උන්වහන්සේ තුළ ආත්මිකව පරිපූර්ණව සුව වී
පරිපූර්ණව සුවවීම කියන්නෙ මේ ජීවිතයේ ශාරීරික හා චිත්තවේගීය ප්රකෘතිමත් වීමක්ම නෙවේ. පරිපූර්ණ සුවය උපත ලබන්නේ යේසුස් ක්රිස්තුස්වහන්සේ කෙරෙහි ඇදහිල්ලෙන් හා හැරීමෙන්.
ලාදුරු රෝගීන් දස දෙනෙක් ගැලවුම්කරුවාණන්ට මෙහෙම කෑ ගැසුවා, “අපට කරුණා කළ මැනව.” ඒවගේම යේසුස්වහන්සේ එහෙම කළා. ඔවුන්ට පූජකයා ඉදිරියේ පෙනී සිටින්න කියා උන්වහන්සේ කිව්වා, ඒවගේම ඔවුන් ඒ සඳහා යන අතරමගදී ඔවුන්ව ඒ රෝගයෙන් පවිත්ර වුණා.
තමා සුව වූ බව දැකපු ඔවුන්ගෙන් එක් කෙනෙක් දෙවියන්වහන්සේට ප්රශංසා කරමින් කෑ ගැසුවා. ඔහු ගැලවුම්කරුවාණන් වෙත ආපසු හැරිලා ආවා, උන්වහන්සේගේ පාමුල වැටිලා, උන්වහන්සේට ස්තූතිය පිදුවා.
ඊටපස්සෙ ගැලවුම්කරුවාණන්ට ස්තූතිවන්ත වුණු ඒ තැනැත්තාට උන්වහන්සේ මෙහෙම කිව්වා, “යන්න; ඔබේ ඇදහිල්ල ඔබව සුවපත් කළේය.”
යේසුස් ක්රිස්තුස්වහන්සේ ලාදුරු රෝගීන් දහ දෙනෙක්ව සුව කළා. නමුත් ගැලවුම්කරුවාණන් වෙත ආපසු පැමිණි එක් අයෙකුට, ඊට අමතරවත් යමක් ලැබුණා. ඔහුව පරිපූර්ණව සුව කරනු ලැබුවා.
ලාදුරු රෝගීන් නව දෙනෙකුව ශාරීරිකව සුව කරනු ලැබුවා.
එක් අයෙකු ශාරීරිකව සුව කර, ඒවගේම අධ්යාත්මිකවත් පරිපූර්ණව සුව කරනු ලැබුවා.
මේ කතාව ගැන මෙනෙහි කරද්දි, මෙහි කතාව ගැන තියෙන සාකච්ඡා ඇත්තද කියලා මම කල්පනා කරලා තිබෙනවා. සුවය සහ පරිපූර්ණව සුව වීම කියන්නෙ එකම දේ නොවේ නම්, උන්වහන්සේට කෙනෙකුව ශාරීරිකව හා චිත්තවේගීයව සුවපත් නොකර, අධ්යාත්මිකව පරිපූර්ණ සුවයක් දෙන්න පුළුවන් ද?
සුව කරන ස්වාමියාණන් උන්වහන්සේගේ වෙලාවට අනුව—අපගේ සියලු ශාරීරික හා චිත්තවේගීය පීඩා—සුව කරනවා. නමුත් සුවය ලැබීමට බලා සිටීමේදී, කෙනෙකුට පරිපූර්ණව සුව වෙන්න පුළුවන් ද?
අධ්යාත්මිකව පරිපූර්ණ සුවය යන්නෙන් අදහස් කරන්නේ මොකක්ද?
