Gyedzi: Awerɛhyɛmu na Nokwardzi Nkitahodzi
Gyedzi fefɛw ber a yenya awerɛhyɛmu wɔ Jesus Christ mu na ɔhyerɛn ber a yɛyɛ anokwafo na yedzi nokwar ma No.
Mber a midzii mfe 17 no, menye me nyɛnko José Luis yɛɛ nhyehyɛɛ dɛ mebɛkyerɛkyerɛ no mbrɛ wosi bor wɔ nsu mu. Ntsi anapa bi yetuu mber sii hɔ dɛ yebosũasũa. Mber a hɛn adzesũa baa ewiei no na nna mirifi nsutaae no mu no, metsee dɛ me nyɛnko no rekekã mu agye mboa. Nna ɔrodɔ wɔ nsutaae no ne beebi a ɔdɔ ara yie no mu.
Motoow moho too nsu no mu na moboree kɔr ne nkyɛn ber a nna morobɔ mpaa agye mboa. Ber a musuoo ne nsamu dɛ morotwe no aba sor no, me nyɛnko a nna ɔwɔ atseetsee mu no foow m’ekyir na ɔbɔɔ me men. Afei nna hɛn beenu no rodɔ. Morobɔ mo mbɔdzen papaapa dɛ mebɛba sor no, medze m’ahoɔdzen nyinara bɔɔ mpaa dɛ Nyankopɔn n’awanwadze besi. Nkyii, nkakrankakra na bɔkɔɔ mu ara, Nyankopɔn no tum daa edzi ber a metsee dɛ nsa bi rotwe me akɔ nsutae ne bea a ɔnndɔ no, ɔdze hɛn baa dwudwoodwo.
Adzesũadze yi sii adzesũadze bi a no mu dɔ pi a President Russell M. Nelson kyerɛkyerɛɛ no mber bi dɛ: “Sɛ edze ahoɔdzen noara a obi a nsu remen no wɔ ber a ɔregye ahom ntaataado rohwehwɛ mframa no hwehwɛ Ewuradze no tum wɔ w’abrabɔ mu a, tum a ofi Jesus Christ hɔ bɛyɛ wodze.’’
Mbofra na mbabun adɔfo, ndɛ mepɛ dɛ mekãsa kyerɛ hom fa gyedzi wɔ Jesus Christ mu ne fapem a ohia tsitsir.
Gyedzi wɔ Christ mu N’asekyerɛ nye Erenya Awerɛhyɛmu wɔ No mu
Inya gyedzi wɔ Christ mu no n’asekyerɛ nye dɛn? Ana n’asekyerɛ nye yɛgye No dzi anaa yɛwɔ dase dɛ Ɔwɔ hɔ ampara a? Bia dɛm no bɛyɛ ahyɛse, mbom ɔbor kyɛn dɛm. Ana adwen gyedzi ho da dɛ ɔyɛ awerɛhyɛmu? Dwendwen nyimpa a ewɔ awerɛhyɛmu kɛse wɔ no mu ho—bia ebusuanyi bi anaa nyɛnko bi. Ebɛnadze ntsi na ewɔ awerɛhyɛmu wɔ hɔn mu? Ebia a osiandɛ inya hɔn daa daa ɔdɔ na mboa ntsi.
Sɛ yenya gyedzi wɔ Christ mu a, yehu Ne nhyira horow na yenye No nya awerɛhyɛmu nkitahodzi.
Ibesi Dɛn Botum Ama Wo Awerɛhyɛmu wɔ Jesus Christ mu Enyin?
Mbabun mpaabɔsom a ɔnnkyɛree mu no, wɔtoo nsa frɛɛ hom dɛ “hom ndwendwen mber bi wɔ hom abrabɔ mu ho a hom nyaa ɔsor kan ne nsensanee bi.’’ Bɔ mbɔdzen yɛ dwumadzi yi!
Hyɛ ase ber a erodwendwen Christ na enyigye a No Werdambɔ na asɛmpa no dze ba w’abrabɔ mu ho. Kyerɛw “sunsum mu nkaadze apapa” ho nsɛm so a Nyankopɔn boaa ɔwo, w’adɔfo, na nkorɔfo a wɔwɔ kyerɛwsɛm no mu. Afei, dase horow yinom remmfa tum mba w’abrabɔ mu kɛpem dɛ Sunsum no krukye wɔ “w’akomapon’’ do. Ntsi dwendwen na kyerɛw dza Nyankopɔn yɛ ma anwanwadze yinom nyinara ba mber kor noara a oye mu no.
