කරුණාවේ සැලැස්ම

පසුගිය වසරේ අප්‍රියෙල් මාසයේ, සභාව විසින් කර්ට්ලන්ඩ් දේවමාළිගාව අත්කරගත් බවට ලබාදුන් ප්‍රීතිමත් පුවත ලැබීමෙන් ටික කාලයකට පස්සෙ, සභාපති රසල් එම්. නෙල්සන් අපට දහම සහ ගිවිසුම් පොතේ 109 වන කොටසේ වාර්තා කරලා තිබෙන කර්ට්ලන්ඩ් දේවමාළිගාවේ කැපකිරීමේ යාච්ඤාව අධ්‍යයනය කිරීමට ආරාධනා කළා. සභාපති නෙල්සන් පැවසූ ආකාරයට, මේ කැපකිරීමේ යාච්ඤාව, “මෙම අවසාන දිනවලදී ජීවිතයේ අභියෝගවලට මුහුණ දීමට මේ දේවමාළිගාව ඔබටත් මටත් අධ්‍යාත්මිකව ශක්තිය ලබා දෙන ආකාරය පිළිබඳ පාඩමක්.”

ඔබ 109 වෙනි කොටස අධ්‍යයනය කරද්දී, ඔබට ආශිර්වාද කළ අවබෝධයක් ලැබුණු බව මට විශ්වාසයි. අපගේ අනාගතවක්තෘවරයාගේ ආරාධනය අනුගමනය කිරීම මගින් මා ඉගෙනගත් දේවල් කිහිපයක් මම මේ සන්ධ්‍යාවේ බෙදා ගන්නම්. ස්වාමින්වහන්සේ කරුණාවන්ත බව සහ අපගේ ස්වර්ගික පියාණන්වහන්සේගේ ගැලවීමේ සැලැස්ම සැබවින්ම කරුණාවේ සැලැස්මක් බව, මගේ අධ්‍යයනයෙන් මට ලැබුණු සාමය ලබා දෙන මාවත ගැන මට මතක් කර දුන්නා.

ඔබ දන්නා පරිදි, “අලුතින් කැඳවනු ලබන ධර්මදූතවරුන්ට, හැකි ඉක්මනින් දේවමාළිගාවේ බලයෙන් සැරසීම ලබා ගැනීමටත්, අවස්ථාවන් ඉඩ දෙන සෑම විටම දේවමාළිගාවට පැමිණීමටත් දිරිගන්වනු ලැබෙනවා.” බලයෙන් සැරසීම ලබාගත්තට පස්සෙ, ඔවුන්ට “ධර්මදූත සේවය ආරම්භ කරන්න කලින් දේවමාළිගාවේ සේවකයින් විදියටත් සේවය කරන්න පුළුවන්.”

ධර්මදූත පුහුණු මධ්‍යස්ථානයට (MTC) ඇතුළු වීමට පෙර දේවමාළිගාවේ ගත කරන කාලය තුළ, නව ධර්මදූතයින් දේවමාළිගා ගිවිසුම් ගැන වැඩි විස්තර ඉගෙන ගද්දි, එම ගිවිසුම්වල ආශීර්වාද ලෝකය සමඟ බෙදාගැනීම ඔවුන්ට අපූරු ආශිර්වාදයක් වෙන්න පුළුවන්.

