පිවිතුරු ප්‍රේමය—සැබෑ අනුගාමිකත්වයේ සලකුණ

ගෝලයෙක් කියන්නේ තවත් කෙනෙකුගේ අනුගාමිකයෙක් හෝ ශිෂ්‍යයෙක්. ගෝලයන් කියන්නේ ඔවුන්ගේ ගුරුවරයා වගේ වෙන්න ඔවුන්ගේ ජීවිතය කැප කරන “නවකයින්.” මේ අනුව, යේසුස් ක්‍රිස්තුස්වහන්සේගේ ගෝලයෙකු වීම යන්නෙන් උන්වහන්සේගේ ඉගැන්වීම් සහ මූලධර්ම විශ්වාස කිරීමට වඩා වැඩි යමක් අදහස් කරනවා. එය කෙතරම් වැදගත් වුවත්, එය උන්වහන්සේගේ දේවත්වය පිළිගෙන උන්වහන්සේව අපගේ ගැලවුම්කරුවාණන් සහ මිදුම්කරුවාණන් ලෙස පිළිගැනීමටත් වඩා වැඩි දෙයක් අදහස් කරනවා.

සභාපති ඩැලන් එච්. ඕක්ස් මෙහෙම පැහැදිලි කළා: “ක්‍රිස්තුස්වහන්සේව අනුගමනය කිරීම තාවකාලික හෝ ඉඳහිට සිදු කරන ක්‍රියාවක් නොවේ. එය සෑම අවස්ථාවකදීම සහ සෑම තැනකදීම අපට මගපෙන්විය යුතු අඛණ්ඩ කැපවීමක් සහ ජීවන මාර්ගයක්.” අනුගාමිකත්වය කියන්නේ ස්වාමීන්වහන්සේගේ වන්දිගෙවිමේ පරිත්‍යාගය සහ උන්වහන්සේගේ පැවරීමේ බලය තුළින් පරිවර්තනය වීමට අප ඕනෑකමින් යා යුතු ගමනක්. අනුගාමිකත්වයේ සැබෑ ගමනාන්තය වචනාර්ථයෙන්ම අපට උන්වහන්සේගේ “ස්වරූපය [අපගේ] මුහුණේ” ලැබෙන තැන දක්වා පවා යේසුස් ක්‍රිස්තුස්වහන්සේ වගේ වෙන එකයි.

ස්වාමීන්වහන්සේගේ ගෝලයන් වෙන්න නම්, අපි හැමදාම උන්වහන්සේගේ සිතුවිලි සහ ක්‍රියාවන් ඕනෑකමින් අනුකරණය කළ යුතු වෙනවා—උදාහරණ ලෙස, උන්වහන්සේගේ කීකරුකම, නිහතමානිකම සහ ඉවසීම. අපි ක්‍රමයෙන් මෙම ගුණාංග අපගේම අනන්‍යතාවන්ට ඇතුළත් කරගන්න කොට, අපි “[උන්වහන්සේගේ] දේව ස්වභාවට පංගුකාරයන්” බවට පත්වෙනවා. ගැලවුම්කරුවාණන්ගේ චරිතයේ මෙම අනුකරණය උන්වහන්සේට වන්දනාමාන කිරීමේ හදවතයි. සභාපති නෙල්සන් ඉගැන්වූ පරිදි, “යේසුස්වහන්සේ කෙරෙහි අපගේ නමස්කාරය වඩාත් හොඳින් ප්‍රකාශ වන්නේ අපි යේසුස්වහන්සේව අනුකරණය කිරීමෙනුයි.”

