Nyame no Dɔ no

Ɔhyewber bi, ber a nna yerutu kwan wɔ ekuraase no, hɛn ebusua daa abowano ewimbir bi wɔ wimu a nna fua biara nnyi mu ase. Dza yehu no pefee wɔ hɛn sor no nye wimu abɔdzedze nwanwa, a nworaba a wonntum nnkan ahyɛ no mã na ɔyɛ a kan nyinam mu no. Ber a bobor boow hɛn wɔ tum a ɔwɔ Nyame n’abɔdze mu no, yenya obu nkitahodzi ho atsenkã ma No. Nna hɛn mbofra nkakraba, a wonyinii wɔ Hong Kong no, nnyaa sũahu bi tse dɛ iyi da. Wonnyim hwee no wobisaa sɛ yɛtse wimu kor noara ase wɔ fie a. Mobɔɔ mbɔdzen dɛ mebɛkyerɛkyerɛ hɔn mu dɛ ɔyɛ wimu kor noara, mbom mframa na kan hyirɛɛn a ɔwɔ bea a yɛtse no mma hɛn kwan ma yennhu dɛm nworaba yinom mpo dɛ wɔwɔ hɔ.

Kyerɛwsɛm no kyerɛkyerɛ hɛn dɛ “gyedzi nye awerɛhyɛmu a osi pi wɔ ndzɛmba a enyi da ho kwan, ndzɛmba a enyi nntua ho no nokwar danse.” Susuampara dɛ wiadze mu dza ɔdan enyi na nsɔhwɛ horow fua hɛn sunsum mu adzehu no, sɛ yɛdze gyedzi dzi dwuma wɔ Nyankopɔn na Ne Ba Jesus Christ mu a, yenya awerɛhyɛmu pefee wɔ hɔn ayamuhyehye ma hɛn ho.

Mormon Nwoma mu no, nkɔnhyɛnyi Lehi hun “dua bi a n’eduaba yɛ akɔndɔ na obotum so ama nyimpa enyigye” na ɔyɛ dɛw papapanara sen nduaba a [ɔ]asɔ ahwɛ nyinara.” Ɔsɔ eduaba no hwɛɛ no, dɛw kɛse hyɛɛ ne kra mã, na ɔpɛɛ dɛ n’ebusua bɔsɔ ahwɛ so. Yesua dɛ dɛm dua yi gyina hɔ ma “Nyame no Dɔ no,” na tse dɛ Lehi, hɛn so yebotum enya dɛw dasegye afa Nyame ho sɛ yɛto nsa frɛ No wɔ hɛn abrabɔ mu a.

Jesus Christ yɛ Ɔsor Egya no dɔ ma hɛn no ne fasusu. Ɔnam No werdam afɔrbɔ do no, Ɔfaa hɛn bɔn too No do na woposoow no wɔ hɛn emumuyɛ ntsi. Ɔasɔw hɛn yaw, ɔasoa hɛn awerɛhow, na ɔafa hɛn ayawdzi na nyarbanyarba ato No ho do. Ɔsoma Sunsum Krɔnkrɔn no dɛ ɔnkyekye hɛn werɛ, na dɛw, asomdwee, na gyedzi, a ɔdze enyidado na ɔdɔ hyɛ hɛn mã ka Sunsum n’aba ho.

Susuampaara dɛ Nyame no Dɔ no wɔ hɔ ma obiara no, dodowara hwehwɛ no enyiber do, na binom so pɛ dɛ wɔtse Nyame no Dɔ nkã naaso wɔnngye nndzi dɛ wɔfata. Binom so bɔ mbɔdzen dzendzenndzen kɔ do tse Nyame no dɔ nkã. Kyerɛwsɛm no na Ewuradze no nkɔnhyɛnyi kyerɛkyerɛ hɛn dɛ yebotum awɔwdo enya Nyame no dɔ ho sũahu sɛ, ɔnam Jesus Christ n’adom do, yenu hɛnho ntaataado, nokwar mu ara dze bɔn kyɛ, per dɛ yebesie Ne mbrasɛm no, na etuhoakyɛ mu ara yɛsom adasa a. Yɛtse Nyame no dɔ nkã sɛ yɛyɛ ndzɛmba a ɔtwe hɛn bɛn No, tse dɛ yerudua daa daa mpaabɔ na kyerɛwsɛm adzesũa do nye No akasa, na yerigyaa ndzɛmba a ɔtwe hɛn fi No ho yɛ, tse dɛ yɛreyɛ ahantan, yɛdze wentwiwentwi reba, na yɛreyɛ etuatsewfo.

