ N’esuafo nokwafo no mu no do.

Odzi kan, Agyenkwa no daa ayamuyie edzi ber a Ɔkyerɛɛ ayamuhyehye. No somdwuma wɔ Nephifo mu no dɛ mbrɛ wɔakyerɛw wɔ Mormon Nwoma mu no, Jesus too nsa frɛɛ no nkorɔfo dɛ wɔnsan nkɔ hɔn efiefi na wɔnkɔdwendwen dza Ɔakã no ho na wonsiesie hɔn adwen mu yie mmfa mma adzekyee a, Ɔbɛba hɔn nkyɛn bio no. Afei nkyerɛwee no kã dɛ:

“Nyinsuwa eguraa hɔn, na wɔhwɛɛ no hann tse dɛ ma wɔrohwehwɛ akã akyerɛ no ma oetsintsim wɔ hɔn nkyɛn kakra.

“Na ɔsee hɔn dɛ: Hwɛ, ayamuhyehye ahyɛ m’abadaa mu mã wɔ homho.”

Ayamuhyehye yɛ ayamuyie ne fã a ɔhwehwɛ tsew amandzehu do. Ayamuhyehye ahyɛ No mã no, Ewuradze maa ayarfo na hɔn a biribi rehaw hɔn a wɔwɔ nkorɔfo no mu no ayarsa. Ɔno ekyir no, Ohyiraa hɔn mbofra ber a abɔfo fii sor sianee botwaa hɔnho hyiae. Ɔyɛɛ dɛm adɔyɛ ndzeyɛɛ yi na pii a ɔka ho, osiandɛ Ne “yamu hyehyee no.”

Ber a nna morosom dɛ asɛmpasomafo aberɛntsɛba wɔ South America no, moso minyaa ayamuhyehye a ɔdɔfo bi daa no edzi kyerɛɛ me no bi. Ewimbir bi a nna mereka kaar akɔ hɛn asɛmpakã president no fie a nna menye mo companion no, aberantsɛ bi a nna ɔtse bicycle do bɛdaan no ho mpofirmu wɔ kaar no enyim. Osii ntsɛmara ma menntum ensiw akwanhyia no kwan. Awerɛhowsɛm nye dɛ, no kaar no a ɔbɔɔ no no kum aberɛntsɛba yi. Yaw kɛsenara kãa me wɔ no nkwa a ɔhweree ho. Suro na ahobow mu no wɔ dza oesi a ɔnnkyɛree no ho hu no tɔɔ mo do, wɔdze mo kɔtweer aban ne efiadze mu. Munnhun suro na ankonamyɛ mbordo a ɔtse dɛm dabiara da. Minyaa abagura na suro dɛ wɔdze mo bɔto efiadze mo nkwa da nyina.

Me mfɛfo asɛmpasomafo, Elder Brian Kochever, tsee akwanhyia no na ayamuhyehye kaa no. Ɔbaa efiadze hɔ na ɔpaa mpanyimfo no kyɛw dɛ wɔmma no kwan ma ɔnye me ntsena efiadze hɔ amma mannyɛ ankonam. Anwanwa kwan do no, wɔgyee too mu. Besi dɛm da yi, m’enyi sɔ osuafo yi no dwumadzi a ɔkyerɛ dɛ ɔwɔ dɔ dɛ Christ a ɔmaa me abodwee, awerɛkyekyer na abotɔyamu ber a meretseetsee kɛse wɔ m’abrabɔ mu. Elder Kochever n’ayamuhyehye ayamuyie yɛ sɛnkyerɛdze a ɔkyerɛ no suanyiyɛ. Dɛ mbrɛ President Russell M. Nelson akã no, “Kwan kor a ɔyɛ mberɛw a edze botum ehu Jesus Christ osuanyi nokwafo nye ayamuhyehye kwan a ɔdze hwɛ nkorɔfo nkaa no.”

