Mo Dɔ ma Agyenkwa no Nye Me “Siantsir”

Ana ahyɛ no nsew da dɛ hɛn nkɔnhyɛnyi dɔfo, President Russell M. Nelson, kɔ do ara to nsa frɛ hɛn a? Ɔnnyɛ hu dɛ, ɔato nsa afrɛ hɛn dɛ yensũa na yɛndwendwen nsɛm a wɔkyɛɛ no wɔ ehyiadzi ebien a wɔabasen kɔ no ase ho. Ebɔbira 2024 mu no, ɔkãa dɛ, “Mowɔ enyidado dɛ hom besi do ara esũa ehyiadzi yi mu nsɛm no abosoom a ɔreba no mu no nyinara.” Na Ɔbɛsɛ 2024 mu no, ɔkãa dɛ, “Mutu hom fo dɛ hom nsũa [akasafo no hɔn] nsɛm no. Hom mfa nnyɛ esusudze mma dza ɔyɛ nokwar, na dza ɔnnyɛ nokwar wɔ abosoom esia a odzi do yi mu.”

Yebotum dze ɔfrɛ yinom akã nkɔnhyɛ nsato a yeenya wɔ hɛn abrabɔ nyina mu ho a, nkanka dza yeenya no ndaansa mfe mu yi kã ho. Ɔbɛyɛ hɛn dɛ anaa yɛbɔdwen dɛ ɔfrɛ yinom yɛ dza ɔsɛ dɛ yɛdze kã hɛn ndzɛmba nyɛe nkyerɛwee ho ara, osiandɛ wɔtoo nsa frɛɛ hɛn anaa wɔkãa kyerɛɛ hɛn dɛ yɛnyɛ ntsi. Ana biribi botum awɔ ho akyɛn dɛm a?

Morodwendwen iyi ho na nsato nyinara a hɛn nsa akã ho no, mekaa adze bi a musũae na misii ho gyinae mber tsentsenntsen a etwa mu kɔ. Morobɔ mbɔdzen dɛ mebɛyɛ ndzɛmba yinom a ohia ma me osiandɛ modɔ No; modɔ hɛn Agyenkwa. Iyi nye siantsir nokwar a ɔyɛ ndam koraa ntsi a meyɛ dza meyɛ no, na dza ɔkã iyi ho nye mo dɔ ma hom, mo nuanom mbanyin na mbaa.

Dɛ hom nuabanyin no, mowɔ enyidado dɛ hom bohu me nsɛm no dɛ nsato a ofi m’akoma mu dɛ hom nhwehwɛ ntse ase kwan a yɛwɔ dɛ biribiara a yɛyɛ no yɛdze fam hɛn dɔ ma Agyenkwa no ho.

Yɛreyɛ iyi no bɔboa hɛn ma yɛatse nokwar “siantsir” a ɔtaa dza yɛyɛ nyina ekyir dɛ Agyenkwa no n’akadofo no ase. Iyi bɔboa hɛn ma yɛahyɛ hɛn na Nyankopɔn ntamu ahyɛmu nkitahodzi mu dzen a, yɛretse No nokwar krɔnkrɔn a onnyiewiei no ase— No nokwar a onnyiewiei na osi pi a ɔrennsesa da. Onnyiewiei nokwar tse dɛ “Na mbrɛ Nyankopɔn dɔɔ wiadze nye yi, dɛ ɔdze ne Ba a ɔwoo no kor no mae, ama obiara a ɔgye no dzi no ɔaannhera, na oeenya onyiewiei nkwa.”

Ɔyɛ nwanwa dɛ ɔtɔfabi a ɔnam dɛ yɛakɔ do ayɛ ndzɛmba ekodu mpɛnpɛndo bi ma wɔadan abɛyɛ amambra no ntsi, yɛma kwan ma dɛm amambra anaa nyɛe yinom hyɛ hɛn mbɔdzembɔ do dɛ yɛbɛkyekyer gyedzi wɔ Jesus Christ mu. Ɔyɛ dɛ ma yɛyɛ dɛm ndzɛmba yinom osiandɛ yɛayɛ no mfe pii a, yɛnhwɛɛ no nsunsuando wɔ hɛn na Agyenkwa no ntamu ahyɛmu nkitahodzi do.

