Obu ma Ndzɛmba Krɔnkrɔn

Exodus nwoma mu no, yɛnye Moses tu kwan kɔ Bepɔw Horeb ne fã a osian ber a ɔdaan no ho fii ne daa daa dwumadzi horow ho—biribi a ɔsɛ dɛ hɛn nyina yenya pɛ dɛ yɛbɛyɛ—dze hwɛɛ haban a ɔredzɛw a nna ɔnnhyew. Ɔbɛnee no, “Nyankopɔn frɛɛ no fii haban ne finimfin, na Ɔsee dɛ, Moses, Moses. Na ɔsee dɛ, Emi nye yi. Na [Nyankopɔn] kãa dɛ, … yiyi w’ananadze mpaboa no, na bea a igyina do yɛ asaase krɔnkrɔn.” Obu kɛse, ahobrɛadze, na ahobow mu no, Moses yii ne mpaboa na osiesie no ho dɛ obetsie Ewuradze n’asɛm na oenya N’enyim krɔnkrɔn ho sũahu.

Nna dɛm bepɔw do nyikyerɛ krɔnkrɔn no yɛ sũahu a obu mãpa ahyɛ no mã, dze Moses faam n’awosu krɔnkrɔn no, na ampaara, nna ɔyɛ adze tsitsir wɔ ne nsakyeree fi oguanhwɛfo ahobrɛadzenyi kɔ nkɔnhyɛnyi tumfo a, ogyaa no ma ɔnantseew kwan fofor do wɔ abrabɔ mu. Dɛmara, hɛn mu kor biara botum asakyer hɛn osũanyiyɛ ma ɔayɛ sunsum mu nhwɛdo a ɔkrɔn ber, a yɛdze obu isu no reyɛ adze krɔnkrɔn a ɔkã hɛn sunsum mu suban ho.

Asɛmfua obu fi Latin nyɛe asɛmfua revereri mu, a ɔkyerɛ dɛ “ibegyina ahobow mu ama.” Nsɛmpa afã mu no, nkyerɛase yi dze enyidze, ɔdɔ, na enyisɔ atsenkã anaa ndzeyɛɛ soronko fora. Hɔn a wɔwɔ akoma a wɔabotow na etuhoakyɛ a no mu dɔ ma Nyankopɔn na Jesus Christ no kyerɛ ndzeyɛɛ a ɔtse dɛm ma dza ɔyɛ krɔnkrɔn a ɔboa ma wonya dɛwdzi kɛse wɔ hɔn akra mu.

Obu ma ndzɛmba krɔnkrɔn yɛ dza ɔda sunsum mu suban tsitsir bi edzi, ɔyɛ nsunsuando a ofi krɔnkrɔn nkitahodzi mu na ɔkyerɛ hɛn dɔ ma na mbrɛ yesi bɛn hɛn Ɔsor Egya na hɛn Agyenkwa, Jesus Christ. Ɔsan so yɛ ɔkra no sũahu kor a ɔkrɔn ankasa. Ɔbra pa yi dan hɛn adwendwen, akoma, na abrabɔ kyerɛ Nyankopɔn. Ampaara, obu nnyɛ sunsum mu ahoɔdzen ne fã kor biara kɛkɛ; ɔyɛ ne siantsir—fapem a wosi sunsum mu ahoɔdzen wɔ do, dze yɛ ankorankor na ɔsor nkitahodzi, dɛ mbrɛ hɛn mbofra kyerɛ sɛ wɔtow: “Ber a mekyerɛ obu no, Minyim wɔ m’akoma mu dɛ Ɔsor Egya na Jesus bɛn me.”

Dɛ yɛyɛ Jesus Christ n’esuafo yi, wɔato nsa afrɛ hɛn dɛ yɛnyɛn obu akyɛdze no wɔ hɛn abrabɔ mu ama yeebue hɛn ho ama Nyankopɔn na Ne Ba Jesus Christ ntamu nkitahodzi a no mu dɔ, ber kor noara ɔahyɛ hɛn sunsum mu su dzen. Nkyɛ yenya dɛm atsenkã yi piinara wɔ hɛn akoma mu, a nokwar ara, dɛwdzi kɛse na enyigye bɛba hɛn abrabɔ mu, na awerɛhow do bohuan. Otwar dɛ yɛkaa dɛ yɛrekyerɛ obu ma ndzɛmba krɔnkrɔn no dze ntseasee brɛ piinara a yɛyɛ no daa daa na ɔhyɛ hɛn enyisɔ nkãtse dzen—kenyan ahobow, enyidzi, na ɔdɔ ma ndzɛmba a ɔkrɔn na ɔyɛ krɔnkrɔn.