නමුත් 109 වන කොටස අධ්‍යයනය කරද්දි, දෙවියන්වහන්සේ නව ධර්මදූතයින්ව—ඇත්ත වශයෙන්ම, අපි හැමෝවම—අතිරේක, පරිශුද්ධ ආකාරයකින් බලගන්වන බව මම ඉගෙනගත්තා. එළිදරව් මගින් දෙන ලද කැපකිරීමේ යාච්ඤාවේදී, අනාගතවක්තෘ ජෝසෆ් ස්මිත් මෙහෙම යාච්ඤා කළා “ඔබවහන්සේගේ නාමයෙන් සාක්ෂි දැරීමට, ඔබවහන්සේගේ සේවකයන් ඔබවහන්සේගේ ගෘහයෙන් පිටතට යන විට,” “සියලු මිනිසුන්ගේ” “හදවත්” මෘදු කළ මැනව—“පොළොවේ ශ්‍රේෂ්ඨ අයවළුන්ව” සහ “සියලු දුප්පතුන්ද, අවශ්‍යතා ඇත්තන්ද, තවද පොළොවේ පීඩා ලද්දවුන්වද මෘදු කළ මැනව.” “ඔවුන්ගේ මතය සත්‍ය ඉදිරියේ නැතිවී යන පිණිසත්, තවද ඔබවහන්සේගේ ජනතාව සියල්ලන් ඉදිරියේම ප්‍රසාදය හිමිකරගන්නා පිණිසත්; පොළොවේ සියලු කෙළවරවල්, ඔබවහන්සේගේ සේවකයින් වන අප, ඔබවහන්සේගේ හඬ අසා ඇති බවත්, තවද ඔබවහන්සේ අපව එවා ඇති බවත් පොළොවේ සියලු අන්තයන් දැනගන්නා පිණිසත්” ඔහු යාච්ඤා කළා.

“ඔවුන්ගේ මතය සත්‍ය ඉදිරියේ නැතිවී යන පිණිස”, “සියල්ලන් ඉදිරියේම ප්‍රසාදය හිමිකරගන්නා පිණිස” සහ ඔවුන් ස්වාමින්වහන්සේ විසින් එවන ලද බව ලෝකයට දැන ගැනීමට සැලැස්වීම—අලුතින් කැඳවන ලද ධර්මදූතයෙකුට ලැබෙන ලස්සන පොරොන්දුවක්. අපි හැමෝටම මේ ආශිර්වාදම අනිවාර්යයෙන්ම අවශ්‍යයි. අසල්වැසියන් සහ රැකියා සගයන් සමඟ කටයුතු කරද්දි හදවත් මෘදු වීම මොනතරම් ආශිර්වාදයක් වෙයිද. මේ කැපකිරීමේ යාච්ඤාව දේවමාළිගාවේ අපගේ කාලය අන් අයගේ හදවත් මෘදු කරන්නේ කොහොමද කියලා හරියටම පැහැදිලි කරන්නේ නෑ, නමුත් ස්වාමින්වහන්සේගේ ගෘහයේ කාලය ගතකිරීමෙන්, යේසුස් ක්‍රිස්තුස්වහන්සේ මත සහ උන්වහන්සේගේ දයාව මත අපව කේන්ද්‍රගත කිරීමෙන්, අපගේම හදවත් මෘදු කරන ආකාරය මත එය බැඳී ඇති බව මට තේරිලා තිබෙනවා.

මම කර්ට්ලන්ඩ් දේවමාළිගාව කැපකිරීමේ යාච්ඤාව අධ්‍යයනය කරද්දි,—සභාවේ සාමාජිකයන් වෙනුවෙන්, සභාවේ සතුරන් වෙනුවෙන්, රටේ නායකයින් වෙනුවෙන්, පොළොවේ ජාතීන් වෙනුවෙන් අයැද සිටිමින්—ජෝසෆ් නැවත නැවතත් කරුණාව ඉල්ලා ආයාචනා කළ ආකාරය මාව පුදුමයට පත්කළා. එමෙන්ම, ඉතා පෞද්ගලිකව, ඔහු ස්වාමින්වහන්සේට තමාව සිහිපත් කර ඔහුගේ ආදරණීය එමා සහ ඔවුන්ගේ දරුවන්ට කරුණාව ඉල්ලා ආයාචනා කළා.