Hɛn wiadze mu no, yɛtaa tsim wɔ dza yɛyɛ do na dɛ daa yebotum ayɛ dwumadzi na botae horow ewie. Wɔ sunsum afamu no, yɛwɔ kwan dɛ yɛtra yɛreyɛ ndzɛmba anaa botae horow ewie ara ber a yɛretse siantsir a yɛreyɛ no ase. Sɛ yebotum atse ase na yeehu dɛ botae a ɔtaa hɛn ndzeyɛɛ ekyir no bata hɛn dɔ ma Agyenkwa no na hɛn Ɔsor Egya ho a, yɛrefa dɛm kwan yinom edzi dwuma no, yɛbɛtse ase dɛ ɔwɔ mu dɛ yɛreyɛ ndzɛmba a ɔtsen tse dɛ Asɔr dwumadzi anaa amambra horow no na yɛreyɛ no no kwan do no yɛ dza oye no, sɛ yɛdze “dɛn ntsi” no bata ho a, wobehyira hɛn ma yɛatse siantsir no ase. Ɔnnkɛyɛ dɛ yɛreyɛ ndzɛmba apapa anaa yɛreyɛ no yie ara; yɛbɛsan so atse ase yie.

Mfatoho, sɛ edze botae bi si w’enyiwa do dɛ ebɛkenkan kyerɛwsɛm no, abɔ mpaa fi w’akoma mu, anaadɛ ehyehyɛ dwumadzi bi ma w’ebusua anaa ward a, ana botae no ankasa nye dɛ wɔbɛyɛ dwumadzi yinom ewie ara a? Anaadɛ dwumadzi yinom yɛ kwan a wodua do, yɛ edwindadze a ɔwɔ wo nsamu, a wɔdze nya nokwar botae ankasa no? Ana botae no nye dɛ yɛbɛyɛ dwumadzi bi ara osiandɛ yɛayɛ no mfe pii, na nkyii yɛasan ho wɔ krataa do dɛ yɛayɛ ewie? Anaadɛ, bio, wɔyɛ kwan a yɛfa do sũa adze, dze tse nka na yɛnye Agyenkwa no nya nkitahodzi?

Meserɛ, hom ntse m’asɛm ase fa ereyɛ dwumadzi na amambra binom anaa edze botae horow risi w’enyiwa do na ayɛ edwuma dzen ama wo nsa aaka no; bɔn biara nnyi iyi ho. Mbom, moto nsa frɛ hom dɛ hom mbue hom akoma na hom adwen mu mma kwan na nhyira a ɔwɔ siantsir a yɛyɛ dɛm ndzɛmba no ho na kwan a yɛfa do yɛ hɛn som ho ntseasee mu.

Kusum a ogyina Christ do ho mfatoho tsitsir kor nye taferbanyinmbɔmu a President Dallin H. Oaks toow maa hɛn nyina wɔ President a Odzi Kan na N’Apamfo hɔn afã no. President Oaks kãa dɛ, “Ber a yɛhɛn afe fofor yi mu no, hom mma yensiesie hɛnho mma Easter afahyɛ a ɔfa Jesus Christ no werdam afɔrbɔ no ho. … Ɔmmfa ho dza binom gye dzi anaa wɔyɛ no, yɛnhyɛ hɛn Agyenkwa tseasefo no Wusoɛr ho fa ber a yerusũa Ne nkyerɛkyerɛ na yɛroboa akyekyer Easter amambra wɔ hɛn sɔn mu nyina, nkanka wɔ hɛnara hɛn ebusua ebusua mu.” Itum hu dɛ, ɔnnyɛ ɔfrɛ dɛ yebenya amambra ara. Mbom, yɛdze dɛm amambra yinom no yɛ kwan a yɛfa do sũa adze yie fa Agyenkwa no ho na yɛkaa No Wusoɛr.