Ɔyɛ yaw dɛ, yɛtse wiadze a erekyerɛ obu ma ndzɛmba krɔnkrɔn no rebɛyɛ dza ɔnntɔ kã. Ampaara, wiadze no taa hyɛ ndzɛmba gyangyan ho fa, dɛ mbrɛ nsɛnsɛm nkrataa, TV anaa internet mpɛnsampɛnsamu dzi ho dase no. Enyidzi a onnyi hɔ ma dza ɔyɛ krɔnkrɔn no ma suban biarabiara na ndzeyɛɛ a ahwɛyie nnyi ho no kwan, a ntsɛmara obotum egya ebusuasantsen kor akɔ tsebea a hwee mmfa hɔnho mu na oegya ebusuasantsen a odzi do no akɔ awerɛhow mu.

Obu nnyi hɔ no so botum atwe hɛn efi nkitahodzi horow a hɛn na Nyankopɔn ntamu ahyɛmudzi horow no dze ma na ɔaberɛ hɛn nkotaabu atsenkã ma Nyankopɔn no adze. Nkyii, yɛannhwɛ yie a yɛbɔdwen hɛn ahotɔ nko ho, ahyɛ hɛn akɔndɔdze mã, na ewiei no yebodur bea a ɔnntsew a yebu ndzɛmba krɔnkrɔn enyimtsia, mpo Nyankopɔn, na no nsunsuando no hɛn awosu krɔnkrɔn dɛ Ɔsor Egya ne mba. Yɛmmfa enyidzi mma ndzɛmba krɔnkrɔn no tserɛw ɔtamfo no botae horow mu ber a ɔsɛɛ hɛn kwan horow a yɛfa do nya nyikyerɛ ho atsenkã a ohia ma hɛn sunsum mu asetsena wɔ hɛn nda yi mu.

Woetsintsim obu ma dza ɔyɛ krɔnkrɔn no ne nkyerɛase na ho hia a ohia yie wɔ kyerɛwsɛm nyina mu. Asɛm kor wɔ Nkyerɛkyerɛ na Ahyɛmudzi mu a ɔyɛ dɛ ɔkyerɛ dɛ obu ma hɛn Ɔsor Egya na Ne Ba Jesus Christ yɛ hɔn a wobenya celestial ahenman no hɔn su tsitsir.

Dɛ yɛyɛ asɔr no, yɛbɔ mbɔdzen wɔ kwan biara mu dze krɔnkrɔnyɛ na enyidzi mãpa ma Egya na Ɔba no, a kwan a yɛfa do kyerɛ Hɔn mfonyin horow kã ho. Sunsum Krɔnkrɔn no n’akwankyerɛ yɛ adze tsitsir wɔ iruhu kwan a dɛm mfonyin horow yinom si kyerɛ Egya na Ɔba no hɔn su krɔnkrɔn, suban, na nyamesu horow. Yɛyɛ ahwɛyie ankasa ma yekwetsir yɛrekyerɛ ndzɛmba a obotum atwe hɛn efi hɛn ntsimii wɔ hɛn Ɔsor Egya na Ne Ba Jesus Christ na Hɔn nkyerɛkyerɛ, a kwan a yɛdze (AI) tɛknɔlɔgye dzi dwuma wɔ mfonyinyɛ mu kã ho no do.

Fapem kor yi ara na wɔdze ma asɛm biara a odua Asɔr ne kasa kwan horow a ɔapen do ba. Ahwɛyie mu ara, wɔahyehyɛ na wɔagye ato mu wɔ Sunsum Krɔnkrɔn n’akwankyerɛ ase adzesũa biara, buukuu, kwankyerɛ nwoma na asɛm biara ama yeetum abɔ su kɔnkrɔn, na Jesus Christ n’asɛmpa ho gyinapɛn horow ho ban. Ndaansa yi, asɛm a ɔdze maa Asɔr ne young adultfo no, Elder David A. Bednar kyerɛkyerɛe dɛ: “Ama eetum eduadua sunsum mu ahoɔdzen na tɛknɔlɔgye nkitahodzi huanyann no mu no, otwar dɛ Nda a Odzi Ekyir Ahotseweefo ahobrɛadze na mpaabɔ mu ara (1) hu asɛmpa fapem horow a obotum ama hɔn kwankyerɛ wɔ kwan a wɔdze AI bedzi dwuma na (2) bɔ mbɔdzen nokwar mu ara nya Sunsum Krɔnkrɔn n’anyɛnkoyɛ na nyikyerɛ sunsum akyɛdze no.”