සතියකට පසු, 1836 අප්‍රියෙල් 3 වන දින පාස්කු ඉරිදා දිනයේ, කර්ට්ලන්ඩ් දේවමාළිගාවේදී, ගැලවුම්කරුවාණන් ඔහුට සහ ඔලිවර් කවුඩ්‍රිට දර්ශනය වෙලා, දහම සහ ගිවිසුම් පොතේ 110 වෙනි කොටසේ වාර්තා කර ඇති ආකාරයට, පැවසූ විට ජෝසෆ්ට කොහොම දැනෙන්න ඇත්ද, “මක්නිසාද බලන්න, මම මෙම ගෘහය පිළිගන්නෙමි, තවද මාගේ නාමය මෙහිය; තවද මම මාගේ ජනතාවට මෙම ගෘහයේදී මම කරුණාවෙන් ප්‍රකාශ වන්නෙමි.” කරුණාවේ මෙම පොරොන්දුව මගින් ජෝසෆ්ට විශේෂ අර්ථයක් ලැබෙන්නට ඇති. සභාපති නෙල්සන් පසුගිය අප්‍රියෙල් මාසයේදී ඉගැන්නුවා වගේ, මේ පොරොන්දුව “කැපකර ඇති සෑම දේවමාළිගාවකටම අද අදාළ වෙනවා.”

අපි සෑම කෙනෙකුටම ස්වාමින්වහන්සේගේ ගෘහය තුළ කරුණාව සොයාගත හැකි ක්‍රම බොහොමයක් තිබෙනවා. ස්වාමින්වහන්සේ විසින් ඊශ්‍රායෙලයට, මණ්ඩපයක් ගොඩනඟා එහි මධ්‍යයේ “කරුණාවේ ආසනය” තබන ලෙස මුලින්ම ආඥා කළ දා සිටම මෙය සත්‍යයක් වී තිබෙනවා. දේවමාළිගාවේදී, අප කරන ගිවිසුම් තුළින් අපිට කරුණාව හොයාගන්න පුළුවන්. බෞතීස්ම ගිවිසුමට අමතරව, එම ගිවිසුම් අපව පියාණන්වහන්සේට සහ පුත්‍රයාණන්වහන්සේට බැඳ තබනවා, ඒවගේම සභාපති නෙල්සන් ඉගැන්වූ, “හෙබ්‍රෙව් භාෂාවෙන් හෙසෙඩ් ලෙස හඳුන්වන විශේෂ ප්‍රේමයක් සහ කරුණාවක්” කෙරෙහි වැඩි ප්‍රවේශයක් අපට ලබාදෙනවා.

අපගේ පවුල්වලට සදාකාලිකවම මුද්‍රා වීමේ අවස්ථාව තුළ අපට කරුණාව ලැබෙනවා. දේවමාළිගාවේදී, ඒවගේම මැවීම, වැටීම, ගැලවුම්කරුවාණන්ගේ වන්දිගෙවීමේ පූජාව සහ අපගේ ස්වර්ගික පියාණන්වහන්සේගේ අභිමුඛයට නැවත ඇතුළු වීමට අපට ඇති හැකියාව—ගැලවීමේ සැලැස්මේ සෑම කොටසක්ම—කරුණාවේ ප්‍රකාශනයන් බව අපි වඩාත් පැහැදිලි ලෙස තේරුම් ගන්නවා. එය ගැලවීමේ සැලැස්ම සතුටේ සැලැස්මක් බව පැවසිය හැක්කේ එය “කරුණාවේ සැලැස්මක්” නිසාමයි.

ස්වාමින්වහන්සේ උන්වහන්සේගේ දේවමාළිගාවල කරුණාවෙන් යුතුව උන්වහන්සේව ප්‍රකාශ කරන බවට 110 වෙනි කොටසේ ලබා දීලා තියෙන ලස්සන පොරොන්දුවට මම ස්තූතිවන්ත වෙනවා. ජෝසෆ් වගේ අපිත් කරුණාව ඉල්ලන සෑම අවස්ථාවකම ස්වාමින්වහන්සේ කරුණාවෙන් යුතුව උන්වහන්සේව ප්‍රකාශ කරන ආකාරය පිළිබඳව එයින් හෙළි වන දේ ගැන මම ස්තූතිවන්ත වෙනවා.