අප අනුකරණය කළ යුතු යේසුස් ක්‍රිස්තුස්වහන්සේගේ බොහෝ දිව්‍යමය ගුණාංග අතුරින්, එකක් ප්‍රමුඛ වන අතර එයට අනෙක් සියල්ල ඇතුළත් වෙනවා. ඒ ගුණාංගය තමයි උන්වහන්සේගේ නිර්මල ප්‍රේමය නැත්නම් පිවිතුරු ප්‍රේමය. පිවිතුරු ප්‍රේමය නොමැති නම් “[අපි] නිෂ්ඵල” බව අනාගතවක්තෘ මොර්මොන් සහ ප්‍රේරිතවර පාවුල් යන දෙදෙනාම අපට මතක් කර දෙනවා. නැතහොත්, අනාගතවක්තෘ ජෝසෆ් ස්මිත්ට හෙළි කළ පරිදි, “පිවිතුරු ප්‍රේමය නොමැතිව, [අපට] කිසිවක් කළ නොහැකියි.”

ගැලවුම්කරුවාණන් මෙසේ ප්‍රකාශ කළ විට ප්‍රේමය උන්වහන්සේගේ සැබෑ ගෝලයන් හඳුනා ගන්නා සංකේතයක් හෝ සලකුණක් ලෙස උන්වහන්සේ විසින්ම හැඳින්වූවා:

“මා ඔබ සැමට ප්‍රේම කළාක්මෙන් ඔබ සැමත් එකිනෙකාට ප්‍රේමකරන ලෙස, එකිනෙකාට ප්‍රේම කරන්නය කියා අලුත් ආඥාවක් මම ඔබ සැමට දෙමි.

“ඔබ සැම එකිනෙකාට ප්‍රේම කරනවා නම්, ඔබ සැම මාගේ ගෝලයෝ බව එයින් සියල්ලන් දැනගන්නවා ඇත.”

පිවිතුරු ප්‍රේමය කියන්නේ අර්ථ දැක්වීමට අපහසු විය හැකි නමුත් එයින් ස්පර්ශ වන සියල්ලන්ටම පහසුවෙන් වටහා ගත හැකි අනර්ඝ සංකල්පයක්. “ඇදහිල්ල මෙන්ම පිවිතුරු ප්‍රේමයත් ක්‍රියාවට මඟ පාදයි” යනුවෙන් මාගේ ශුභාරංචිය දේශනා කරන්න උගන්වනවා. ඇත්ත වශයෙන්ම, පිවිතුරු ප්‍රේමය “ක්‍රියාවට නැංවෙන ප්‍රේමය” ලෙස විස්තර කරන්න පුළුවන්. මෙම විස්තරය ගැලවුම්කරුවාණන්ගේ ජීවිතයේ සාරාංශ ප්‍රකාශය පිළිබඳ විශිෂ්ට අවබෝධයක් සපයනවා—උන්වහන්සේ “යහපත්කම් කරමින් හැසුරුණා.”

යේසුස් ක්‍රිස්තුස්වහන්සේගේ අනුගාමිකයින් වශයෙන්, අපගේ ස්වාමියා අන් අය කෙරෙහි තම නිර්මල ප්‍රේමය පෙන්වූ ආකාරය අනුකරණය කිරීමට අප උත්සාහ කළ යුතු වෙනවා. ගැලවුම්කරුවාණන් බොහෝ ආකාරවලින් මේ පිවිතුරු ප්‍රේමය විද්‍යමාන කළත්, උන්වහන්සේගේ සැබෑ ගෝලයන් තුළ පහසුවෙන් දැකිය හැකි උන්වහන්සේගේ පිවිතුරු ප්‍රේමයේ විශේෂිත රටා තුනක් කෙරෙහි අවධානය යොමු කිරීමට මම කැමතියි.

මුලින්ම, ගැලවුම්කරුවාණන් දයානුම්කම්පිත වීමෙන් පිවිතුරු ප්‍රේමය පෙන්වූවා. මොර්මොන්ගේ පොතේ වාර්තා කර ඇති පරිදි නීෆායිවරුන් අතර උන්වහන්සේගේ දේවසේවය අතරතුර, ස්වාමීන්වහන්සේ ජනතාවට නිවසට ආපසු ගොස් උන්වහන්සේ ඉගැන්වූ දේවල් ගැන මෙනෙහි කර පසුදා උන්වහන්සේගේ නැවත පැමිණීමට සූදානම් වන ලෙස ආරාධනා කළා. ඉන්පසු වාර්තාවේ මෙසේ සඳහන් වෙනවා:

“තවද ඔවුන් කඳුලු හෙලනු දුටු සේක, ඔවුන් සමඟ ටික වෙලාවක් උන්වහන්සේට නවතින ලෙස ඇසීමට මෙන් ඔවුහු උන්වහන්සේ දෙස ස්ථිරව බලා සිටියහ.”