අපි යේසුස් ක්රිස්තුස්වහන්සේව ඇදහිල්ලෙන් අනුගමනය කිරීමට, උන්වහන්සේට අපව වෙනස් කරන්න හැකි වන ලෙස අපගේ හදවත් උන්වහන්සේට යටත් කිරීමට, උන්වහන්සේගේ ආඥා පිළිපැදීමට සහ උන්වහන්සේ සමඟ ගිවිසුම් සම්බන්ධතාවයකට ඇතුළු වීමට, උන්වහන්සේගේ අභිමුඛයට නැවත ගිහින් සෑම ආකාරයකින්ම සුවය ලබන තෙක් මෙම ලෞකික තත්ත්වයේ අභියෝග වලින් ඉගෙන ගැනීමට සහ නිහතමානීව විඳදරාගැනීමට, අපි අපේ තෝරාගැනීමේ නිදහස ක්රියාත්මක කරද්දි, අපි යේසුස් ක්රිස්තුස්වහන්සේ තුළ පරිපූර්ණව සුව වෙනවා. මම සුවය බලාපොරොත්තුවෙන් සිටින අතරතුර, උන්වහන්සේ සමඟ මගේ සම්බන්ධතාවය තුළ මගේ මුළු හදවතින්ම සිටිනවා නම්, මට පරිපූර්ණව සුව වෙන්න පුළුවන්.
යේසුස් ක්රිස්තුස්වහන්සේ කෙරෙහි ඇදහිල්ල මගින් බලාපොරොත්තුව ඇති කරනවා. පරිපූර්ණව සුව වෙන්න—යේසුස් ක්රිස්තුස්වහන්සේ කෙරෙහි ඇදහිල්ලෙන් උපන් පරිපූර්ණ සුවයක් ලබන්න උත්සාහ කරද්දි මට බලාපොරොත්තුවක් ලැබෙනවා. සුවය ලැබීම සඳහා උන්වහන්සේ කෙරෙහි ඇදහිල්ල මගේ බලාපොරොත්තුව වැඩි කරනවා, ඒවගේම එම බලාපොරොත්තුව යේසුස් ක්රිස්තුස්වහන්සේ කෙරෙහි මගේ ඇදහිල්ල ශක්තිමත් කරනවා. ඒක හරි බලවත් චක්රයක්.
ඔහුගේ ඇදහිල්ල ඔහුව “පරිපූර්ණව සුව” කළ බව ස්වාමින්වහන්සේ ඊනොස්ට පැවසුවා. සදාකාල ජීවනය සඳහා අවස්ථාව තේරුම් ගැනීමට මහත් උවමනාවකින් පෙළෙද්දි, බලවත් යාච්ඤාවෙන් දෙවියන්වහන්සේට මොරගැසූ විට, ඊනොස් තම අනාගතවක්තෘ-පියා වූ යාකොබ්ගේ වචන ගැන මෙනෙහි කරන විට මේ පරිපූර්ණ සුවය පැමිණියා. ඒ ආශාවෙන් හා නිහතමානී තත්ත්වයෙන්, ඔහුගේ පව්වලට සමාව ලැබුණු බව පවසමින්, ස්වාමීන්වහන්සේගේ හඬ ඔහු වෙත පැමිණියා. ඒවගේම ඊනොස් ස්වාමීන්වහන්සේගෙන් මෙහෙම ඇහුවා, “එය සිදුවන්නේ කෙසේද?” ඉන්පසු ස්වාමින්වහන්සේ මෙසේ ප්රතිචාර දැක්වූවා, “ක්රිස්තුස්වහන්සේ කෙරෙහි ඔබේ ඇදහිල්ල නිසා, … ඔබේ ඇදහිල්ල ඔබව පරිපූර්ණව සුවපත් කර ඇත.”
යේසුස් ක්රිස්තුස්වහන්සේ කෙරෙහි අපගේ ඇදහිල්ල තුළින්, ශාරීරික හා චිත්තවේගීය සුවය අපි බලාපොරොත්තුවෙන් බලා සිටින අතරතුර, අපට අධ්යාත්මිකව පරිපූර්ණව සුව වීමට උත්සාහ කරන්න පුළුවන්.
උන්වහන්සේගේ වන්දිගෙවීමේ පරිත්යාගය තුළින් සහ අපි අවංකව පසුතැවිලි වන විට, ගැලවුම්කරුවාණන් ඊනොස් සමඟ කළාක් මෙන් අපවත් පාපයෙන් සුව කරනවා. උන්වහන්සේගේ ඒ අනන්ත වන්දිගෙවීම අපගේ දුක සහ ශෝකය වෙතත් ලඟා වෙනවා.
