இயேசு கிறிஸ்துவின் கோட்பாடு எளிமையானது.

நம் அனைவருக்கும் நாம் நேசிக்கும் குடும்ப உறுப்பினர்கள் உண்டு, அவர்கள் தேவனின் பிள்ளைகள் அனைவரையும் துன்புறுத்தும் சங்காரக்காரனாகிய, சாத்தானின் தொடர்ச்சியான சக்திகளால் பரீட்சிக்கப்பட்டு சோதிக்கப்படுகிறார்கள். நம்மில் பலருக்கு தூக்கமில்லாத இரவுகள் இருந்திருக்கின்றன. ஆபத்தில் இருக்கும் மக்களை நன்மைக்காக ஒவ்வொரு சக்தியுடனும் சுற்றி வளைக்க முயற்சித்தோம். அவர்களுக்காக நாம் ஜெபித்தோம். அவர்களை நாம் நேசித்தோம். நம்மால் முடிந்த சிறந்த முன்னுதாரணத்தை நாம் ஏற்படுத்தினோம்.

பூர்வ காலங்களிலிருந்த ஞானமுள்ள தீர்க்கதரிசியான ஆல்மாவும், இதேபோன்ற சோதனைகளை எதிர்கொண்டான். அவன் வழிநடத்திய மற்றும் நேசித்த மக்கள் அடிக்கடி ஒரு மூர்க்கமான எதிரியின் தாக்குதலுக்கு ஆளானார்கள், இருப்பினும் அவர்கள் துன்மார்க்கமான உலகில் நீதியுள்ள பிள்ளைகளை வளர்க்க இன்னும் முயற்சி செய்து கொண்டிருந்தனர். நாம் சில சமயங்களில் குறைத்து மதிப்பிட்டும் பெரும்பாலும் மிகக் குறைவாகப் பயன்படுத்தும் ஒரு சக்தியை ஆல்மா தனது வெற்றியின் ஒரே நம்பிக்கையாக உணர்ந்தான். அவன் தேவனின் உதவிக்காக மன்றாடினான்.

தேவன் உதவுவதற்கு, அவன் வழிநடத்தியவர்களும், அவனுடைய எதிரிகளும் மனந்திரும்ப வேண்டியிருந்தது என்பதை ஆல்மா அறிந்திருந்தான். இதனால், அவன் போருக்கு வேறுபட்ட அணுகுமுறையைத் தேர்ந்தெடுத்தான்.

மார்மன் புஸ்தகம் அதை இவ்விதமாக விவரிக்கிறது: “இப்போதும், நியாயமானதைச் செய்யும்படி, ஜனங்களை வழிநடத்துகிற மகத்தான தன்மை, வார்த்தையை பிரசங்கிப்பதில் இருந்தாலும், ஆம், பட்டயம் அல்லது ஜனங்களுக்கு ஏற்பட்ட யாதொன்றைக் காட்டிலும், அது ஜனங்களின் மனதில் ஒரு வல்லமையான தாக்கத்தை உண்டாக்குவதினாலும், தேவ வார்த்தையின் நன்மையை அவர்கள் பரீட்சிக்க வேண்டியது அவசியமென ஆல்மா நினைத்தான்.”

இயேசு கிறிஸ்துவாலும் அவருடைய தீர்க்கதரிசிகளாலும் போதிக்கப்பட்ட தேவ வார்த்தையே கோட்பாடாகும். கோட்பாட்டின் வார்த்தைகளுக்கு மிகுந்த வல்லமை இருப்பதை ஆல்மா அறிந்திருந்தான்.

கோட்பாடும் உடன்படிக்கைகளும் 18வது பாகத்தில், கர்த்தர் தமது கோட்பாட்டின் அஸ்திபாரத்தை வெளிப்படுத்தினார்:

“இதோ, எல்லா இடங்களிலுமுள்ள மனுஷர்கள் யாவரும் மனந்திரும்ப நான் கட்டளையிடுகிறேன். …

“ஏனெனில், இதோ, உனது மீட்பரான கர்த்தர் மாம்சத்திலே பாடுபட்டு மரணமடைந்தார்; ஆகவே, சகல மனுஷரும் மனந்திரும்பி அவரிடத்தில் வரும்படிக்கு, அவர் சகல மனுஷர்களின் வேதனையை அனுபவித்தார்.