President Russell M. Nelson ato nsa afrɛ hɛn dɛ “yenyi wura dadaw biara a ɔwɔ hɛn abrabɔ mu” na “yɛmfa ayawdzi nto nkyɛn.” Ɔahyɛ hɛn nkuran dɛ yɛnhyɛ hɛn sunsum mu fapem no dzen yie, ber a yetsim hɛn abrabɔ wɔ Agyenkwa no do na wɔ Ne temple ayɛdze na ahyɛmudzi horow do. Ɔabɔ anohoba dɛ “ber a yesie hɛn temple ahyɛmu horow no, yenya Ewuradze ne dzenhyɛ tum no ho kwan kɛse. … Yɛtse Jesus Christ na Ɔsor Egya Hɔn dɔ mapã no mbordo!”

Mowɔ nyɛnko bi a nna ɔwɔ ebusua fɛɛfɛw na edwuma papa. Iyi sesae ber a yarba maa nna onntum nnyɛ edwuma, a awargyae toaa do. Fitsi dɛm mfe no a ndzɛmba ayɛ dzen, mbom no dɔ ma ne mba na ahyɛmudzi horow a ɔnye Nyankopɔn edzi no ahyɛ no dzen. Dakor, ɔtsee dɛ no hokafo dadaw no awar bio na oebisa dɛ wobotwa hɔn temple nsɔwano no mu. Ɔhaaw no na n’adwen mu yɛɛ konsẽe. Ɔhwehwɛɛ asomdwee na ntseasee wɔ Ewuradze Ne fie mu. Da a odzi ne nserahwɛ ekyir no, minyaa asɛm yi fii no hɔ:

“Minyaa sũahu a ɔyɛ nwanwa wɔ temple ndeda anafua. Nna ɔda edzi dɛ meda ho wɔ ebufuw kakra wɔ mo mu. … Nna minyim dɛ otwar dɛ mesesã, na mabɔ mpaa dapɛn mu no nyina dɛ medze bɛyɛ dɛm. … Ndeda anafua wɔ temple mu no, metsee dɛ Sunsum no eyi ebufuw no efi m’akoma mu ankasa. … Nna ɔyɛ ahotɔ ankasa dɛ mibenya fahodzi efi ho. … Woeyi honam mu adzesoa a ɔrohom mo do no.”

Ɔda ho wɔ no nkõdzen no, sũahu a onyae wɔ Ewuradze ne fie a Nyame no dɔ na ɔgye tum aboa no ma ɔtse dɛ ɔabɛn Nyame, oenya gyedzi wɔ abrabɔ ho, na ɔnnhaw pii wɔ ne daakye ho no, yɛ dza ɔsom me nyɛnko yi bo.

Sɛ yɛtse Nyame no dɔ no a, yebotum asoa hɛn adzesoa na abotar na enyigye mu ara yegyaa hɛnho mu ama Ne pɛ. Yɛwɔ awerɛhyɛmu dɛ Nyame bɛkaa Ne’ahyɛmudzi horow a Ɔnye hɛn ayɛ, asera hɛn wɔ hɛn amandzehu mu, na Ɔagye hɛn efi nkowaasom mu. Yɛbɛpɛ so dɛ yɛnye hɛn ebusua na hɛn adɔfo bɛkyɛ dɛwdzi a yenya no. Tse dɛ Lehi n’ebusua no, nyimpa biara wɔ pɛ dɛ obedzi anaa onnkedzi eduaba no, mbom yɛwɔ ho kwan dɛ yɛbɔdɔ, yɛbɛkyɛ, na yɛato nsa afrɛ wɔ kwan a ɔma hɔn a yɛdɔ hɔn no tse Nyame no Dɔ no.