Mo nuambanyin na nkyerɛbaa adɔfo, susuampara dɛ abaɛfor tɛknɔlɔgye abɛyɛ atsenkã wɔ wiadze yi mu no, onnkotum ama nwanwa, na ahobowdze a ibohu no wɔ obu a ofi Sunsum Krɔnkrɔn ne nhyɛdo mu no. Dɛ yɛyɛ Jesus Christ n’esuafo yi, ohia dɛ yɛyɛ ahwɛyie ma yɛammbrɛ nkitahodzi a yɛnye Nyankopɔn na Ne Ba no wɔ no adze ɔnam dɛ yɛdze AI ndzɛmba na mfonyin horow dzi dwuma wɔ kwan a ɔmmfata do. Ɔwɔ dɛ yɛkaa dɛ eredan abaefo tɛknɔlɔgye “honam n’abasa” yɛ nhyɛananmu a onndzi mu na ɔyɛ enyimtsiabu ma nkenyan, ntowdo, na dase a ɔnam Sunsum Krɔnkrɔn no tum do nko ibotum enya. Dɛ mbrɛ Nephi paa mu kãa no: “O Ewuradze, medze mo werɛ atwer wo, na wo mu na medze mo werɛ bɔtwer afebɔɔ. Meremmfa mo werɛ nntwer honam abasa.”

Nyikyerɛ kor so mu no, wɔkãa kyerɛ Nkɔnhyɛnyi Joseph Smith dɛ temple horow a wosisi ma Ewuradze no sɛ dɛ ɔyɛ bea a ɔkyerɛ obu ma No. No somdwuma mu nyinara no, hɛn nkɔnhyɛnyi dɔfo President Russell M. Nelson, etsim dzendzenndzen wɔ hɛn ɔsom wɔ obu mu wɔ temple krɔnkrɔn no mu do. Ewuradze ne fie mu no, wɔkyerɛkyerɛ hɛn fa erehɛn Egya na Ɔba no hɔn enyim krɔnkrɔn no. Daa mehu dɛ oye na mpo ɔyɛ nkenyan dɛ adze tsitsir kor a yɛyɛ sɛ yɛhɛn temple no mu na yerisiesie hɛnho akɛyɛ ayɛdze krɔnkrɔn horow wɔ hɔ nye dɛ yeyi hɛn mpaboa na yɛsesa hɛnho hyɛ ntar fufuw. Tse dɛ Moses, sɛ yɛgye enyim a, yebohu dɛ yeriyi hɛn wiadze mpaboa nye yɛrehɛn krɔnkrɔn bea na nsesa wɔ akwan krɔnkrɔn a ɔkrɔn mu no n’ahyɛse.

Nuambanyin na nkyerɛbaa, onnhia dɛ yɛbɔfow akɔ bepɔw n’etsĩfi, tse dɛ Moses yɛe no, ma yehu obu ma ndzɛmba krɔnkrɔn na wɔasakyer hɛn osuanyiyɛ akɔ sunsum mu ahoɔdzen na etuhoakyɛ no bun mu. Mfatoho, yebotum ehu, ber a yɛper dɛ yɛbɔweɔn hɛn efiefi efi wiadze nhyɛdo horow ho. Iyi botum ayɛ yie sɛ nokwar mu ara yɛbɔ mpaaa wɔ hɛn Ɔsor Egya enyim wɔ Jesus Christ ne dzin mu na yɛhwehwɛ dɛ yebohu hɛn Agyenkwa no yie ber a yɛdze enyimpisi sũa Nyankopɔn n’asɛm a ɔwɔ kyerɛwsɛm no mu na hɛn nkɔnhyɛfo hɔn nkyerɛkyerɛ no. Ɔkã ho no, dɛm sunsum mu nsesa yi botum aba ber a yɛbɔ mbɔdzen sie ahyɛmudzi horow a yɛnye Ewuradze yɛ na yɛdze setsie ma Ne mbrasɛm bɔ bra. Mbɔdzembɔ horow yinom botum dze kommyɛ na abodwee bi abrɛ hɛn akoma. Yeritsim ndzeyɛɛ yinom do no botum ampaara aboa asesa hɛn efiefi ma wɔabɛyɛ mbea a enyidzi wɔ na sunsum mu guandɔbea—ankorankor gyedzi krɔnkrɔn bea a Sunsum no tsena, tse dɛ Moses ne bepɔw do sũahu no.