“மனந்திரும்புதலின் நிபந்தனைகளின்படி சகல மனுஷரும் அவரிடத்தில் வரும்படியாக அவர் மரித்தோரிலிருந்து மீண்டும் உயிர்த்தெழுந்தார்.”

“நீ கீழே விழுந்து எனது நாமத்தில் பிதாவை பணிந்துகொள்வாய்.

“… நீங்கள் மனந்திரும்பி இயேசு கிறிஸ்துவின் நாமத்தில் ஞானஸ்நானம்பெற வேண்டும்.”

விசுவாசத்தில் நீங்கள் பெற்றுக்கொள்வீர்களென்று நம்பி, எனது நாமத்தினால் பிதாவினிடத்தில் கேளுங்கள், அப்போது பரிசுத்த ஆவியை நீங்கள் பெறுவீர்கள்.”

இப்பொழுது, இதை நீங்கள் பெற்றபின்பு, நீங்கள் சகல காரியங்களிலும் எனது கட்டளைகளைக் கைக்கொள்ளவேண்டும்.”

“கிறிஸ்துவின் நாமத்தை உங்கள்மேல் தரித்துக்கொண்டு, தெளிந்த புத்தியோடு சத்தியத்தைப் பேசுங்கள்.

“எவ்வளவு பேர் மனந்திரும்பி இயேசு கிறிஸ்துவாகிய எனது நாமத்தில் ஞானஸ்நானம் பெற்று, முடிவுபரியந்தம் நிலைத்திருக்கிறார்களோ, அவர்களே இரட்சிக்கப்படுவார்கள்.

அந்த சில பத்திகளில், இரட்சகர் அவருடைய கோட்பாட்டை நாம் எவ்வாறு போதிக்க வேண்டும் என்பதற்கான சரியான உதாரணத்தை நமக்குத் தருகிறார். கர்த்தராகிய இயேசு கிறிஸ்துவில் விசுவாசம், மனந்திரும்புதல், ஞானஸ்நானம், பரிசுத்த ஆவியானவரின் வரத்தைப் பெறுதல், முடிவுபரியந்தம் நிலைத்திருத்தல் தேவனுடைய பிள்ளைகள் அனைவரையும் ஆசீர்வதிக்கிறது என்பதே இந்த கோட்பாடு.

நாம் நேசிக்கிறவர்களுக்கு இந்த கொள்கைகளை நாம் போதிக்கும்போது, சத்தியத்தை அறிய பரிசுத்த ஆவியானவர் நமக்கு உதவுவார். பரிசுத்த ஆவியானவரின் தூண்டுதல்கள் நமக்குத் தேவைப்படுவதால், உண்மையான கோட்பாட்டைப் போதிப்பதற்கு அப்பாற்பட்ட ஊகங்கள் அல்லது தனிப்பட்ட விளக்கங்களை நாம் தவிர்க்க வேண்டும்.

நீங்கள் செல்வாக்கு செலுத்த முயற்சிக்கும் நபரை நீங்கள் நேசிக்கும்போது அதைச் செய்வது கடினம். போதிக்கப்பட்ட கோட்பாட்டை அவன் அல்லது அவள் புறக்கணித்திருக்கலாம். புதிய அல்லது பரபரப்பான ஒன்றை முயற்சிக்க இது தூண்டுகிறது. ஆனால் உண்மையான கோட்பாட்டை போதிப்பதிலிருந்து அப்பால் செல்லாமல் நாம் எச்சரிக்கையாகவும் கவனமாகவும் இருக்கும்போது மட்டுமே பரிசுத்த ஆவியானவர் சத்திய ஆவியை வெளிப்படுத்துவார். தவறான கோட்பாட்டிற்கு அருகில் செல்வதைத் தவிர்ப்பதற்கான உறுதியான வழிகளில் ஒன்று, நமது போதனையில் எளிமையாக இருப்பதைத் தேர்ந்தெடுப்பதாகும். அந்த எளிமையால் பாதுகாப்பு பெறப்படுகிறது, எதுவும் இழக்கப்படுவதில்லை.