තවද උන්වහන්සේ ඔවුන් හට කී සේක: “බලව මාගේ අභ්‍යන්තරය නුඹලා දෙසට අනුකම්පාවෙන් පිරී ඇත්තේය.”

දයානුකම්පාව කියන්නේ දුක් වේදනා සමනය කිරීමට උත්සාහ කරන පිවිතුරු ප්‍රේමයේ කොටසක්. දයානුම්කම්පාවෙන් පිරුණු ස්වාමීන්වහන්සේ, ජනතාව අතර සිටි රෝගීන් සහ පීඩිතයන් සුවපත් කළා. පසුව, දේවදූතයන් ස්වර්ගයෙන් බැස ඔවුන් වට කරගෙන සිටියදී, උන්වහන්සේ ඔවුන්ගේ දරුවන්ට ආශීර්වාද කළා. උන්වහන්සේ මෙම මෘදු, ප්‍රේමණීය ක්‍රියා සහ තවත් බොහෝ දේ සිදු කළේ උන්වහන්සේ “දයානුකම්පාව සමඟ ” ­සිටින නිසයි.

මම දකුණු ඇමරිකාවේ තරුණ ධර්මදූතවරයෙකු ලෙස සේවය කරන කාලයේදී, දයාබර මිතුරෙකුගේ දයානුකම්පාවෙන් උපකාර ලැබුවා. එක් සැන්දෑවක මම මගේ සහයකයා සමඟ අපේ ධර්මදූත සභාපතිවරයාගේ නිවසට යන අතරතුර, බයිසිකලයකින් පැමිණි තරුණයෙක් හදිසියේම වාහනය ඉදිරිපිටට හැරුණා. මට ඒ ගැටීම වළක්වා ගන්න බැරි තරම් ගොඩක් ඉක්මනට ඒක සිද්ධ වුණා. ඛේදජනක ලෙස, මෙම තරුණයා එම හැප්පීමෙන් මිය ගියා. ඔහුගේ ජීවිතය අහිමි වීම ගැන මම ගොඩක් කම්පාවට පත් වුණා. සිදු වූ දෙයෙහි භයානක යථාර්ථය මා මතට ​​කඩා වැටෙද්දී භීතියට හා කම්පනයට පත් වූ මාව සිරගෙට ගෙන ගොස් සිර කරනු ලැබුවා. ඒතරම් බියක් සහ තනිකමක් මට කවදාවත් දැනිලා නැහැ. මගේ ජීවිත කාලය පුරාම මාව සිරගත කරයි කියලා මම බලාපොරොත්තුවක් නැතිව හා බියෙන් පිරී හිටියා.

සෙසු ධර්මදූතවරයෙකු වූ වැඩිහිටි බ්‍රයන් කෝචෙවර් අනතුර ගැන දැනගත් අතර දයානුකම්පාවෙන් යුතුව සලිත වුණා. ඔහු බන්ධනාගාරයට පැමිණ මා තනි නොවන පරිදි මා සමඟ සිර මැදිරියේ රැඳී සිටීමට අවසර දෙන්න කියලා නිලධාරීන්ගෙන් ඉල්ලා සිටියා. ආශ්චර්යමත් ලෙස, ඔවුන් එකඟ වුණා. මගේ ජීවිතයේ ලොකුම දුක්ඛිත මොහොතේ මට සන්සුන් බවක්, සහනයයක් සහ අස්වැසුමක් ලබා දුන් මෙම ගෝලයාගේ ක්‍රිස්තුස්වහන්සේ වැනි ප්‍රේමයේ ක්‍රියාව ගැන අද දක්වාම මට ගැඹුරු කෘතඥතාවක් දැනෙනවා. ඔහුගේ පිවිතුරු ප්‍රේමයේ දයානුකම්පාව ඔහුගේ අනුගාමිකත්වයේ කැපී පෙනෙන සලකුණක් වුණා. සභාපති නෙල්සන් නිරීක්ෂණය කළ ආකාරයට, “යේසුස් ක්‍රිස්තුස්වහන්සේගේ සැබෑ අනුගාමිකයෙකු හඳුනා ගැනීමට ඇති පහසුම ක්‍රමයක් තමයි, එම පුද්ගලයා අනෙක් මිනිසුන්ට කෙතරම් දයානුකම්පිතව සලකනවාද කියා බැලීම.”