නමුත් උන්වහන්සේ අසනීප හා රෝග—නිදන්ගත වේදනාවන්, බහු ස්ක්ලේරෝසිස් වැනි ස්වයං ප්රතිශක්තිකරණ ආබාධ, පිළිකා, කාංසාව, මානසික අවපීඩනය වැනි දේවලින් සුවය ලබාදෙන්නෙ නැති වෙන්න පුළුවන්. ඒ ආකාරයේ සුවයක් ලැබෙන්නේ ස්වාමීන්වහන්සේගේ කාලයට අනුවයි. ඒවගේම ඒ අතරතුර, උන්වහන්සේ කෙරෙහි අපගේ ඇදහිල්ල ක්රියාත්මක කිරීමෙන් අපට පරිපූර්ණව සුව වීමට තෝරාගන්න පුළුවන්!
පරිපූර්ණව සුව වෙනවා කියන්නේ සම්පූර්ණ හා පූර්ණ වීම. මනාලයා පැමිණි විට තෙල්වලින් පිරුණු පහන් තිබූ නුවණැති කන්යාවන් පස්දෙනා වගේ, අපගේ පහන් උන්වහන්සේ වෙතට හැරීමේ පෝෂ්යදායී තෙල්වලින් පුරවද්දි, අපිටත් යේසුස් ක්රිස්තුස්වහන්සේ තුළ පූර්ණව සුව වෙන්න පුළුවන්. ඒ ආකාරයෙන්, අපි ඒ සංකේතාත්මක විවාහ මංගල්ය භෝජන සංග්රහය වන උන්වහන්සේගේ දෙවන පැමිණීම සඳහා සූදානම් වෙනවා.
උපමාවේ කන්යාවන් දසදෙනාම මනාලයා එනතුරු නිසි ස්ථානයේ සිටියා. ඒ හැමෝම ආවේ පහනක් අරගෙන.
නමුත් උන්වහන්සේ අනපේක්ෂිත ලෙස මධ්යම රාත්රියේ ආවම, අනුවණ පස්දෙනා ලඟ ඔවුන්ගේ පහන් සඳහා ප්රමාණවත් තෙල් තිබුණේ නැහැ. ඔවුන්ව විස්තර කළේ දුෂ්ටයන් විදියට නෙවේ, නමුත් අනුවණ ලෙසයි. එම අනුවණ කාන්තාවන් තම පහන් ඒ හැරීමේ තෙල්වලින් දැල්වෙමින් තබා ගැනීමට ප්රමාණවත් ලෙස සූදානම් වීමට අසමත් වෙලා තිබුණා.
ඉතින්, විවාහ මංගල්ය භෝජන සංග්රහයට ඇතුළුවීමට අවසර දෙන ලෙස ඔවුන් කළ ආයාචනයට ප්රතිචාර වශයෙන්, මනාලයා මෙහෙම ප්රතිචාර දැක්වූවා, “මම නුඹලා නාඳුනමි.”
එසේ නම්, නුවණැති කන්යාවන් පස්දෙනා උන්වහන්සේව දැන සිටි බව එයින් කියවෙනවා. ඔවුන් උන්වහන්සේ තුළ පරිපූර්ණව සුව වෙලා හිටියා.
ඔවුන්ගේ පහන්, මනාලයාගේ දකුණු පැත්තේ සිට විවාහ මංගල්යයට ඇතුළු වීමට නුවණැති කන්යාවන්ට ඉඩ සලසන, හැරීමේ වටිනා තෙල්වලින් පිරී තිබුණා.
ගැලවුම්කරුවාණන් ප්රකාශ කළා වගේ, “මනාලයාගේ පැමිණීමේදී ඔබ සූදානම්ව සිටින පිණිස, ඇදහිල්ලෙන් සිටින්න, නිතර යාච්ඤා කරන්න, නුඹලාගේ පහන් සූදානම් කොට දල්වාගන්න, තවද තෙල් නුඹලා සමඟ තබාගන්න.”
බෙන් හැමන්ඩ් විසින්, Five Wise Virgins [නුවණැති කන්යාවන් පස් දෙනෙක්]
සෝල්ට් ලේක් දේවමාළිගාව අසල දේවමාළිගා චතුරශ්රයේ සහන සමිති ගොඩනැගිල්ලේ දොරටු ඉදිරිපිට මෑතකදී ඒ නුවණැති කන්යාවන් පස්දෙනාව නිරූපණය කරන අපූරු මූර්තියක් තැන්පත් කළා.
