Ɔsor Mboa horow ma Ɔnnkyebo Abrabɔ

Ewuradze duaa Nkɔnhyɛnyi Joseph Smith do yii ndzɛmba kumaabi kyerɛe no a ɔfa hɛn abrabɔ ansaana nyimpa reba asaase do ho. Hɔ no, yɛtsenaa ase dɛ Nyankopɔn no sunsum mu mba. Osiandɛ Nyankopɔn pɛ dɛ Ɔboa Ne mba ma wotu mpon ntsi, Ɔbɔɔ adwenpɔw dɛ Ɔbɔbɔ asaase a yebotum enya honandua wɔ do, yedua sũahu mu esũa adze, yenya nyame su, na wɔasɔ hɛn ahwɛ sɛ yebedzi Nyankopɔn ne mbrasɛm do a. Hɔn a wɔafata no “wɔdze enyimnyam bogu hɔn etsir do afebɔɔ kesi afebɔɔ” (Abraham 3:26).

Ama wɔakyekyer nhyehyɛɛ krɔnkrɔn yi ne ngyinado no, Nyankopɔn saan mu yii Ne Ba Kortoono dɛ ɔnyɛ hɛn Agyenkwa. Lucifer a, ɔdze nsusui fofor a ɔbɛsɛɛ nyimpa ne pɛ no, bɛyɛɛ Satan na “wɔtoow no kyeen famu.” Wɔpaam no baa asaase do na wɔdze ɔnnkyebo abrabɔ ho ndzinoa kaam no, wɔmaa Satan kwan dɛ ɔmper “ndaadaa na ɔmfura adasa hɔn enyi, na ongya hɔn nkɔ ndɔmmum mu dɛ mbrɛ ɔpɛ, dodowara a wonnketsie [Nyame ne] ndze mpo“ (Moses 4:4).

Dza ohia tsitsir wɔ Nyankopɔn ne nhyehyɛɛ kɛse ma ɔnnkyebo abrabɔ mu mpontu ma Ne mba nye wobenya “adze nyina dza otsia no” (2 Nephi 2:11) ho sũahu. Tse dɛ hɛn honandua mu nam runntum nnyin anaa wɔnnhwɛ do yie gyedɛ otsia gravity mbra no, dɛm ara na ɔnnkyebo asetsena mu nyinii hia dɛ yetsia Satan no nsɔhwɛ horow na honandua mu ndzɛmba binom a wɔkõ tsia. Dza ohia kɛse ma sunsum mu mpontu nye ahwehwɛdze dɛ yɛsan mu yi papa fi bɔn ntamu. Hɔn a wɔsan mu fa papa no botu mpon akɔ hɔn onnyiewiei nkrabea. Hɔn a wɔsan mu fa bɔn no—a nyimpa nyina bɛyɛ wɔ ɔnnkyebo abrabɔ nsɔhwɛ ahorow mu no—behia ɔgye ho mboa, a Nyame dɔfo ahyehyɛ dze ama.

Nyame no ɔnnkyebo abrabɔ mu mboa ne kɛse koraa nye Ɔmaa hɛn Agyenkwa, Jesus Christ, a Obohu amandze dze etua kaw na Ɔama bɔnfakyɛ wɔ bɔn horow a yenu hɛnho wɔ ho no. Dɛm ehumbɔbɔr na enyimnyam Werdambɔ no kyerɛkyerɛ siantsir a gyedzi wɔ Ewuradze Jesus Christ mu nye asɛmpa fapem a odzi kan no mu. No Werdambɔ no “na ɔma owusoɛr ba” (Alma 42:23), na “[ɔ]abɔ werdam dze etua wiadze bɔn kaw” (Alma 34:8), a ɔpepa hɛn bɔn nyina a yenu hɛnho wɔ ho no na ɔma Agyenkwa no tum ma ɔboa hɛn wɔ hɛn honandua mu mberɛwyɛ horow mu.