பிள்ளைகள் கற்றுக்கொள்ள வேண்டிய சத்தியங்கள், சமூக ஊடகங்கள், சகாக்கள் மற்றும் அவர்களின் சொந்த தனிப்பட்ட போராட்டங்களின் சத்தத்தால் மூழ்கடிக்கப்படுவதற்கு நீண்ட காலத்திற்கு முன்பே, அவர்கள் எதிர்கொள்ள வேண்டிய ஏமாற்றுக்காரனின் சோதனைகளால் தீண்டப்படாமல் இருக்கும்போது, எளிமையாய் போதித்தல் இரட்சிக்கும் கோட்பாட்டை ஆரம்பத்திலேயே பகிர்ந்து கொள்ள நம்மை அனுமதிக்கிறது. இயேசு கிறிஸ்துவின் போதனைகளை பிள்ளைகளுடன் பகிர்ந்து கொள்ள ஒவ்வொரு வாய்ப்பையும் நாம் பயன்படுத்திக் கொள்ள வேண்டும். இந்த கற்பிக்கும் தருணங்கள் விலைமதிப்பற்றவை மற்றும் எதிர்க்கும் சக்திகளின் இடைவிடாத முயற்சிகளுடன் ஒப்பிடும்போது மிகவும் குறைவானவை. ஒரு பிள்ளையின் வாழ்க்கையில் கோட்பாட்டை விதைக்க செலவழிக்கும் ஒவ்வொரு மணிநேரத்திற்கும், அந்த இரட்சிப்பின் சத்தியங்களை சவால் செய்யும் அல்லது புறக்கணிக்கும் செய்திகள் மற்றும் படங்களால் நிரப்பப்பட்ட எண்ணற்ற மணிநேர எதிர்ப்பு உள்ளது.

வேடிக்கையாக இருப்பதன் மூலம் உங்கள் பிள்ளைகளை உங்களிடம் நெருக்கமாக இழுப்பது சிறந்ததா என்று உங்களில் சிலர் ஆச்சரியப்படலாம், அல்லது உங்கள் போதனைகளால் பிள்ளை சோர்வடையுமோ என்று நீங்கள் கேட்கலாம். அதற்குப் பதிலாக, “மிகக் குறைந்த நேரத்திலும், மிகக் குறைந்த வாய்ப்புகளிலும், அவர்களின் விசுவாசத்திற்கு தவிர்க்க முடியாத சவால்களுக்கு எதிராக அவர்களைப் பலப்படுத்தும் எந்த கோட்பாட்டு வார்த்தைகளை நான் பகிர்ந்து கொள்ள முடியும்?“ என்பதை நாம் சிந்திக்க வேண்டும். இன்றைய நாளில் நீங்கள் பகிர்ந்து கொள்ளும் வார்த்தைகள் அவர்கள் தங்களுடன் எடுத்துச் செல்பவைகளாக இருக்கலாம், இன்றைய நாள் விரைவில் கடந்தும் போகும்.

இயேசு கிறிஸ்துவின் கோட்பாட்டைப் பகிர்ந்து கொள்வதில் என் கொள்ளுப்பாட்டி மேரி பொம்மேலியின் பக்தியை நான் எப்போதும் பாராட்டுகிறேன். அவளுக்கு 24 வயதாக இருந்தபோது, சுவிட்சர்லாந்தில் அவளது குடும்பம் ஊழியக்காரர்களால் போதிக்கப்பட்டது.