එය මේ උපමාවේ අදාළත්වයට ගැලපෙනම ස්ථානයක්. මොකද, අපි ගිවිසුම්, විශේෂයෙන් ස්වාමීන්වහන්සේගේ ගෘහයේදී ගිවිසුම් ඇති කරගද්දි සහ තබාගද්දි, අපි අපගේ පහන් හැරීමේ තෙල්වලින් පුරවාගන්නවා.
නුවණැති කන්යාවන් පස්දෙනා ලෙස නිරූපණය වන කාන්තාවන් ඔවුන්ගේ හැරීමේ තෙල් බෙදාගත්තේ නැති වුණත්, ඔවුන් තෙල්වලින් පිරුණු සහ දීප්තිමත් ලෙස දැල්වෙන ඔවුන්ගේ පහන් ඔසවාගෙන ඔවුන්ගේ ආලෝකය බෙදාගන්නවා. සැලකිය යුතු ලෙස, ඔවුන් එකිනෙකාට සහයෝගය දක්වමින්—එකට ලංවෙලා, අතක් අනෙකා වටා තබාගෙන, ඇස් වලින් එකිනෙකා දෙස බලන ආකාරය සහ අන් අයට ආලෝකයට පැමිණෙන ලෙස ආරාධනා කිරීම එහි නිරූපණය වෙනවා.
ඇත්තෙන්ම, “[අපි] තමයි ලෝකයේ ආලෝකය.” ගැලවුම්කරුවාණන් මෙහෙම ඉගැන්වූවා:
“මෙම ජනතාවට ආලෝකයක් වීමට මම නුඹලාට දෙන්නෙමි. කන්දක් මත ඇති නුවරක් සඟවන්නට නොහැකිය.
“… [අපි] පහනක් දල්වා කුරුණිය යට තබත් ද? නැත, එහෙත් පහන පහන් කණුවක් මත තබයි; තවද එයින් ගෙයි සිටින සියල්ලන් කෙරෙහි ආලෝකය දෙන්නේය;
“එසේහෙයින් නුඹලාගේ යහපත් ක්රියා දකිනු පිණිස, නුඹලාගේ ස්වර්ගයේ සිටින පියාණන්ගේ නාමය මහිමයට පැමිණවීමට, මෙම ජනතාව ඉදිරියේ නුඹලාගේ ආලෝකය බබළවන්න.”
උන්වහන්සේගේ ආලෝකය බෙදා ගැනීමට අපට අණ කර තිබෙනවා. ඒ නිසා ඔබේ පහන යේසුස් ක්රිස්තුස්වහන්සේ වෙතට හැරීමේ තෙල්වලින් පුරවා තබා ගන්න, ඔබේ පහන සකස් කරගෙන එය දීප්තිමත්ව දැල්වීමට සූදානම්ව සිටින්න. ඉන්පසු ඒ ආලෝකයට බැබළෙන්න ඉඩ දෙන්න. අපි අපේ ආලෝකය බෙදාගද්දි, අපි අනෙක් අය වෙතට යේසුස් ක්රිස්තුස්වහන්සේගේ සහනය ගෙන යනවා, උන්වහන්සේ වෙත අපගේ හැරීම ගැඹුරු වෙනවා, ඒවගේම සුවය ලැබෙන තෙක් බලා සිටින අතරතුර පවා අපට පරිපූර්ණව සුව වෙන්න පුළුවන් වෙනවා. ඒවගේම අපි අපේ ආලෝකය දීප්තිමත්ව බබළන්න ඉඩ දෙද්දි, අපි යමක් සඳහා බලා සිටින අතරතුර පවා අපට ප්රීති වෙන්න පුළුවන්.
අපි යේසුස් ක්රිස්තුස්වහන්සේ වෙතට හැරී උන්වහන්සේගෙන් ශක්තිය ලබාගද්දි, සුවය ලැබෙන තෙක් බලා සිටින අතරතුර පවා අපට පරිපූර්ණව සුව වෙන්න පුළුවන් කියන මූලධර්මය ශක්තිමත් කිරීමට ශුද්ධලියවිලිමය උදාහරණයක් ප්රයෝජනවත් වෙයි.