Dza ɔtra hɛn bɔn a yɛayɛ a wɔrepepa no enyimnyam mu na wɔdze akyɛ hɛn no, hɛn Egya dɔfo a ɔwɔ Sor ma hɛn akyɛdze horow binom so ma ɔbɔ hɛnho ban, a odzi kan no ɔrobɔ hɛn ho ban ma yɛnnyɛ bɔn kã ho. Hɛn ɔnnkyebo abrabɔ aber biara no dza ɔhyɛ ase nye egya bi na nã bi. Ne papa mu no, beenu no nyina wɔ hɔ a wɔdze akyɛdze nsonsonee rema hɛn nyinii ho kwankyerɛ. Sɛ ɔnntse dɛm a, wonnyi hɔ no kã dza otsia a ɔsɛ dɛ yedzi do konyim ho.

Hɛn Ɔsor Egya ne nhyehyɛɛ no ma hɛn mboa binom so a ɔma hɛn kwankyerɛ wɔ hɛn ɔnnkyebo akwantu yinom mu. Mebɛkasa afa iyinom mu anan ho. Meserɛ hom, mma hom mmfa hom enyi nnda nkanee anan no do, osiandɛ mboa yinom dzi afora. Bio so, ehumbɔbɔr bambɔdze binom wɔ hɔ dze kã iyinom ho.

Odzi kan, Mekasa fa Christ ne Kan anaa no Sunsum ho. Ne nkyerɛkyerɛ a okenyan kɛse wɔ Moroni nwoma mu no, Moroni sera kã n’egya n’asɛm dɛ “wɔdze Christ no Sunsum ama ɔdasanyi biara , ama oeehu papa fi bɔn ho” (Moroni 7:16). Yɛkenkan nkyerɛkyerɛ kor yi ara wɔ ndɛ nyikyerɛ mu:

“Na Sunsum no ma ɔdasanyi biara a ɔbɛba wiadze yi mu no kan; na Sunsum no ma ɔdasanyi biara a ɔwɔ wiadze yi mu a otsie Sunsum ne ndze no nyimdzee” (Nkyerɛkyerɛ na Ahyɛmudzi 84:46).

Bio: “Na masoma mo Sunsum ma ɔkɔ wiadze dɛ ɔnkɛtsew ahobrɛadzefo nye hɔn a wɔbotow, no enyi na ɔdze afɔbu ama ndzebɔnyɛfo” (Nkyerɛkyerɛ na Ahyɛmudzi 136:33).

“Ewuradze nngyaa nyimpa (ber a wɔwoo no ba wiadze yi mu) a onnyi boafo, dɛ ɔkekã dze hwehwɛ kan na nokwar, mbom wɔwoo obiara dɛ ɔwɔ ndzinoa no dɛ ɔbɛgye Christ No Sunsum anaa Nokwar Kan no, a ɔtɔfabi a wɔfrɛ no Ewuradze No Sunsum wɔ hɛn nkyerɛwee mu no no kwankyerɛ, nkyerɛkyerɛ, na n’afotu.”

Mboa akɛse ahorow a Ewuradze dze ama dɛ ɔbɔboa hɛn ma yɛasan mu eyi dza oye no dza otsĩa ebien no yɛ kwankyerɛ horow a wɔsɛ a ɔwɔ kyerɛwsɛm no mu a wɔyɛ nkwagye ho nhyehyɛɛ (enyigye ho nhyehyɛɛ) ne fã bi). Kwankyerɛ yinom nye mbrasɛm, ayɛdze, na ahyɛmudzi horow.

Mbrasɛm no kyerɛ anamɔnkwan a hɛn Ɔsor Egya akyerɛ hɛn dɛ yɛmfa do nkɔ onnyiewiei nkwa mu. Nkorɔfo a wosusu dɛ mbrasɛm no yɛ kwan a Nyankopɔn fa do dze hu hɔn a Ɔbɛtsẽa hɔn no nnyi Nyankopɔn n’enyigye ho nhyehyɛɛ ɔdɔ mu ara yi no botae ho ntseasee. Dɛm anamɔnkwan no do no, yebotum nkakrankakra no yɛnye hɛn Agyenkwa enya nkitahodzi a yehia na ɔma yɛfata No tum kɛse a ɔboa hɛn wɔ hɛn kwan do a ogya kɔ bea a Ɔpɛ ma hɛn nyina no. Hɛn Ɔsor Egya pɛ dɛ Ne mba nyina san ba celestial ahenman no mu, bea a Nyankopɔn na hɛn Agyenkwa no tse, na yenya abrabɔ kor a hɔn a wɔtse celestial enyimnyam mu no wɔ.