109 වෙනි කොටසේ ජෝසෆ් ස්මිත්ගේ කරුණාව සඳහා වූ ආයාචනය, ඔහුගේ කරුණාව සඳහා වූ ආයාචනා මගින් එළිදරව් ලබාගත් පළමු අවස්ථාව නෙවෙයි. පූජනීය වනයේදී, තරුණ ජෝසෆ් යාච්ඤා කළේ කුමන සභාව සත්‍යදැයි දැන ගැනීමට පමණක් නොවේ, නමුත් ඔහු මෙහෙමත් කිව්වා, “මම ස්වාමින්වහන්සේගෙන් කරුණාව ඉල්ලා මොරගැසුවෙමි, මක්නිසාද මට කරුණාව ලබා ගැනීමට යා හැකි වෙනත් කිසිවෙක් සිටියේ නැත.” කෙසේ හෝ ස්වාමින්වහන්සේට පමණක් ලබා දිය හැකි කරුණාව ඔහුට අවශ්‍ය බව ඔහු හඳුනා ගැනීම ස්වර්ගයේ කවුළු විවෘත කිරීමට උදව්වක් වුණා. අවුරුදු තුනකට පසු “මාගේ සියලු පාපයන්ට සහ අඥාන ක්‍රියාවන්ට කමාව පිණිස, සර්වබලධාරී දෙවියන්වහන්සේට කළ යාච්ඤාවෙන් සහ ආයාචනාවෙන්” මොරෝනි දේවදූතයා පෙනී සිටිය බව ජෝසෆ් පැවසුවා.

කරුණාව සඳහා කරන ලද ආයාචනයකින් පසු මෙම එළිදරව් කිරීමේ රටාව ශුද්ධලියවිලිවල ඇති හුරුපුරුදු එකක්. ඊනොස්ට ස්වාමින්වහන්සේගේ හඬ ඇසුණේ, ඔහු සමාව ඉල්ලා යාච්ඤා කිරීමෙන් පසුව පමණයි. ලමෝනි රජුගේ පියාගේ හැරීම ආරම්භ වන්නේ ඔහුගේ යාච්ඤාවෙනුයි, “මාගේ සියලුම පාපයන් ඔබවහන්සේව දැනගැනීම පිණිස මම අත්හරින්නෙමි.” මේ වගේ නාට්‍යමය අත්දැකීම් වලින් අපටත් ආශිර්වාද නොලැබෙන්න පුළුවන්, නමුත් සමහර විට යාච්ඤාවට පිළිතුරු දැනීමට අරගල කරන අයට, ස්වාමින්වහන්සේගේ කරුණාව සෙවීම කියන්නෙ ශුද්ධාත්මයාණන්ගේ සාක්ෂිය දැනීමට ඇති බලවත්ම ක්‍රමවලින් එකක්.

මොරෝනි 10:3–5 තුළ ඒ හා සමානම මූලධර්මයක් ඉතා අලංකාර ලෙස උගන්වනවා. අවංක යාච්ඤාව තුළින්, මොර්මොන්ගේ පොත සත්‍යද කියා අපට ඉගෙන ගත හැකි බව ඉගැන්වීමට, අපි බොහෝ විට මේ පද කෙටි කරනවා. නමුත් මේ කෙටි කිරීම මගින් කරුණාවේ වැදගත් කාර්යභාරය නොසලකා හැරී යන්න පුළුවන්. මොරෝනි ඔහුගේ ආයාචනය ආරම්භ කරන ආකාරයට සවන් දෙන්න: “බලන්න, මම නුඹලාට අවවාද කිරීමට කැමැත්තෙමි, එනම් නුඹලා මෙම දේවල් කියවන විට … මනුෂ්‍ය දරුවන් හට ආදම්ගේ මැවීමේ සිට මෙම දේවල් නුඹ ලබාගන්නා කාලය දක්වා වුවත් ස්වාමින්වහන්සේ කෙතරම් කරුණාවන්තදැයි සිහිකරන්න, තවද එය නුඹගේ හදවත තුළ මෙනෙහි කරන්න.”