ප්රේරිත පාවුල්ට යම් ආකාරයක පීඩාවක් තිබුණා—ඔහු එය විස්තර කළේ “මාංසයේ උලක්” ලෙසයි, එය ඉවත් කරන ලෙස ඔහු තුන් වතාවක්ම ස්වාමීන්වහන්සේගෙන් ඉල්ලා සිටියා. ඒවගේම ස්වාමීන්වහන්සේ පාවුල්ට මෙහෙම කිව්වා, “මාගේ කරුණාව නුඹට සෑහේය. මක්නිසාද දුර්වලකමේදී මාගේ බලය සම්පූර්ණ වෙන්නේය.” එයට පාවුල් මෙසේ ප්රකාශ කළා:
“එබැවින් ක්රිස්තුස්වහන්සේගේ ශක්තිය මා කෙරෙහි පිහිටන පිණිස මාගේ දුර්වලකම් ගැන ඉතා සන්තෝෂයෙන් පාරට්ටු කරන්නෙමි.
“ඒ නිසා මම දුර්වලකම්වලට, … ක්රිස්තුස්වහන්සේ උදෙසා දුක් වේදනාවලට ප්රිය කරමි: මක්නිසාද මම දුර්වල වූ විට, මම ශක්තිමත් වෙමි.”
පාවුල්ගේ ආදර්ශයෙන් ඇඟවෙන්නේ අපගේ දුර්වලකමේදී පවා, යේසුස් ක්රිස්තුස්වහන්සේ තුළ අපගේ ශක්තිය පරිපූර්ණ කළ හැකි බවයි—එනම්, සම්පූර්ණ හා පරිපූර්ණව සුව කළ හැකි බවයි. ලෞකික අරගල සමඟ පොරබදමින්, පාවුල් මෙන් ඇදහිල්ලෙන් දෙවියන්වහන්සේ වෙත හැරෙන අයට, දෙවියන්වහන්සේව හඳුනා ගැනීමේ ආශිර්වාද ලබාගන්න පුළුවන්.
පාවුල් ඔහුගේ පීඩාවෙන් සුවය ලැබුවේ නැති වුණත්, ඔහු යේසුස් ක්රිස්තුස්වහන්සේ තුළ ආත්මිකව පූර්ණ සුවයක් ලැබුවා. ඔහුගේ විපත්තියේදී පවා, යේසුස් ක්රිස්තුස්වහන්සේ වෙතට ඔහුගේ හැරීමේ ආලෝකය සහ ශක්තිය බැබළෙමින් තිබුණා ඒවගේම ඔහු ප්රීතියෙන් සිටියා. පිලිප්පිවරුන්ට ලියූ ඔහුගේ ලිපියේ ඔහු මෙහෙම සඳහන් කළා, “ස්වාමීන්වහන්සේ තුළ නිතරම ප්රීතිවෙන්න. ප්රීතිවෙන්න යැයි නැවතත් කියමි.”
සහෝදරියනි, සහෝදරවරුනි, පිළිතුර ඔව්, අපි ශාරීරික හා චිත්තවේගීය සුවය බලාපොරොත්තුවෙන් සිටියත්, අපට අධ්යාත්මිකව පරිපූර්ණ සුවයක් ලබාගන්න පුළුවන්. පරිපූර්ණව සුවවීම කියන්නෙ මේ ජීවිතයේ ශාරීරික හා චිත්තවේගීය ප්රකෘතිමත් වීමක්ම නෙවේ. පූර්ණත්වයෙන් සුව වීම උපත ලබන්නේ යේසුස් ක්රිස්තුස්වහන්සේ කෙරෙහි ඇදහිල්ලෙන් හා හැරීමෙන් සහ එම පරිවර්තනයේ ආලෝකය බැබළීමට සැලැස්වීමෙනුයි.
“කැඳවනු ලැබුවෝ බොහෝය, තෝරාගනු ලැබුවෝ [වීමට තෝරා ගත්තෝ] ස්වල්පයකි.”
මරණයෙන් නැවත නැගිටීමේදී සියල්ලන්ම ශාරීරිකව හා චිත්තවේගීයව සුවපත් වෙනවා. නමුත් දැන් ඔබ උන්වහන්සේ තුළ පරිපූර්ණව සුව වීමට තෝරා ගන්නවාද?