ගැලවුම්කරුවාණන් උන්වහන්සේගේ ප්‍රේමය පෙන්නුම් කරන ආකාරය පිළිබඳ තවත් උදාහරණයක් තමා, අන් අයගේ නොකියන අවශ්‍යතා හඳුනා ගැනීම සහ දේවසේවය කිරීම. අවුරුදු 38ක් තිස්සේ කිසිවෙකු උදව්වක් නොමැතිව කොරව සිටි මිනිසාට, ස්වාමින්වහන්සේ ඔහුව සුවපත් කර ධර්මිෂ්ඨව ජීවත් වීමට දිරිගැන්වූවා. කාමමිථ්‍යාචාරයේ යෙදී සිටියදී අල්ලාගත් කාන්තාවව, උන්වහන්සේ හෙළා දකින්නේ නැතිව බලාපොරොත්තුව සහ සැනසීම ලබා දුන්නා. වහලෙන් බිමට බාපු අංශභාග රෝගයෙන් පෙළෙන මිනිසාට, ස්වාමීන්වහන්සේ ශරීරය සුවපත් කෙරුවා විතරක් නෙමේ, ඔහුගේ පව්වලටත් සමාව ලබා දුන්නා.

මට සභානායකවරයෙකු ලෙස සේවය කිරීමට කැඳවීමක් ලැබුණු විට, අපේ කුඩා දරුවන් හය දෙනා මගේ බිරිඳ ක්‍රිස්ටින්ට සක්‍රමේන්තු රැස්වීම් අභියෝගාත්මක කළා, මම වේදිකාවේ වාඩි වී සිටියදී ඇයට ඔවුන්ව තනිවම හසුරුවන්නට සිදු වුණා. ඔබට සිතාගන්න පුළුවන් ආකාරයට, ගොඩක් වෙලාවට අපේ දරුවන්ගේ භක්තිමත් බවක් තිබුණේ නැහැ. ඇගේ තත්වය දැක්ක අපේ කොට්ඨාශයේ සාමාජිකයන් දෙදෙනෙකු වන ජෝන් සහ ඩෙබී බෙනිච් සෑම ඉරිදාවකම ඇය සමඟ වාඩි වී ඇයට උදව් කිරීමට පටන් ගත්තා. ඔවුන්ගේ කරුණාව වසර ගණනාවක් පුරා පැවතුන අතර, ඔවුන් අපේ පවුලට ආදේශක ආච්චිලා සීයලා බවට පත් වුණා. ස්වාමීන්වහන්සේ වගේම, මෙම ගෝලයන් අප්‍රකාශිත අවශ්‍යතාවය දැක ඇති අතර ප්‍රේමයෙන් ක්‍රියා කළා—එය ඔවුන්ගේ අනුගාමිකත්වයේ කැපී පෙනෙන සලකුණක්.

අවසාන වශයෙන්, ගැලවුම්කරුවාණන්ගේ පරිපූර්ණ ප්‍රේමය අවධානය යොමු කර ඇත්තේ දෙවියන්වහන්සේගේ සියලුම දරුවන්ට අපගේ දිව්‍යමය හැකියාවන් පැවරීමේ හැකියාව ලබා දීම කෙරෙහි වන අතර එමඟින් අපට “උන්වහන්සේගේ ගැලවීමේ සහභාගිකමට සහ උන්වහන්සේගේ මිදීමේ බලය වෙතට පැමිණෙන්නට හැකි” වෙනවා. අපි අපේ ස්වාමියාණන් වගේ වෙන තරමට, ගිවිසුම් මාර්ගයේ අපේ සහෝදර සහෝදරියන්ට උපකාර කිරීමට ඇති අපේ ආශාව ස්වභාවිකවම වැඩි වෙනවා.