Ɔtɔdo no, fa dwumadzi yi dzi dwuma dɛ kwan a ebɔtwe abɛn Nyankopɔn yie. Bɔ mpaa ma wo Ɔsor Egya tse dɛ mbrɛ ɔyɛ mber a odzi kan a. Kyerɛ wo dɔ na w’enyisɔ ma Ne nhyira horow. Mpo bisa No mbrɛ Osi hu wo na ɔfa kwan a w’abrabɔ rokɔ ho asɛm.
Sɛ idzi nokwar na eyɛ ahobrɛadze a, ebɛtse Ne nyiano na ahyɛ wankasa na enye Ɔsor Egya na Jesus Christ daapem nkitahodzi ase. Nnyɛ ɔno nko, mbom wo nyamesom ndzeyɛɛ bɛyɛ mfaso! Mfatoho, ebɔhwɛ wo mpaabɔ kwan, wankasa w’adzesũa, na temple sɔr dɛ akwan horow a ibohu Hɔn na enye Hɔn atsena.
Gyedzi dze Nokwardzi yɛ Frɔmfrɔm
Hu dɛ gyedzi fefɛw ber a yenya awerɛhyɛmu wɔ Jesus Christ mu na ɔhyerɛn ber a yɛyɛ anokwafo na yedzi nokwar ma No. Sɛ epɛ enye Christ enya nokwar nkitahodzi a, kyerɛ No ber a ereyɛ ahyɛmudzi horow na edze nokwar na nokwardzi ridzi no nyi. Yɛnye Jesus Christ reyɛ ahyɛmudzi horow tow enyidado mu. Yeridzi no nyi no tow gyedzi mu.
Hom mma memfa mankasa me fasusu: Ber a nna meyɛ abofra no, dakor bi muhun me maame a nna ɔno nko rusũ. Ber a mibisaa no siantsir no, ɔdwe mu ara ɔkãa dɛ, “mihia wo ma ayɛ banyimba papa.’’ Nna ɔwɔ mu mpo dɛ nnyɛ emi nye n’atseetsee ne siantsir no no, modɔɔ me maame na minyaa awerɛhyɛmu wɔ no mu kyɛn obiara na mepɛɛ dɛ mebɛyɛ ma n’abrabɔ nnkɛyɛ dzen. Ntsi, nyisuwa wɔ m’enyiwa mu no na medze botooyɛ biara a mfe akron botum enya no, mobɔɔ no anohoba dɛm da no dɛ mebɛper aber nyina dɛ mebɛyɛ ba papa ma oenya ahomka.
Ana hom botum esusu tum a dɛm anohoba no nyae—na ɔda ho nya—wɔ mo do a?
Dɛm anohoba a menye no dzii no weɔɔn m’abrabɔ. Ansaana mobɔbɔ adwenpɔw no, mohwɛ sɛ me ndzeyɛɛ bɔsɔ n’enyi ana. Anohoba yi ne nkitahodzi na menye me maame nkitahodzi no yɛɛ sekyɛ maa mo suban wɔ m’abrabɔ nyina mu.
Mfe pii ekyir no, ber a muhun Jesus Christ yie no, nna minyim mbrɛ mebesi dze me gyedzi betsim No mu dadaw. Menye Ewuradze dzii ahyɛmudzi horow, na ber a mahwehwɛ edzi no nyi no, Ɔdze mo bɔn akyɛ me, aweɔn m’abrabɔ, na “ɔdze no dɔ ahyɛ me mã” dze ahɛn me nyimpadua nyina mu. Christ dze ɔdɔ, enyidzi, na nokwardzi a no mu dɔ ma No no ahyɛ mo mu.
Hom tse siantsir a “gyedzi yɛ ndzeyɛɛ ne fapem’’ na dɛ “na gyedzi nnyi mu a obi nntum nnsɔ [Nyankopɔn] n’enyi’’ ase a?
Ber a ebɔ mbɔdzen yɛ dza ɔsɔ N’enyi no, ebɛkã tse dɛ Joseph a ɔwɔ Egypt no mber a Potiphar ne yer sɔɔ no hwɛɛ no dɛ: “Na ɔyɛ dɛn na mebɛyɛ emumuyɛ kɛse, na mayɛ bɔn metsia Nyankopɔn?’’ Na sɛ ehyia ɔkõtsia a, ebɛkã tse dɛ Nkɔnhyɛnyi Joseph kumabaa no dɛ: “Minyim dɛm, na minyim so dɛ Nyame nyim, na munnkotum apow; … minyim dɛ sɛ meyɛ dɛm a mobɔfom Nyame.”