Ayɛdze na ahyɛmudzi horow kã mbra no a ɔkyerɛ anamɔnkwan a odzi kɔ onnyiewiei nkwa mu no ho. Ayɛdze, na ahyɛmudzi krɔnkrɔn a yedua mu yɛnye Nyankopɔn dzi no, yɛ anamɔntu a wohia na bambɔdze a ɔwɔ dɛm kwan no do. Ɔyɛ a, mepɛ dɛ modwen ahyɛmudzi horow n’asɛdze dɛ ɔrekyerɛ dɛ wɔ Nyankopɔn ne nhyehyɛɛ mu no, nhyira horow a Ɔkrɔn kɛse no wɔdze ma hɔn a wodzi kan bɔ anohoba dɛ wobesie mbrasɛm binom na wodzi dɛm anohoba horow no do.

Mboa binom so a Nyankopɔn dze ama a ɔboa ma yɛyɛ nsanmuyi horow a oye nye Sunsum Krɔnkrɔn ne ndaedzi horow. Sunsum Krɔnkrɔn no yɛ Nyametsir hɔn mu nyia otsĩa ebiasa no. No dwuma, dɛ mbrɛ wɔakyerɛ wɔ kyerɛwsɛm mu no, nye Ɔbɛgye Egya na Ɔba no ho dase, ɔbɛkyerɛkyerɛ hɛn adze, ɔakaa hɛn ndzɛmba nyina, na Ɔama hɛn kwankyerɛ akɔ nokwar nyina mu. Kyerɛwsɛm no kã Sunsum Krɔnkrɔn ne ndaedzi ho nsɛm pii, tse dɛ sunsum ne dasegye wɔ Mormon Nwoma no nokwar ho nsɛmbisa ho mbuae. Onnyi dɛ yɛdwen dɛ ndaedzi nye Sunsum Krɔnkrɔn akyɛdze no, a wɔdze ma wɔ enuma ekyir no.

Nyankopɔn no mboa horow ma Ne mba anokwafo mu tsitsir kor nye Sunsum Krɔnkrɔn akyɛdze. Akyɛdze yi ho hia a ohia no da edzi osiandɛ nhyehyɛɛ kwan do ara wɔdze ma wɔ nnuhu na nsu mu enuma ekyir no, “na iyi ekyir na [kyerɛwsɛm no kyerɛkyerɛ mu dɛ] hom bɔnfakyɛ a ofi ogya nye Sunsum Krɔnkrɔn mu no bɛba” (2 Nephi 31:17). Nkorɔfo a woenya bɔnfakyɛ yi—na nkyii wɔtaa kenyan hɔn ahotsew no ber a worunu hɔnho daa daa na wɔdze ahyɛmudzi a wodua sacrament ayɛdze do yɛ no dze bɔ bra no—fata anohoba no dɛ Sunsum Krɔnkrɔn no, Ewuradze no Sunsum, “nye hɔn bɛtsena aber nyina” (Nkyerɛkyerɛ na Ahyɛmudzi 20:77).

Dɛm ntsi, President Joseph F. Smith kyerɛkyerɛɛ dɛ Sunsum Krɔnkrɔn no: “bɛtsew nkorɔfo no hɔn adwen mu afa Nyame ne ndzɛmba ho, na ɔama wɔaagye edzi wɔ hɔn nsakyeree ber no dɛ wɔayɛ Egya ne pɛ, na Ɔbɔwɔ hɔn mu dɛ dasegye a otsim na adamfo wɔ abrabɔ nyina mu, ɔbɛyɛ kwankyerɛfo mapã akɔ nokwar nyina mu na ɔdze dɛw na enyigye ahyɛ hɔn mã dabiara, dze su dɛ wɔbɛyɛ papa ama nyimpa nyina, na woehu amandze wɔ bɔn ho akyɛn dɛ wɔbɛyɛ bɔn, wɔbɛyɛ ayamuyie na ehumbɔbɔr, penkyɛr na woenya ɔdɔ mapã. Hɔn a wɔwɔ akyɛdze yi a wonntum nnsusu no bo no, bota a ɔsom bo mapã yi, tsenenee ho nsukɔm kɔ do ara dze hɔn. President Smith wiee dɛ, “Yennya Sunsum Krɔnkrɔn no mboa a, nkyɛ ɔdasanyi biara a ɔnnkyebo no runntum nnantsew kwan tɔɔtsen na heaheaba no do.”