උදාහරණයක් වශයෙන්, අමනාප වූ හෝ අමතක වූ බවක් දැනෙන අයව නඟා සිටුවීමට සහ මිතුරු වීමට, අපගේ සභාවට අලුතින් පැමිණෙන අයට පිළිගැනීම දැනෙන්නට උපකාර කිරීමට හෝ සක්‍රමේන්තු රැස්වීමේදී අප සමඟ වන්දනාමාන කිරීමට මිතුරන්ට ආරාධනා කිරීමට අපිට පුළුවන්—සමහර විට මෙම එළඹෙන පාස්කුවේ අපිට එහෙම කරන්න පුළුවන්. යේසුස් ක්‍රිස්තුස්වහන්සේට ඔවුන්ව පෙනෙන සහ ඔවුන්ව දැනෙන ආකාරයෙන් ඔවුන්ව දැකීමට ඇස් සහ දැනීමට හදවතක් ලබා ගැනීමට අපි ඕනෑකමින් සහ යාච්ඤා පූර්වකව ස්වර්ගයේ උපකාරය පතනවා නම්, අන් අයගේ දියුණුව සඳහා දිරිගැන්වීමට සහ උපකාර කිරීමට ගණන් කළ නොහැකි තරම් ක්‍රම තියෙනවා.

අන් අයට ඔවුන්ගේ ගිවිසුම් මාර්ගයේ උපකාර කිරීම සේවාවක් ලබාදීමේ ක්‍රියාවක ස්වරූපයක් ගන්න පුළුවන්. උදාහරණයක් ලෙස, මම පිලිපීනයේ මගේ වත්මන් පැවරුම අතරතුර, අගමාටා පවුල ගැන දැනගත්තා. ඔවුන් 2023 දී බව්තීස්ම වූ අතර, පසුව ඔවුන් ඉතා උනන්දුවෙන් අසල පිහිටි ඔර්ඩනෙට්ටා පිලිපීන දේවමාළිගාවේ පවුලක් ලෙස මුද්‍රා වීමට දිනයක් නියම කර ගත්තා. කෙසේ වෙතත්, පවුලේ හමුවට ටික කාලෙකට කළින්, එම පළාතට සුළි කුණාටු කිහිපයක් බලපෑවා. සහල් ගොවියෙකු වූ සහෝදර අගමාටාට දරුණු කුණාටු අතරතුර තම බෝග වගා කිරීමට නොහැකි වුණා. අවසානයේ කුණාටුව පහව ගිය විට, වගා කිරීමට සුදුසුම තත්වය වන බිම ජලයෙන් තෙත්ව තියෙද්දී වී ඉක්මනින් සිටුවීමට ඔහුට අවශ්‍ය වුණා. කණගාටුවට කරුණක් නම්, දේවමාළිගාවේ ගමන කල් දැමීමට සිදුවුණා.

ගෝලයන් දෙදෙනෙකු වන වැඩිහිටි කයිලන් සහ එම සහෝදරිය සහ තරුණ සේවා ධර්මදූතයන් තිදෙනෙකු අගමාටා පවුලේ අරගලය ගැන අසා ගොවිතැන් කිරීමේ අත්දැකීම් නොතිබුණද ඔවුන්ට උදව් කිරීමට ඉදිරිපත් වුණා. අගමාටා පවුලට ඔවුන්ගේ කාර්යය සම්පූර්ණ කිරීමට සහ නියමිත පරිදි ඔවුන්ගේ දේවමාළිගා මුද්‍රා තැබීමට සහභාගී වීමට ඉඩ සලසමින් දැඩි හිරු එළිය යටතේ වැඩ කරමින්, ඔවුන් බීජ පැල සිටුවීමට උදව් කළා. “[අගමාටා පවුල] ස්වාමීන්වහන්සේගේ ගෘහයේ සුදු පැහැයෙන් සැරසී සිටිනු දුටු විට ඔවුන්ගේ මුහුණු දිලිසුණ බව වැඩිහිටි කයිලන් නිරීක්ෂණය කළා. කෙනෙක්ට සේවය කිරීමෙන් අපිට දැනුණු සතුට අසමසමයි!”