Ntsi gyedzi wɔ Jesus Christ mu yɛ awerɛhyɛmu nkitahodzi a wɔdze nokwardzi wen na ɔdɔ mu. Sɛ yɛkã no bio a, enyisɔ ma Nyankopɔn n’ehumbɔbɔr dɔ (hesed, a yɛkyerɛ hɛn nokwar dɔ (emunah) ber a yesie Ne mbrasɛm.
Christ bɔ anohoba dɛ, “Nyia ɔwɔ me mbrasɛm, na odzi do no … m’Egya bɔdɔ no, na mo so mobɔdɔ no, na mibeyi moho makyerɛ no.” Sɛ eyɛ enyimpisi dɛ ebedzi nokwar ama No a, Ɔbɛda No dɔ edzi akyerɛ wo.
Gyedzi wɔ Abɛbrɛsɛ mu
Na ibesi dɛn ehyia gyinabew horow a ɔnnyɛ papa a ɔtsetse dɛm a obehia N’awanwandze? Ber a ɔyɛ dɛnara ɔhaw bɛba na ɔtɔfabi a ɔyɛ hu no, mma mmfa suro nnanantsew nnkɔ No hɔ, dɛmara dɛ 2025 FSY ehyiadzi asɛngyinado no, to nsa frɛ no: “Hwɛ me wɔ adwendwen biara mu; mma nngye kyim, mma nnsuro.”
Ibesi Dɛn Botum dɛ Nnkɛfa Suro Anantsew Akɔ No Hɔ?
Susu woho dɛ eyɛ hwehwɛfo wɔ beebi a wonnyim hɔ. Ama edzi akwansiwdze a ɔda w’enyim do konyim no, ihia kan bi. Wo nokwardzi ma Nyankopɔn na daa daa enye No nya nkitahodzi nye ngo ma wo kandzea no. Ntsi no sɛ ihyia sum na gyinabew horow huhuihu a, nkyɛ ebɛnantsew akɔ ho a nnhu hwee no, ebɔsɔ wo kandzea no a gyedzi wɔ Christ mu ngo ahyɛ no mã no dze ahyerɛn enyidado kan wɔ anamɔnkwan a wonnyim no do. Wo sũahu horow a woetwa mu no bɛma w’enyidado enyin dɛ Ewruadze bɛma wo ahom wɔ w’akwantu no mu.
W’Enyidado na Gyedzi wɔ Christ mu Nye Wo Bodu Henfa?
Ekaa m’asɛm wɔ nsutaae no ho a? Abagura ber mu no, anwanwadze no bae wɔ kwan a nna m’enyi da do mu, naaso Nyankopɔn nnhyɛ dɛ aber nyina Ɔbɛyɛ dɛ mbrɛ hɛn pɛ tse. Otwar dɛ hɛn gyedzi tsim wɔ Jesus Christ mu na hɛn enyidado wɔ Ne nhyira horow mu, dɛ mbrɛ Ɔsan mu yi dze ba no. “Ma w’enyi nda anwanwadze do,’’ mbom “hom mma Nyankopɔn ndzi nyim wɔ hɛn abrabɔ mu.”
Nyankopɔn n’Anohoba Horow ma No Nkorɔfo Anokwafo
M’anyɛnkofo nkumabaa, mbrɛ yesi dɔ hom na yɛwɔ awerɛhyɛmu wɔ hom mu a! Hom ka Nyankopɔn n’ebusua ho na hom yɛ ahyɛmudzi mba. Hom ngye Jesus Christ Ndzi na hom nnya awerɛhyɛmu wɔ no mu. Ɔbɛma hom tum ma nokwar ara hom abɛyɛ N’esuafo.
Moto nsa frɛ hom dɛ hom nhyɛ ase dɛ hom bɛtsetse hom nye Jesus Christ nkitahodzi no. Hom nyɛ enyimpisi dɛ hom rommpow No dabiarada.
Hom nokwardzi, ɔdɔ, na awerɛhyɛmu wɔ Jesus Christ mu no besiesie hom suban na hom nyimpa ban tse dɛ Ne dze. Hom benya awerɛhyɛmu na ahoɔdzen dze edzi Satan ne ngyegyee do konyim. Na sɛ hom yɛ mfomdo a, hom bɛper No bɔnfakyɛ. Ewiei no, hom enyidado ma ndaamba no bɛhyerɛn. Ɔdze No tum no bɛma hom ma hom dze ayɛ biribiara a N’enyi da kwan fi hom hɔ no, mpo tum dɛ hom bɛsan akɔ N’enyim.
Megye dase kyerɛ hom fa dɛwdzi a ofi hom rotow “ɔpon dɔ ho ndwom no’’ na “n’abasa dɔ no etwa homho ehyia no.’’ Jesus Christ ne dzin krɔnkrɔn no mu, amen.