Yɛwɔ mboa pii a ɔyɛ ndam a ɔma hɛn kwankyerɛ wɔ hɛn ɔnnkyebo akwantu horow mu no, ɔyɛ abagura dɛ dodowara nnyɛ ahoboa yie wɔ hɔn nhyiamu a wɔahyehyɛ dɛ wobehyia hɛn Agyenkwa na Pomfo, Jesus Christ. Ne mbaabun du abɛbusɛm no a, wɔakã ho asɛm pii wɔ ehyiadzi yi ase no, susu kyerɛ dɛ hɔn a wɔato nsa afrɛ hɔn no, hɔn mu fã nko na wɔbɔyɛ krado.

Hɛn nyina yɛnyim hɔn a wɔnnyɛ ahoboa ho mfatoho nsɛm: asɛmpasomafo a woewie edwuma asan aba a woetwa hɔn sunsum mu mpontu do ɔnam dɛ mber kakra mu no wɔmmbɔhyew, mbabun a wɔasɛɛ hɔn sunsum mu mpontu ɔnam dɛ wɔpaa hɔnho fii Asɔr nkyerɛkyerɛ na dwumadzi horow ho, mbanyin a woetu hɔn asɔfohyɛ kɔ Melchizedek Asɔfodzi mu no ahyɛ da, mbanyin na mbaa—ɔtɔfabi a wɔwɔ edzikamfo enyimnyamfo anaa awofo a wɔfata—a woefi ahyɛmudzi anamɔnkwan no do a wonndzi temple ahyɛmudzi horow do na wonnsie.

Mmanee a ɔtse dɛm dodowara ba ber a asɔrmba pow dɛ wobedzi sunsum mu nsiesie nhyehyɛɛ do dɛ ankorankor mpaabɔ, kyerɛwsɛm adzesũa a wɔtaa yɛ, na nnuho a wɔtaa yɛ. Dza ɔbɔ ebira no, binom bu enyi gu dapɛn dapɛn ahyɛmudzi ne nkenyan do a ɔnam sacrament a wonndzi no. Binom kã dɛ Asɔr no nntum mma hɔn ehiadze horow no, dɛm nkorɔfo no sesa dza wohu dɛ ɔyɛ hɔn ndaamba ehiadze no dzi dza Ewuradze dze ama wɔ Ne nkyerɛkyerɛ na kwan a yɛdze yɛ hɛn mboa a ohia ma nkaafo no kan.

Ahobrɛadze na awerɛhyɛmu wɔ Ewuradze mu nye mmanee a ɔtsetse dɛm ho edur. Dɛ mbrɛ Mormon Nwoma kyerɛkyerɛ no, Ewuradze “hyira na ɔyɛ hɔn a wɔtwer no no prɔmprɔm” (Helaman 12:1). Yerinya awerɛhyɛmu wɔ Ewuradze mu no yɛ ehiadze ma nkanka hɔn a mfom mu no, wɔdze Nyankopɔn ne mbrasɛm na No nkɔnhyɛfo hɔn nkyerɛkyerɛ toto dza woehu no ndaansa yi na nyimpa nyansaa ho.

Makasa afa ɔnnkyebo abrabɔ mu mboa horow a hɛn Egya dɔfo a Ɔwɔ Sor dze ama dze roboa Ne mba ma wɔasan aba No hɔ. Hɛn kyɛfã wɔ nhyehyɛɛ krɔnkrɔn yi mu nye yebenya awerɛhyɛmu wɔ Nyankopɔn mu na yɛhwehwɛ ɔsor mboa yinom na yɛdze dzi dwuma, nkankara No Dɔba, hɛn Agyenkwa na Pomfo, Jesus Christ No Werdambɔ. Mobɔ mpaa dɛ yɛbɛkyerɛkyerɛ nkyerɛkyerɛ yinom na yɛdze abɔ bra, wɔ Jesus Christ dzin mu, amen.