Mfatoho bi so a ɔkyerɛ kwan a Agyenkwa No da No dɔ edzi nye Ɔrohwɛ ehu na Ɔrema afofor hɔn ehiadze horow a wommbue hɔn ano nnkã. Banyin no a nna ɔayɛ obubuafo mfe 38 a obiara nnyi hɔ a ɔbɔboa no no, Ewuradze maa no do na ɔhyɛɛ no nkuran dɛ ɔmbɔ bra tseneneeyɛ mu. Ɔbaa no a wɔkyeer no wɔ awartõ mu no, Ɔmaa no enyidado na awerɛkyekyer na nnyɛ afɔbu. Banyin mbubuinyi no a wogyaagyaa no mu dua dan estifi sii famu no, Ewuradze maa bɔnfakyɛ, nnyɛ honandua ayarsa kɛkɛ.

Ber a wɔfrɛɛ me dɛ monsom dɛ bishop no, hɛn mba nkakraba esia maa sacrament nhyiamu yɛɛ dzen maa me yer, Cristin, a nna ɔwɔ dɛ ɔno nko na ɔhwɛ hɔn ber a metsena sor hɔ. Bia ibotum esusu ho, mpɛn pii no, nna hɛn mba no nntaa nnda obu edzi. Hɛn asɔrmba ebien, John na Debbie Benich, huu me yer ne tsebea no wɔhyɛɛ ase wɔnye no tsenae Kwesida biara dze boaa no. Hɔn ayamuyie no kɔr do mfe pii, na wɔbɛyɛɛ nananom ananmusifo maa hɛn ebusua. Tse dɛ Ewuradze no, dɛm esuafo yi hun ehiadze a wɔmmfa ano nnkã na wodzii dwuma wɔ ɔdɔ mu—hɔn osuanyiyɛ asɛnkyerɛdze a ɔkrɔn.

Ewiei koraa no, Agyenkwa no dɔ a odzi mu tsim dɛ ɔbɛma Nyankopɔn ne mba nyina botum ahyɛ hɛn nkrabea krɔnkrɔn mã ama “[yɛa]bɛfa no nkwagye na ɔpon tum no bi” Ber a yɛbɛyɛ tse dɛ hɛn Wura yie no, hɛn pɛ dɛ yɛboaboa hɛn nuambanyin na nkyerɛbaa wɔ ahyɛmudzi anamɔnkwan no do bɔkɔ sor.

Mfatoho, yebotum ama hɔn a hɔn bo efuw anaa hɔn a werɛ efir hɔn no nkuranhyɛ anaa yɛafa hɔn anyɛnkofo, aboa hɔn a wɔyɛ afoforfo wɔ hɛn mboanofo mu no ma wɔatse dɛ wɔkã ho, anaa yɛato nsa afrɛ ayɛnkofo ma wɔnye hɛn abɔsom wɔ sacrament nhyiamu ase—bia Easter a ɔreba yi. Akwan pii wɔ hɔ a wɔfa do hyɛ nkuran na wɔboa binom wɔ hɔn mpontu mu sɛ yɛgye enyim dze mpaabɔ hwehwɛ ɔsor mboa ama yeenya enyiwa a wɔdze hu na akoma ma yɛatse nkã dɛ ma Jesus hu na onya atsenkã ma hɔn no.

Eroboa binom wɔ hɔn ahyɛmudzi anamɔnkwan no do botum afa kwan a ɔnnyɛ ntɔyɛɛ som dwuma do. Dɛ mfatoho, mo dwumadzi a sesei miridzi wɔ Philippines no, musũaa Agamata ebusua no hɔn ho asɛm. Wonumaa hɔn wɔ afe 2023 mu, na afei wɔdze enyiber tuu da bi sii hɔ dɛ wɔdze bɔsɔw hɔn ebusua ano wɔ Urdaneta Philippines Temple a ɔbɛn hɔn. Mbom, aka kakra ma ebusua no hɔn mber no asõ no, ehum adzendzen pii tutui wɔ mantɔw no mu. Onuabanyin Agamata, okuafo a odua emo, enntum enndua no nduadzewa wɔ ehum dzendzen ber no mu. Ewiei koraa no a ehum no twae no, nna ohia dɛ odua emo no ntsɛmara ber a asaase no amemen nsu ara yie—tsebea pa a wɔdze tsetsɛw. Awerɛhowsɛm nye dɛ, nna ɔwɔ dɛ wotu temple akwantu no hyɛ da.