මොරෝනි අපෙන් ඉල්ලා සිටින්නේ—ඔහු මුද්‍රා තැබීමට යන මේ වාර්තා—කියවීමට පමණක් නොවේ නමුත් “ස්වාමින්වහන්සේ මනුෂ්‍ය දරුවන්ට කෙතරම් කරුණාවන්ත වී ඇත්ද” කියා මොර්මොන්ගේ පොත හෙළි කරන දේ අපගේ හදවත් තුළ මෙනෙහි කරන ලෙස ඔහු අපෙන් ඉල්ලා සිටිනවා. ඒ තමයි “මේ දේවල් සත්‍ය නොවේදැයි ක්‍රිස්තුස්වහන්සේගේ නාමයෙන් සදාකාලික පියාණන් වන දෙවියන්වහන්සේගෙන් ඇසීම” මගින් අපව සූදානම් කරන ස්වාමින්වහන්සේගේ කරුණාව ගැන මෙනෙහි කිරීම.

අපි මොර්මොන්ගේ පොත ගැන මෙනෙහි කරද්දි, අපිට මෙහෙම අහන්න පුළුවන්: ඇල්මා ඉගැන්වූ පරිදි, දෙවියන්වහන්සේගේ කරුණාවේ සැලැස්ම මගින් මේ පොළොවේ ජීවත් වූ සෑම පුද්ගලයෙකුම මරණයෙන් නැවත නැගිටින බවත්, ඔවුන් ඔවුන්ගේ පරිපූර්ණ රාමුවට නැවත පැමිණෙන බවත් සැබවින්ම ඇත්තක් ද‍? අමුලෙක් හරිද—ගැලවුම්කරුවාණන්ගේ දයාව යුක්තියේ කටුක සැබෑ ඉල්ලීම් සියල්ලම සෑහීමකට පත් කරන අතර ඒ වෙනුවට “අපව වටකරන දෑතින් අපව වටකර ගැනීමට” බැඳී සිටිනවාද?

ඇල්මා සාක්ෂි දුන් පරිදි, ක්‍රිස්තුස්වහන්සේ අපගේ පාපයන් සඳහා පමණක් නොව, නමුත් “උන්වහන්සේගේ සෙනඟගේ දුර්වලතා අනුව ඔවුන්ට උපකාර කරන්නේ කෙසේදැයි” දැනගන්නා පිණිස, අපේ “වේදනා සහ කරදර” වෙනුවෙනුත් දුක් වින්ද බව ඇත්තද? “ඔවුන් වෙනුවෙන් දෙවියන්වහන්සේගේ කැමැත්ත කුමක්දැයි නොදැන මරණයට පත්වූවන්, හෝ නොදැනුවත්ව පාප කළ අය උදෙසා” ස්වාමින්වහන්සේ නොමිලේ ත්‍යාගයක් ලෙස වන්දි ගෙවූ බවට වූ බෙන්ජමින් රජුගේ ඉගැන්වීම අනුව ස්වාමින්වහන්සේ එතරම්ම දයාන්විත ද?