ஞானஸ்நானம் பெற்ற பிறகு, மேரி அமெரிக்காவில் உள்ள பரிசுத்தவான்களுடன் சேர விரும்பினாள், எனவே அவள் சுவிட்சர்லாந்திலிருந்து பெர்லினுக்குச் சென்று, அங்கு குடும்பத்தினரின் ஆடைகளுக்கு துணி நெய்ய அவரை பணியமர்த்திய ஒரு பெண்ணிடம் வேலை செய்தார். மேரி ஒரு வேலைக்காரரின் அறையில் வசித்து வந்தார், வீட்டின் வரவேற்புப் பகுதியில் தனது தறியை அமைத்தார்

அந்த நேரத்தில், பிற்காலப் பரிசுத்தவான்களின் இயேசு கிறிஸ்து சபையின் கோட்பாட்டை போதிப்பது பெர்லினில் சட்டவிரோதமானது. ஆனால் மேரி தான் கற்றுக்கொண்ட விஷயங்களைப் பகிர்ந்து கொள்ளாமல் இருக்க முடியாது என்று கண்டாள். வீட்டுப் பெண்ணும் அவளுடைய தோழிகளும் மேரி போதிப்பதைக் கேட்க தறியைச் சுற்றி கூடுவார்கள். ஜோசப் ஸ்மித்துக்கு பரலோக பிதாவும் இயேசு கிறிஸ்துவும் தோன்றியதையும், தேவதூதர்களின் வருகையையும், மார்மன் புஸ்தகத்தையும் பற்றி அவள் பேசினாள். ஆல்மாவின் பதிவுகளை நினைவுகூர்ந்து, அவள் உயிர்த்தெழுதல் கோட்பாட்டைக் குறித்துப் போதித்தாள். குடும்பங்கள் சிலஸ்டியல் ராஜ்யத்தில் மீண்டும் ஒன்றிணைய முடியும் என்று அவள் சாட்சியமளித்தாள்.

மறுஸ்தாபிதம் செய்யப்பட்ட சுவிசேஷத்தின் கோட்பாட்டைப் பகிர்ந்து கொள்ளும் மேரியின் உற்சாகத்தினால் விரைவில் சிக்கல் ஏற்பட்டது. போலீசார் மேரியை சிறைக்கு அழைத்துச் செல்ல அதிக காலமாகிவிடவில்லை. போகும் வழியில், போலீஸ்காரரிடம் மறுநாள் காலையில் ஆஜராக வேண்டிய நீதிபதியின் பெயரைக் கேட்டாள். அவரது குடும்பத்தைப் பற்றியும், அவர் ஒரு நல்ல தந்தையாகவும் கணவராகவும் இருக்கிறாரா என்றும் அவள் கேட்டாள். போலீஸ்காரர் நீதிபதியை உலக அனுபவங்களைக் கற்றவர் என்று வர்ணித்தார்.

சிறையில், மேரி ஒரு பென்சில் மற்றும் சில காகிதங்களைக் கேட்டார். மார்மன் புஸ்தகத்தில் விவரிக்கப்பட்டுள்ளபடி இயேசு கிறிஸ்துவின் உயிர்த்தெழுதலுக்கு சாட்சியளித்து, ஆவி உலகத்தைப் பற்றி விவரித்து, மனந்திரும்புதலை விளக்கி, நீதிபதிக்கு ஒரு கடிதம் எழுதி அவள் இரவைக் கழித்தாள். இறுதித் தீர்ப்பை எதிர்கொள்வதற்கு முன்பு நீதிபதிக்கு தனது வாழ்க்கையைப் பற்றி சிந்திக்க நேரம் தேவை என்று அவர் பரிந்துரைத்தார். அவர் மனந்திரும்ப வேண்டியது நிறைய இருக்கிறது என்றும் அவை அவருடைய குடும்பத்தை ஆழ்ந்த வருத்தத்தில் ஆழ்த்தும், அவருக்கு மிகுந்த துயரத்தைக் கொண்டுவருமென்று தனக்குத் தெரியுமென்றும் அவள் எழுதினாள், . காலையில், அவள் கடிதத்தை எழுதி முடித்ததும், அதை போலீஸ்காரரிடம் கொடுத்து நீதிபதியிடம் கொடுக்கும்படி அவரைக் கேட்டாள். அவரும் ஒப்புக்கொண்டார்.