Yebotum so enya sunsum mu nsesa sũahu yi ber a nokwar mu ara yɛdze hɛnho hyɛ Asɔr no n’asɔrsom mu, a yedua asɔr ndwom krɔnkrɔn no tow do dan hɛn akoma ma Ewuradze kã ho. Yɛredan—tse dɛ Moses—efi wiadze egyangyandze ho, nkanka hɛn cell foon horow anaa biribiara a ɔnye mber krɔnkrɔn yi bɔ ebira, boa hɛn ma yɛdze hɛn adwen nyina to sacrament ne ndzii no do, a hɛn adwen na akoma tsim Agyenkwa na No werdam afɔrbɔ nye hɛn ahyɛmudzi horow do. Ntsimii a ɔtse dɛm wɔ sacrament do no bɛma hɛn obu pisi fofor mber ma hɛn ahyɛmudzi a yɛnye Agyenkwa no ayɛ no, na ɔbɛma Kwesida no ayɛ enyigye na ɔasesa hɛn abrabɔ.

Ewiei no, yebotum enya sunsum mu nsesa sũahu yi wɔ hɛn osuanyiyɛ mu ber a yɛtaa som wɔ Ewuradze ne bepɔw fie no mu—hɛn temple krɔnkrɔn horow no—na yɛbɔ mbɔdzen dze ahyɛmudzi awerɛhyɛmu bɔ bra, nkanka sɛ yehyia ɔnnkyebo abrabɔ no nsɔhwɛ horow a.

Emi na me yer enya hɛnankasa hɛn krɔnkrɔn bepɔw do sũahu mber wɔ obu mu ber a yɛabɔ mbɔdzen dɛ yɛdze nkyerɛkyerɛ yinom bedzi dwuma wɔ hɛn abrabɔ mu, a wɔama nsesa mãpa aba hɛn osũanyiyɛ mu. Mekaa no tse dɛ ndeda a yɛnam esiei ansaana yeribesie hɛn ba a ɔtɔ do ebien, a ne mber annso ana wɔrowo no na owui, ber a nna me yer da ho retse apɔw wɔ asopitsi hɔ. Mekae morobɔ mpaa enyiberdo kyerɛ Nyankopɔn reserɛ mboa ama yeetum asɔw dɛm nsɔhwɛ no. Dɛm mber no mu ara, minyaa sunsum mu awerɛhyɛmu pefee a tum wɔ mu wɔ m’akoma mu: biribiara bɛyɛ yie wɔ hɛn abrabɔ mu sɛ emi na me yer sɔw, yerusuo dɛwdzi a ofi edze Jesus Christ n’asɛmpa no robɔ bra mu ba. Dza nna ɔyɛ dɛ dza ɔbor hɛn do, nsɔhwɛ yaayaw dɛm ber no, bɛyɛɛ krɔnkrɔn, obu sũahu, dza ɔaboa esi hɛn gyedzi pi na ɔama hɛn awerɛhyɛmu wɔ ahyɛmudzi horow a yɛnye Ewuradze edzi na wɔ N’anohoba horow ma emi na m’ebusua.

Mo nuambanyin na nkyerɛbaa, obu ma dza ɔyɛ krɔnkrɔn no fua nokwar enyisɔ, tserɛw nokwar enyigye mu, gya hɛn adwen kɔ nyikyerɛ mu, na ɔdze dɛwdzi kɛse ba hɛn abrabɔ mu. Ɔdze hɛn anan si bea krɔnkrɔn do na opegyga hɛn akoma ma Nyame.

Megye dase kyerɛ hom dɛ ber a yɛbɔ mbɔdzen dze su yi hyɛ hɛn daa daa abrabɔ mu no, yebotum enyin wɔ hɛn ahobrɛadze mu, yɛatserɛw hɛn ntseasee wɔ Nyankopɔn ne pɛ ma hɛn ho, na yɛahyɛ hɛn awerɛhyɛmu wɔ anohoba horow a ɔbata ahyɛmudzi a yɛnye Ewuradze ayɛ ho no dzen. Megye dase dɛ ber a yefua obu ma ndzɛmba krɔnkrɔn akyɛdze yi no—sɛ ɔwɔ Ewuradze ne bepɔw fie o, ɔwɔ asɔrdan mu o, anaa ɔwɔ hɛnara hɛn fie o— nwanwa na ahobow bɛhyɛ hɛn mã ber a yɛdze hɛnho bata hɛn Ɔsor Egya na Jesus Christ hɔn dɔ a odzi mu no. Megye dɛm nokwar yinom ho dase enyidzi mu ara wɔ hɛn Agyenkwa na Pomfo, Jesus Christ dzin krɔnkrɔn mu, amen.