ලීහායි පැවසූ ලෙස, “ආදම් වැටුනේ මනුෂ්‍යයන් පවතිනු පිණිසය, තවද, මනුෂ්‍යයන් පැවතෙන්නේ එනම් ප්‍රීතිය ලබනු පිණිසය” යන කියමන සත්‍යයද? යෙසායාව උපුටා දක්වමින්, අබිනාදි සාක්ෂි දුන් ලෙස, යේසුස් ක්‍රිස්තුස්වහන්සේ ”තුවාල ලැබුවේ අපගේ අපරාධ නිසාය, උන්වහන්සේ පොඩි කරනු ලැබුවේ අපගේ අයුතුකම් නිසාය, අපට සමාදානය ගෙන දෙන දඬුවම උන්වහන්සේ පිටට පැමිනුණේය; තවද උන්වහන්සේගේ පහර වලින් අපට සුවය ලැබී තිබේ” යන කියමන සත්‍යයද?

ඒ සියල්ලේ එකතුවක් ලෙස, මොර්මොන්ගේ පොතේ උගන්වා ඇති ලෙස පියාණන්වහන්සේගේ සැලැස්ම මෙතරම් දයාන්විත ද? එය එසේ බවත්, මොර්මොන්ගේ පොත තුළ සාමය ලබා දෙන සහ කරුණාව පිළිබඳ බලාපොරොත්තු සහගත ඉගැන්වීම් සත්‍ය බවත් මම සාක්ෂි දරනවා.

තවමත්, ඔබේ විශ්වාසවන්ත කියවීම් සහ යාච්ඤාවන් නොතකා, ස්වර්ගික පියාණන්වහන්සේ “ශුද්ධාත්මයාණන්ගේ බලයෙන් එහි සත්‍යය ඔබට ප්‍රකාශ කරන” බවට මොරෝනි දුන් පොරොන්දුව සාක්ෂාත් කර ගැනීමට සමහරු අරගල කරනවා ඇති කියලා මම හිතනවා. මම මේ අරගලය දන්නවා, මොකද මට ඒක දැනුණා, අවුරුදු ගණනාවකට කලින්, මොර්මොන්ගේ පොත මුලින්ම කියෙව්වම මගේ යාච්ඤාවලට ක්ෂණික හා පැහැදිලි පිළිතුරක් ලැබුණේ නැහැ.

ඔබ අරගල කරන්නේ නම්, “ස්වාමින්වහන්සේ මනුෂ්‍ය පුත්‍රයන්ට දයානුකම්පිත වී ඇති ආකාරය” ගැන මොර්මොන්ගේ පොත මගින් උගන්වන බොහෝ ආකාර ගැන මෙනෙහි කරන්නට මොරෝනි ලබාදුන් උපදේශය අනුගමනය කරන්නට මට ඔබට ආරාධනා කරන්න පුළුවන් ද? මගේ අත්දැකීම් මත පදනම්ව, ඔබ එහෙම කරද්දි, ශුද්ධාත්මයාණන්ගේ සාමය ඔබේ හදවතට ඇතුළු වේවා කියාත්, මොර්මොන්ගේ පොත සහ එය උගන්වන කරුණාවේ සැලැස්ම සත්‍ය බව ඔබට දැන ගැනීමට, විශ්වාස කිරීමට සහ දැනෙන්නට හැකි වේවා කියාත් මම බලාපොරොත්තු වෙනවා.

පියාණන්වහන්සේගේ ශ්‍රේෂ්ඨ කරුණාවේ සැලැස්මට සහ එය ක්‍රියාත්මක කිරීමට ගැලවුම්කරුවාණන් දක්වන කැමැත්තට මම මගේ ස්තූතිය පුද කරනවා. අපි උන්වහන්සේව සොයනවා නම්, උන්වහන්සේගේ ශුද්ධ වූ දේවමාළිගාවේදී සහ අපගේ ජීවිතයේ සෑම කොටසකදීම උන්වහන්සේ කරුණාවෙන් යුතුව ප්‍රකාශ වන බව මම දන්නවා. යේසුස් ක්‍රිස්තුස්වහන්සේගේ නාමයෙන්, ආමෙන්.