இதையடுத்து அந்த போலீஸ்காரரை நீதிபதி தனது அலுவலகத்துக்கு வரவழைத்தார். மேரி எழுதிய கடிதம், மறுஸ்தாபிதம் செய்யப்பட்ட சுவிசேஷத்தின் கோட்பாட்டை அவள் கற்பிக்கிறாள் என்பதற்கும், அவ்வாறு செய்வதன் மூலம், சட்டத்தை மீறுகிறாள் என்பதற்கும் மறுக்க முடியாத அத்தாட்சியாக இருந்தது. இருப்பினும், போலீஸ்காரர் மேரியின் அறைக்குத் திரும்புவதற்கு நீண்ட நேரம் ஆகவில்லை. எல்லா குற்றச்சாட்டுகளும் தள்ளுபடி செய்யப்பட்டதாகவும், அவள் சுதந்திரமாக செல்லலாம் என்றும் அவர் அவளிடம் கூறினார். இயேசு கிறிஸ்துவின் மறுஸ்தாபிதம் செய்யப்பட்ட சுவிசேஷத்தின் கோட்பாட்டை அவள் போதித்தது அவளை சிறையில் தள்ளியது. நீதிபதியிடம் மனந்திரும்புதலின் கோட்பாட்டை அவள் அறிவித்தது அவளை சிறையிலிருந்து வெளியேற்றியது.

மேரி பொம்மேலியின் போதனை அவளது விடுதலையுடன் முடிவடையவில்லை. அவளுடைய வார்த்தைகளின் பதிவு இன்னும் பிறக்காத தலைமுறைகளுக்கு உண்மையான கோட்பாட்டைக் கடத்தியது. புதிதாக மனமாறியவர் கூட இயேசு கிறிஸ்துவின் கோட்பாட்டை போதிக்க முடியும் என்ற அவரது நம்பிக்கை, அவரது சந்ததியினர் தங்கள் சொந்த போராட்டங்களில் பெலப்படுத்தப்படுவார்கள் என்பதை உறுதிப்படுத்தியது.

இயேசு கிறிஸ்துவின் கோட்பாட்டைக் குறித்து நாம் நேசிப்பவர்களுக்கு போதிக்க நம்மால் முடிந்த அனைத்தையும் செய்யும்போது, சிலர் இன்னும் பதிலளிக்காமல் இருக்கலாம். உங்கள் மனதில் சந்தேகங்கள் எழலாம். இரட்சகரின் கோட்பாட்டை திறம்பட போதிக்கும் அளவுக்கு எனக்குத் தெரியுமா என்று நீங்கள் கேள்வி எழுப்பலாம். நீங்கள் ஏற்கனவே அதை போதிக்க முயற்சிகளை மேற்கொண்டிருந்தால், நேர்மறையான விளைவுகள் ஏன் அதிகம் தெரியவில்லை என்று நீங்கள் ஆச்சரியப்படலாம் அந்த சந்தேகங்களுக்கு இடம் கொடுக்க வேண்டாம். உதவிக்காக தேவனிடம் திரும்புங்கள்.