Mpɛn dodow a yebotum dze siantsir no abata hɛn dɔ ma Agyenkwa no ho no, mpɛn dodow a yebotum enya dza yehia anaa yɛrohwehwɛ. President Nelson kãa dɛ, “Asɛmbisa anaa ɔhaw biara a hom wɔ no, aber nyina mbuae no wobohu no wɔ Jesus Christ ne bra na ne nkyerɛkyerɛ mu.” Na nkyii ɔtoo nsa frɛe dɛ: “Sũa No Werdambɔ, No dɔ, N’ehumbɔbɔr, Ne nkyerɛkyerɛ, na N’ayarsa na mpontu asɛmpa a wɔdze asan ananmu ho nsɛm mbordo. Dan kɔ No hɔ! Ka No Do!”

Hom ndwendwen iyi ho wɔ hom akoma nye hom adwen mu: Ana hom gye dzi dɛ President Nelson ne nsato no no botae nye dɛ ɔbɔboa hɛn ma yɛakyerɛwkyerɛw ndzɛmba a yɛdze benya nyimdzee kɛse na yeewie dwumadzi horow ama yɛasan ne nsato no ho wɔ hɛn dwumadzi nkyerɛwee a yɛayɛ no nkorkor do dɛ yeewie a? Anaadɛ ɔroto nsa frɛ hɛn dɛ yɛnhwɛ dɛm onnyiewiei nokwar na fapem ne fã yi dɛ kwan a yɛdze benya ntseaase wɔ “siantsir” no ho na yɛdze Agyenkwa no n’ahyɛmu dɔ no afam hɛn osuanyiyɛ abrabɔ akwantu no ho?

Hom mma menkyerɛ fapem a morobɔ mbɔdzen akã ho asɛm no mu. Kor nye dɛ, bia ɔbor do dodow dze, mebɛkenkan wiadze mfɛndzanan ehyiadzi mu nsɛm no nyinara da kor; nkyii, sɛ muwie a, nna masan nsato yi ho eyi efi mo dwumadzi nkyerɛwee a mayɛ no nkorkor no do dɛ mewie, a memmfa dza makenkan no nndzi dwuma fofor biara. Metse ase dɛ iyi yɛ dza ɔbor do dze, eso obotum esi. Bia, pii gyina dɛm bea yi na dza ɔsɛ dɛ yɛyɛ ankasa ntamu.

Nsato no nye dɛ yensũa na yɛndwendwen wiadze mfɛndzanan ehyiadzi nsɛm ho na yɛmfa nsi gyinae na yennya ntseasee wɔ dza hɛn mu kor biara botum ayɛ dze etu mpon ho.

Ber a yɛgye ɔfrɛ no, a yɛretse “siantsir” a ɔtaa ekyir no ase no, yebenya akwan pii dze abɛn Agyenkwa no yie. Yɛbɛhyɛ ase atse ase dɛ ɔnam dɛ modɔ Agyenkwa no ntsi, mepɛ dɛ musũa pii fa No ho ber a murusũa nkɔnhyɛfo atseasefo hɔn nsɛm. Na osiandɛ modɔ me nyɛnko dasanyi ntsi, menye binom bɛkyɛ nkɔnhyɛfo, adzehufo, na nyikyerɛfo hɔn nsɛm a mebɛhyɛ ase efi m’adɔfo do.

Mfatoho ebien nyina no mu no, ereyɛ dza ɔtsen. Kor mu no, ihu no dɛ botae no nye dɛ yɛdze kwan a Ɔsor Egya na Agyenkwa no dze ama hɛn no, ɔyɛ nsɛm a wɔkyɛ no wiadze mfɛndzanan ehyiadzi mu no, dzi dwuma. Dza ɔtɔ do ebien no fua nhyira a ɔwɔ irinya nhumu wɔ siantsir no ho, a obue kwan ma ntseasee wɔ onnyiewiei nokwar ho na nhyira a wɔdze abɔ obiara a ɔdze hɛn Agyenkwa Jesus Christ ne nkyerɛkyerɛ na n’abrabɔ si hɔn bra ne finimfin anohoba.