ඔවුන්ගේ අනුගාමිකත්වයේ ලකුණක් වන දයාවෙන් පිරී සිටි සෙසු ගෝලයන් කිහිප දෙනෙකු—ඔවුන්ගේ සහෝදර සහෝදරියන්ට ඔවුන්ගේ ගිවිසුම් මාර්ගය ඔස්සේ ඉදිරියට යාමට උපකාර කිරීමට අධිෂ්ඨාන කර ගත් නිසා, අගමාටා පවුල දැන් සදාකාලික පවුලක් ලෙස මුද්‍රා වීමේ අනර්ඝ ආශිර්වාද භුක්ති විඳිනවා.

සහෝදර සහෝදරියනි, යේසුස් ක්‍රිස්තුස්වහන්සේගේ ගෝලයෙකු වීම, කල්පවත්නා සතුට ලබා ගැනීමට ඇති එකම මාර්ගයයි. එය අන් අය කෙරෙහි ඕනෑකමින් සහ අරමුණු සහිත ප්‍රේමණීය ක්‍රියාවන්ගෙන් පිරුණු මාර්ගයක්. අනුගාමිකත්වයේ මාවත දුෂ්කර හා අභියෝගාත්මක විය හැකි අතර, සමහර අවස්ථාවලදී අපි අරගල කර අසමත් විය හැකි වුවද, දෙවියන්වහන්සේ අප ගැන සැලකිලිමත් වන බවත්, අප උත්සාහ කරන සෑම අවස්ථාවකම අපට උපකාර කිරීමට ආශාවෙනුත් සිටින නිසා අපට සැනසීමක් ලබා ගන්න පුළුවන්. යෙසායා අපට මෙහෙම මතක් කර දෙනවා “දෙවියන්වහන්සේ [අපගේ] අත අල්ලාගෙන මෙසේ කියයි, … “භය නොවෙන්න, මම නුඹට පිහිටවන්නෙමි.”

අපගේ ස්වර්ගික පියාණන්වහන්සේගේ මෙම සහතිකය මනසේ තබාගෙන, අපගේ අනුගාමිකත්වයට ප්‍රමුඛත්වය දීමට සභාපති නෙල්සන්ගේ ආරාධනය අප අනුගමනය කරන පිණිස මම අවංකවම යාච්ඤා කරනවා. අපි “මේ ප්‍රේමය සමඟ පූර්ණ වන පිණිසය, එය උන්වහන්සේ; යේසුස් ක්‍රිස්තුස්වහන්සේ වූ, උන්වහන්සේගේ පුත්‍රයාණන්ගේ සැබෑ අනුගාමිකයින් මත ප්‍රදානය කර ඇති සේක” “හදවතේ සියලු ශක්තිය සමඟ පියාණන්වහන්සේට යාච්ඤා කරන්න; … ඒ උන්වහන්සේ පෙනී සිටින විට අපි උන්වහන්සේ මෙන් වීම පිණිසය,” මොකද අපි සැබෑ අනුගාමිකත්වයේ සලකුණක් රැගෙන යන නිසායි, ඒ තමයි “පිවිතුරු ප්‍රේමය … ක්‍රිස්තුස්වහන්සේගේ පවිත්‍ර ආදරය.”

යේසුස් ක්‍රිස්තුස්වහන්සේ අපගේ ජීවමාන, මහිමාන්විත ගැලවුම්කරුවාණන්, මිදුම්කරුවාණන්, ආදර්ශමත් සහ මිතුරා බව මම සාක්ෂි දරනවා. යේසුස් ක්‍රිස්තුස්වහන්සේගේ නාමයෙන්, ආමෙන්.