“ஆம், உன் எல்லா ஆதரவிற்காகவும் தேவனிடத்தில் கூக்குரலிடு; … உன் இருதயத்தின் பற்றுதல் என்றென்றும் கர்த்தர் மீதே வைக்கப்படுவதாக.“

இப்பொழுதும், நீங்கள் தாழ்மையாயும், கீழ்ப்படிதலுள்ளவர்களாயும், மென்மையானவர்களாயும், போதிக்கப்படக்கூடியவர்களாயும், பூரண பொறுமையும், நீடிய சாந்தமும், சகலத்திலும் இச்சையடக்கமாயுமிருந்து, தேவ கட்டளைகளைக் கைக்கொள்வதில் சதாகாலங்களிலும் கருத்துள்ளவர்களாயும், தங்களுக்குத் தேவையாயிருக்கிற ஆவிக்குரியதும், இம்மைக்குரியதுமான சகல காரியங்களுக்கும் விண்ணப்பம் செய்து, நீங்கள் பெற்றுக்கொண்டவைகள் எதுவாகிலும், அதற்காய் எப்போதும் தேவனுக்கு நன்றியை ஏறெடுப்பவர்களாயும், இருக்கவேண்டுமென மனதாயிருக்கிறேன்.

நீங்கள் ஜெபித்தால், நீங்கள் தேவனிடம் பேசினால், உங்கள் அன்புக்குரியவருக்காக அவருடைய உதவிக்காக நீங்கள் மன்றாடினால், உதவிக்காக மட்டுமல்ல, நீங்கள் விரும்பும் அனைத்தையும் உடனடியாக அல்லது ஒருவேளை எப்போதுமே பெறாமாலிருந்தாலும் வரும் பொறுமைக்காகவும் சாந்தத்திற்காகவும் அவருக்கு நன்றி செலுத்தினால், நீங்கள் அவரிடம் நெருங்கி வருவீர்கள் என்று நான் உங்களுக்கு வாக்களிக்கிறேன். விடாமுயற்சியும், நீடிய பொறுமையும் உடையவராக மாறுவீர்கள். நீங்கள் நேசிப்பவர்களுக்கும், நீங்கள் ஜெபிப்பவர்களுக்கும், அவர்களை தடம் புரளச் செய்யும் சாத்தானின் முயற்சியை முறியடித்துச் செல்ல உதவ உங்களால் முடிந்த அனைத்தையும் செய்துள்ளீர்கள் என்பதை நீங்கள் அறிந்து கொள்ளலாம்.

கர்த்தருக்குக் காத்திருக்கிறவர்களோ புதுப்பெலன் அடைந்து, கழுகுகளைப்போலச் செட்டைகளை அடித்து எழும்புவார்கள், அவர்கள் ஓடினாலும் இளைப்படையார்கள், நடந்தாலும் சோர்ந்துபோகார்கள்”

குடும்பங்களைப் பற்றிய வேதப் பதிவேட்டில் நம்பிக்கையை நீங்கள் காணலாம். தங்களுக்குப் போதித்ததை விட்டு விலகியவர்கள் அல்லது மன்னிப்பிற்காக தேவனுடன் போராடியவர்களாகிய இளைய ஆல்மா, மோசியாவின் குமாரர்கள் மற்றும் ஏனோஸ் போன்றவர்களைப் பற்றி நாம் படிக்கிறோம். அவர்களின் நெருக்கடியான தருணங்களில், அவர்கள் தங்கள் பெற்றோரின் வார்த்தைகளை, இயேசு கிறிஸ்துவின் கோட்பாட்டின் வார்த்தைகளை நினைவுகூர்ந்தனர். நினைவுகூர்தல் அவர்களைக் காப்பாற்றியது. அந்தப் பரிசுத்த உபதேசத்தைப் பற்றிய உங்கள் போதனை நினைவுகூரப்படும்.

இயேசு கிறிஸ்துவின் எளிய கோட்பாட்டை பரலோக பிதாவின் பிள்ளைகளுக்கு போதிக்கும் பரிசுத்த பணியானது, நம்மை ஆவிக்குரிய சுத்திகரிப்படையவும், இறுதியில் தேவனின் பிரசன்னத்திற்குள் வரவேற்கப்படவும், அவருடனும் அவருடைய குமாரருடனும் குடும்பங்களாக என்றென்றும் மகிமையில் வாழவும் அனுமதிக்கிறது என்று நான் சாட்சி பகருகிறேன். இயேசு கிறிஸ்துவின், நாமத்தினாலே, ஆமென்.