Nuambanyin na nkyerɛbaa adɔfo, mowɔ enyidado dɛ hom tum tse na wohu hia a ohia dɛ yɛdze hɛn ndzeyɛɛ bata hɛn dɔ ma Agyenkwa no ho. Wiadze nyina mu no, ndze ahorow pii bɔbɔ mbɔdzen dɛ wobenya nhyɛdo wɔ hom do, na sɛ wobotum a, woegya hom ma hom aagye edzi dɛ nokwar fapem binom a ɔwɔ Jesus Christ n’asɛmpa a wɔdze asan ananmu mu aba no nnhia. Ndze horow yinom dze nokwar ehiasɛm wɔ hia a yehia nsanananmu no wɔ nda a odzi ekyir yi mu hyɛ ase, a hia a ohia dɛ yenya Nyankopɔn n’ahenman wɔ asaase do a, ɔyɛ nsanananmu Jesus Christ N’Asɔr a ɔwɔ hɔ ma Nda a Odzi Ekyir Ahotseweefo no kã ho.

Hom bɛtse ndze horow a wosi do ketsee dɛ enye Agyenkwa no ntamu ankorankor nkitahodzi anaa ntseasee nko na oye na nyameom anaa Asɔr a wɔdze asan ananmu aba no nnhia anaa ho nnyi mfaso. Moto nsa frɛ hom dɛ hom nyɛ nyaa dɛ hom betsie anaa mpo hom mma hom ho nyɛ dzen ntsia dɛ hom bɛma dɛm adwenhun yinom enya nhyɛdo wɔ hom do na hom nyɛ ntsɛm yie nkaa dza Agyenkwa no rekã na ɔrekyerɛkyerɛ hɛn fi tsetseber do no—hom dze dɔ a Ɔsor Egya na Jesus Christ wɔ ma hɛn no rehyɛ ase na hom dze hɛn dɔ ma Hɔn no rebata siantsir a yɛka Hɔn do ho.

Nyame Egya no na Ne Ba bae nye Joseph Smith kasae ama ɔdze Jesus Christ N’Asɔr asan ananmu aba na wɔahyɛ mberano ne mãhyɛ no ase, N’ahenman wɔ asaase do. Dɛm ntsi, Jesus Christ N’Asɔr a ɔwɔ hɔ Ma Nda a Odzi Ekyir Ahotseweefo nye kwan a Ɔsor Egya akyekyer ato hɔ a yɛdze benya ahyɛmudzi horow a ɔbɛma hɛn kwan ma yɛasan akɔ fie. Ntsi no, yehia dodow kyɛn yɛnye Ɔsor Egya na Ne Ba ntamu ankorankor nkitahodzi ara; yehia asɔfodzi ayɛdze horow a ohia a yedua do nye Hɔn dzi ahyɛmu. Iyi ma yɛnye Hɔn kyekyer ahyɛmudzi nkitaho na ɔma hɛn kwan ma hɛn nsa ka Hɔn ahyɛmudzi dɔ no, a ɔma ɔyɛ yie dɛ yebenya enyimnyam ahenman a ɔkrɔn a woesiesie ama hɔn nyinara a wodzi nokwar na wɔyɛ anokwafo ma hɔn ahyɛmudzi horow no.

Medze me kra mu ahom nyina no, megye dase fa hɛn Agyenkwa Jesus Christ no nokwaryɛ na no krɔnkrɔnyɛ ho. Ɔdɔ wo. Onyim dza ɔrokɔ do wɔ w’abrabɔ mu. Ɔatserɛw n’abasa mu yantamm, roto nsa frɛ dɛ, “Hom nyina hom mbra mo hɔ, … na mebɛma hom ahomgye.”

Modɔ Agyenkwa no, na mo dɔ ma No nye me “siantsir” no. Wɔ Jesus Christ ne dzin mu, amen.