Esuafo ebien, Elder na Akyerɛbaa Cauilan, na asɛmpasomafo asomfo baasa tsee Agamata ebusua no hɔn aperdzi na wɔmaa mboa a nna ɔwɔ mu dɛ wonnyi ekuadwuma ho suahu biara. Wɔreyɛ edwuma wɔ ewia ne hyew ase no, wɔboae tsetsɛɛw nduadzewa no, a ɔmaa Agamatafo no wiee hɔn dwumadzi na wɔkɔr hɔn temple nsɔwano dɛ mbrɛ wɔhyehyɛɛ no. Elder Cauilan hun dɛ “[Agamatafo no] hɔn enyim hyerɛnee ber a yehun dɛ wɔhyehyɛ ntar efufuw wɔ Ewuradze fie no. Enyigye a yɛtsee ho ber a yɛrosom nyimpa kor mpo yɛ enyigye a onnyi ntotoho!”

Seseiara Agamatafo no enya nhyira a ɔwɔ onnyiewiei ebusua nsɔwano mu osiandɛ hɔn mfɛfo esuafo kumaa bi a ayamuyie ahyɛ hɔn mã—hɔn osuanyiyɛ asɛnkyerɛdze—sii gyinae dɛ wɔbɔboa hɔn nuambanyin na nkyerɛbaa ma wɔakɔ enyim wɔ hɔn ahyɛmu anamɔnkwan no do.

Nuambanyin na nkyerɛbaa, Jesus Christ osuanyiyɛ nko nye kwan a wɔfa do nya enyigye a otsim. Ɔyɛ anamɔnkwan a ɔdɔ dwumadzi a wɔhyɛ da gye enyim yɛ ma nkorɔfo ahyɛ mu mã. Ber a osuanyiyɛ anamɔnkwan no tum yɛ dzen no, na ber a mber bi yebedzi aper na yɛatɔ sin no, yɛbotum enya awerɛkyekyer dɛ Nyankopɔn enyi wɔ hɛn do na Ɔpɛ dɛ Ɔboa hɛn ber biara a yɛbɔ mbɔdzen. Isaiah kaa hɛn dɛ “Nyankopɔn bosuo [hɛn] nsa … mu, dɛ, Mma nnsuro, mobɔboa wo.”

Yɛdze awerɛhyɛmu yi a ofi hɛn Ɔsor Egya hɔ to hɛn adwen do no, mobɔ mpaa enyiberdo dɛ yebotum edzi President Neslon ne nsato do dɛ yɛmma hɛn osuanyiyɛ nyɛ adze tsitsir. Hom mma “[yɛ]mfa [hɛn] akoma mu ahoɔdzen nyina mbɔ mpaa mma Egya no, ama ɔdze dɛm ɔdɔ yi aahyɛ hɛn mã, dza ɔdze egu hɔn a wɔyɛ ne Ba Jesus Christ n’akãdofo nokwafo do no; … ama ber a obopue no, yɛabɛyɛ tse dɛ ɔno,” osiandɛ yɛsoa osuanyiyɛ mapã ho asɛnkyerɛdze a ɔyɛ “ayamuyie … Christ no dɔ mapã.”

Megye dase dɛ Jesus Christ, nye hɛn enyimnyam tseasefo Agyenkwa, Pomfo, Fasusu, na Nyɛnko. Jesus Christ ne dzin mu, amen.