Ama aaboa binom ma wɔatse Nyame no dɔ no, ohia dɛ yenyin wɔ Christ-su tse dɛ ahobrɛase, ɔdɔ, ayamuhyeyhe, na abotar wɔ hɛn mu, na yedua yɛrekã mbrasɛm akɛse ebien a ɔyɛ yɛrodɔ Nyankopɔn na yɛrodɔ hɛn mfɛfo no do yɛadan binom ama Agyenkwa no.

Hɛn mba mbanyin no mu baako nyaa aperdzi fa gyedzi a ɔwɔ no mu na dɛ ɔkã ho no wɔ ne mbabun mfe mu. Emi na me yer bɔɔ mpaa hwehwɛɛ kwan a yebotum afa do aboa no, na nna yɛayɛ krado dɛ yɛbɛyɛ dza Ewuradze bɛma yɛayɛ biara. Dakor minyaa nkenyan dɛ mimbisa me elderfo quorum president sɛ onyim obi a ɔwɔ ahohia mu a mubotum nye me ba banyimba yi akɛsera no a. Ɔdwen ho kakra ekyir no, ɔserɛ hɛn dɛ yɛnkɛsera ɔbaa bi a ɔwɔ apɔwmudzen mu haw horow, na nkorbata ne president ama hɛn kwan no, yɛdze sacrament abrɛ no dapɛn biara. M’enyi gyee ankasa naaso nna morodwen mbrɛ me ba no bɛgye dɛm dapɛn dapɛn pisi yi.

Hɛn nserahwɛ a odzi kan no, hɛn akoma dzii yaw ma ɔbaa dɔfo yi, a nna ɔwɔ yaw mu daa daa. N’enyi sɔɔ sacrament no ankasa, na hɛn enyi gyee dɛ yɛserɛ ɔno na no kun. Nserahwɛ kakra ekyir no, Kwesida bi nna minnyi hɔ na menntum annka me ba no ho mbom mekaa no wɔ hɛn dwumadzi no ho. Ber a mudur fie no, nna m’enyi da kwan dɛ mebɛtse ma nserahwɛ no yɛɛ kɔree. Me ba no yii ano dɛ ɔnngye nndzi dɛ ne mfɛfo yɛ ndzɛmba a ɔyɛ ahomka tse dɛ iyi. Na ɔkyerɛɛ mu a ɔkã dɛ ɔnye no nuabanyin kɔr dɛ ɔmbɔboa no, na dɛ sacrament mmae no kɔr do tɔɔtsenn, mbom nna akyerɛbaa dɔfo yi no werɛ ahow dapɛnda no mu osiandɛ ɔtoo nsa frɛ n’anyɛnkofo dɛ wɔmbra ne fie mbɔhwɛ sene, naaso n’efir a wodzi yi sene no annyɛ edwuma. Me ba no kãa dɛ ɔhwehwɛɛ internet do, hun ɔhaw no, na osiesiee no wɔ hɔ noara maa no. Ohun dɛ no ho wɔ mfaso, n’enyi gyee, na onyaa awerɛhyɛmu nkã-tse dɛ ɔayɛ biribi ma akyerɛbaa no enyi agye. Ɔtsee Nyame no dɔ nkã ma no.

Sɛ, hɛn mbɔdzembɔ apapa nyinara ekyir no, abrabɔ yɛ dzen mpo a, sɛ inya nkã-tse dɛ wɔnntse wo mpaabɔ a, anaa sɛ nntum ntse Nyame no dɔ a, meserɛ hu dɛ wo mbɔdzembɔ biara hia na, dɛ mbrɛ nworaba wɔ wimu ampaara no, Ɔsor Egya na Jesus Christ nyim, tsie, na wɔdɔ wo.