ස්වාමීන් වන යේසුස් ක්රිස්තුස්වහන්සේ වෙතට මම හැරී ඇති බව මම ප්රීතියෙන් යුතුව ප්රකාශ කරනවා. මම උන්වහන්සේ තුළ පරිපූර්ණව සුව වෙන්න උත්සාහ කරනවා. උන්වහන්සේ ජීවමාන නිසා, උන්වහන්සේගේ කාලයට අනුව සියල්ල යථා තත්ත්වයට පත් වන බවත් සුවය පැමිණෙන බවත් මට විශ්වාසයි.
මරියා මග්දලේනා කියන්නෙ යේසුස් ක්රිස්තුස්වහන්සේගෙන් සුවය ලැබූ කාන්තාවක්. ඒවගේම ඇය යේසුස් ක්රිස්තුස්වහන්සේ තුළ පරිපූර්ණ සුවය ලබපු කාන්තාවක්. උන්වහන්සේගේ ගෝලයෙකු විදියට, ඇය ගැලවුම්කරුවාණන්ව අනුගමනය කරමින් ගලීලය පුරාම යමින් උන්වහන්සේට සේවය කළා.
ඇය කුරුසියේ පාමුල සිටියා, උන්වහන්සේගේ මරණයට සාක්ෂිකාරියක් වුණා.
භූමදාන කටයුතු සඳහා සූදානම් කිරීම් සම්පූර්ණ කිරීම සඳහා ඇය උන්වහන්සේගේ සොහොන් ගෙය වෙත ගියා, ඒවගේම ගල් ආවරණය ඉවත් කර ඇති බවත්, ස්වාමීන්වහන්සේගේ දේහය නැති වී ඇති බවත් ඇය සොයා ගත්තා. මරියා සොහොන් ගෙය ළඟ අඬමින් ඉද්දි, පළමුව දේවදූතයන් විසින්ද පසුව ගැලවුම්කරුවාණන් විසින්ද ඇගෙන් මෙහෙම ඇහුවා, “ස්ත්රිය, ඔබ අඬන්නේ ඇයි? ඔබ සොයන්නේ කාවද?”
මරියා මෙහෙම ඇඬුවා, “ඔවුන් මාගේ ස්වාමීන්ව රැගෙන ගොස් ඇත, ඔවුන් ඔහුව කොහේ තැබුවාද කියා මම නොදනිමි.”
යේසුස්වහන්සේ ඇයට මෘදු ලෙස “මරියා” කියා කතා කළා. ඇය උන්වහන්සේව හඳුනාගෙන ගෞරවාන්විතව මෙහෙම පිළිතුරු දුන්නා, “රබ්බා … ස්වාමීනි.”
ගැලවුම්කරුවාණන් ගැන අනාවැකි කියමින් යෙසායා මෙහෙම කිව්වා, “උන්වහන්සේ මරණය සදාකාලයටම ගිල දැමූ සේක; ස්වාමි වූ දෙවියන්වහන්සේ සියලු මුහුණුවලින් කඳුළු පිසදමන සේක.”
උන්වහන්සේගේ මරණයෙන් නැවත නැගිටීම මරියාගේ කඳුළු පිස දැමීමට ඉඩ සැලසුවා. නියත වශයෙන්ම උන්වහන්සේ ඔබේ කඳුලුත් පිස දමයි.
මරියා තමයි මරණයෙන් නැවත නැගිටි ගැලවුම්කරුවාණන්ගේ පළමු සාක්ෂිකාරිය. ඇය දුටු දේ ගැන අන් අයට මුලින්ම සාක්ෂි දැරුවේ ඇයයි.
මම නිහතමානීව මගේ සාක්ෂිය මරියාගේ සාක්ෂියට එකතු කරනවා. උන්වහන්සේ මරණයෙන් නැවත නැගිටි සේක. යේසුස් ක්රිස්තුස්වහන්සේ ජීවමානයි. අවසානයේදී සියල්ලන්ම උන්වහන්සේ තුළ ශාරීරිකව හා චිත්තවේගීයව සුවපත් වෙයි. ඒ සුවය බලාපොරොත්තුවෙන්, සුව කරන ස්වාමියා කෙරෙහි ඇදහිල්ල තුළින් අපව අධ්යාත්මිකව පරිපූර්ණව සුව කරයි. යේසුස් ක්රිස්තුස්වහන්සේගේ නාමයෙන්, ආමෙන්.