Ber bi a nna N’esũafo wɔ nsuhɛn mu a “asorɛkye robɔ hɔn no,” Agyenkwa no nantsewee bɛn hɔn wɔ nsu no do na ɔmaa hɔn awerɛhyɛmu, see dɛ, “Hom enyi ngye, ɔyɛ emi, mma hom nnsuro.” Ber a Peter pɛɛ dɛ ɔnantsew kɔ Agyenkwa no hɔ wɔ nsu no do no, Jesus too no nsa, see dɛ, “Bra.” Na ber a Peter yew ne ntsimii na ɔhyɛɛ ase dɛ ɔremem no, ntsɛmara Agyenkwa no tsen Ne nsa dze gyee no na ɔdze no kɔr dwudwoodwo a ɔsee dɛ, “Ɔwo a wo gyedzi suar, ɔyɛ dɛn ntsi na egyee kyim?”

Sɛ ehum no tsia hɛn wɔ hɛn abrabɔ mu a, yɛwɔ pɛ dɛ hɛn enyi bɛgye na yɛayɛ akokodurfo a? Yebesi dɛn akaa dɛ Agyenkwa no nngyaa hɛn na dɛ Ɔbɛn hɛn bia wɔ akwanhorow a yennyaa nnhunii mu? Yɛwɔ pɛ dɛ yɛbɔkɔ No hɔ wɔ gyedzi mu nkanka ber a kwan a ɔda hɛn enyim no yɛ dɛ dza ɔnnkɛyɛ yie? Na ebɛn akwan do na Opegya hɛn kɔ bambɔ mu sɛ yɛhaw a? Yebesi dɛn nokwar mu ara ahwɛ No wɔ adwendwen biara mu, a yɛnngye kyim anaa yennsuro?

Sɛ epɛ dɛ etse Nyame no Dɔ no pii wɔ w’abrabɔ mu a, ma monto nsa mfrɛ wo dɛ susu dza odzi do yinom:

• Odzi kan, taa dzinn fa kaa dɛ eyɛ Nyame ne ba na dwen ndzɛmba a ewɔ enyisɔ ma ho.

• Otsĩa ebien, bɔ mpaa daa daa, bisa Ɔsor Egya mboa ma ehu nyia ɔwɔ wo nkyɛn a ohia dɛ ɔtse No dɔ nkã.

• Otsĩa ebiasa, bisa nokwar mu dza ibotum ayɛ dze aboa dɛm nyimpa no ma ɔatse Nyame no dɔ no nkã.

• Na otsĩa anan, yɛ ntsɛmara dzi nkenyan a enya no do.

Sɛ yɛwɔwdo bɔ mpaa na yebisa ma binom a, Nyankopɔn bɛkyerɛ hɛn nkorɔfo a yebotum aboa. Na sɛ yedzi dwuma ntsɛmara a, yebotum abɛyɛ kwan a Ɔnam do yi hɔn mpaa ano. Yɛreyɛ dɛm no, mber mu no, yebenya nyiano ama hɛn mpaabɔ, na yɛbɛtse Nyame no dɔ nkã wɔ hɛnara hɛn abrabɔ mu.

Abosoom kakra abasen no a yerutu kwan wɔ Vietnam no, nna emi na me yer wɔ wimhɛn a otui wɔ ehum dzendzen mu. Nna ehum no yɛ dzen ankasa, na nna yehu fua kebii, nsu a ɔrotɔ dzendzen, na enyinam ɔrepaa fi hɛn ntokura no mu. Mfowee tsentsen a nna ɔyɛ akomatu ekyir no, hɛn wimuhɛn yi tuii traa ehum fua no na opueii enyimnyam bea. Yɛkaa hɛn Ɔsor Egya na Jesus Chirst na yɛtsee Hɔn dɔ kɛse nkã ma hɛn no bio.

Anyɛnkofo dɔfo, dɛ nyia ɔatse Nyame no dɔ no, megye dase enyigye mu ara dɛ Agyenkwa Jesus Christ nye Nyame no dɔ no. No dɔ ma hɛn dzi mu, yɛ ankorankor, na afebɔɔ. Ber a nokwar mu ara yɛka No do no, nkyɛ No dɔ ahyɛ hɛn mã na yɛayɛ kandzea a ɔweɔn adasa ba No dɔ ho. Jesus Christ ne dzin mu, amen.